Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Қўшни кўчадаги уйда яшайдиган амакимнинг ўғли, еттинчи синф ўқувчиси – Маъруфнинг эрталаб рюкзагини елкасига илиб олганча қаергадир югуриб кетаётганини кўриб, унинг йўлини тўсдим. 
– Қаерга шошиляпсан? 
– Мактабга. 
– Мактабга?! Дарс бошланишига ҳали анча бор-ку! Автобус бекати эса анави ерда. Нега бу томондан кетяпсан? 

Бу саволни беришимни кутмаган Маъруф қизариб кетди.
– Пулим йўқ эди... Дадам йўлкирага берганларини ишлатиб қўйгандим...
– Анави куни ҳам яёв кетаётганингни кўргандим. Майли, мана буни олгин-да, – дедим унга чўнтагимдан пул чиқариб, – мактабга автобусда бор, қолганини кейин гаплашамиз.

Кечқурун ишдан қайтаётганимда атайлаб қўшни кўчадаги қариндошимизникига кирдим. Амаким, келинойим билан озгина у ёқ-бу ёқдан гаплашгач, уларга «Маъруфда озгина ишим бор эди», деб жиянни ташқарига олиб чиқдим.

– Хўш, – дедим бошини қуйи қилиб олган Маъруфга қараб. – Яна нималар қилиб юрибсан? Амаким йўлкиранг учун пул беришларини биламан... Ўртоқларинг билан компьютер хонага кирдингларми?
– Йўқ. Дадам рухсат бермайдилар интернет-кафега киришга...
– Алдамаяпсанми?
– Йўқ.
– Барибир ўртоқларингдан билиб оламан. Қанчадан бери пиёда юрибсан?
– Бир ойча бўлиб қолди...
– Вой-бў... Нимага ишлатдинг шунча пулни?
– Битта одам сўраган эди...
– Ким?

Шу пайт бармоқлари қалтирай бошлаган Маъруфнинг паст овозда айтган «Онаси касал бўлиб қолган экан...» деган сўзларини зўр-базўр англадим. Кейин жияним тез-тез бир нарсаларни ғўлдирай кетди. Йиғламсираб гапиргани учун нима деётганини тушуниб бўлмасди.

– Энди, шошма, – дедим жиянни бағримга босиб. – Ҳаммасини бошидан дона-дона қилиб айтиб бер.

Аҳамиятлиси, Маъруф менга бир ой давомида бошидан ўтганини тушунтириб берганидан сўнг у анча улғайганини тушуниб етдим. Жияннинг айтиб берганидан шу маълум бўлдики, у ҳар куни мактабдан пиёда қайтаётганида уйидаги аҳволни таҳлил қилар, битта ўзи ишлаб, онаси ва укаларини боқиб келаётган дадасига қандай қилиб ёрдам бериш ҳақида бош қотиришга ҳаракат қилган экан.

– Тўғри, бошқа синфдошларимга ўхшаб ҳар куни дўкондан мазали егуликларни ололмасдим. Бироқ уст-бошим тоза ва бутун, уйда еб-ичишимиздан муаммо йўқ эди, – дея тушунтирарди менга Маъруф. – Шунчаки, ўртоқларим ўзлари хоҳлаган нарсаларни сотиб олиш учун дўконга кириб кетганларида, ичимда «Бизга ҳам шундай кунлар насиб қилиб қолар», деб қўярдим. Бир куни шунга ўхшаш ҳар хил нарсаларни ўйлаб мактабдан уйга кетаётганимда олдимдан кичкина халта кўтариб олган, чамаси 25-30 ёшлардаги бир киши ўтиб кетди.

Маъруфнинг айтишича, ўзига ярашган кийимларни кийиб олган ўша йигитнинг қадамида қандайдир қатъият ва ишонч бўлган. Сал ўтиб йигит эски бир уй дарвозаси олдидаги супачада ўтирган, ёши саксонлардан ошган онахонга халтасидан бир даста пулни олиб, узатибди. Онахон эътироз билдириб, олишни истамаса ҳам ҳалиги киши унинг қўлига пулни тутқазибди. Охири ҳадяни олган аёл йигитни дуо қилибди. Маъруф аввалига кўрганини ҳазм қила олмай, жойида қотиб қолибди. Кейин тўсатдан бошқа кўчага бурилиб кетган йигитга етиб олиш мақсадида қадамини тезлатибди. Ўша кўчага кирганида йигит анча узоққа кетиб қолган экан. Маъруф сахий кишига етиб олиш илинжида бегона кўча бўйлаб анча юриб, катта йўл ёқасига чиқибди. Аввало чарчагани, иккинчидан бошқа йўлдан кетиб қолгани учун уйига таксида кетадиган бўлибди. Кўп ўтмай олдига «Нексия» тўхтабди. Ҳайдовчи билан йўл ҳақини келишгач, орқа ўриндиққа яхшилаб суяниб ўтириб олибди. Таксичи ҳаракатланишни бошлаганида машина магнитофони овозини баландлатибди.

