Аввал, Ўзбекистон мусулмонлари идораси раиси, муфтий Усмонхон Алимов ҳазратлари бошчиликларидаги бир гуруҳ уламолар Тошкент шаҳри ва Тошкент вилоятига ташрифлари давом этаётгани ҳақида хабар берган эдик.
Ўтган куни муфтий Усмонхон Алимов ҳазратлари бошчиликларидаги уламолар Тошкент шаҳридаги “Олтинтепа” жоме масжидига мўмин-мусулмонлар билан бирга-бирга пешин намозини адо этиш учун ташриф буюрдилар.
“Олтинтепа” жоме масжиди имоми Исломиддин домла Зуҳриддинов қавмга чиройли суҳбат ва дуолар қилиб бериш учун муфтий ҳазратлари ташриф буюрганларини билдириб, сўзни у кишига берди.
Муфтий ҳазратлари ўз мавъизаларида бугунги кунда мўмин-мусулмонларга муҳтарам Президентимиз раҳнамоликларида жуда катта имкониятлар берилаётгани, шароитлар ҳозирланаётгани ҳақида гапириб, диний-маърифий соҳада қилинаётган ўзгаришлар, янгиланишлар ва хушхабарлар ҳақида сўзлаб бердилар.
Файзли мавъизада муфтий ҳазратлари намозхонларга бугунги кунда мамлакатимизда олиб борилаётган муборак динимиз тараққиёти йўлидаги хайрли ишлар, янги-янги ижроотлар, хушхабарлар ва бундай неъматларга ҳар бир киши туну кун Парвардигорга шукрона қилиши лозимлигини айтиб, Ҳазрати Пайғамбаримиз соллаллоҳу алайҳи васалламнинг “Икки неъмат борки, кўпчилик инсонлар унинг қадрига етмайдилар. У – хотиржамлик ва сиҳат-саломатлик”, мазмунидаги ҳадиси шарифларини изоҳлаб бердилар.
Айни кунларда бутун дунёга катта ташвиш бўлиб турган коронавирус пандемияси даврида инсон саломатлик ва хотиржамлик неъматини янада теранроқ англашини муфтий ҳазратлари билдирдилар. Бу ҳам бўлса, Аллоҳ таолонинг синови экани, инсон тинчлик ва саломатликни қадрига доимо етиши зарурлигини ўқтирдилар.
Муфтий ҳазратлари сўзларида давом этиб, Тошкент шаҳридаги 120 дан зиёд жоме масжидлар кундан-кунга обод бўлиб бораётгани, хусусан, “Сирож Солиҳ”, “Сузук ота”, “Шайх Муҳаммад Содиқ Муҳаммад Юсуф”, “Имом Термизий” каби жоме масжидлар янгидан қурилганини сўзлаб бердилар.
Муфтий ҳазратлари Давлатимиз Раҳбари раҳнамоликларида диний соҳадаги ўзгаришлар, янгиланишлар ҳақида сўз юритиб, хусусан, Мир Араб мадрасасининг дунёдаги нуфузини инобатга олган ҳолда олий мақомга кўтарилгани, 500 йиллигини кенг нишонлашга тайёргарлик кўрилаётгани, Халқаро Ислом академияси, Ҳадис илми олий мактаби, Имом Бухорий халқаро илмий-тадқиқот маркази, илмий мактаблар ўз фаолиятлари йўлга қўйилгани, яқинда ташкил этилган Имом Термизий ўрта-махсус ислом билим юрти тўрт йилдан кейин олий бўлиши, Имом Бухорий ҳазратларига мос шаклда мажмуа қайта бунёд этилаётгани, Етти Пир обод қилинаётгани ҳақида сўз қилиб бердилар. Мана шундай ўзгаришларни кенг халқимиз, айниқса, ёшларимизга етказиш зарурлиги тўғрисида гапирдилар. Ёшларимиз фақат имом-хатибларга эргашишларини алоҳида таъкидладилар.
“Олтинтепа” жоме масжидига жамланган намозхонлар муфтий ҳазратларидан дилни қувонтирадиган янгиликлар ва имону ихлосни бойитадиган сўзларни тинглаб, ўз миннатдорликларини изҳор этдилар.

