Барчамизни Аллоҳ таоло яратган. Тақдирларимизни иҳота қилувчи ягона Зот ҳам фақатгина Роббимизнинг Ўзидир. Қуръони каримда: “…Албатта, биз Аллоҳнинг ихтиёридамиз ва албатта, биз Унинг ҳузурига қайтувчилармиз…” дейилган.

Ўзбекистон мусулмонлари идораси Фарғона вилояти вакиллиги муҳтасиби Иқболжон домла Аҳмадалиевнинг волидаи муҳтарамасининг вафоти муносабати билан оила аъзолари ва яқинларига чуқур таъзия изҳор этади.

Аллоҳ марҳумани мағфират қилсин, савобли амаллари билан қабрларини нурга тўлдириб, жойларини жаннатда қилсин! Қолган барча яқинларига Аллоҳ сабри жамил берсин! Марҳуманинг яқинлари, фарзанду аржумандларига, хусусан, Иқболжон домлага чиройли сабр бериб, бу мусибатларга ажру мукофотлар ато этсин.

Жаноза намози 30 декабрь куни соат 12:00 Риштон тумани Воҳим қишлоғида марҳуманинг хонадонида ўқилади.

Иннаа лиллааҳи ва иннаа илайҳи рожиъуун.

Ўзбекистон мусулмонлари идораси

Самарқанд вилояти бош имом-хатиби

Зайниддин домла Эшонқулов

Алҳамдулиллаҳ, сўнгги йилларда интернет сайтлари ва ижтимоий тармоқларда “Пақилдоқ ўйнаши оқибатида кўзи кўр бўлиб қолди”, “Қўли куйиб қолди”, “..уйга ўт кетди” каби турли кўнгилсиз воқеалар ҳақидаги хабарлар сезиларли даражада камайди. Лекин бу ҳолат бизнинг хотиржам бўлишимизга асос бўла олмайди.

Ҳар йили декабрь ойи бошидан кўчаларда, аҳоли гавжум жойларда болалар пақилдоқ ўйнаб, инсонларнинг тинчини буза бошлайди. Онда-сонда, у ер-бу ерда бундай овозлар ҳали-ҳануз эшитилиб турса-да, тарихнинг аччиқ сабоғидан хулоса чиқаришимиз керак.

Ислом дини таълимотида ўзгаларга азият етказиш, озор бериш қаттиқ қораланади. Қуръони каримда “Мўмин ва мўминаларга, улар бирор нарса қилмасалар ҳам, озор берадиганлар, батаҳқиқ, ўз устиларига бўҳтон ва очиқ ойдин гуноҳни олибдилар”, деб марҳамат қилади (Аҳзоб сураси, 58-оят).

Демак, бировга озор бериш – катта гуноҳ. То азият чеккан киши озор берган кишини кечирмагунча Аллоҳ таоло ҳам уни мағфират қилмаслиги мўътабар манбаларимизда келтирилган.

Шу билан бирга, ҳадиси шарифларда ҳам ўзгаларга азият бериш, қўрқитиш, бировнинг устидан кулишнинг оқибати жуда ёмон экани огоҳлантирилади.

Абу Лайло Ансорийдан ривоят қилинади: «Расулуллоҳ соллаллоҳу алайҳи васаллам бир ғазотга чиққанларида у зотнинг саҳобаларидан бири ҳазиллашиб, бир кишининг ўқдонини беркитиб қўйди. Эгаси уни излаб, топа олмай, хавфга тушди. Унинг устидан кула бошлашган эди, Набий соллаллоҳу алайҳи ва саллам чиқиб: “Нимага куляпсизлар?” дедилар. “Ҳазиллашиб, фалончининг ўқдонини беркитиб қўйган эдик, қўрқиб кетди. Шунга куляпмиз”, дейишди. У зот: “Мусулмонни қўрқитиш мусулмонга ҳалол эмас”, дедилар».

Бошқа бир ҳадисда: “Мусулмон мусулмонлар унинг тилидан ва қўлидан саломат бўлган кишидир”, деб марҳамат қиладилар (Муттафақун алайҳ).

Бу арзимас кўринган иш сабабли инсоннинг бошига турли кулфатлар ёғилиши, ҳаёти хавф-хатарда қолиши ва ҳатто ҳалокатга учраши ҳам мумкин. Раббимиз Каломуллоҳда: “Ўз қўлларингиз (бахиллигингиз) билан ўзларингизни ҳалокатга ташламангиз” деб марҳамат қилган (Бақара сураси, 195-оят).

Пиротехника воситаларига сарфланаётган маблағни хайрли ишларга йўналтирсак, дейлик, китоб сотиб олиб, мутолаа билан шуғуллансак, қандай ҳам яхши: бундан жуда катта манфаат топамиз, ақлимиз чархланади, дунёқарашимиз кенгаяди, билимизмиз ошади, натижада маърифатли инсон бўламиз.

Аксинча, пиротехники воситаларини сотиб олиб, одамлар гавжум жойда пақиллатсак, одамларнинг тинчини бузамиз ҳамда уларга зарар етказамиз. Мутахассисларнинг маълумотларига кўра, пиротехника воситаси пақиллаши оқибатида:

– руҳий бузилиш;

– сурункали асаб ва қон-томир тизими касалликлари;

• қандли диабет, ҳомилага зиён етиш каби зарарлар юзага чиқади. Яқин масофада пақилласа, карлик ёки умрбод қулоқ шанғиллаши (тиннитус) касаллигига олиб келиши мумкин.

