Савол: Сийрат танловига материал топширишнинг энг охирги куни қачонгача?

Жавоб: Танлов учун материаллар 2023 йилнинг 30 сентябрь куни соат 24:00 га қадар қабул қилинади.

Савол:Ушбу танловда хотин-қизлар ҳам иштирок этса бўладими?

Жавоб: Албатта, ушбу танловда 18 ёшдан катта аёл-қизлар иштирок этишлари мумкин.

Савол: Танловга мақолаларни телеграмдаги бот орқали юбориш мумкинми?

Жавоб: Йўқ, материллар бот орқали қабул қилинмайди. Танлов учун материаллар Ф.И.Ш, манзили, телефон рақамларини тўлиқ кўрсатган ҳолда ушбу линкдаги google формага (https://forms.gle/v9GzKuNK5zhpvL679) ёки Ўзбекистон мусулмонлари идорасига намунадаги аризани (https://docs.google.com/document/d/13VIuRuKQZfZTn8sLWfFg_U_oy_cmQrH4/edit?usp=sharing&ouid=102940526358584270487&rtpof=true&sd=true) тўлдириш орқали жўнатилади.

Савол: Танловда қайси китоблардан савол-жавоб бўлади?

Жавоб: Танловда савол-жавоб ўтказилмайди. Танловда Расулуллоҳ соллаллоҳу алайҳи васаллам сийратларига оид ёзилган китоблар, рисолалар, таржималар, мақолалар, қасидалар, ҳикоялар, мобиль иловалар, электрон дастурлар, қисқа метражли фильмлар, аудио материаллар, инфографикалар билан иштирок этиш мумкин.

Савол: Танловда кимлар иштирок этиши мумкин?

Жавоб: Танловда 18 ёшдан катта сийратга муҳаббатли барча салоҳиятли эркак ва аёллар иштирок этишлари мумкин.

Савол: Танловнинг учта йўналишида ҳам иштирок этсам бўладими?

Жавоб: Танловда иштирокчилар фақатгина битта йўналишда иштирок этиш ҳуқуқига эга.

Савол: Ҳозирда Россияда истиқомат қилмоқдаман. Мен ҳам ушбу танловда қатнашсам бўладими?

Жавоб: Албатта қатнашсангиз бўлади. Танловда ҳар бир Ўзбекистон фуқароси иштирок этиши мумкин.

Савол: Танловга тақдим этилган мақола бирор журнал ёки газетада нашр этилган бўлиши керакми?

Жавоб: Йўқ, мақолалар ОАВда эълон қилинмаган бўлиши керак.

Савол: Танловнинг бош мукофоти – ҳаж йўлланмаси неча кишига берилади?

Жавоб: Бир нафар иштирокчига бош мукофот – ҳаж зиёрати йўлланмаси тақдим этилади. Шунингдек, танловнинг 3 та йўналишининг ҳар бири орасидан 1, 2, 3-ўринлар учун ғолиблар аниқланади.

Савол: Мақоланинг электрон вариантини юборсам бўладими?

Жавоб: Мақолани электрон шаклда ҳам, қоғозга чиқариб ҳам юборсангиз бўлади.

Савол: Танловда агар икки ёки ундан ортиқ иштирокчилар бир хил балл тўпласа ғолиб қандай аниқланади?

Жавоб: Бундай ҳолатда баҳолаш мезонларининг долзарблиги ва аҳамиятидан келиб чиққан ҳолда Ҳакамлар ҳайъати қарори асосида ғолиб аниқланади.

Савол: Танловга қайта нашр этилган китоб топширсам бўладими?

Жавоб: Китоблар, асарлар, таржималар охирги икки йилда нашр қилинган ва илк нашр бўлиши лозим. Қайта ёки тўлдирилган нашрлар қабул этилмайди.