Ўзбекистон мусулмонлари идораси Матбуот хизмати

Ўзбекистон мустақилликка эришгач, миллий тарихимизни ўрганишга бўлган эътибор ортиб борди. Жумладан, ўзбек матбуотининг тарихи кенг ўрганила борди. Бундай тадқиқотлар натижасида биринчи миллий газетамиз “Тараққий” газетаси ташкил топган кун 1995 йил 27-июндан “Матбуот ва оммавий ахборот воситалари ходимлари куни” деб эълон қилинди.

Чунки Туркистон жадид зиёлилари миллий газета чиқариш йўлида ҳаракатлари самараси сифатида 1906-йил 27-июнида Тошкент шаҳрида “Тараққий” номли газета чиқаришга эришдилар.

“Тараққий” таҳририяти ўша вақт Тошкент шаҳар Ўратепа кўчаси 97-уйда жойлашган. Газета баҳоси бир йиллига 5 сўм, олти ойлиги 2 сўм 50 тийин, 3 ойлиги 1 сўм 50 тийин, бир ойлиги 50 тийин бўлиб, бир донаси 5 тийиндан сотилган.

Жадидларимизнинг илк нашрида эълонлар ҳам босилиб, биринчи саҳифада 40 тийиндан, охирги саҳифада эса 20 тийиндан тўланган.

“Тараққий” газетаси шиори: “Нажот: маслакда сабот; тўғрилиқна ижобат” деб номланган. Фаолияти “илмий, адабий,сиёсий, фажий, тижорий газета” бўлган. Исмоил Обидий ушбу газета муҳаррири бўлган. Унга Мунаввар Қори Абдурашидхонов энг яқин ёрдамчи бўлган.                               

“Тараққий” фаолияти узоққа чўзилмади. Атига 20 сонигина дунё юзини кўрди. Аммо илк миллий-тараққийпарвар газетамиз мана шу оз вақт давомида катта ютуқларга эриша олган. Энг муҳим миллий журналистикамизга тамал тошини қўйиб, унинг давомийлигини таминлаган.

 Аслида газета катта мақсадларни ўз олдига қўйган. Жумладан: “биз бир монеъ сабабидан газетамиз бир оз вақтгача қадимий тараққий исми ила таслим қилинуб нашр этулса ҳам иншоллоҳ тез фурсатда “Шарқ” исми ила тасмиҳ қилинур” - деб “Тараққий” газетасининг илк сонида маълум қилган эди.  Газетани “Тараққий” газетаси ҳақида тадқиқот олиб борган Чўлпон, Авлоний, Зиё Саидлар бир овоздан ҳукумат томонидан ёпилганини ёзади. Ҳақиқатдан озодлик, эркинлик ғоялари яширинган ҳур фикрли мақолалар мустабид тузум амалдорларига ёқмаслиги аниқ эди.       

 “Тараққий” газетасида Исмоил Обидий ва Мунаввар Қори Абдурашидхонов билан бирга Шокир Мухторий, Исмоил Алиев, Малзу ал Фиқор, “Қаламкаш” каби публицистлар ўз мақолалари билан иштирок этиб туришган.

Ушбу газета фаолияти тўхтатилгандан кейин тараққийпарвар зиёлиларнинг журналистик ишлари тўхтаб қолмади, аксинча ривожланиб борди ва кўплаб газета ҳамда журналлар дунё юзини кўрди.

