Бугун, 11 июнь куни Ўзбекистон мусулмонлари идораси раиси, муфтий Усмонхон Алимов ҳазратлари Андижон вилоятидаги “Зубайр ибн Аввом” жоме масжидида намозхонлар билан шом намозини бирга-бирга адо этдилар.

Муфтий ҳазратлари ўз мавъизаларида бугунги кунда мўмин-мусулмонларга муҳтарам Президентимиз раҳнамоликларида жуда катта имкониятлар берилаётгани, шароитлар ҳозирланаётгани ҳақида гапириб, диний-маърифий соҳада қилинаётган ўзгаришлар, янгиланишлар ва хушхабарлар ҳақида сўзлаб бердилар.

Ўзбекистон мусулмонлари идораси Матбуот хизмати

Шу йил 12 июнь куни Ўзбекистон мусулмонлари идораси раиси, муфтий Усмонхон Алимов ҳазратлари бошчилигидаги бир гуруҳ уламоларнинг Фарғона вилоятига ташрифлари бошланади.

Ташриф давомида маънавий-маърифий учрашувлар, олис ва чекка ҳудудлардаги аҳоли вакиллари билан юзма-юз мулоқотлар, таниқли уламолар иитирокида жоме масжидларда суҳбатлар ўтказилиши ва эҳтиёжманд оилалар ҳолидан хабар олиш каби хайрли ишларни амалга ошириш мақсад қилинган.

Шунингдек, вилоят аҳлини юртимизда бўлаётган ўзгаришлар мазмун-моҳияти ҳақида хабардор қилиш билан бир қаторда уларнинг дарду ташвишларига кўмаклашиш, фикр-мулоҳазаларини тинглаш ва диний соҳага тегишли муаммоларини жойида ўрганиб, бартараф этиш ҳам кўзда тутилган.

Қолаверса, ушбу мулоқот ва тадбирларда Ўзбекистон Республикаси Президенти маслаҳатчиси Шоазим Миноваров, Дин ишлари бўйича қўмита раиси Содиқжон Тошбоев ва бошқа мутасаддилар ҳам иштирок этиши режалаштирилган.

Аллоҳ таоло вилоятимизга уламоларимиз сафарини хайрли ва манфаатли қилсин!

Ўзбекистон мусулмонлари идораси Матбуот хизмати
@muslimuzportal | @mp3muslim | @diniysavollar

Бугун, 11 июнь куни Ўзбекистон мусулмонлари идораси раиси, муфтий Усмонхон Алимов ҳазратлари Андижон вилояти Асака туманидаги “Холид ибн Валид” жоме масжидига ташриф қилиб, намозхонлар билан биргаликда жума намозини адо этадилар.

Муфтий ҳазратлари жума намозидан аввал ўзларининг гўзал панду насиҳатлари ила кишиларни дину диёнат, имон-эътиқод, сабру тоқат, шукроналик, олийжаноблик ва самимийлик каби фазилатларга даъват этадилар.

Шунингдек, юртимизда амалга оширилаётган энг сўнгги янгиликлар ила мўмин-мусулмонларимизни хушнуд этадилар.

Жума тафсилотларини сайт ва ижтимоий тармоқларда кузатиб боринг.

Ўзбекистон мусулмонлари идораси Матбуот хизмати
@muslimuzportal | @mp3muslim | @diniysavollar

Бугун, 10 июнь куни эрта тонгда Ўзбекистон мусулмонлари идораси раиси, муфтий Усмонхон Алимов ҳазратлари, Президент маслаҳатчиси Шоазим Минаваров, Дин ишлари бўйича қўмита раиси Содиқжон Тошбоев Андижон шаҳридаги “Мирпўстин ота” зиёратгоҳига ташриф буюришиб, муборак қадамжони зиёрат қилишди. Меҳмонларга Андижон вилояти бош имом-хатиби Мирзамақсуд Алимов ва Диний идора ишбошқарувчиси Рустам Жамилов ҳамрохлик қилмоқда.

Диний соҳа раҳбарлари зиёрат асносида Мирпўстин ота ва бошқа улуғ ота-боболаримиз ибратли ҳаёти ва фаолиятлари эсга олиниб, юртимиздаги муборак масканлар обод этилаётгани, зиёрат туризмига алоҳида эътибор қаратилаётгани, улуғ ота-боболаримиз қўним топган масканларни обод қилиш, уларнинг беқиёс меросини ўрганиб, ёш-авлодни уларга муносиб қилиб тарбиялаш зарурлиги таъкидланди.

Қуръони карим оятлари тиловат қилиниб, савоби азиз авлиёлар руҳига бағишланди, юртимиз тинчлиги, халқимиз фаровонлигини сўраб хайрли дуолар қилинди.

Шунингдек, ушбу муборак масканда Ҳақ таоло ризолиги учун бир қўчқор сўйилиб, савоби ўтган улуғларимиз ҳаққига бахшида этилди.