Танлов ҳақида батафсил маълумотлар қуйидаги линкларда:

1. https://t.me/muslimuzportal/34853
2. https://t.me/muslimuzportal/34971

Ўзбекистон мусулмонлари идораси

Матбуот хизмати

Muslim.uz

Бу йил Ўзбекистон мусулмонлари идораси тизимида Ҳазрати Пайғамбаримиз соллаллоҳу алайҳи васаллам таваллуд топган Робиул аввал ойи ҳар йилгидан ўзгача шукуҳ ва тароватда ўтмоқда. Буни Диний идора биносида ёққол сезиш мумкин. Киравериш ва йўлаклар муборак ой фазилатини акс эттирувчи лавҳа ва сийратга оид ояти карима, ҳадиси шариф, шиор ва саловатлар билан безатилган. Идорага ташриф буюрувчи ҳар бир кишига мавлид ҳадялари улашилмоқда. Бундай тараддудни диёримиздаги барча жоме масжид ва диний таълим муассасаларида кўриш мумкин.

Шунингдек, масжидларимизда Расулуллоҳ соллаллоҳу алайҳи васалламнинг гўзал одоб-ахлоқларига оид мавъизалар қилиниб, хушовоз қорилар Набий алайҳиссалом тўғрисида битилган Имом Барзанжийнинг “Мавлиди шарифи”ни ўқишмоқда.

Олий ва ўрта махсус диний таълим муассасаларида эса сийратга оид давра суҳбатлари ва мусобақалар ташкил этилмоқда. Мазкур мусобақаларнинг якуний босқичи Диний идорада ўтказилиши режалаштирилган.

“Маданият ва маърифат” телеканалидаги “Маърифий суҳбатлар” кўрсатувида сийратга оид сонлари тайёрланиб, эфирга узатилаётани ҳам халқимиз учун манфаатли бўлаётир.

Ўзбекистон мусулмонлари идораси muslim.uz порталидаги Расул алайҳиссалом сийратларига бағишланган туркум мақолалар, уламолар иштирокида сийрат суҳбатлар ҳам омма эътиборини жалб қилмоқда.

“Вақф” фонди эса ҳомийлар билан бирга кам таъминланган оилалар, ёлғиз қариялар ва меҳрибонлик уйларига “Мавлид ҳадялари” улашилмоқда. Бундай хайрли ва савобли тадбирлар ой охиригача давом этади, инша Аллоҳ.

Бу саъй-ҳаракатларнинг яна бир хайрлиси Робиул аввал ойи муносабати билан “Оламларга раҳмат пайғамбар” номли сийрат танловининг эълон қилиганидир. Мукофоти ҳаж йўлланмаси бўлган мазкур танловга топширган талабгорлар сони кундан кун ортиб, ижодий ишлар кун сайин зиёда бўлмоқда.

Аллоҳ таоло мўмин-мусулмонларга Мавлид ойини муборак айласин, фазилатли ой файзу баракасидан баҳра олишни барчага насиб этсин!

Ўзбекистон мусулмонлари идораси
Матбуот хизмати

Ўзбекистон мусулмонлари идораси ва ҳудудлардаги бош имом-хатибларнинг хотин-қизлар масалалари бўйича ёрдамчилари томонидан ҳафтанинг ҳар чоршанба куни аёл-қизларни қабул қилиш йўлга қўйилган.

Мазкур қабул жараёнларида диний-маърифий саводхонлик, бидъат-хурофотлардан сақланиш, оилавий муаммолар, фарзанд тарбиясига оид маслаҳатлар, аёл-қизларга хос масалалар ва таклиф-мулоҳазалар юзасидан мурожаатлар тингланади ҳамда зарур тавсиялар берилади.

Қуйида Ўзбекистон мусулмонлари идораси ва ҳудудий бўлимларининг қабул манзили, куни ва боғланиш рақамлари ҳавола этилади: 

– Ўзбекистон мусулмонлари идораси Хотин-қизлар масалалари бўйича бўлими мудираси Марям Абдуллаева: 

Қабул куни: чоршанба куни, соат 09.00 дан - 17.00 гача

Манзил: Тошкент шаҳри Олмазор тумани Қорасарой кўчаси 47-уй.

