muslim.uz
“Аҳмаджон қори” жомe масжиди яқинда таъмирдан чиқади
Тошкeнт шаҳридаги шинам, файзли масжидлардан бири “Аҳмаджон қори” жомe масжиди яқинда таъмирдан чиқади.
Мазкур масжид 1991 йилда қуриб битказилган бўлиб 800 та намозхонга мўлжалланган эди.
2018 йилдан масжиднинг қўшимча қисми қурилиши бошланди ва шу билан бирга eртўла қисми ҳам қурилди.
Яқинда қурилиш ишлари якунига eтиб пардозлаш ишлари бошланди. Бугунги кунда “Аҳмаджон қори” масжидида 2000 га яқин киши намоз ўқимоқда.
ЎМИ Матбуот хизмати
Расмлар муаллифи Шаҳзод Шомансур
Масжиднинг ноиб имоми "Маънавият сабоқлари" дарсида қатнашди
Фарғона вилояти Олтиариқ тумани "Бирлашган" жоме масжиди ноиб имоми Абдурахмонжон Абдурахмонов тумандаги 7-умумтаълим мактабида "Маьнавият сабоқлари" дарсида иштирок этди.
"Маънавият сабоқлари" дарсларида диний соҳа ходимларининг иштирок этиши ўқувчиларда мамлакатимизда ҳукм сураётган тинчликнинг қадрига етиш, ёт ғояларга қарши иммунитет шаклланиши, ўз жонига қасд қилиш оғир гуноҳ эканини тушунишда муҳим аҳамиятга эга.
Бундан ташқари, мактаб ўқувчилар орасида ўқитувчи ва мураббийларни эъзозлаш, уларга ҳурмат бажо келтиришнинг улуғ иш экани ҳақида тушунтириш ишлари олиб борилди.
Ўзбекистон мусулмонлари идораси Матбуот хизмати
Нишонга урилган гаплар: “Иймондан кейин ихлосли дўстдан кўра каттароқ неъмат йўқ”
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Буюк парҳез
Ашраф Али Таҳонавий раҳимаҳуллоҳга доктор кўп парҳез буюрди. Шунда у киши докторга: «Абдулҳай, бунча кўп парҳез айтяпсан? Олдимга келганингда, иккита парҳез: «Ҳаромга қарама ва ҳаром ема» дегандим» дедилар.
*****
Иймондан кейин ихлосли дўстдан кўра каттароқ неъмат йўқ.
*****
Ғийбатчидан ҳам ёмонроқ кимса
- Фалончи сизни фалон сўзлар билан ёмонлади.
- Сен ундан ҳам ёмонроқ одам экансан. У юзимга айтишга уялиб, ортимдан гапирибди. Сен эса юзимга айтишдан ҳам уялмадинг!
*****
Дарахтга оғриқ берадиган нарса болта эмас, балки болтанинг сопи ўша дарахт шохидан ясалганидир.
“Тарих муҳрлаган сўзлар”
*****
Пулга сотиб олиб бўлмайдиган нарсага эга бўлсанггина бой ҳисобланасан.
“Тарих муҳрлаган сўзлар”
*****
Иккиланиш қулай фурсатларнинг мақбарасидир.
“Тарих муҳрлаган сўзлар”
*****
Агар қиладиган ишларини биз ёзиб берадиган бўлсак, у ҳолда раҳбарликка ақлли кишиларни тайинлашда мантиқ йўқ. Ахир уларни бизга нима иш қилишимизни айтишлари учун раҳбарликка сайладик-ку!
“Тарих муҳрлаган сўзлар”
*****
Ҳамма билан камтарона муносабатда бўлавер. Чунки башариятнинг табиати мағрур ва кибрли кимсаларни ёқтирмайди.
“Тарих муҳрлаган сўзлар”
*****
- Жисмнинг роҳати оз ейишда.
- Нафснинг роҳати гуноҳлардан тийилишда.
- Тилнинг роҳати кам гапиришда.
- Қалбнинг роҳати фойдасиз нарсаларга эътибор бермасликда.
