Шу йил 24 январь куни пойтахтимиздаги “Шайх Зайниддин” жоме масжидида Тошкент шаҳар ва туманлар бош имом-хатибининг хотин-қизлар масалалари бўйича ёрдамчилари ва барча отинойилар учун бир кунлик ўқув семинар ўтказилди.

Унда Тошкент шаҳар бош имом-хатиби Абдуқаҳҳор домла Юнусов, ўринбосар Абдуллоҳ домла Йўлдошев, пойтахтимиздаги “Сирож солиҳ” масжиди имом-хатиби Ҳасан домла Қодиров ва бош имом хатибнинг хотин-қизлар масалалари бўйича ёрдамчиси Зулайҳо Соатова иштирок этди.

Тадбир Қуръони карим тиловати ва хайрли дуолар билан бошланди.

Дастлаб Абдуқаҳҳор домла Юнусов динимиз таълимотларида илм-маърифатга юксак эътибор қаратилганини таъкидлаб, ўқув-семинарнинг аҳамияти ҳақида сўз юритди.

Шундан сўнг воиз имом-хатиблар отинойиларга динимиз аҳкомларига оид маъруза қилиб беришди.

Якунда отинойилар фаолияти, илмий изланишлари, халқимизга маърифат улашишда улкан салоҳият ва заковат тилаб, хайрли дуолар қилинди.

Ўзбекистон мусулмонлари идораси
Матбуот хизмати

(Ўзбекистонда диний таълим олишнинг аҳамияти ёҳуд хорижий давлатларда ноқонуний диний таълим олишнинг хатарлари)

Абдулҳамид домла Жуманов

Имом Бухорий номли Тошкент ислом институти

“Ақоид ва фиқҳий фанлар” кафедраси ўқитувчиси

Шу йил 24 январь куни Боку шаҳрида бўлиб ўтаётган Ўзбекистон фан ва маданияти кунлари доирасида ҳукуматимиз делегацияси таркибида ташриф буюрган Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Кавказ мусулмонлари идораси раиси Шайхулислом Оллоҳшукур Пошозода билан мулоқот ўтказдилар.

Учрашувда маърифий тадбирлар юқори даражада ташкил этилгани ҳақида сўз юритиш баробарида келгусидаги истиқболли режалар, ҳамкорликда амалга ошириладиган тадбирлар ва халқаро анжуманлар ҳақида фикр-мулоҳаза алмашилди. Шунингдек, икки давлат раҳбарларининг диний-маърифий соҳага қаратаётган эътиборлари натижасида кўплаб хайрли ишлар амалга оширилаётганини алоҳида қайд этилди.

Мулоқот чоғида Шайхулислом Оллоҳшукур Пошозода Ўзбекистон Президенти томонидан сўнгги йилларда ватан, халқ ва дин равнақи йўлида жуда катта ишлар амалга оширилаётганига урғу қаратди. Бундан ташқари, у Шайхулислом даражасига етишда Тошкент ва Бухородаги устозлари, сафдошлари ва билим даргоҳларининг ўрни ниҳоятда беқиёс эканини билдирди.

Шайхулислом ҳазратлари ўтган 2023 йил ноябрь ойида Туркий давлатлар муфтийлари йиғилиши ва Мир Араб мадрасасининг 500 йиллигига бағишланган халқаро анжуман юртимизда жуда юқори даражада ўтказилганини юксак эътироф этди.

Муфтийлар икки мамлакат халқлари ўртасидаги дўстлик ва қардошлик ришталарини янада мустаҳкамлаш, диний-маърифий соҳадаги ҳамкорликни ривожлантириш ва илм-фан соҳаларида ўзаро тажриба алмашишга оид масалаларга ҳам урғу қаратдилар.

Ўзбекистон мусулмонлари идораси Матбуот хизмати

Бугун, 24 январь чоршанба куни Ўзбекистон мусулмонлари идораси раиси ўринбосари Жалолиддин домла Ҳамроқулов фуқароларни қабул қилиб, уларнинг мурожаат ва таклифларини тинглади.

Мазкур қабул жараёнида билдирилган шаръий масалалар, масжидлар ҳолати, имомлар фаолияти, ҳаж навбати, оилавий муносабатлар, ишга кириш, моддий ёрдам ва соҳани ривожлантиришга оид масалалар атрофлича ўрганилиб, масъулларга қисқа муддатларда ҳал этиш юзасидан топшириқ берилди.

Бугунги қабул давомида Фарғона, Наманган, Қашқадарё, Сурхондарё, Тошкент, Бухоро, Навоий вилоятлари ва Тошкент шаҳридан келган ҳар бир фуқаронинг муаммо ва таклифлари эшитилиб, уларнинг ечими бўйича амалий чоралар кўрилди.

Мана шундай самимий қабул ва ғамхўрликдан мамнун бўлган фуқаролар Ўзбекистон мусулмонлари идораси раҳбарияти томонидан кўрсатилган эътибордан кўнгиллари шод бўлишиб, хайрли дуолар қилишди.

Ўзбекистон мусулмонлари идораси
Матбуот хизмати

Ўзбекистон мусулмонлари идораси ҳузуридаги “Шамсуддинхон Бобохонов” нашриёт-матбаа ижодий уйида “Инсониятнинг энг яхшисининг сўзларидан жилоланувчи нурлар” китоби нашр этилди. Мазкур асар Ҳофиз Абдул Азим Мунзирийнинг “Ат Тарғиб ват- Тарҳиб” ва Имом Нававийнинг “Риёзус Солиҳийн” китоблари асосида Искандар домла Халилов томонидан нашр учун тўпланган.

Шу йил 24 январь куни Тошкент шаҳридаги “Шайх Муҳаммад Содиқ Муҳаммад Юсуф” жоме масжидида мазкур китоб тақдимоти ўтказилди.

Маърифий тадбирда Ўзбекистон мусулмонлари идораси раиси ўринбосари Муҳаммадолим домла Муҳаммадсиддиқов, Дин ишлари бўйича қўмита бошқарма бошлиғи Муҳиддин Ҳакимов, уламолар, имом домлалар ва соҳа мутахассислари иштирок этди.

Тадбирда сўзга чиққан нотиқлар юртимизнинг янги тараққиёт даврида имом-хатибларнинг билим ва малакалари юксалиб бораётгани, хусусан, ушбу янги тўпламнинг нашр этилиши ҳам бунга ёрқин далил экани, унда машҳур олтита саҳиҳ ҳадис тўпламларидаги одоб-ахлоққа оид ҳадисларнинг энг сараларидан 3 550 та ҳадисни омма ўқувчилар учун жамлангани ва икки жилдлик китоб қилингани эътироф этилди.

Шунингдек, мазкур тўплам имом-хатиблар, мударрислар ва талабалар учун фойдали кўлланма бўлиши алоҳида қайд этилди.

Тадбир сўнгида янги нашр этилган китоб иштирокчиларга тақдим этилди.

Ўзбекистон мусулмонлари идораси
Матбуот хизмати