Ўзбекистон мусулмонлари идораси

Мўлжал: “Ҳазрати Имом” мажмуаси

Телефон: (71) 240-01-96

– Тошкент шаҳар бош имом хатибининг хотин-қизлар масалалари  бўйича ёрдамчиси Зулайҳо Соатова:

Қабул куни: чоршанба  соат 09.00 – 17.00 гача

Манзил: Шайхонтоҳур тумани Сузук ота кўчаси 50-уй 1-хона.

Мўлжал: “Сузук ота” мажмуаси.

Телефон: (95) 146-99-00

– Андижон вилояти бош имом-хатибининг хотин-қизлар масалалари бўйича ёрдамчиси Шоирахон Қосимова:

Қабул куни: чоршанба соат 09.00 – 17.00 гача.

Манзил: Андижон шаҳри “Хурсандлик” МФЙ,  Ғуломжон Хакимов кўча 7-уй.

Мўлжал: “Саййид Мухйиддин махдум” ўрта махсус ислом билим юрти

Телефон: (74) 228-01-58

– Бухоро вилоят бош имом хатибининг хотин-кизлар бўйича ёрдамчиси Ризвон Баҳрамова:

Қабул куни: чоршанба 09.00 -17.00 гача .

Манзил: Бухоро шаҳри  Абу Ҳафс Кабир кўчаси, 9-уй.

Мўлжал: Абу Ҳафс Кабир зиёратгоҳи.

Телефон: (55) 301-94-87

– Жиззах вилоят бош имом- атибининг хотин-қизлар масалалари бўйича ёрдамчиси Фароғат Сатторова:

Қабул куни: чоршанба соат  09.00 - 16.00 гача

Манзили: Ш.Рашидов тумани Тошкентлик кўчаси 19-уй.

Мўлжал: “Қўшчинор” жоме масжиди.  

Телефон: (95) 373-11-80

 

– Навоий вилояти бош имом xатибининг хотин-қизлар масалалари бўйича ёрдамчиси Умида Холова: 

Қабул куни: чоршанба соат 09.00 – 17.00 гача

Манзил: Навоий шаҳри  Ғалаба шоҳ кўчаси 73-уй.

Мўлжал: “Ҳазрат Алишер Навоий” жоме масжиди. 

Телефон: (79) 225-68-82

– Наманган  вилояти бош имом-хатибининг хотин-қизлар масалалари бўйича ёрдамчиси Ходияхон Раҳмонова:

Қабул куни: чоршанба соат 09:00 - 17:00 гача

Манзил: Наманган шаҳар  Ахсикент МФЙ  Қувонч  кўчаси 1-уй.

Мўлжал: “Мулла Бозор Охун” жоме масжиди.

Телефон: (69) 226-10-01

 

– Самарқанд вилояти бош имом-хатибининг хотин-қизлар масалалари бўйича ёрдамчиси Нозбуви Темирова:

Қабул куни: чоршанба соат 09.00-17.00 гача

Манзил: Самарқанд шаҳри Даҳбед кўчаси 229 А-уй.

Мўлжал: вилоят халқ қабулхонаси

Телефон: (55)705-02-78 103-хонага улаб бериш сўралади

– Сирдарё вилояти бош имом хатибининг хотин-қизлар масалалари бўйича ёрдамчиси Мансурахон Мелибаева: 

Қабул куни: чоршанба соат  09.00 - 17-00 гача

Манзил: Гулистон шаҳри Ғолиблар кўчаси 75 уй.

Мўлжал: “Гулистон” жоме масжиди.

Телефон: (67) 227-23-00

– Сурхондарё вилояти бош имом хатибининг хотин-қизлар масалалари бўйича ёрдамчиси: Хосият Қосимова

Қабул куни: душанба соат 09.00-17.00 гача

Манзил:  Термиз тумани “Ат-Термизий” МФЙ.  

Мўлжал: “Вақф” меҳмонхонаси.