Тошкент ислом институти

“Ижтимоий фанлар” кафедраси

мудири О.Э. Тангиров

Яратган Парвардигоримизга беадад шукрлар бўлсин, бугунги кунимиз кечагидан, эртамиз бугунимиздан кўра фаровон, турмушимиз янада маъмур бўлиб боряпти. Бунинг тасдиғини ҳар қадамда учратиш мумкин. Албатта, бундай муваффақиятлар замирида муҳтарам Президентимиз ташаббуслари билан узоқни кўзлаб олиб борилаётган хайрли ишлар мужассам.

Ўзбекистон мусулмонлари идораси раиси, муфтий Усмонхон Алимов ҳазратлари бошчилигидаги бир гуруҳ таниқли уламолар бугун пойтахтимизнинг Олмазор, Шайхонтоҳур, Миробод, Мирзо Улуғбек, Яккасарой, Янгиҳаёт ва Сергели туманларига ташриф буюришди.

Ташриф давомида маънавий-маърифий учрашувлар, ҳудудлардаги аҳоли вакиллари билан юзма-юз мулоқотлар, таниқли уламолар иштирокида жоме масжидларда суҳбатлар ўтказилиши ва эҳтиёжманд оилалар ҳолидан хабар олиш каби хайрли ишларни амалга оширилди.

Муфтий Усмонхон Алимов ҳазратлари ҳамда Тошкент шаҳар бош имом-хатиби ўринбосари Абдуқаҳҳор домла Юнусов Мирзо Улуғбек туманидаги “Олтинтепа” жоме масжидига ташриф буюриб, намозхонлар биан учрашди, уларга сўнгги йилларда юртимизда амалга оширилаётган, диний-маърифий соҳадаги ислоҳотлар ҳақида сўзлаб берди:

• Бугун юртдошларимиз, мўмин-мусулмонларимиз ҳар қачонгидан ҳам кўра кўпроқ шукр қилишлари керак, – дейди муфтий ҳазратлари. – Чунончи, ҳаётимиз чек-чегарасиз моддий-маънавий неъматлар билан тўла. Илм-маърифат, соғлик, мол-давлат, фарзанд, қадр-қиммат сингари инъомлар билан сийланганмиз. Буларнинг барчаси тафаккур ва тадаббур қилишга ундайди. Неъмат етганда унинг шукрини унутиш, мусибат етганда эса умидсизликка учраб, туғёнга кетиш заиф ва иродасиз кишилар ишидир.

Суҳайб розияллоҳу анҳудан қилинган ривоятда Расулуллоҳ соллаллоҳу алайҳи ва саллам: “Мўминнинг иши ажойиб. Унинг барча иши яхшиликдир. Бу фақат мўмин учунгина хосдир. Агар унга хурсандчилик етса, шукр қилади, бунинг учун унга яхшилик бўлади. Агар унга зарар етса, сабр қилади, бунинг учун унга яхшилик етади” (Имом Муслим ривояти), деб марҳамат қилганлар.

Шундан келиб чиқиб, ҳар биримиз бугун шукрни янада кўпайтиришимиз керак. Зеро, кўп шукр нематларнинг зиёда бўлиши омилидир.

* * *

Шунингдек, бугун пешин намозига Ўзбекистон мусулмонлари идораси раисининг биринчи ўринбосари Ҳомиджон қори Ишматбеков “Коҳ ота бузруг”, Жалолиддин домла Ҳамроқулов “Усмон ибн Мазъун”, Шукрулло домла Эгамбердиев “Минор” ва Аброр Мухтор Али “Имом ат-Термизий” жоме масжидларига ташриф буюриб, мўмин-мусулмонларга “Шукрнинг фазилати ва юртимизда диний-маърифий соҳаларда амалга оширилаёган ислоҳотлар” мавзусида чиройли маърузалар қилиб беришди.

Ўзбекистон халқаро ислом академияси бош директори ўринбосари Шайх Абдулазиз Мансур ҳазратлари бугун пешин намозида Яккасарой туманидаги “Яккасарой” жоме масжидига ташриф буюриб, ҳудуддаги “Яккасарой”, “Тўқимачи” ва “Мерос” маҳалла фуқаролар йиғинлари аҳолисига “Шукрнинг фазилати ҳамда юртимизда диний-маърифий соҳаларда амалга оширилаётган ислоҳотларнинг мазмун-моҳияти” мавзусида маъруза қилиб бердилар.