“Тарих муҳрлаган сўзлар”
*****
Иши юришиб турганнинг дўстлари кўп бўлади.
Иши орқага кетганнинг дўстлари ҳақиқий бўлади.
“Тарих муҳрлаган сўзлар”
*****
Фазилатдан ялонғоч (холи) кишини ҳеч нарса билан тўсишнинг иложи йўқ.
Франклин
*****
Интернет материалларидан тўплаб, таржима қилувчи
Нозимжон Иминжонов
Намоз ўқимайдиган одам...
Аллоҳ таоло Қуръони каримда шундай деб марҳамат қилади: “Бас, шундай намозхонлар ҳолига войки, улар намозларини «унутиб» қўядилар” (Моъун, 4-5).
Пайғамбар соллаллоҳу алайҳи васаллам шундай деб марҳамат қилганлар: “Аллоҳ таоло қиёмат куни умматимнинг ўнта тоифасига ғазаб қилади, уларни лаънатлайди ҳамда улар учун аламли азоб тайёрлаб қўйган. Аллоҳ уларни дўзахга киритади” дедилар. Шунда саҳобалар: “Улар кимлар, эй Аллоҳнинг Расули?” деб сўрашди. У зот шундай жавоб бердилар: “Зинокор қария, золим раҳбар, доим ароқ ичувчи, закотни ман қилувчи, ёлғон гувоҳлик берувчи, одамлар орасида чақимчилик қилувчи, ота-онасининг юзига ғазаб билан боқувчи, хотинини талоқ қилиб, кейин ҳаром ҳолатда ушлаб турувчи, зулм ва жабрга ҳукм қилувчи, бадани соғ бўла туриб намозни тарк қилувчи”.
Ибн Аббос розияллоҳу анҳудан соғ бўла туриб намозни тарк қилувчи одамнинг тавҳиди ҳақида сўралди. У зот: “Намозни тарк қилувчи кишининг тавҳиди йўқ, намозни тарк қилувчи кишининг закоти йўқ, намозни тарк қилувчи кишининг рўзаси йўқ” деб жавоб бердилар.
Аллоҳ таоло Қуръонда шундай деб марҳамат қилади: “Сўнгра уларнинг ортидан намозни зое қилган ва шаҳватларга эргашган кимсалар ўрин олдилар. Энди улар, албатта, ёмонликка (ёмон жазога) йўлиқурлар” (Марям, 59).
Ушбу оятдаги “ёмонлик” деб таржима қилинган сўз арабчада “ғойй” деб номланади. “Ғойй” эса жаҳаннамдаги бир водий бўлиб, унга фақатгина намозни узрсиз тарк қилувчилар тушади.
Ибн Аббос розияллоҳу анҳу шундай дедилар: “Қиёмат куни банда биринчи бўлиб намоздан сўралади. Агар намози қабул бўлса, бошқа амаллари ҳам қабул бўлади”.
Намоз ўқимайдиган одам Аллоҳ билан боғланиш неъматидан маҳрум бўлади.
Намоз ўқимайдиган одам Аллоҳ билан ёлғиз қолиб, унга муножот қилишдан, шу ибодатнинг руҳий, маънавий лаззатларидан бебаҳра қолади.
Намоз ўқимайдиган одам омонлик, хотиржамлик ва нажотдан мосуво бўлади.
Намоз хато ва гуноҳларни ювишнинг энг ишончли йўл бўлиб, у доимо ўз эгасига кўплаб шахсий фойдалар келтиради. Намоз ўқимайдиган одам эса бундай фойдалардан бенасиб қолади.
Намоз ўқимайдиган одам Аллоҳдан узоқлашади.
Намоз ўқимайдиган одамнинг иродаси заиф бўлади.
Намоз ўқимайдиган одам мислсиз нафсоний роҳат ва руҳий фароғатлардан қуруқ қолади.
Намоз ўқимайдиган одам ғафлат уйқусида ухлаётган бўлади.
Намоз ўқимайдиган одам ҳаётга теранроқ назар сола олмайди.
Намоз ўқимайдиган одам беинтизом, бетартиб бўлади.
Намоз ўқимайдиган одам вақтнинг қадрига етмайди.