Андижон сафари давом этмоқда.

Ўзбекистон мусулмонлари идораси матбуот хизмати

Жамият тараққиётининг таназзулга учраши ва фуқароларнинг ислоҳотларга бўлган ишончи йўқолишининг сабабларидан бири порахўрликдир. Ўзгалар молини ноҳақ йўл билан ейиш бу иллатнинг бир кўриниши. Ота-боболаримиз бундай луқмадан қаттиқ ҳазар қилган, гуноҳ ҳисоблаган. Ҳолбуки, динимизда бировнинг молини ўзлаштириш ҳаром дея таърифланган.

Ҳаётда турли эҳтиёж ва заруратлар мавжуд. Шундай ҳолатларда инсон ҳамкорга, қўллаб-қувватловчи ва таскин берувчига муҳтожлик сезади. Мана шу эҳтиёжмандлик ортидан ўрнатилган муносабатлар ҳалоллик ва тўғрилик асосига қурилиши лозим. Акс ҳолда оқибати хайрли бўлмайди. 

Пора — ўзгалар молини ноҳақ ейишнинг бир кўриниши. Унинг арабча маъноси “ришва” бўлиб, ислом уламолари: “Пора — киши ўзи ҳақли бўлмаган нарсага эришиши ёки зиммасида лозим бўлган нарсадан қутулиши учун тақдим этган мол ёки манфаатдир”, деб таъриф берадилар. У пул шаклидагина эмас, бирор ишни бажариш ёки бажармаслик орқали ҳам манфаатни ҳосил қилиш эканини англатади.

Пора берувчи қинғир йўллар билан ўз мақсадига эришишга уриниши туфайли ўзгалар ишончини суистеъмол қилинишига, натижада бундан норози кайфиятдаги қатламнинг вужудга келишига сабабчи бўлади. Порани “ҳадя”, “совға” сифатида берилди”, дея ўзини оқлашга одатланганлар адашадилар. Берувчи “кўнгилдан чиқди”, “атадик” каби “чиройли” сўзлар билан қабиҳ режаларини амалга оширади. Исломда “ҳадя”нинг аниқ таърифи шуки, бирор инсонга нафи тегиши мақсадида ниманидир (савобдан бошқа ҳеч қандай манфаатни кўзламай) беришидир. Порахўр эса ўз қилмиши билан динига, иймонига, виждонига, ишониб топширилган вазифасига, халқига, энг асосийси “яхшилик қиляпман” дея оиласи, фарзандларига хиёнат қилаётганини англаб етмайди.

 Ачинарлиси, аҳолининг кам таъминланган ва боқувчисини йўқотган қатламига давлат томонидан бериладиган маблағларни ажратишда ҳам айрим мутасадди шахсларнинг қўштирноқ ичидаги ҳадяларга кўз тикиб қолаётганидир. Имом Муслим Адий ибн Умар разияллоҳу анҳудан ривоят қилинган бир ҳадисда, Расулуллоҳ саллаллоҳу алайҳи васаллам: “Кимни бирор ишга бошлиқ қилсак ва у игнадек нарсани яширса, Қиёмат куни омонатга хиёнат қилгани учун жавобгарликка тортилади”, дедилар. Шунда ал-Ансор қабиласига мансуб қора танли бир киши Расулуллоҳ саллаллоҳу алайҳи васалламнинг ёнларига келиб: “Эй Аллоҳнинг Расу­ли! Менга топширган ишингизни (закот ва садақа йиғиш вазифасини) қайтариб олинг”, деб айтди. Расулуллоҳ саллаллоҳу алайҳи васаллам: “Сенга нима бўлди?” — деб сўраганларида ҳалиги одам: “Сиз шундай-шундай деганингизни эшитдим”, дея юқоридаги сўзини келтиради. Шунда Расулуллоҳ саллаллоҳу алайҳи васаллам: “Ҳозир яна қайтариб айтаман, кимни бирор ишга бошлиқ қилсак, озиниям, кўпиниям яширмай олиб келсин. Нимани берсак, уни олсин. Нимадан қайтарсак, уни олишдан ўзини тийсин”, дедилар. Динимиз кўрсатмаларида, порахўрлар ва уларнинг разил мақсадли ҳамтовоқлари, қилмишидан қайтиб, чин дилдан тавба қилмаса, дунё ва охиратда ниҳоятда оғир жазолар кутиб тургани ҳақида оят ва ҳадислар орқали жиддий огоҳлантирилган. 

Хулоса ўзимиздан. Динимизда пора берувчининг ҳам олувчининг ҳам азобга дучор бўлишдаги даражаси баравар. Бу каби ижтимоий-салбий иллатдан халос бўлиш ва уларга қарши курашишда ҳамжиҳатлик билан ҳаракат қилишимиз лозим. 

Акмалхон АҲМЕДОВ,

Ўзбекистон мусулмонлари идораси мутахассиси.

"Hamkor press" газетаси 2021 йил 25 феврал, 4-сон