Иброҳимжон домла Иномов, устоз Салоҳиддин домла Шарипов ва  бир гуруҳ уламолар Тошкент шаҳрининг “Қўйлиқ ота”, ва “Валихўжа ўғли Норхўжа” масжидларига бориб, мўмин-мусулмонлар билан дилдан суҳбатлашди.

Уламоларнинг ташрифидан хабар топган мухлис мўмин-мусулмонлар масжидларни тўлдиришди. Маърузалар сўнгида намозхонлар олимлардан ўзларини қизиқтирган саволларга атрофлича жавоб олишди.

* * *

Ҳар бир кишининг ўзига яраша ташвиши, муаммоси бўлади. Ана шундай кишиларга кўмаклашиш динимиз амридир. Зеро, ҳадиси шарифда: “Ким бу дунёда бир мусулмоннинг ташвишини аритса, Аллоҳ таоло охиратда унинг ташвишларини аритади”, дейилган (Имом Табароний ривояти).

Таниқли уламолар Олмазор туманидаги “Эски шаҳар”, “Умид” ва “Шодиёна” маҳаллалари аҳолиси билан учрашиб, уларни қийнаётган муаммоларнинг бартараф этилишига кўмаклашди.

* * *

Пойтахтимиз маҳалларига ташриф жараёнида аёллар, отинойилар ҳамда Тарғибот  гуруҳлари аъзолари ҳам фаол иштирок этмоқда.

Бугунги ташриф асносида Дин ишлари бўйича қўмита масъул ходими Омила Арипова, Ўзбекистон мусулмонлари  идораси маъсул ходими Марямхон Абдуллаева Сергели, Янгиҳаёт ва Олмазор туманлари маҳаллаларида бўлишди.

Улар Тарғибот гуруҳлари раҳбарлари, ҳудудларга бириктирилган отинойилар ҳамда маҳалла фаоллари билан биргаликда Сергели туманидаги “Соҳибқирон” маҳалласида, Янгиҳаёт туманидаги 285-мактабда хотин-қизлар билан учрашувлар ўтказишди.

Олмазор туманидаги “Эски шаҳар”, “Умид” ва “Шодиёна” маҳаллаларида яшовчи оилаларга кириб, улар билан мулоқот қилиб, дилдан суҳбатлар уюштиришди.

Аҳолига юртимизда инсон манфаатларини кўзлаб амалга оширилаётган ислоҳотлар, хотин-қизларга қаратилаётган эътибор ҳақида сўзлаб беришди.

* * *

Ташрифлар давомида “Вақф” хайрия жамоат фондига моддий ёрдам сўраб мурожаат қилган ҳеч бир оила эътибордан четда қолмади. Бундай оилаларнинг ҳар бирига фонд томонидан ажратилган пул маблағлари ҳамда совға томонидан саломлар етказиб берилди.

* * *

Бир кунлик ташрифлар фақат ана шу хайрли ишлар билангина чекланиб қолмади. Яна қанчадан-қанча одамларнинг кўнглига илиқлик кирди, маҳаллалар аҳолисининг, мўмин-мусулмонларнинг маънавияти, маърифати юксалди. Энг муҳими, уламоларнинг ибратли маърузалари, савол-жавоблар барчага бирдек манзур бўлганини уларнинг: “Яна тез-тез келиб туринглар”, деганидан ҳам билиш мумкин.

Хулоса қилиб айтганда, бундай хайрли ташрифлар ҳазрат Алишер Навоийнинг “Одамий эрсанг, демагил одами, ониким, йўқ халқ ғамидин ғами” деган ҳикматининг ҳамда Заҳириддин Муҳаммад “Бори элга яхшилиғ қилғилки, мундин яхши йўқ”, деган сўзларининг амалдаги инъикосидир. Зеро, халққа, юртдошларимизга хизмат қилиш инсонийликнинг олий мезонидир.

