muslim.uz

الجمعة, 29 نيسان/أبريل 2022 00:00

Самарқандда “Рамазон” номли имтиёзли туристик пакет эълон қилинди.

Рамазон ҳайити муносабати билан Самарқанд вилояти туризм ва маданий мерос бош бошқармаси ҳамда Касаба уюшмалари федерацияси вилоят бўлими ташаббуси билан вилоятдаги туристик фирмалар томонидан 25 апрелдан 5 майгача “Рамазон” номли имтиёзли туристик пакет эълон қилинди, деб хабар бермоқда ЎзА.

– Асосий мақсад Рамазон ҳайити муносабати билан эълон қилинган дам олиш кунларида юртдошларимиз ва хорижлик сайёҳларни Самарқандга кўпроқ жалб қилиш, уларнинг мароқли ҳордиқ чиқаришлари учун кенг имконият яратишдан иборат, – дейди Самарқанд вилояти ҳокими ўринбосари – туризм ва маданий мерос бош бошқармаси бошлиғи Рустам Қобилов.

– Мазкур лойиҳа доирасида Самарқанддаги муқаддас қадамжолар ва зиёратгоҳларга саёҳатлар уюштирилади ва мажмуларга киришда 20 фоизгача имтиёз берилади. Рўза кунларида ифторлик тадбирлари уюштирилади. Меҳмонхоналар, транспорт воситалари ва овқатланиш шохобчаларида ҳам имтиёзлар мавжуд. Бундан ташқари, бир қатор маданий дастурлар, кўнгилочар тадбирлар, маърфий суҳбатлар ўтказилади. Маҳаллий ва хорижлик сайёҳлар 1 май куни Самарқанд шаҳрида ўтказиладиган “Фавворалар сайли”да ҳамда Рамазон ҳайити тадбирларида иштирок этишлари учун имконият яратилади.

Ўзбекистон мусулмонлари идораси матбуот хизмати

Published in Ўзбекистон янгиликлари

الجمعة, 29 نيسان/أبريل 2022 00:00

Миссионерлик – миллат ва дин кушандаси

Ҳозирга ахборот алмашуви ривожланган, дунёнинг хоҳлаган жойидан туриб хоҳлаган кишига ахборот етказиш имкони бўлган бу даврда муқаддас динимизни туҳмат ва бўҳтонлардан ҳимоя қилиш, унинг асл моҳиятини ўниб-ўсиб келаётган ёш авлодимизга тўғри тушунтириш Ислом маданиятининг эзгу-ғояларини кенг тарғиб этиш вазифаси ҳамон долзарб бўлиб қолмоқда.

Бир неча диний экстремистик оқим ва йўналишлар фаолияти тобора кескинлашиб бораётган бир даврда муқаддас Ислом динимизга ва миллий маънавиятимиз ҳамда қадриятларимизга раҳна солишга уринаётган ноисломий йўналишлардан бири бу Миссионерлик йўналишидир.

Миссионерлик тўғрисида сўз очганда, аввал унинг келиб чикиши ва ривожланиши даврига тўхталиб ўтиш лозим бўлади.

“Миссионерлик” тушунчаси умумий маънода бирор динга эътиқод қилувчи халқлар ўртасида бошқа динни тарғиб қилиш маъносини англатади. Миссионерлик, асосан христианлик динига хосдир. Бундай ҳаракат христианлик дини қадимий Византия империясининг давлат дини сифатида эълон қилинган даврдан буён амалга оширилиб келмокда. Христиан руҳонийлари даставвал миссионерлик ҳаракатини Европа ва Яқин Шарқдаги кўпхудоликка эътиқод қилиб келган аҳолини яккахудоликка даъват қилиш байроғи остида олиб бордилар. Шу тариқа IVасрда пайдо бўлган христиан миссионерлиги XIII-XVI асрларда Ҳиндистон, Хитой, ва Японияга кириб борди.

Католик черковида эса миссионерлик Испания ва Португалия империялари ташкил топгач (XIII-XVIасрлар) да тараққий этди.

Миссионерлик ҳаракати Буюк Рим империясига янги ерларни ўзлаштиришга катта ёрдам берди. Католик миссионерлигига рахбарлик қилиш учун папа Григорий XV 1662 йилда “Диний тарғибот конгрегацияси” ни таъсис этди.