Телефон: (91) 583-52-51

– Тошкент вилояти бош имом хатибининг хотин кизлар масалалари буйича ёрдамчиси Нигора Имамова:

Қабул куни: чоршанба соат 9.00 - 16.00 гача

Манзил: Зангиота тумани А.Темур кўчаси 221 уй.

Мўлжал: “Зангиота” зиёратгоҳи.

Телефон: (95)177-14-54

– Фарғона вилояти бош имом-ҳатибининг хотин-қизлар масалалари бўйича ёрдамчиси Ҳилола Комилова:

Қабул куни: чоршанба  соат 09.00 - 17:00 гача

Манзил: Фарғона шаҳри Чек-Шура МФЙ Тутзор кўчаси 14-уй.

Мўлжал: “Уммул Қуро” жоме масжиди.

Телефон: (73) 226-72-44

 

– Хоразм вилояти бош имом-хатибининг хотин-қизлар масалалари бўйича ёрдамчиси Феруза Отажанова:

Қабул куни: чоршанба соат 09.00 – 17.00 гача.

Манзил: Урганч шаҳри  Ю.Бобожонов кўчаси 43 а-уй.

Мўлжал: “Дошқинжон бобо” зиёратгоҳи.

Телефон: (62) 228-44-38

– Қорақалпоғистон мусулмонлари қозиёти

Қабул куни: чоршанба соат 09.00 – 17.00 гача. 

Манзил: Нукус шаҳри, Х.Абдамбетов кучаси.

Мўлжал: “Имом эшон Муҳаммад” жоме масжиди.

Телефон: (61) 229-02-24

– Қашқадарё вилояти бош имом  хатибининг хотин-қизлар      масалалари бўйича ёрдамчиси Насиба Ботирова: 

 Қабул куни: чоршанба  соат 09.00 - 17.00 гача 

 Манзил: Қарши шаҳри Насаф кўчаси 274-уй

Мўлжал: “Кўкгумбаз” жоме масжиди.  

 Телефон: (75) 220-06-32

Эслатма: Диний масалаларга оид саволларни Ўзбекистон мусулмонлари идораси тасарруфидаги Фатво марказидан ёки Колл-марказининг (78) 150-33-44 телефон рақамига боғланиш орқали батафсил жавоб олишингиз мумкин.

Ўзбекистон мусулмонлари идораси

Матбуот хизмати

Бугун, 22 сентябрь куни Ўзбекистон мусулмонлари идораси раиси муфтий, Шайх Нуриддин Холиқназар ҳазратлари Сирдарё вилоятига ташрифлари давомида Сайхунобод туманидаги катта йўл ёқасида жойлашган “Пахтакор” жоме масжидининг қайта бунёд этилган янги биносини кўздан кечирдилар.

Сирдарё вилояти бош имом-хатиби Ҳабибуллоҳ домла Зокиров жомеда намозхонларга яратилган шароитлар билан яқиндан таништириш асносида масжиднинг янги биноси ҳақида маълумот берди.

Шайх Нуриддин Холиқназар ҳазратлари Сирдарё вилоятининг чекка ҳудудида мўмин-мусулмонлар учун мана шундай янги замонавий муҳташам масжид барпо этилгани улкан хайрли иш бўлгани, ушбу неъматнинг қадрига етиш ва уни маънавий жиҳатдан ҳам обод этиш лозимлигини алоҳида қайд этдилар.

Маълумот ўрнида масжиднинг янги биноси қурилиши 2022 йилда бошланган. Мажмуанинг умумий майдони 7 сотих бўлиб, хонақоҳ ва айвонларда 1000 нафардан зиёд намозхон ибодатларни эмин-эркин адо этиши мумкин. Баландлиги 64 метр бўлган минора ва катта гумбази масжидга ўзгача файз бериб турибди. Замонавий таҳоратхонасида бир вақтнинг ўзида 15 киши бемалол таҳорат олиши мумкин. Йўловчи аёллар учун алоҳида намозхона ва таҳоратхона мавжуд. Иссиқлик ва совутиш тизимлари, шу билан бир қаторда замонавий овоз кучайтиргичлар ўрнатилди. Имом-хатиб, мутаввалли ва қоровул учун алоҳида хоналар бор. Жоме тумандаги “Ўзбекистон”, “Бахмалсой”, “Нурли йўл” маҳалла фуқаролар йиғинидаги мўмин-мусулмонларга хизмат қилади.

