Британияда ўтказилган «Йил раҳбари» нуфузли танлов мукофотига халқаро хайрия ташкилотининг биринчи аёл бош раҳбари Ридвана Уоллес Лаҳер сазовор бўлди.

Уоллес Лаҳер 1 сентябрь куни Бирмингемда бўлиб ўтган тақдирлаш маросимида бош совринни қўлга киритди. Бу ҳақда Wakefield Express манбаси хабар берди. 

«British Asian Professional Awards 2023»танловида «Йилнинг бош раҳбари» мукофотини қўлга киритиш мен учун шарафдир», дейди Уоллес Лаҳер.

– Бу эътироф нафақат шахсий ютуқ, балки жамоамнинг саъй-ҳаракатлари ва ижобий ўзгаришларни илгари суриш мажбуриятимизга ҳурматдир. Мен хилма-хиллик ва инклюзивликни қадрлайдиган жамиятнинг бир қисми эканлигимдан фахрланаман. Бундан кейин ҳам муваффақият ва имкониятлар йўлини кенгайтиришда давом этаман.

Oceanic Consulting томонидан ташкил этилган Британия Осиё Профессионал мукофотлари Британия ҳамжамиятида муҳим роль ўйнайди.

Уоллес Лаҳер шу йил бошида халқаро мусулмон хайрия ташкилотининг янги бош ижрочи раҳбари этиб тайинланган. У биринчи мусулмон аёл сифатида тарихга кирди.

У таълим ва хайрия соҳасида қарийб 20 йилдан бери етакчилик қилиб келмоқда. Катта тажрибага эга бўлган Уоллес Лаҳер инновациялар, ҳамкорлик ва рақамли трансформацияни тарғиб этиш орқали ташкилий ўсиш ва диверсификацияни рағбатлантирди.

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Пайғамбаримиз соллаллоҳу алайҳи васаллам ҳамроҳлари Абу Бакр Сиддиқ розияллоҳу анҳу билан Мадина сари йўлда боришар экан, бир жойда тўхтаб, бир чўпоннинг ўзидан рухсат сўраб унинг қўйи сутидан ичишади.

Одатда арабларда сутни бироз совутиш учун унга муздек сув қўшиб ичишар эди. Ҳазрати Абу Бакр Сиддиқ розияллоҳу анҳу сув қўшилган сутни Пайғамбаримиз соллаллоҳу алайҳи васалламга узатадилар. Набий соллаллоҳу алайҳғи васаллам чанқоқлари босилгунча ҳалиги муздек сутдан ичадилар. Бу ҳолни кўриб турган Абу Бакр Сиддиқ шундай баён қиладилар:

“Мен сутни Набий алайҳиссолату вассаломга узатдим. У зот чанқоқлари босилгунча сутдан ичдилар ва чанқоқлари босилди. Бу ҳолни кўриб мен тўйдим, менинг ҳам чанқоғим босилди”.

Қаранг, бирга йўлга чиққан, сафар машаққатларини бирга бошдан кечирган, биргаликда чанқаган, биргаликда қийналган, чангу тўзонга беланган Абу Бакр Сиддиқ розияллоҳу анҳу ҳали бир қултум сут ичмасдан, сув ичмасдан маҳбубининг сув ичиб, сут ичиб чанқоқлари босилганини кўриб, “Мен тўйдим, чанқоғим босилди” деяптилар. Бу жуда ҳам буюк муҳаббат, азизлар.

Абу бакр Сиддиқ розияллоҳу анҳу ҳақларида, у кишини севиш ҳақида баъзи гапларни уламоларимиз келтиришган.

Жумладан, Ибн Жавзий раҳматуллоҳи алайҳи шундай деганлар:
“Салафи солиҳларимиз ўз фарзандларига Абу Бакр ва Умар розияллоҳу анҳумони севишни худди Қуръондан бир сура ўргатгандек ўргатишар эди”.

Қаранг, Қуръони Каримдан бир сура ўрганиш қандай муҳим бўлса, қандай жиддий иш бўлса, Абу Бакр ва Умар розияллоҳу анҳумога бўлган муҳаббатни ўрганиш-ўргатиш ҳам ана шундай жиддий иш деб қарашар эди.