Ўзбекистон мусулмонлари идораси

Тошкент шаҳар вакиллиги

Матбуот хизмати

Мамлакатимизда муҳтарам Президентимиз Шавкат Мирзиеёв ташаббуси билан барча соҳалар қатори диний-маърифий йўналишларда амалга оширилаётган улкан ислоҳотлар, аввало, аҳолининг маънавий-маърифий савиясини юксалтиришга, уларнинг турмушдан рози бўлиб, шукроналик ҳисси билан яшашга, эртанги кунга ишончини янада мустаҳкамлашга хизмат қилмоқда. Энг муҳими, бу ташрифлар юртдошларимизни шу юрт равнақига ҳисса қўшишга, уларда Ватан тақдирига дахлдорлик ҳиссини кучайтиришга  ундамоқда.

Ўтган ҳафта Ўзбекистон мусулмонлари идораси раиси, муфтий Усмонхон Алимов ҳазратлари бошчилигидаги бир гуруҳ уламолар Андижон, Фарғона ва Наманган вилоятларига ташриф буюриб, халқ билан маънавий-маърифий учрашувлар, олис ва чекка ҳудудлардаги аҳоли вакиллари билан юзма-юз мулоқотлар, жоме масжидларда суҳбатлар ўтказиб, эҳтиёжманд оилалар ҳолидан хабар олган эдилар.

Бугун, 2021 йил 25 июнь куни уламолар мазкур анъанани давом эттириб, Тошкент вилоятига ташриф буюрдилар. Дастлаб Ўзбекистон Республикаси Президентининг маслаҳатчиси Шоазим Миноваров бошчилигида Тошкент вилояти бош имом-хатиби Жасурбек домла Раупов ҳамда Ўзбекистондаги ислом цивилизацияси маркази масъул ходими Аброр Мухтор Алий Олмалиқ шаҳрига ташриф буюриб, ижтимоий ҳимояга муҳтож фуқаролар билан учрашиб, уларнинг дарду ташвишларини тинглашди. Шаҳар сектор раҳбарлари билан ҳудуддаги ижтимоий объектларни кўздан кечиришди.

Ўзбекистон мусулмонлари идораси раисининг биринчи ўринбосари Ҳомиджон қори Ишматбеков, Муҳаммадайюбхон домла Ҳомидов ва Тошкент вилояти бош имом-хатиби ўринбосари З.Нортожиевлар Ангрен шаҳридаги “Қорабоғ”, “Саид ота” масжидлари атрофидаги аҳоли билан мулоқотлар қилишди.

Ўзбекистон мусулмонлари идораси раисининг маслаҳатчиси, таниқли олим Салоҳиддин домла Шарипов Ангрен шаҳридаги “Облиқ” масжидига ташриф буюриб, жоменинг қурилиш жараёни билан яқиндан танишди ҳамда ўзининг қимматли маслаҳатларини берди.

* * *

Ташрифнинг жума куни бошланишида ҳам рамзий маъно бор, албатта. Чунки ҳадиси шарифда: “Қуёш чиққан куннинг энг яхшиси жума кунидир” (Имом Термизий ривояти), дейилган. Дарвоқе, жуманинг файзи бўлакча. Шу билан бирга, бу кунда бажариладиган хайрли амалларнинг ажрлари кўпайтирилиб берилади. Иншоаллоҳ.

Бугунги жума мавъизаси мавзуси “Юсуф алайҳиссалом қиссасидан ибратлар” бўлиб, бу мавзуни уламолар: Ҳомиджон қори Ишматбеков Ангрен шаҳридаги “Қорабоғ”, Салоҳиддин домла Шарипов “Облик”, Нуриддин домла Холиқназаров Бўка туманидаги “Ўрта Қўрғон”, Абдуқаҳҳор домла Юнусов Янгийўл туманидаги “Гулбоғ”, Жалолиддин домла Ҳамроқулов Оққўрғон туманидаги “Нодирхон қори”, Аброр Мухтор Алий домла Олмалиқ шаҳридаги “Рамазони шариф” жоме масжидларида мўмин-мусулмонларга таъсирчан тарзда етказишди.

