muslim.uz
Экстремизм – мудҳиш иллат
Кейинги йилларда, афсуски, экстремизм чуқур илдиз отаётган мудҳиш иллат сифатида дунё ҳамжамиятини ташвишга солмоқда. Жаҳоннинг турли бурчакларида экстремистик ўчоқлар ва ташкилотлар пайдо бўлиб, мутаассиб аъзолари томонидан ақл бовар қилмас жиноятлар содир этилмоқда.
Экстремистларнинг асосий мақсади бирор-бир давлатда ижтимоий-сиёсий вазиятни издан чиқариб, амалдаги тузумни ўзгартириш, ҳокимиятни зўравонлик билан эгаллаш, миллий, ирқий, этник ва диний адоват қўзғатиш, маънавиятини емириш, моддий бойликларини талаш, қурол-яроғ ва наркотиклар савдосини кучайтиришдир.
“Экстремизм” тушунчаси Қуръони карим оятлари ва ҳадиси шарифларда қайта-қайта келган “ғулув”, “туғён”, “ҳаддан ошиш” каби сўзлар билан ҳамоҳанг бўлиб, динимиз таълимотида уларнинг барчаси қаттиқ қораланган. Масалан, Қуръони каримда Аллоҳ таоло бандаларини ғулувдан қайтариб, бундай огоҳлантиради: «Эй аҳли китоблар! (Исони илоҳийлаштириб) динингизда ҳаддан ошиб кетмангиз! Аллоҳ (шаъни)га эса фақат ҳақ (гап)ни айтингиз!..» (Нисо сураси, 171-оят). Бошқа ояти каримада: “Эй аҳли китоблар! Динингизда ҳаддан ошмангиз ва олдиндан адашган ва кўпларни адаштирган ҳамда тўғри йўлдан чалғиганларнинг ҳавойи нафсларига эргашмангиз!” (Моида сураси, 77-оят), деб амр қилинган.
Муқаддас динимизда яккаю ёлғиз Аллоҳ таолога ибодат қилишга буюрилиб, бирдамликка чақирилади. Динда ғулувга кетиш, ҳаддан ошиш ихтилофга, гуруҳбозликка, ақиданинг бузилишига олиб келади. Тарихда пайдо бўлган равофиз, хавориж, мўътазила ва бошқа тоифаларнинг юзага келиши, асосан, динда ғулувга кетишнинг оқибатидир. Ғулув машаққат бўлгани боис одамлар тўғри йўлдан озиб, диндан нафратланиб, безиб қоладилар. Охир-оқибат шариатда буюрилган амалларни бажаришдан қониқиш ҳосил қилмай, ўз-ўзига машаққат туғдирадиган янги бидъат амалларни ўйлаб топиши ва динни машаққатдан иборат қилиб кўрсатишга сабаб бўладилар. Бу эса Ислом динининг мўътадиллик ва енгилликка чақирувчи, машаққат ва қийинчиликларни бартараф этишга асосланган таълимотларига зиддир. Зеро, енгиллик бериш Исломнинг асосий шиорларидан биридир.
Имом Бухорий раҳматуллоҳи алайҳ ривоят қилган ҳадиси шарифда: “Осонлаштиринг, асло қийинлаштирманг. Башорат беринг, ҳеч ҳам нафратлантирманг”, дейилган.
Ислом дини фасодга қарши курашиб, ошкора ва ботиний фитналардан қайтарган. Аъроф сурасининг 56-оятида: «Ерни (Аллоҳ хайрли ишларга) яроқли қилиб қўйгандан кейин (унда) бузғунчилик қилмангиз!» деб амр этилган.
Муфассирлар ушбу оят тафсирида “арз”, яъни “ер” сўзи, араб қоидаларига кўра, алиф-лом билан келгани учун муайян бир жойга – Мадина шаҳрига далолат қилади, дейишади. Шунда оятнинг мазмуни: “Мадина шаҳри ислоҳ қилинганидан кейин у ерда фасод ишларни қилманг”, бўлади. Мадина – Ер юзидаги кичкина шаҳар. Мана шу жойда ҳам фасод қилмасликка буюриляпти. Модомики, кичик шаҳарда фасодга чек қўйилмас экан, худди учқун бутун бошли ўрмоннинг кулини кўкка совурганидек, фасод ишлар – экстремизм, терроризм ҳам Ер юзини вайрон қилади.