Тобеинлардан Масруқ раҳматуллоҳи алайҳи “Албатта, Абу Бакр ва Умарни яхши кўриш, уларга муҳаббат қўйиш суннат амаллардандир” деганлар. Бу гапни эшитган бир киши Ҳасан Басрий раҳматуллоҳи алайҳининг ҳузурларига бориб, “Эй буюк имом, эй тобеинларнинг буюги, Абу Бакр ва Умар розияллоҳу анҳумони севиш суннат амалми?” деб сўраганда, у киши “Йўқ, балки уларни севиш фарз амаллардандир” деб жавоб берганлар.
Ҳа, азизлар! Воқеамиз қаҳрамони ана шундай буюк мақом соҳиби эдилар. У кишининг саҳобаликлари Роббул оламийн томонидан тасдиқланган, умматга баён этилган зот эдилар. У киши бутун борлиқларини оила аъзолари билан биргаликда Ислом учун фидо қилдилар, шу йўлда хизмат қилдилар.

Аллоҳ таоло бизга ҳам ана шундай муҳаббат берсин! Ибодатларимизни ихлос билан ўз вақтида адо этиб боришимизни насиб этсин, омин!
 

Нозимжон Ҳошимжон тайёрлади

Шайх Абдулқодир ал-Ҳусайний

Туркия Маданият ва туризм вазирлиги Истанбулнинг энг муҳим тарихий жойларидан бири Aясофии масжидида таъмирлаш ишлари бошланганини маълум қилди.

IQNA агентлиги “Hurriyet Daily” нашрига таяниб хабар беришича, Туркия Маданият ва туризм вазирлиги мамлакатнинг энг йирик шаҳридаги энг муҳим тарихий масканлардан бири бўлган Aясофия масжидини таъмирлаш ишлари бошланганини билдирди.

Вазирлик баёнотига кўра, Туркия Маданият ва туризм вазирлиги томонидан бошланган таъмирлаш лойиҳаси 1 500 йиллик бинонинг “асрлар давомида қадимийлигини йўқотгани” учун амалга оширилмоқда.

Мутахассислар эрамиздан аввалги 6-асрга оид бу тарихий бино ичи ва ташқарисида катта зарарни аниқлади.

50 йилдан ортиқ давом этиши мумкин бўлган янгилаш ва таъмирлаш ишлари объектни тўлиқ ёпиб қўймасдан, босқичма-босқич амалга оширилади, деди расмийлар.

Дастлаб, ибодатхона, кейинроқ Усмонли император масжиди сифатида фаолият юритган бу тарихий бино 1935 йилда музей сифатида қайта очилган ва Усмонли ҳамда Византия санъатининг ўзига хос хусусиятларини намойиш этади. 2020 йилда бу бино яна масжидга айлантирилди.

Ўзбекистон мусулмонлари идораси
Матбуот хизмати

Ташриф

Бугун Тошкент шаҳар бош имом-хатиби Абдуқаҳҳор домла Юнусов пешин намозига Чилонзор туманидаги "Фотимаи Заҳро" жоме масжидига ташриф буюриб, намоздан сўнг мўмин-мусулмонларга Мавлид ойи муносабати билан Расулуллоҳнинг сийратлари, гўзал хулқ соҳиби бўлганлари ҳақида мавъиза қилиб, жумладан, бундай дедилар:
– Абдуллоҳ ибн Умми Мактум исмли кўзи ожиз киши эди. У Расули акрам соллаллоҳу алайҳи ва салламнинг банд эканларини сезмай, ўзининг саволларига жавоб олишга ҳаракат қилади. Ундан малолланган Пайғамбаримизнинг кайфиятлари бузилиб, саволларига жавоб бермайдилар. Бу муомала Ҳақ таолога хуш келмади ва Абаса сурасининг дастлабки оятлар билан танбеҳ берди. Танбеҳни ҳам: "қовоғинг уюлди" демасдан, "қовоғи уюлди", - деб учинчи шахс шаклида айтди. Бу эса унча қаттиқ ботмайди. Пайғамбаримиз олий хулқ эгаси бўлатуриб, кўзи ожиз одамга шундай совуқ муомала қилдиларми, деган савол туғилиши мумкин. Йўқ, асло! Биринчидан, ўзлари Макка зодагонларини ҳидоят сари йўналтира олармиканман, деб ҳаракат қилиб турганларида биров келиб бундан чалғитган ҳолатни тасаввур қилиб кўринг. Бошқа ҳар қандай одам у зотнинг ўрнида бўлганида уни жеркиб ташлаган бўлур эди. Лекин Набий алайҳиссалом юзларини буриштириш билан кифояландилар. Буни у киши пайқагани ҳам йўқ. Лекин улуғларнинг озгина саҳву хатоси ҳам бошқаларга нисбатан катта нуқсон ҳисобланади. Бинобарин, Ҳақ таоло ўз Ҳабибини огоҳлантириб қўйди.
Суҳбат сўнгида хайрли дуолар қилинди.