Ўзбекистон мусулмонлари идораси
Матбуот хизмати

Бисмиллаҳир Роҳманир Роҳийм.

Аллоҳ таолога шукрки, юртимиздаги инсон манфаатларига қаратилган ислоҳотлар дунё ҳамжамияти томонидан ҳам муносиб эътироф этилмоқда, тақдим этилган таклиф-ташаббуслар ҳаётийлиги билан муҳим аҳамият касб этаётир. Натижада мамлакатимиз дунё миқёсида ўз ўрни, ўз сўзига эга бўлиб, довруғи янада юксалмоқда.

Президентимизнинг 2023 йил 17-21 сентябрь кунлари АҚШга қилган сафари ҳам самарали мулоқотлар, манфаатли учрашувлар ва фойдали келишувларга бой бўлди. Айниқса, давлатимиз раҳбарининг 19 сентябрь куни Бирлашган Миллатлар Ташкилоти Бош Ассамблеясининг 78-сессиясидаги нутқида жаҳон ҳамжамиятини бугунги кунда муҳим бўлган масалаларга эътибор қаратиб, бир қатор таклифларни илгари сургани океанорти сафарининг энг муҳим нуқтаси бўлди.

Таъкидлаш керакки, сўнгги йилларда Ўзбекистон ва БМТ ўртасидаги ҳамкорлик мисли кўрилмаган юксак даражага чиқди. Биргаликда қарийб 140 та дастур ва лойиҳалар муваффақиятли амалга оширилгани, айниқса, Ўзбекистон ташаббуси билан БМТ Бош Ассамблеясининг 6 та резолюцияси қабул қилингани фикримизни яққол тасдиқлайди.

Шунингдек, Ўзбекистон БМТнинг бир қатор нуфузли тузилмаларига сайланди ва уларнинг ишида фаол иштирок этмоқда. Биргаликда глобал кун тартибига оид, жумладан, озиқ-овқат хавфсизлигини таъминлаш, туризмни ривожлантириш, камбағалликка ва иқлим ўзгаришига қарши курашиш масалалари бўйича йирик халқаро тадбирлар ўтказилмоқда.

Юртбошимиз ўз чиқишида “Биз ҳуқуқий, дунёвий, демократик ва ижтимоий давлат бўлмиш Янги Ўзбекистонни барпо этиш сиёсатини қатъий давом эттирмоқдамиз. Мамлакатимиз “Инсон қадри ва манфаатлари учун” деган эзгу ғоя асосида демократия ва адолат тамойилларини мустаҳкамлашга қаратилган туб ислоҳотлар йўлидан дадил илгари бормоқда”, дея таъкидлади.

Дарҳақиқат, бугун юртимизнинг барча жабҳасида изчил ислоҳотлар давом этмоқда. Бу эса, ўз навбатида, халқимизнинг турмуш фаровонлиги ошишига, юрт равнақи ва дунё миқёсида муносиб ўрин эгаллашида муҳим омил бўлаётир. Айниқса, барча йўналишда “Инсон қадри ва манфаатлари учун” деган тамойил асосида иш олиб борилаётгани бу ислоҳотларнинг янада самарали кечишига, халқимизнинг розилигига замин бўлмоқда.

Аҳоли билан ишлашда маҳаллалар, оилалар кесимида иш олиб борилаётгани, барча мутасадди ташкилот вакиллари қаторида диний соҳа ходимлари, хусусан, имом-хатиблар ҳам халқ билан мулоқотни йўлга қўйгани бу ишларнинг янада самарали кечишида муҳим ўрин тутмоқда.

