muslim.uz
Қорилар мусобақасидан лавҳа: Комилжон Сиддиқов
Online: Қуръон мусобақаси (Facebook)
ONLINE.
АНДИЖОН.
ЎМИ Матбуот хизмати
Ўзбекистон Қуръон мусобақаси: мухлислар эътирофи
Диёримизда бошланган Қуръони карим мусобақаси барча юртдошларимиз томонидан кўтаринки руҳ, хурсандчилик билан қарши олинмоқда. Бугунги кунга қадар Жиззах, Сирдарё, Самарқанд, Сурхондарё, Бухоро, Навоий, Хоразм вилоятлари ва Қорақалпоғистон Республикасида мусобақанинг туман-шаҳар саралаш босқичлари ўтказилди.
Muslim.uz портали ҳамда унинг ижтимоий тармоқлардаги саҳифаларида Қуръон байрамини кузатиб борган ҳамюртларимиз қалбларининг тубидаги самимий дил изҳорларини қуйидагича ифода этдилар.
Жумладан, Шавкатбек Тожибоев номли фойдаланувчи “Ушбу мусобақани ташкиллаштирган юртбошимизни Аллоҳ ҳамиша паноҳида асрасин. Шундай улуғ кунларга етказган Аллоҳга ҳамдлар бўлсин”, дея ўз фикрини билдирган.
Абдусаттар Аҳунов эса мусобақани онлайн кузатиб бораётган дўстига мурожаат қилиб “Муҳаммадсодиқ шартта билет олиб қайтайликми-а?” дея Ватанни соғинганини билдирган.
Салмон Форсий номли фойдаланувчи “Андижон ҳофизи Куръонлар макони иншааллоҳ юзлари ёруғ бўлгуси”, деб ёзиб қолдирган.
“Аллоҳ таоло қориларимиздан рози бўлсин! Азизлар, шукрни кўпайтирсак, Аллоҳ таоло бизга неъматларини зиёда қилади”, дея Нозимжон Иминжонов ўз фикрини билдирган.
Маъсумхон Собиров исмли фойдаланувчи “Диндорларга, хусусан, Ислом динига берилаётган эътибор учун давлат раҳбарига раҳмат”, дея ёзган.
Мустафо Алиев “Андижон қорилар (заводи) макони дейишадику. Бу ердаги файзни кўринг.... Ҳаммаларидан Аллоҳ рози бўлсин!”, деб ўз хурсандчилигини бошқалар билан бўлишган.
Қобилжон Исаков “Субҳаналлоҳ! Ҳакамларнинг энг қийналган жойи – Андижон бўлади шекилли! Булбулзабон қориларимизни қай бирини олий ўринга қўйишниям билмайди одам!” деб мусобақаларнинг юқори савияда ўтаётганига эътибор қаратган.
Руҳуллоҳ Отахонов номли фойдаланувчи “Аллоҳга шукр шу кунларга етказганига. Юртбошимизнинг бошлари омон бўлсин. Иймонлари зиёда бўлсин”, дея ўз миннатдорлигини билдирган.
Онлайн эфирларга қолдирилган 10 мингдан ортиқ изоҳларда ижтимоий тармоқ фойдаланувчилари мусобақанинг дастлабки босқичи ҳақида ўзларининг илиқ ва ижобий фикрларини билдириб ўтганлар. Фойдаланувчилар ташкилий масалалар бўйича ўз тавсия ва таклифларини билдириб ўтганлар.
Маълумот учун, мусобақанинг дастлабки босқичи “muslim.uz” саҳифасида 141 мингдан ортиқ мухлислар томонидан кўрилган. Умумий қамров эса 640 минг нафарни ташкил этган.
Айни кунларда мусобақа Андижон вилоятида бўлиб ўтмоқда.
Ўзбекистон мусулмонлари идораси Матбуот хизмати
Эртага мусобақа энг жўшқин паллага киради!
Азиз Қуръон шайдолари, бугун Андижоннинг бир неча ҳудудларидаги қорилар мусобақасини улкан кошона ва йирик масжидларни тўлдириб, кузатаётган одамларни кўриб, ич-ичимиздан қувондик, Ҳақ таолога ҳамдлар айтдик, барча-барчадан Аллоҳ рози бўлишини тиладик.