Расулуллоҳ соллаллоҳу алайҳи ва саллам: “Зарар бериш ҳам йўқ, зарарланиш ҳам йўқ”, деганлар (Имом Молик ривояти).

Пиротехника воситалари савдоси ёки сотиб олиш билан шуғулланиб, тинч аҳолини қўрқитаётган, айрим инсонларнинг касал бўлишига сабаб бўлиш шаръан ман этилган, қонунан мумкин эмас.

Маъмурий жавобгарлик тўғрисидаги кодекснинг 185¹-моддасига мувофиқ, пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиш, худди шунингдек, уларни қонунга хилоф равишда Ўзбекистон Республикасига олиб кириш (Ўзбекистон Республикасидан олиб чиқиш) ёки ўтказиш ҳуқуқбузарлик ашёларини мусодара қилиб, энг кам иш ҳақининг беш бараваридан йигирма бараваригача миқдорда жарима солишга сабаб бўлади. Жиноят кодексининг 250¹-моддасида эса бундай қилмишлар содир этганлар учун унинг ким томонидан содир этилгани ва қандай оқибатларга олиб келганлигига қараб турли жазо чоралари, жумладан, саккиз йилдан ўн йилгача озодликдан маҳрум қилиш жазоси қўлланиши кўзда тутилган.

Шундай экан, азизлар, фарзандларимизга бу ишнинг оқибатларини батафсил тушунтирайлик, уларга пақилдоқлар оқибатида қанчалаб соғлом кишилар ногирон бўлиб қолганини мисоллар орқали очиб берайлик. Шундагина кўзланган мақсадга эришамиз, иншоаллоҳ.

Элёр ЗИЁВУДДИНОВ,

Янги ҳаёт тумани “Ниёзмат ота” жоме масжиди имом ноиби

Мино яқинида зиёратчилар учун 12 та янги турар-жой биноси қурилади. Бу ҳақда Ҳаж ва Умра миллий қўмитаси маслаҳатчиси жаноб Саад Ал Қурайш маълум қилди.

Ҳаж бутун дунё мусулмонлари учун муҳим ибодатдир. Ҳаж вақтида зиёратчилар Минода бир неча кечани ўтказадилар. 

Саад Ал Қурайшнинг маълумотларига кўра, турар-жой бинолари 2024 йил Ҳаж ибодатини амалга оширувчи зиёратчилар учун тўлиқ қулай шароитларда бўлади. 

Шунингдек, зиёратчиларга 2024 йил Ҳаж мавсуми учун дарҳол рўйхатдан ўтишни маслаҳат берди.

2024 йил Ҳаж ибодатини адо этиш учун кўплаб зиёратчилар ташрифи кутилмоқда. Аввалроқ зиёратчилар сонини ҳисобга олган ҳолда Саудия ҳукумати 2024 йилги Ҳаж зиёратчилари учун 166 та бинога лицензия бергани ҳақида хабар берилган эди.

Бугунги кунда имом-хатиблар том маънода элнинг кори билан ҳамоҳанг яшаб юртимизнинг турли гўшаларида ўзининг илми, иқтидори ва ташаббускорлиги билан фаолият юритиб келмоқда.

Айни кунларда пойтахтимиздаги Шайхонтоҳур тумани имом- домлалари ташаббуси билан кўламли хайрли ишлар амалга оширилди. Шу йил 19 декабрь куни Шайхонтоҳур тумани “Тинчлик” маҳалласида ёнғин оқибатида жабр кўрган уч хонадон аҳлига ёрдам кўрсатиши учун саҳоватпеша инсонларга моддий ёрдам беришига тавсия қилинди.

Ана шундай оғир кунда “Мунаввар қори” жоме” жоме масжиди имом хатиби Абдулқодир домла Муллабоев ва имом ноиби Баҳодир домла Тошмуҳаммедов бошчилигида ҳомийлар жалб этилиб ушбу талофат етган уч хонадонга жами 40 миллион сўмлик, “Мўйи Муборак” масжиди имом-хатиби Илҳомжон домла Мадалиев ҳомийлар жалб этилиб талофат етган хонадонларга 5,5 миллион сўмлик моддий ёрдам кўрсатилди.

25 декабрь куни “Кох ота Бузрук” жоме масжиди имом-хатиби Абдуҳаким домла Пирназаров “Кох ота”, “Жангоҳ”, “Тахтапул”, “Лабзак” маҳаллаларига ташриф буюриб, ҳудуд вакиллари иштирокида моддий ёрдамга муҳтож оилаларга ҳомийларни ёрдамида 20 хил озиқ овқат махсулотларидан иборат рўзғорлик тўпламини 50 та хонадонга жами 32,5 миллион сўм миқдорида эҳсон қилинди.

Дарҳақиқат, саҳоват – бу икки тоифа ўртасини боғловчи, уларни улфат қилувчи ва ҳар иккисини дунё имтихонидан яхши ўтишга ёрдам берувчи амаллардан биридир.
Қуръони каримнинг кўплаб оятларида одамларга инфоқ-эҳсон қилиш ҳақида гап кетади. Аллоҳ йўлида қилинадиган садақа ва эҳсонларнинг фазилати бундай марҳамат қилинади: “Садақаларингизни агар ошкора берсангиз, жуда яхши. Борди-ю, камбағалларга пинҳона берсангиз – ўзингиз учун янада яхшироқдир ва (У) гуноҳларингиздан ўтар. Аллоҳ қилаётган (барча) ишларингиздан хабардордир” (Бақара сураси, 271-оят).

Аллоҳ таоло юртимизда хайрли ишларни бардавом қилсин!

Ўзбекистон мусулмонлари идораси
Матбуот хизмати