Президентимиз ўз нутқида ислом динининг инсонпарварлик моҳиятини кенг тарғиб этиш, диний бағрикенгликни қарор топтириш ва турли таҳдидларга қарши биргаликда курашишга ҳам алоҳида тўхталди.

Сўнгги пайтларда айрим мамлакатларда кўзга ташланаётган диний тоқатсизлик, исломофобия ҳолатларига асло йўл қўйиб бўлмаслиги таъкидланди. Ҳақиқатан, кейинги пайтларда дунёда исломни ёмонотлиқ қилишга уринишлар, турли фитналар кенг тарқалмоқда. Аслида, буларнинг динимизга умуман алоқаси йўқ. Ислом одамларни Ер юзида тинчлик-осойишталикда аҳил-иноқ бўлиб яшашга чорлайди. Шу мақсадда ҳар қандай ҳолатда ҳам раҳм-шафқат ва бағрикенглик каби юксак инсоний фазилатларни тарғиб этади.

Манбаларда ҳақиқий мўмин бошқаларга қўли билан ҳам, тили билан ҳам озор бермаслиги кераклиги уқтирилади. Бир ҳадиси шарифда саҳобалардан бири Набий соллаллоҳу алайҳи васалламнинг олдига келиб, “Эй Аллоҳнинг Расули, қайси мусулмон афзал саналади?” деб сўради. Шунда у зот: “Ҳақиқий мусулмон тили ва қўлидан бошқа мусулмонлар саломат бўлган кишидир”, деб жавоб берди.

Бинобарин, қайси динга мансуб бўлмасин, одамлар инсон бўлгани учун ҳурмат қилинади, ҳимоя этилади ва ҳар бири ўз ҳуқуқларига эга бўлади. Қисқача айтганда, динимиз — бағрикенглик дини. Бу тушунча бугун давлатимиз сиёсатида ҳам муҳим ўрин олаётганини алоҳида таъкидлаш жоиз.

Президентимизнинг олий минбардан туриб жаҳон миқёсида динлараро бағрикенглик ва ҳамжиҳатлик ғояларини кенг тарғиб этиш мақсадида Ўзбекистонда ЮНЕСКО шафелигида Динлараро мулоқот ва бағрикенглик халқаро марказини ташкил этиш таклифи ҳам бежиз эмас. Чунки кейинги йилларда Ўзбекистонда турли динларга мансуб қадриятларни асраб-авайлашга, барча фуқарога ўз эътиқодини амалга ошириш учун зарур шароитларни яратиб беришга, динлар ва миллатлараро ҳамжиҳатликни янада мустаҳкамлашга, улар ўртасида муштарак анъаналарни ривожлантиришга алоҳида эътибор қаратиб келинмоқда ва бу борада дунё мамлакатларига намуна бўлаётганини ҳам қайд этиш даркор.

Ҳозирги даврда турли диний конфессиялар ўртасида ўзаро бир-бирини тушуниш, мулоқот қилиш ва аҳил-иноқ яшаш тинчликни қарор топтиришнинг бош омили бўлмоқда. Қуръони каримда ҳам Ҳақ таоло: “Эй, инсонлар! Дарҳақиқат, Биз сизларни бир эркак (Одам) ва бир аёл (Ҳавво)дан яратдик ҳамда бир-бирларингиз билан танишишингиз учун сизларни (турли-туман) халқлар ва қабила (элат)лар қилиб қўйдик...” (Ҳужурот, 13), деб хитоб қилади.

Маълумки, давлатимиз раҳбари 2017 йил 19 сентябрда ҳам БМТ Бош Ассамблеясининг 72-сессиясида “Маърифат ва диний бағрикенглик” деб номланган махсус резолюция қабул қилиш ташаббуси билан чиққанди. Бинобарин, Ўзбекистон томонидан ишлаб чиқилган лойиҳа БМТга аъзо давлатлар томонидан бир овоздан қўллаб-қувватланган. Резолюция нафақат БМТнинг барча аъзо давлатлари томонидан, балки 50 дан ортиқ давлатлар ҳаммуаллифлигида қабул қилинган эди.