Дарҳақиқат, таниқли уламоларнинг, дин пешволарининг маърузаларини эшитиш кишига ўзгача завқ бағишлайди. Шу боис кўплаб кишилар уларнинг масжидларига ошиқадилар, маърузаларидан баҳраманд бўлишга интиладилар. Бугун эса, уламоларимиз аҳоли орасида, уларнинг ўзлари халқ билан учрашиб турибди. Бу катта имкониятдир.

Воизларнинг бугунги жума мавъизасидан мўмин-мусулмонлар сир сақлаш; ҳасаддан тийилиш; тўғри йўлдан адаштирувчи амаллардан четланиш; ҳақ йўлда сабр ва сабот кўрсатиш; ўзини туҳматдан поклаш каби динимиз таълимотларини таъсирчан мисоллар орқали билиб олишди.

* * *

Муқаддас динимиз доимо яхшилик қилишга ундайди. Аллоҳ таоло Ар-Раҳмон сурасининг 60-оятида: «Эҳсон (эзгулик)нинг мукофоти фақат эҳсон (эзгулик)дир», деб марҳамат қилади.

Ояти каримани ўзиларига шиор қилиб олган уламолар эҳтиёжманд оилаларга кўмак бериб, уларнинг кўнгилларини кўтаришмоқда.

Тошкент вилоятига ташрифлар давомида маънавий-маърифий учрашувлар, олис ва чекка ҳудудлардаги аҳоли вакиллари билан юзма-юз мулоқотлар, таниқли уламолар иштирокида жоме масжидларда суҳбатлар ўтказилиши баробарида эҳтиёжманд оилалар ҳолидан ҳам хабар олиняпти.

Ўзбекистон мусулмонлари идораси раиси ўринбосари Ҳомиджон қори Ишматбеков ва Ангрен шаҳар бош имом-хатиби Яҳёхон Бобохонов ҳудуддаги кам таъминланган оилаларга “Вақф” хайрия жамоат фонди ажратган эҳсонни топширишди.

Нуриддин домла Холиқназаров, Собиржон домла Рустамов, Баҳриддин домла Шарипов ҳамда Ҳ.Тошбоевлар Бўка туманидаги кам таъминланган, боқувчисини йўқотган оилалар ҳолидан хабар олишди.

Шунингдек, Абдуллоҳ домла Йўлдошев ҳамда Обиджон домла Мирҳамидов Оққўрғон туманида бўлишиб, кам таъминланган оилаларга “Вақф” фонди томонидан берилган моддий ёрдамлар ҳамда совғаларни улашди.

Янгийўл туманидаги “Умид” маҳалла фуқаролар йиғинида яшовчи эҳтиёжманд оилалар ҳам “Вақф”нинг мурувватидан бебаҳра қолмади. Абдуқаҳҳор домла Юнусов, Миродил домла Миржалилов ҳамда Қамариддин домла Қамбаровлар моддий ёрдам ва совғаларни ҳақдорларга етказишди.

Аллоҳ таоло эҳсонларни даргоҳида қабул қилсин.

* * *

Тошкент вилоятига ташриф буюрган уламолар кун тартибидан инсон манфаатларига хизмат қиладиган, аҳолининг маънавий-маърифий савиясини юксалтирадиган, одамларни эртанги кундан рози бўлиб яшашга ундайдиган ҳеч бир масала эътибордан четда қолмаяпти.

Шу билан бирга, вақт тиғиз бўлишига қарамай, уламоларимиз Ватан, эл, дин учун хизмат қилиб ўтган азиз инсонларнинг оила аъзоларини зиёрат қилишни ҳам унутишмади.