Ҳозирги кунда айрим давлатларда ғулувга кетган, қўли қонга ботган бир қанча экстремистик гуруҳлар фаолият олиб бораётгани сир эмас. Ғарб мамлакатларининг баъзи оммавий ахборот воситалари ушбу экстремистик гуруҳларнинг қўпорувчилик ҳаракатларини Ислом дини билан боғлашга уринмоқдалар. Ваҳоланки, Ислом дини экстремизмни, терроризмни қаттиқ қоралайди, лаънатлайди. Динимиз экстремизмга қарши курашни ўн беш аср олдин бошлаган. Исломнинг мўътадил дин экани унинг ҳар қандай экстремизмга, хунрезликка қаршилигининг яққол исботидир.
Турли экстремистик оқимлар таъсирига тушиб қолган кимсаларнинг гумроҳлиги шундаки, кўр кўрни қоронғида топибди деганидай, улар фақат ўзларига ўхшаш кишиларнинг гапларига ишонишади. Самимий насиҳат қилиб, тўғри йўлни кўрсатган олимлар у ёқда турсин, баъзан айримлари ота-онаси, акасини ҳам тан олмайди. Булар ҳақида Қуръони каримда: «Парвардигорининг оятлари билан насиҳат қилинганидан сўнг, улардан юз ўгирган кимсадан кўра ким ҳам золимроқдир?! Албатта, Биз (ундай) жиноятчилардан (дунё ва охиратда) интиқом олувчидирмиз» (Сажда сураси, 22-оят), деб марҳамат қилинган.
Шукрки, бағрикенг юртда яшаяпмиз. Мамлакатимизда шонли саналар, байрамлар муносабати билан адашиб турли экстремистик оқимлар таъсирига тушиб қолиб, озодликдан маҳрум этилган, айни пайтда қилмишига чин пушаймон бўлиб, бутунлай тузалиш йўлига ўтган фуқароларни афв этиш тўғрисида муҳтарам Президентимизнинг фармонлари эълон қилиняпти. Оиласи бағрига қайтаётган бундай фуқаролар билан кайвонилар, ҳожи оталар иштирокида суҳбатлар ўтказиб, уларга динимизнинг асл моҳиятини тушунтиришга ҳаракат қиляпмиз.
Ибн Аббос розияллоҳу анҳумо муаззам Каъба деворига суяниб бундай деганлар: “Эй Каъба! Аллоҳнинг наздида ҳурматинг баланд. Лекин агар сени етти марта бузиб вайрон қилганимда ҳам бир мусулмонга озор берганимчалик ёмон иш қилмаган бўлар эдим”.
Видолашув ҳажида Расулуллоҳ соллаллоҳу алайҳи ва саллам: “Албатта, қонингиз, молингиз ва обрўйингиз бир-биринизга худди бугунги кундай, шу шаҳардай ва шу ойдай ҳаромдир” (Имом Муслим ривояти), деб огоҳлантирганлар. .
Ибн Ҳажар Асқалоний ушбу ҳадис шарҳида: “Пайғамбар соллаллоҳу алайҳи ва саллам мусулмонларни қадри, улуғлиги, азизлиги, ҳурмати аён бўлган нарсалар: Қурбон ҳайити, Макка шаҳри ва муҳаррам ойи каби ўзаро молларини, жонларини ва обрўларни ҳурмат қилишга даъват қилдилар”, деб таъкидлайди. .
Имом Шотибий “Муваффақот” китобида ёзишича, барча самовий динлар каби Ислом ҳам беш нарсани – нафс, жон, мол, ақл ва наслу насабни ҳимоясига олган. Экстремист ва уларнинг ҳомийлари эса гуруҳлар шу нарсаларнинг ҳаммасига қарши уруш эълон қилиб, ақидани ҳам, иқтисодни ҳам, жамиятдаги ижтимоий муносабатларни, тинчлик-тотувлик, ҳамжиҳатликни ҳам бузиш пайида бўлади.
Хулоса қилиб айтганда, биз ёшларнинг онгу шуурини ҳар қандай зарарли мафкуралардан, ғоялардан ҳимоя қила олсак, одамларга бугунги тинч ва осуда ҳаётнинг қадрига етишни ўртага олсак, дунёнинг айрим минтақаларида кузатилаётган урушлар, қонли тўқнашувлар, вайронагарчиликлар, дин ниқоби остида содир этилаётган ваҳшиёна ҳаракатлардан огоҳ эта олсак, динимизни, юртимизни турли бузғунчи кучлар адоватидан сақлаган бўламиз. Зеро, зарарни даф этиш фойдани жалб қилишдан муқаддамдир.