Бу Ўзбекистонда турли миллат ва элатлар, диний конфессиялар вакиллари ўртасидаги аҳил-иноқлик, ҳамжиҳатликни таъминлаш, тинчлик-осойишталик, барқарорликни сақлаш йўлида оқилона ислоҳотлар ва амалий чора-тадбирлар олиб борилаётгани баробарида мамлакатимиз жаҳонда бағрикенглик тарғиботчиси ва ташаббускори бўлаётганидан далолат.

Юртбошимизнинг мазкур Ассамблеядаги яна бир муҳим ташаббуси 2024 йилда Ўзбекистонда “Ислом — тинчлик ва эзгулик дини” мавзусида халқаро конференция ўтказиш таклифи бўлди. Диёримиз жаҳон илм-фани ривожига беқиёс ҳисса қўшган, исломни илм-маърифат ва тинчлик дини сифатида намоён этган ал-Хоразмий, Беруний, Ибн Сино, Имом Бухорий, Мирзо Улуғбек, Алишер Навоий сингари улуғ аллома ва мутафаккирлар ватанидир. Буюк олимларнинг бой меросини ўрганиш, исломнинг асл инсонпарварлик моҳиятини чуқур очиб бериш бугунги кун учун ғоят долзарб аҳамият касб этмоқда.

Бугун тараққиётнинг янги босқичида тарихий меросни асраб-авайлаш, ўрганиш ва авлоддан-авлодга қолдириш давлатимиз сиёсатининг устувор йўналишларидан бирига айланган. Зеро, муборак динимизнинг асл инсонпарварлик моҳиятини кенг жамоатчиликка етказиш, миллий қадриятларимизни, азиз авлиёларимизнинг хотирасини тиклаш, бебаҳо меросини ўрганиш, қадамжоларини обод қилиш борасида амалга оширилаётган кенг кўламли ишлар Ўзбекистонни илм-фан, маданият, маърифат марказига айлантиришдек эзгу ниятларга, юксак мақсадларга пойдевор бўлмоқда.

Ушбу чиқишда давлатимиз раҳбари “Биз экстремизм балоси тарқалишига, ёшларнинг радикаллашувига йўл қўймаслик учун биргаликдаги ҳаракатларимизни кучайтиришимиз зарур”, деб таъкидлади. Мазкур йўналишда авваллари экстремизм ғоялари таъсирида бўлган шахсларни соғлом ҳаётга қайтариш ва жамиятга мослаштириш масаласига алоҳида урғу берилди. Жумладан, беш марта “Меҳр” инсонпарварлик миссияси ўтказилгани, 530 нафардан зиёд фуқаролар, аввало, аёллар ва болалар Яқин Шарқ ва Афғонистондаги ҳудудлардан юртимизга қайтарилгани Президентимиз нутқида алоҳида таъкидланди. Ушбу шахсларнинг барчасига тиббий, руҳий, ижтимоий ва бошқа ёрдамлар кўрсатилганига эътибор қаратилди. Ушбу тажриба ҳам анжуман иштирокчилар томонидан эътироф этилди.

Мана шундай таклиф ва ташаббуслар сессия иштирокчилари, делегациялар аъзолари ва сиёсий етакчилар томонидан илиқ кутиб олинди. Айниқса, давлатимиз раҳбарининг нутқини БМТ Бош котиби юксак баҳолаб, унда билдирилган таклифлар, ташаббуслар долзарб глобал ва минтақавий муаммоларга ечим топишда муҳим аҳамиятга эгалигини, мамлакатимизда амалга оширилаётган ислоҳотларни қўллаб-қувватлашини урғулади.

Аллоҳ таоло юртимизда амалга оширилаётган ислоҳотларни бардавом айласин ва дунёда мамлакатимиз нуфузини янада оширсин!

Шайх Нуриддин ХОЛИҚНАЗАР,

Ўзбекистон мусулмонлари идораси раиси, муфтий.