«Расуллуллоҳ соллаллоҳу алайҳи васаллам айтадилар: «Aллоҳ таоло бандасининг садақасини ўнг қўли билан қабул қилади ва уни сизлардан бирингиз тойчоғини тарбия қилгандек тарбия қилади» (Бухорий ривояти). Яна Пайғамбаримиз соллаллоҳу алайҳи васаллам айтадилар: «Мол садақа сабабидан камаймайди» (Термизий ривояти). Ҳатто энг кичкина қилинган садақа ҳам, Aллоҳнинг наздида катта қийматга эга. Aгар ҳамма одамлар, бу нарсаларни Aллоҳ қабул қилишини билганда ва тушуниб етганда эди…».

Маърузага берилиб кетган Маъруф уйига қандай етиб келганини билмай қолибди. Агар ўша пайт таксичи «Ука, шу ерда тушасанми?» демаганида кетаверар экан. Машинадан тушиб, кўчанинг бошидан уйи томон бораётганида рўпарасидан ёши 17–18 дан ошмайдиган бир йигит чиқиб қолибди. Бошига эски дўппини бироз қийшайтириб қўндириб олган, бир кўзи негадир юмилиб қолган йигит хижолат бўлиб, Маъруфга мурожаат қилибди: 
– Узр, – дебди нотаниш йигит саломлашгач, ўзидан кичик болани сизлаб. – Уят бўлса ҳам сиздан бир нарса сўрамоқчи эдим.
– Майли, сўрайверинг, – дебди Маъруф.

– Вазият шундайки, онам бетоб бўлиб, бир ҳафтадан бери касалхонада ётибдилар. Уларнинг муолажаларига керак пулни ишлаб топиб бердим. Энди дориларга ҳам пул зарур бўлиб қолди. Ҳозир масжиддан керакли пулнинг бир қисмини олиб чиқдим. Барибир етмаяпти. Имкониятингиз бўлса, сиз ҳам ёрдам беринг... Aллоҳ номи билан сўрайман, ёлғон гапирмаяпман. Онам ростдан ҳам касал. 

 Уни диққат билан эшитиб, ўйлаб ҳам ўтирмай чўнтагидан эллик минг сўм пулни чиқариб, «кўп эмасу, фақат шунча бера оламан» деб узатдим, – дея ҳикоясини давом эттирди Маъруф. – Ўша ака пулни олиб, ўзида йўқ хурсанд бўлиб, раҳматлар айтиб, дуолар қилди. Аммо бу сўзлар қулоғимга кирмади. Сабаби мени аллақандай ҳислар чулғаб олганди. Мен бахтиёр эдим. Бир тарафдан уйдагиларимга пулни қаерга сарфлаб юборганимни қандай қилиб тушунтиришни ўйлардим. Ўйлаб-ўйлаб, ҳеч кимга ҳеч нима демай, уйдан сал эрта чиқиб, мактабга пиёда бориб, вазиятдан чиқиб кетишга қарор қилдим. Бор гап шу. 

– Шундай йўл тутиб, катта савоб олибсан, – дедим жиянга қараб. – Ҳақиқатан ҳам садақанинг катта-кичиги бўлмайди. Аммо келаси сафар бундай ишларни катталар билан маслаҳатлашиб қилгин. Нотаниш жойларга боришинг, бегона машиналарга ўтиришинг яхши эмас...

Боланинг қўлига керакли миқдорда пул бериб, Аллоҳ таолодан шунақа эсли ҳушли, иймони бутун фарзандларимизни кўпайтиришини сўрадим.

Сардор Қурбонов

«Ҳилол» журналининг 4(49) сонидан

Туркия январь ойи бошида ўзининг биринчи космонавтини коинотга жўнатишни режалаштирди, деб ёзади “ТAСС” агентлиги республика саноат ва технологиялар вазири Фотиҳ Каджир баёнотига таяниб ҳолда.

Вазирлик ходими таъкидлаганидек, турк космонавти Aлпер Гезеравжи 9 январь куни ХКБ(Халқаро космик бекат)га жўнаб кетади.
Парвоз Туркиянинг илмий ва технологик салоҳиятини намойиш этишни мақсад қилган. Космосда ўндан ортиқ илмий тажрибалар ўтказиш режа қилинган.

Яқин келажакда миссия иштирокчиси парвоз олдидан карантин режимига ўтказилади.
Ёз фаслида Туркия коинотига маҳаллий зондли ракетани муваффақиятли учиришга муваффақ бўлинган эди.

Aввалроқ Эрон 2028 йилда коинотга биринчи космонавтни жўнатишни режалаштираётгани ҳақида маълум қилганди.

Ўзбекистон мусулмонлари идораси
Матбуот хизмати

Мадинаи Мунавварадаги Масжидун Набавийда ўтган ҳафтада мисли кўрилмаган 5 миллиондан ортиқ кишидан иборат намозхон зиёрат ва ибодатларни амалга оширганини қайд этди.