XIX асрга келиб эса миссионерлик янгидан фаоллашди.Ушбу ҳаракат вакиллари бўлган миссионерлар ўз фаолиятларини Африкада кенг тарзда ёйиб, ўз мамлакатларининг сиёсатини ўтказишга ёрдам бердилар.

Миссионерларнинг турли давлатлар, жумладан, Марказий Осиё минтақаси мамлакатларида олиб бораётган фаолияти христианликни тарғиб қилишда махсус адабиётлар, аудио ва видеокассеталарни маҳаллий тилларда тайёрлаш ва бепул тарқатиш масалаларига эътибор қаратадилар.

Юқоридаги каби мисолларни яна давом эттириш мумкин. Аммо шуларнинг ўзи ҳам миссионерлик ҳаракати турли дин вакиллари ўртасида ҳамда мусулмонлар орасида динлараро ва миллатлараро низоларни келтириб чиқаришга замин яратиш мумкин эканлигига далолат беради.

Хулоса қилиб айтганда бугунги кунда миссионерлик ҳаракати инсонлар орасида ҳамда баъзи-бир ёшларимиз нигоҳида диний мутаассибликнинг ўзига хос кўриниши сифатида намоён бўлмоқда десак асло муболаға бўлмайди.

Л.Олимов
Китоб туман бош имом хатиби

Published in МАҚОЛА

الخميس, 28 نيسان/أبريل 2022 00:00

Имом-хатибларимиз Орландодаги таровиҳда гўзал мавъизалар қилишди!

Хабар берганимиздек, юртимизнинг таниқли ва воиз имом-хатиблар АҚШнинг Флорида штати Орландо шаҳрида жойлашган “Ал-Бухорий Ислом маркази”да хатми Қуръон ва илмий суҳбатларда қатнашди.

Таровиҳ намози асносида Исҳоқжон домла Бегматов, Муҳаммад Айюб домла Ҳомидов, Абдулҳамид домла Жумановлар бугунги кундаги муҳим мавзуларда мавъизалар қилиб беришди.

Ушбу маърифий суҳбатлар Тошкент вақти билан 28 апрель соат 7:00 да онлайн эфирга узатилди.

Учрашув давомида имомларимизга Филофелфия, Нью-Йорк, Синсиннати ва Орландо ўзбек жамиятлари фаоллари ҳадялар улашди.

Мазкур ҳавола орқали хатми Қуръон ва илмий суҳбатларни онлайн кузатишингиз мумкин:

Эслатиб ўтамиз, Ўзбекистондан ташриф буюрган уламоларнинг АҚШдаги илмий учрашувлар 2 майга қадар давом этади.

Бизни кузатишда давом этинг.

Ўзбекистон мусулмонлари идораси Матбуот хизмати

Published in Ўзбекистон янгиликлари

الخميس, 28 نيسان/أبريل 2022 00:00

Термиздаги мадрасага 600 дан зиёд китоб олиб берилди

Юртбошимиз ташаббуси билан мамлакатимизда китобхонликни кенг ёйиш, ёшларнинг илм олиш, ўқиб-ўрганишга бўлган қизиқишини янада ошириш, уларнинг маънавияти ва дунёқарашини шакллантириш, одоб-ахлоқига эътибор қаратиш ва бунга муносиб шароит яратилмоқда.

Ўзбекистон мусулмонлари идораси раиси, муфтий Нуриддин домла Холиқназаров ташаббуси билан 2022 йил 20 апрел куни буюк аждодларимиз томонидан араб тилида битилган тафсир, ҳадис, фиқҳ ҳамда ақоидга оид мўътабар асарлар шарҳлари бўлган 273 турдаги 626 дона китобдан иборат “Маърифат карвони” Термизга етиб борди.

Мазкур муборак китоблар беғараз ҳадя сифатида Имом Термизий ўрта махсус ислом таълим муассасаси кутубхонасига топширилди.

Аллоҳ таоло мазкур китобларни толиби илмларга манфаатли қилсин.

Ўзбекистон мусулмонлари идораси Матбуот хизмати

Published in Ўзбекистон янгиликлари

الخميس, 28 نيسان/أبريل 2022 00:00

Фитр садақаси: Кимлар нима учун ва кимларга, қачон ва қанча миқдорда беради? (аудио)

Ўзбекистон мусулмонлари идораси Матбуот хизмати

Published in Аудио