Азизхўжа ИНОЯТОВ,
Бухоро вилоятидаги «Чор-Бакр» жоме масжиди имом-хатиби
Ашраф Али Таҳонавийнинг 3 насиҳати
Аллоҳ таоло инсон зотини яратиб унга ўзининг кўп неьматларини ато этган. Зотан бу неьматларнинг шукрини адо қилиш банданинг зиммасидаги абадий бурчи саналади. Шу билан бирга Аллоҳ таоло берган бу неьматлардан оқилона фойдаланиш ҳам унинг вазифасидир. Инсонга ато этилган неьматлар ичида катта бебаҳо неьмат борки, у орқали инсон муомалага киришади, ўз фикрини мустақил баён этади. Бе неьмат тил неьмати деб аталади. Бу аьзо шундай қувватга эгаки бир оғиздан чиқадиган бир сўз ёки ибора бир инсонни ёки бутун инсонлар жамоасини хурсанд этиши ёхуд уларнинг қалбини ларзага келтириши мумкин. Расулуллоҳ соллаллоҳу алайҳи васалламнинг: “Беҳуда ишларни тарк қилиш киши Исломининг гўзаллигидандир” деган муборак ҳадислари мусулмон киши ўзига манфаат бермайдиган хар қандай ёмон, ёмон ахлоқ ва амалларни тарк қилишига ишорадир. Мана шу сабабдан Пайғамбаримиз Муҳаммад мустафо соллаллоҳу алайҳи васалламдан ривоят қилинган ҳадисда: “Одам боласи тонг оттирганда, тана аьзоларининг ҳаммаси тилга танбеҳ бериб - “Бизнинг тўғримизда Аллоҳдан қўрқ! Биз (нима ахволга тушсак хам) сен сабабли (тушамиз). Агар тўғри бўлсанг, биз ҳам тўғри бўламиз. Агар эгри бўлсанг биз ҳам эгри бўламиз” дейишади” деганлар. Имом Кархий: “Инсон ўзига фойдасиз нарсани сўзлаши Аллоҳ томонидан хорланиши билан баробардир”, деганлар. Демак, тонг отгандан бошлаб турли ўзига манфаат бермайдиган нарсаларни сўзлаши инсоннинг ўзига зарар беришдан бошқа нарса эмас экан. Улуғ тобеьинлардан бўлган Ҳасан Басрий роҳматуллоҳи алайҳи: “Аллоҳ таоло бирор бандани фойдасиз ишда машғул қилиб қуйиши ундан юз ўгиришининг аломатидир”, деганлар. Бугун сўзлаётган ва бажараётган амалларимизга бир назар ташласак нимага эришаётган эканимизни биилиб олишимиз мумкин бўлади.
Ўтмишда ўтган улуғ алломалардан Имом Муновийнинг “Файзул қодир” номли китобида бундай келтирилади: “Ибн Арабий айтади: “Машойихларимиз ҳар доим кун давомида гапирган сўзлари ва қилган ишларини ҳисоб-китоб қилиш учун қайд қилиб борардилар. Хуфтон намозини адо қилгач, дафтарга қараб ўзларини ҳисоб-китоб қилар, агар истиғфорга ҳақли иш кўрсалар, истиғфор айтар, тавбага лойиқ бўлса, тавба этар, шукр талаб амалларда шукрона келтириб, сўнг ухлар эдилар”. Албатта ислом билан танилган улуғ машойихлар барча нарсада ибрат ва намуна эдилар. Бутун бир кунлари давомида қилган амалларини ёзиб бориш ва уни таҳлил қилиш орқали ўша айб ва нуқсонлардан ўзларини йироқ тутишган. Шу сабабдан ҳаётлари ва умрлари билан бир умр бизга ўрнак бўлганлар.
Инсон ҳаётига назар ташлар экан баьзида қалби қотганлиги, ибодати унга таьсир этмаётганидан нолийди. Ваҳоланки унинг қалбининг қотишлигининг катта сабаби бор. Бу ҳақда Молик ибн Динор айтади: “Агар қалбинг қотганлиги, баданинг заифлашгани ва ризқингда маҳрумликни кўрсанг, огоҳ бўлгинки, сен ўзингга фойда бермайдиган нарса тўғрисида гапиргансан”.