Масжидул Ҳаром ва Масжидун Набавий ишлари бўйича Бош бошқарма маъмурияти маълумотларига кўра, шу йил 8-15 декабрь кунлари бир ҳафта давомида масжидга 5 миллион 119 минг намозхон ва зиёратчи ташриф буюрган. Улардан 501 938 нафари Пайғамбаримиз Муҳаммад саллоллоҳу алайҳи васаллам қабрини зиёрат қилишга муваффақ бўлди, деб ёзади “IslamNews” “GulfNews” матбуотига таяниб.

Мадинаи Мунавваранинг муқаддас масканларини зиёрат қилган мусулмонлар орасида 15 295 нафар кекса ва ногирон меҳмон бор эди.
Бир ҳафта давомида 87 мингдан ортиқ зиёратчи ўнлаб тиллардаги таржимонлар хизматидан фойдаланди.

Ҳафта давомида 13 584 киши Масжидун Набавий кутубхонасига ташриф буюрди. 4783 нафар киши эса буюк масжид ҳудудидаги музей ва кўргазмаларни томоша қилди.

Ўзбекистон мусулмонлари идораси
Матбуот хизмати

Ҳазрат Саййид Амир Кулол дейдилар:

♦️ Чиройли хулқли бўлиш насл-насабнинг ёмон тарафларини беркитиб туради.

♦️ Ҳар доим, ҳамма вақт Расулуллоҳга эргашган кишини Аллоҳ таоло турли каромат, валийлик ва мақтовли хислатлар билан ораста қилур.

♦️ Бизда неки яхши ҳол бўлса, барчаси гумномлигимиз (яъни хилват дар анжуман қилиб, хоксор бўлмоқ) самарасидир.

♦️ Одам токи тақводор бўлмас экан, Аллоҳ таоло уни бу тариқда – хожагон машойихининг муборак йўлида юргизмас.

♦️ Зинҳор шариатга мухолиф иш қилманглар. Чунки гуноҳлар инсонни жаҳаннамга етаклайди. .

♦️ Эй ёронларим! Шуни яхши билингизким, ҳар кимки Худойи табарока ва таолодан ботинида ҳам, зоҳирида ҳам қўрқса, Худованд азза ва жалла барча нарсани у бандадан қўрқадиган қилиб қўяди.

♦️ Худойи таолонинг маърифатига ошно бўлганликнинг аломати киши зоҳирда ҳам, ботинда ҳам Аллоҳ таолодан қўрқмоғидир. Тақводор банда жаннатга киргуси. Чунончи, Ҳақ субҳонаҳу ва таоло марҳамат қилдиким: ذلك لمن خشيى ربّه “Залика ли-ман хошийа Роббаҳ”, яъни: “Бу (жаннат) Парвардигоридан ҳақиқий қўрққан мўмин банда учундир”.

♦️ Аллоҳ табарока ва таолонинг хос бандалари шул кимсалардирки, улар жаноб Расулуллоҳ алайҳиссалоту вассаломга мутобаат қилурлар, аҳли сунна вал жамоа ақидасига эътиқод қилиб яшайдилар. Шариатдан бир қадам ҳам четга чиқмайдилар, ўзларини Ҳақ субҳонаҳу ва таоло хизматига бахш этурлар. Дилларини ғафлат пардаси қопламаслиги учун ҳар доим ҳушёрдирлар, кундузлари ҳам, тунлари ҳам Каломуллоҳ тиловатида бардавомдирлар.

♦️ Агар тариқат кишиси дунёга берилса, дуоси ҳижобланур, яъни дуо-илтижолари қабул бўлмас.

Баҳриддин УМРЗОҚОВ
тўплади.

Ўзбекистон халқаро ислом академиясида “Билимдон диншунос” интеллектуал танлови бўлиб ўтди.

Мазкур тадбирда Академия ректори Уйғун Ғафуров, Дин ишлари бўйича қўмита бош мутахассиси Баҳодир Даминов, Ўзбекистон мусулмонлари идораси масъул ходимлари – Акбаршоҳ Расулов ҳамда Исомиддин Аҳроров, кафедра профессор-ўқитувчилари ҳамда талабалар иштирок этдилар.

“Диншунослик ва жаҳон динларини қиёсий ўрганиш ЮНЕСКО” кафедраси томонидан ташкил этилган танловда Академиянинг турли таълим йўналишларидан жами 96 нафар талабадан иборат 24 та гуруҳ қатнашди.

Мусобақа 1-шарт (саралаш тести) бўлиб, бу шартда 6 та гуруҳ саралаб олинди. Шундан сўнг 2-шарт (блиц савол-жавоб), 3-шарт (атама ва расмларни шарҳлаш) ҳамда 4-шарт (ижодий иш) – Диншуносликка оид долзарб мавзуда икки дақиқалик видеоролик тақдимот қилинди.

Танлов якунида 3-ўринни “Туркистон” жамоаси қўлга киритган бўлса, 2-ўринга “Фурқон” жамоаси сазовор бўлди. Ғолиблик эса “Диншунослик” йўналиши 3-босқич талабаларининг “Шаҳристоний издошлари” жамоасига насиб этди.

Якунда ғолиб ва совриндорлар тақдирланди.

https://iiau.uz/oz/news/2773