Айниқса, Андижон шаҳридаги “Андижон” кошонасининг икки-уч қавати, ҳатто зиналарида ҳам туриб кузатаётганларни кўриб, Аллоҳнинг каломига муҳаббат кишиларимизда чексиз эканига гувоҳ бўлдик.
Ўз навбатида ушбу мусобақани онлайн кузатиб турган мингдан зиёд мухлисларга эса, Қуръонга бўлган муҳаббатингиз бундан ҳам зиёда бўлсин деймиз, ушбу ҳузурбахш онларни, икки дунёга васила бўладиган дақиқаларни дўсту биродарларга ҳам тавсия этишингизни илтимос қиламиз.
Шундай экан азизлар, бундай вақтларнинг қадрига етайлик, руҳониятларимизни сайқаллаб олайлик. Бир неча кундан кейин ниҳоясига етадиган, юракларни эзилтириб кетадиган онлардан ғафлатда қолмай десангиз, бизнинг muslim.uz портали ва ижтимоий тармоқларни кузатиб боринг.
Ўзбекистон мусулмонлари идораси Матбуот хизмати
Ҳамкорлик ривожланади Эрон Элчиси Баҳман Оғозорий билан учрашув
2 февраль куни Ўзбекистон мусулмонлари идорасида Ўзбекистондаги Ислом цивилизацияси маркази директори Шоазим Миноваров Эрон Ислом Республикасининг Ўзбекистондаги Фавқулодда ва Мухтор Элчиси Баҳман Оғозорий Дўрмоний билан учрашди.
Шоазим Миноваров элчи жанобларини ташриф билан қутлаб, Ўзбекистон ва Эрон давлатлари ўртасидаги ҳамкорлик муносабатлари тараққий этиб бораётганини, икки мамлакат ва халқларнинг маданиятлари ва анъаналаридаги умумий томонларни таъкидлади. Ўзбекистон Республикаси Президентининг ташаббуси билан ташкил этилаётган Ўзбекистондаги Ислом цивилизацияси марказининг мақсадлари ва вазифалари тўғрисида меҳмонга ахборот берди. Жумладан, асосий кўзланган мақсад ислом динининг асл моҳияти тинчлик, илмга даъват қилиш ва бунёдкорлик эканини жамият аъзолари ва хорижликларга етказиш экани қайд қилинди. Маҳобатли бинода жойлашадиган Ислом цивилизацияси марказида Ислом академияси, илмий кутубхона, музей ва қўлёзмалар фонди ташкил этилиши баён этилди. Мезбон, шунингдек, зиёрат туризмини ташкил этиш бўйича ишлар жадал кетаётгани ва бу борада Ўзбекистон делегацияси тажриба алмашиш учун турли давлатларда бўлиб қайтганини айтиб, Эрон давлатидан ҳам сайёҳларни жалб этиш ҳар икки томон учун ҳам фойдали бўлишини таъкидлади.
Ўзининг жавоб сўзида элчи Баҳман Оғозорий жаноблари Ўзбекистон Раҳбарининг ташаббусини маъқуллади ва Ислом цивилизацияси маркази фаолиятини ташкил этишда Эрон томони ёрдамга тайёр эканини, Эронда сақланаётган қўлёзмалар ва нодир ёдгорликлар, Эроннинг қўлёзмалар ва музейлар фаолияти соҳаларидаги тажрибаси билан ўзбекистонлик мутахассисларни таништиришга, шунингдек, бинога безак бериш жараёни бошланганида Исфаҳондан кошин ва ўймакорлик соҳаларида уста-мутахассисларни юборишга тайёр эканини маълум қилди.
Эрон элчиси сўзида давом этиб, ўзбекистонлик мутахассислар делегациясини Эроннинг Теҳрон, қадимий Исфахон ва Шероз шаҳарларидаги қўлёзмалар билан шуғулланувчи марказлар ва кутубхоналарнинг ишлари билан танишишга, улар билан ҳамкорлик шартномалари тузишга даъват этди. Юбориладиган делегациялар аъзолари учун Эрон томони барча шароитларни яратиб беришга тайёрлигини таъкидлади.
Учрашув дўстона ва самимий руҳда ўтди.
Ўзбекистон мусулмонлари идораси Матбуот хизмати.