Юнус ибн Убайд айтади: “Киши ўзига манфаат келтирмайдиган бир сўзни тарк қилиши бир кун рўза тутишидан афзалдир.”
Имом Шофеъий айтади: “Ким Аллоҳ қалбини нурлантириб қуйишини хоҳласа, беҳуда гапларни тарк қилсин”.
Имом Шофеъий айтади: "Уч нарса ақлни ўткирлаштиради.
- Уламолар билан ўтириш;
- солиҳлар суҳбатида бўлиш;
- беҳуда гап-сўзлардан тийилиш".
Умматнинг ҳакими Ашраф Али Таҳонавий раҳматуллоҳи алайҳ Муҳаммад Шафиъ раҳматуллоҳи алайҳга бундай васият қилган: “Албатта фарз, вожибларни адо қилиш, суннат ва мустаҳабларга риоя этиш хос-авом мусулмонга бирдек лозимдир. Лекин сенга уч амалда бардавом бўлишингни васият қиламан:
- Аллоҳга тақво қилгин. Зеро, у намоз, рўза ва зоҳирий муомалот масалалари билан чегараланмаган. Балки ботиний амалларда ҳам тақво риоясини қилиш вожибдир. Шундай экан, тақво зоҳирий амалларда кўрингани каби ботинийларида ҳам руёбга чиқсин.
- Фойда келтирмайдиган нарсалардан четлан. У хоҳ амал, хоҳ калом бўлсин фарқи йўқ.
- Ҳар куни озгина бўлса-да, Қуръон тиловатида бардавом бўл. Бундан ташқари, “Субҳаналлоҳ”, “Алҳамдулиллаҳ”, “Лаа илаҳа иллаллоҳ”, “Астағфируллоҳ” каби зикрларни такрорлашда ва Набий соллаллоҳу алайҳи васалламга салавот йўллаш ҳамда намоздан сўнг айтиладиган тасбеҳларда бардавом бўлгин.
Шундай экан, юқоридаги ўгитларга амал қилиб, ўтаётган ҳар бир лаҳзамизни ғанимат билишимиз, бизга берилган тил неъматидан унумли фойдаланишимиз керак. Зеро, вақтимизни беҳуда гап-сўзларга совуриш ўрнига, илм-фан, касб-ҳунар, таълим-тарбия ва жамиятимиз фаровонлиги йўлида сарфласак, икки дунё саодатига эришамиз. Аллоҳ таоло бизларга ато қилган барча неъматларидан оқилона фойдаланишимизни насиб айласин.
Алишер ЖУМАЕВ,
Шаҳрисабз туман бош имом-хатиби
Бузғунчи тўда (аудио)
Зоҳиджон Сувонов
"Ҳазрати Султон Абулхайр" жоме масжиди имом-хатиби
Имом ал-Бухорий раҳматуллоҳи алайҳнинг ҳаётлари (7-қисм)
Энг афзал ибодат
Намоз жуда қийматли ибодатдир. Уни аввалги вақтида ўқинглар. Пайғамбаримиз соллаллоҳу алайҳи васалламдан: "Энг савобли ибодат қайси?" деб сўрабдилар. «Ас-салоту ли аввали вақтиҳо», яъни «Ўз вақтида ўқилган намоз», деб жавоб берибдилар.
Намоз аввалги вақтида ўқилганда жуда нурли бўлади. Ўртасида нури бироз камаяди. Охирги вақтига яқин ўқилса, янада камаяди. Энг охирги – тиқилинч пайтида ўқилса, сўниб қолаётган шамга ўхшайди. Яъни савоби жуда кам бўлади. Шунинг учун фарз намозини аввалги вақтида қиласиз! Фарз намозларидан бошқа фазилатли, савобли бўлган нофила намозларини ҳам ўқинглар. Нафл намозларини ўқисанглар Аллоҳнинг севгисини қозонасизлар.
«Бандам мажбурий бўлмаган шу ибодатларни ҳам ихлос билан қилаяпти», – деб Аллоҳ севади.
Шунинг учун машойихларимиз ҳадиси шарифларга асосланиб уларнинг баъзисини бизга тавсия қилганлар. Зотан, нафл намозлар ҳам халқнинг энг буюги, шарафлиси – Пайғамбаримиз соллаллоҳу тавсия қилган намозлардир.
- Бомдод намозидан кейин то қуёш чиқиб, ярим соатлар ўтгунига қадар ухламасдан Қуръон, аврод, дуоларимизни ўқиймиз-да, кейин «Ишроқ» намозини ҳам адо этамиз. Бу жуда савобли намоз.
