Расулуллоҳ соллаллоҳу алайҳи васаллам айтдилар: “Кишининг гўзаллиги унинг тилидан билинади” (Имом Ҳоким ривояти);

– “Ҳамма ишларингизда тўғри бўлинг, одамларга муомалада хулқингиз чиройли бўлсин!” (Имом Табароний, Имом Ҳоким ривояти);

– “Ҳақиқий мусулмоннинг қўлидан ҳам, тилидан ҳам мусулмонлар озор кўришмайди” (Имом Муслим ривояти).

Сийрат китобларида Расулуллоҳ соллаллоҳу алайҳи васалламнинг жуда кам гапиришлари, гапирганларида ҳам, бўлиб-бўлиб, аниқ сўзлашлари баён этилган. У зот алайҳиссаломнинг муборак юзларини кўрган бир саҳройи араб: “Гувоҳлик бераман, бу юз ёлғончиларники эмас”, деб Ислом динини қабул қилган. Зеро, Пайғамбаримиз соллаллоҳу алайҳи васаллам гўзал хулқли инсон эдилар. Ул зот бизларни ҳам яхши хулқли бўлишга чақирганлар.

Ҳадисда: “Ким Аллоҳга ва охират кунига имон келтирган бўлса, яхши сўзларни гапирсин ёки сукут сақласин”, дейилган (Имом Бухорий, Имом Муслим ривояти).

Дунё ва охират учун фойдали сўзларни сўзлаб, фойдасиз гаплардан тийилиш фақат яхшилик келтиради. Яна Пайғамбаримиз соллаллоҳу алайҳи васаллам: “Кишининг ҳар бир эшитган нарсасини гапиравериши гуноҳкор бўлишига кифоядир”, деганлар.

Одам бир гапни айтишдан олдин яхшилаб ўйлаб кўриши керак. Агар айтмоқчи бўлган сўзи яхши бўлса, савоб келтирса, гапиргани тузук. Бордию айтмоқчи бўлгани ёмонликларни қўзғайдиган, яхшиликка шубҳа уйғотадиган бўлса, тилини тийсин. Одам ҳар бир гапи учун жавоб беради. Оғиздан чиққан ҳар бир сўз гапирувчининг фойдасига ёки зарарига хизмат қилади. Ўйламасдан айтилган сўз билан яқин дўст гоҳо душманга айланиб қолиши мумкин.

Манба: islom.uz

Сўнгги йилларда барпо этилаётган янги масжидлар, қайтадан қурилаёган жомелар узукка қўйилган кўздек юртимизга ярашиб тушмоқда. Янги масжидларда эмин-эркин ибодат қилишнинг гашти, сурури ўзгача, албатта.
Бугун Тошкент шаҳар бош имом-хатиби Нуриддин домла Холиқназаров пойтахтимизнинг Миробод туманида янгидан қурилаётган “Ал-Бадр” ҳамда Яккасарой туманида қад ростлаётган “Ракат” жоме масжидларига ташриф буюрдилар.
Қурилиш жараёнларини кўздан кечирган Нуриддин домла ўзларининг зарур тавсия ва маслаҳатларини бериб, усталар, қурувчилар билан суҳбатлашдилар.

Масжид – Аллоҳ таолонинг уйи. Уни фақат ояти каримада айтилганидек: «Аллоҳнинг масжидларини фақат Аллоҳга ва охират кунига имон келтирган, намозни баркамол ўқиган, закот берган ва фақат Аллоҳдангина қўрққан кишилар обод қилурлар. Айнан ўшалар ҳидоят топувчилардан бўлишлари мумкин» (Тавба сураси, 18-оят).

Шайх Салоҳ Абулҳож ҳафизаҳуллоҳ

Сўнгги пайтларда бизнинг расмий сайтимиз ва ижтимоий тармоқлардаги каналларимизни кузатиб бораётган муҳтарам ўқувчиларимиз “Янги масжид очилди”, “Илк ғишт қўйилди” каби хушхабарларга тез-тез дуч келяпти. Бу барча мўмин-мусулмонларни қувонтиради, албатта.

Бугун Тошкент вилояти Нурафшон шаҳридаги “Исмат ота” жоме масжидини қайта қуриш учун илк ғишт қўйиш маросими бўлиб ўтди. Тадбирда Тошкент вилояти бош имом-хатиби Жасурбек домла Раупов иштирок этди.

Мазкур масжид 1995 йили ҳашар йўли билан қурилган бўлиб, сўнгги пайтларда намозхонларнинг сони ошиши натижасида жоме торлик қилиб қолган эди. Шуни инобатга олиб, масжиднинг янги биноси қурилиши бошлаб юборилди.

Янги масжид замонавий ва икки қаватдан иборат бўлиб, бу масканда бир вақтнинг ўзида 1,5 минг киши ибодатларни адо этиши мумкин.

Масжидга мос равишда янги таҳоратхона ҳам қурилиши бошлаб юборилди. Иншоаллоҳ, таҳоратхона ишга тушгач, айни пайтда 30 киши покланиши мумкин.

Ислом динида тинчликка ва кишиларнинг осойишталигига раҳна соладиган барча ишлар бузғунчилик-фасод ишлардан саналади. Қуръони Каримнинг Бақара сураси 205-оятида "Ва ҳолбуки, Аллоҳ фасодни хуш кўрмас" дейилган.
Террорчилик ва ақидапарастлик бегуноҳ одамларнинг қони тўкилишига олиб келади. Муқаддас Ислом динимизда бундай ишлар қатъий ман этилиб, Қуръонда "Ким бир жонни ноҳақдан ёки ер юзида фасод қилмаса ҳам ўлдирса, худди ҳамма одамларни ўлдирган бўлади" (Моида, 32) дея қатъий қораланган.

Бугунги бузғунчи оқимларнинг асосий дастак қилиб ушлаган нарсаси шуки, улар шариат амалларини тўла-тўкис бажармаган бошқа мусулмонларга нисбатан "қозиликни" даъво қилиб, "мунофиқ" ва "муртад" деб ҳукм чиқаришдан тап тортмайдилар. Ҳадисда, "Кимки мўмин кишини "кофирсан" деб ҳақоратласа, гўёки унинг қонини тўкканчалик гуноҳ қилган бўлади", дейилади. Яъни, ҳеч бир одамга мусулмон инсонни "кофир", деб ҳукм чиқариш ҳуқуқи берилмаган.
Юқоридаги маълумотларга асосланиб ҳар бир қадамимизни ўйлаб босайлик, ҳар қандай ғояга таъсирланмасдан, расмий жомеъ масжиди имом-хатиблари билан маслаҳатлашайлик!

Бобобек АБДУРАХИМОВ,
Қорабой оқсоқол жомеъ масжиди имом-хатиби