Хоразм вилоятидаги "Имом Фахриддин ар-Розий" ўрта махсус ислом таълим муассасасига Ўзбекистон мусулмонлари идораси томонидан 2 та, "Вақф" хайрия жамоат фонди томонидан 1 та жами 60 000 000 сўмлик 3 та "Смарт" доскалар тақдим этилди.

Айни кунларда Ўзбекистон мусулмонлари идораси Самарқанд вилояти вакиллиги тасарруфидаги масжид имом-хатиблари ижтимоий кўмакка муҳтож аҳоли вакилларини қўллаб-қувватлаш мақсадида моддий ва маънавий ёрдам кўрсатишда фаол бўлмоқда.

Жумладан, жорий йилнинг 17 январ куни Ургут тумани бош имом-хатиби Ҳусниддин домла Ибрагимов ва “Ғўзни” масжиди имом-хатиби Абдуқодир домла Нурмуҳаммедовлар ҳомийларни жалб қилган ҳолда Ургут туманидаги “Мурувват уйи”даги фуқаролар ҳолидан хабар олиб, уларга жами ўн миллион сўмлик эҳсон дастурхони ёзилди. Шунингдек, мазкур тумандаги "Қози Оллоёрбек" жоме масжиди имом-хатиби Бобур домла Тўраев ҳомийлар кўмагида “Узунсой” маҳалла фуқаролар йиғинида яшовчи 50 та кам таъминланган оилага 50 қоп ун эҳсон қилинди.

Нарпай тумани “Бешқозоқ” жоме масжиди имом-хатиби Давлатбой домла Шукуров ҳам ҳомийларни жалб қилган ҳолда “Тепақўрғон” МФЙда истиқомат қилувчи кам таъминланган оилалар учун қўй сўйилиб, ош дамлаб, умумий ҳисобда ўн икки миллион сўмлик эҳсон дастурхони ёзилди.

Каттақўрғон тумани бош имом-хатиби Сирожиддин домла Шамсиддинов ҳамкор ташкилот масъуллари билан биргаликда “Олмазор” МФЙда яшовчи кам таъминланган оилалар ҳолидан хабар олди ҳамда уларга икки миллион сўмлик озиқ-овқат маҳсулотларини эҳсон қилди.

Шу кунларда Самарқанд вилоятидаги имом-хатиблар умумий ҳисобда 34 000 000 сўмлик хайр-эҳсон ишларини амалга оширди.

Имом-хатиблар иштирокидаги бундай хайрия ишлари давом этмоқда.

Ўзбекистон мусулмонлари идораси
Самарқанд вилояти вакиллиги
Матбуот хизмати

Ўзбекистон мусулмонлари идораси Матбуот хизмати

Инсон жисмидаги мўъжизавий аъзолардан бири юрак бўлиб, у ишламаса ва фаолиятдан тўхтаса, инсон ҳалок бўлади. Инсоннинг юраги бир кунда 100 000 бора уради. Бир йилда ўртача ўттиз беш миллион марта, ўртача умри давомида эса икки ярим миллиард маротаба уради.

Ўртача ёшдаги инсоннинг бош терисида 100 000 соч толаси бўлади. Жигар инсон танасида 500 дан ортиқ функцияларни бажаради. Аммо унинг асосий вазифаси қонни тозалаш ва ёғларни парчалашда асосий рол ўйновчи сариқ суюқлик ишлаб чикаришдир.
Ингичка ичак ошқозон тизимининг энг муҳим қисми бўлиб, овқатни парчалаш ва баданнинг турли қисмларига тарқатиш учун юбориладиган озуқа моддаларини чиқаради.

Қизилўнгачдан таом доимо ошқозонга йўналади. Агар инсон бошини пастга осилтириб туриб еб-ичса ҳам унинг ёрдамчи пайлари сабабли тескари ҳаракатда ошқозон тарафга йўналаверади.
Тананинг энг мустаҳкам аъзоси тиш эмали ҳисобланади.
Буйраклар бир кунда организмдаги қонни 300 марта ювади.
Қизил қон ҳужайралари (эритроцитлар) суяк илигида шаклланиб, тўрт ой яшайди. Ушбу тўрт ойлик умри мобайнида тананинг барча 60 триллион ҳужайрасида озиқланади. Шу сабабли инсон танасида қарийб 250 000 марта айланади.
Аллоҳ таоло Қуръони Каримда шундай марҳамат қилади:

لَقَدْ خَلَقْنَا الْإِنسَانَ فِي أَحْسَنِ تَقْوِيمٍ

«Батаҳқиқ, Биз инсонни энг гўзал тузилишда яратдик» (Тийн сураси, 4-оят).
Аллоҳ таоло инсоннинг жасадини ҳам, ақлини ҳам, руҳини ҳам энг яхши ҳолатда яратгани ҳаммага маълум.
Мана бу оятда эса Аллоҳ таоло:

أَلَمْ تَرَ إِلَى الَّذِينَ خَرَجُواْ مِن دِيَارِهِمْ وَهُمْ أُلُوفٌ حَذَرَ الْمَوْتِ فَقَالَ لَهُمُ اللّهُ مُوتُواْ ثُمَّ أَحْيَاهُمْ إِنَّ اللّهَ لَذُو فَضْلٍ عَلَى النَّاسِ وَلَكِنَّ أَكْثَرَ النَّاسِ لاَ يَشْكُرُونَ

«... Аллоҳ одамларга фазлу марҳаматлидир. Лекин одамларнинг кўплари шукр қилмаслар» (Бақара сураси, 243-оят), деб марҳамат қилган.
Ҳаёт бериб, тирилтириш ҳам Аллоҳнинг бандаларига берган фазлидир. Жонни олиб, ўлдириш ҳам Аллоҳнинг фазлидир. Икковида ҳам одамларга фойда бор. Лекин кўп одам буни тушунмайди ва шукр қилмайди.
Бошқа бир оятда:

وَآتَاكُم مِّن كُلِّ مَا سَأَلْتُمُوهُ وَإِن تَعُدُّواْ نِعْمَتَ اللّهِ لاَ تُحْصُوهَا إِنَّ الإِنسَانَ لَظَلُومٌ كَفَّارٌ

«Ва У сизга барча сўраган нарсаларингиздан берди. Агар Аллоҳнинг неъматларини санасангиз, саноғига ета олмассизлар. Албатта, инсон ўта золим ва ўта ношукрдир» (Иброҳим сураси, 34-оят).

Аллоҳ таоло бандаларига улар сўраган мол-дунё, фарзанд, сиҳат-саломатлик, роҳат-фароғат каби кўплаб неъматлардан беради.
Хулоса шуки, Аллоҳ таолонинг инсонларга ато этган неъматларини замон ҳам, макон ҳам, саноқ ҳам қамраб ола билмайди. Хўш, маълум замонда, маълум маконда яшайдиган, маълум илмга эга одамлар қандай қилиб уларни санай олади? Шундай бўлгач, барча инсонлар бу беҳисоб неъматлар учун ҳар доим ҳисобсиз шукрлар айтишлари лозим.

Шунча ожиз жисмга мукаммал аъзолар жойлаштириб қўйган Аллоҳ таолога битмас-туганмас ҳамду санолар бўлсин.

Фойдаланилган манбалар:
«Тафсири Ҳилол» китоби
«Неъмат эгасини унутма» китоби

Хуршид Маъруф тайёрлади

 “Жумадан жумагача” рукни орқали muslim.uz сайтида эълон қилинган энг муҳим хабарларнинг қисқача шарҳи билан танишиш мумкин.