Муфтий ўринбосарлари Ҳомиджон домла Ишматбеков ва Иброҳимжон домла Иномов, раис маслаҳатчиси Салоҳиддин домла Шарипов, Муҳаммадайюбхон домла Ҳомидов ва бошқа уламолар кўп йиллар давомида динимиз равнақи йўлида катта хизмати сингган Тошкент вилоятининг собиқ бош имом-хатиби марҳум Хайрулла домла Турматовнинг оиласи ҳолидан хабар олишди.

Марҳумнинг ҳаққига Қуръони карим тиловат қилиниб, Хайрулла домланинг амалга оширган хайрли ишлари эсга олинди.

Аллоҳ таоло Хайрулла домлани раҳматига олсин.

* * *

Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари, Ўзбекистон халқаро ислом академияси ректори Музаффар Комилов ҳамда Тошкент шаҳар бош имом-хатиби ўринбосари Абдуқаҳҳор Юнусов Янгийўл туманидаги “Эски қовунчи” жоме масжидида аҳоли билан учрашди, уларнинг дарду ташвишларини тинглади.

Шунингдек, уламолар “Ёшлик”, “Гулистон”, “Қовунчи”, “Пистали” ва “Дархон” маҳаллалари аҳолиси билан ҳам дилдан суҳбатлашишди. Учрашув жуда кўтаринки кайфиятда бўлиб ўтди.

* * *

Бир оғиз ширин сўз киши кўнглини кўтаради. Аксинча, ёмон сўз кўнгилларни барбод қилади. Зотан, ширинсухан бўлиш динимиз амридир. Расулуллоҳ соллаллоҳу алайҳи ва саллам ҳам ҳар доим одамларга ширин сўз айтганлар.

Ташриф давомида фидойи аёллар ҳам фаол қатнашиб, маҳалларда аҳоли билан учрашувлар ўтказишди. Бугунги ташриф асносида Дин ишлари бўйича қўмита масъул ходими О.Арипова, Ўзбекистон халқаро ислом академияси маъсул ходимиҲ.Тўйчиева, Ўзбекистон мусулмонлари  идораси маъсул ходимиМ.Абдуллаева ва Тошкент вилояти Тарғибот гуруҳи раҳбари О.Парпибоева, Тошкент вилоятибош имом-хатибининг хотин-қизлар масалалари бўйича маслаҳатчиси Н.Имомова ҳамда ҳудудга бириктирилган отинойилар маҳалла фаоллари билан биргаликда Бекобод туманидаги “Амир Ҳамза” жоме масжиди атрофида жойлашган “Бўстон” маҳалласида яшовчи муаммоли аҳоли билан мулоқот қилиб, оилаларга кириб, улар билан дилдан суҳбатларуюштиришди.

Аҳолига юртимизда инсон манфаатларини кўзлаб амалга оширилаётган ислоҳотлар ҳақида сўзлаб беришди.

Мухтасар айтганда, бир кунлик ташриф давомида Тошкент вилоятининг Олмалиқ ва Ангрен шаҳарлари ҳамда Янгийўл, Оққўрғон, Бўка ва Бекобод туманлари аҳолиси билан ўтказилган маънавий-маърифий учрашувлар, олис ва чекка ҳудудларда яшовчи кишилар билан қилинган юзма-юз мулоқотлар, жоме масжидларда уюштирилган суҳбатлар одамларда жуда катта қизиқиш уйғотди. Айниқса, эҳтиёжманд оилалар ҳолидан хабар олингани уларнинг ёлғиз эмаслигини англатди.

Хайрли ишлар давом этади.

Ўзбекистон мусулмонлари идораси

Тошкент вилояти вакиллиги

 Ахборот хизмати

Доктор Салоҳ Муҳаммад Абул Ҳаж Ал-Ҳанафий ҳафизаҳуллоҳ