Пайғамбаримиз соллаллоҳу алайҳи васаллам: «Кимки тонг намозини жамоат билан ўқиб, сўнгра то қуёш чиққунига қадар ўтириб Аллоҳнинг зикрига машғул бўлса, сўнгра икки ракаат нафл намози ўқиса, комил бир ҳаж ва умранинг савобига мушарраф бўлади» – деганлар.
Нотўғри эшитдик демасинлар, ҳайрон бўлмасинлар деб комил ҳаж ва умра деб такрорлаганлар....
Бу Имом Термизий ривоят этган «Саҳиҳ» ҳадислардандир. Комил ҳаж билан умра савоби дедилар...
Хўш, ҳаж ва умра қандай ибодат? «Инсон мақбул ва комил ҳаж қилдими, унинг мукофоти жаннатдан бошқа нарса эмас» деган ҳадис бор. Ҳаж инсонни жаннатга олиб борадиган ибодат бўлгач, ҳар кун эрталаб бир ҳаж ва умра савобини қўлдан бой бермасликка ҳаракат қилиш керак!
Ухлайдиган одатинг бўлса ҳам, олдин бу савобни қўлга кирит-да, сўнгра ёт...
- Тонг билан пешин намозининг орасида «зуҳо» (чоштгоҳ) намози бор. Пешинга 45 дақиқалар қолгунига қадар ўқилади. Икки, тўрт ёки ундан кўп ракат ўқиш мумкин.
Бир инсон «зуҳо» намозини ҳар доим ўқиб борса, Аллоҳ уни ўзи севган муҳсинун ва муҳсинот қуллари қаторига қўшади.
- Шом намозининг суннатидан кейин Пайғамбаримиз соллаллоҳу алайҳи васаллам тавсия қилган савобли намозлардан бириси «аввобин» намозидир. Ҳадисда айтилишича: Инсоннинг гуноҳлари денгизларнинг кўпиги қадар бўлса ҳам, аввобин намозини ўқиса, гуноҳларининг кечирилишига сабаб бўлади...
Ҳузуримга шаҳардан бир қизгина келиб: «Устоз, мен кўп гуноҳлар қилганман, Аллоҳ мени кечирадими?», – деб йиғлар эди. Хотиримга шу ҳадис келди:
– «Аввобин намозини ўқишга одатлан, Аллоҳ кечиради», – дедим.
- Хуфтон намозидан кейин ухлашдан олдин, янги таҳорат қилиб, 4 ракат намоз ўқиб, таҳоратли ётиш керак. Таҳоратли ётишнинг ажри, ҳикмати нима?
1) Туни билан ҳеч ухламасдан ибодат қилиб чиққандек унга савоб ёзилади.
2) Ўлса иймонли кетишига сабаб бўлади...
3) Фаришталар унинг вужудини нур каби кўриб, осмондан тушадилар ва атрофида жам бўлиб ўраб оладилар.
4) Фаришталар бошининг тепасида «Ё Робби! Бу қулинг таҳоратли ётди, сен унинг гуноҳларини кечир!», – деб тонггача дуо қилишади.
5) Шайтон унга яқинлаша олмайди.
Шунинг учун кечқурун таҳоратли ётишга ҳаракат қилинглар.
Тундан маълум миқдор ўтгандан кейин «таҳажжуд» намозини ўқишга ҳаракат қилинглар. Бирор сабаб билан уйғонсангиз (масалан болангиз йиғлайди, чивин чақади, чақмоқ бўлади ё туш кўриб уйғонасиз) ўқиб олинглар. Баъзан чивин уйғотади, қашиниб, уйғониб қарасангиз, таҳажжуд вақти... Мен шунақанги пайт чивинга жаҳлим чиқмайди, балки хурсанд бўламан.
Буларнинг ҳаммаси савобли намозлардир... Яна бир эслатиб ўтай: бомдоддан кейин «ишроқ», бомдод ва пешин намозининг орасида «зуҳо», шомдан кейин «аввобин», хуфтондан кейин, ухлашдан олдин тўрт ракаат, «тун намози», кечаси уйқудан туриб ўқилган «таҳажжуд» намози. Бу намозларни Пайғамбаримиз соллаллоҳу алайҳи васаллам тавсия қилганлар, биз ҳам тавсия қиламиз.
"Ислом ва ахлоқ" китобидан олинди