Намоз ўқимайдиган одам қўрс, шошқалоқ, пасткаш, бесабр бўлади.
Намоз ўқимайдиган одам мусулмонлар билан бўладиган ижтимоий боғланишлардан, яхшилик йўлидаги ҳамкорликлардан бенасиб қолади.
Намоз ўқимайдиган одамда меҳрибонлик, ёрдамга шошилиш, ғамхўрлик ҳисси бўлмайди.
Намоз ўқимайдиган одамда мустаҳкам ишонч бўлмайди.
Намоз мусулмон кишини ғайримусулмондан ажратиб турувчи энг асосий белгидир.
Намоз ўқимайдиган одамни ҳеч ким ҳурмат қилмайди.
Намоз ўқимайдиган одамдан ҳеч ким хотиржам бўлмайди.
Маълумки, намоз поклик ва озодалик рамзидир.
Намозхон одамнинг энг аввало, қалби пок бўлади. Қолаверса, бадани, кийим-боши ва макони ҳам пок бўлади.
Намоз ўқимайдиган одамнинг эса кийими, бадани ва энг асосийси, қалбининг поклигида шубҳа бор.
Намоз ўқимайдиган одамнинг юзида нур бўлмайди.
Намоз ўқимайдиган одамнинг юраги тор, ўта инжиқ бўлади.
Намоз ўқимайдиган одамнинг ризқи танг бўлади.
Намоз ўқимайдиган одамга ҳамма ғазаб билан қарайди.
Намоз ўқимайдиган одамни ҳамма ёмон кўради.
Намоз ўқимайдиган одам жамиятнинг ишончсиз кишиси ҳисобланади.
Намоз ўқимайдиган кишга ҳеч ким ишонмайди.
Намоз ўқимайдиган одамнинг гувоҳлиги ўтмайди.
Қачонгача ғафлат уйқусида ухлаймиз?!
Қачонгача Роббимизнинг тоатидан бўйин товлаб юрамиз?!
Ўз нафсимизга раҳмимиз келсин. Эртага охиратда талофат етишидан олдин унга насиҳат қилайлик. Чунки, сафар узоқ, озуқа эса кам.
Вақтни ғанимат билиб, ўлим учун ҳозирлик кўрайлик.
Аллоҳ барчамизни беш вақт намозни ўз вақтида, масжидда, жамоат билан адо этадиган бандаларидан қилсин, омин!
Нозимжон Ҳошимжон тайёрлади
Умрингиз қандай ўтяпти?
Инсон умри азиз ва бебаҳо неъматдир. Аллоҳ таоло инсоннинг она қорнида инсон шаклига келганда, бир махсус фаришта юбориб, унга руҳ киргизиш ва тўрт нарсани пешонасига битишни буюради:
- Шу дунёдаги ризқу насибаси нималардан иборат экани;
- Неча йил умр кўриб, қачон дунёдан ўтиши;
- Қиладиган яхши ва ёмон амаллари;
- Бахтли ёки бахтсиз бўлиши.
***
Ҳасан Басрий ҳазратлари демишлар: “Қуёшнинг ҳар ботишида бир парча камайишинг бор...”
***
Имом ибн Жавзий раҳматуллоҳи алайҳ инсон умрини беш мавсумга бўладилар:
- Сабийлик, норасидалик. Бу мавсум гўдакликдан то 15 ёшга етгунча ўтадиган умрдан иборатдир.
- Йигитлик, ўсмирлик мавсуми. Бунинг интиҳоси то 35 ёшга тўлгунча.
- Ўрта ёшлик мавсуми. Бунинг миқдори то 50 ёшга етгунча.
- Кексайиш мавсуми. Бунинг интиҳоси то 70 ёшга киргунча.
- Қарилик даври. Бунга 70 ёшдан кейинги умр киради.
***
Ёшлик – тошқин сув, суғорадиган экинингизни суғориб қолмасангиз, ўтиб кетади. Кейин кексалик кўзойнагини тақиб, игна билан қудуқ қазишдан иш чиқмайди.
Абдулла Қаҳҳор
***
Донишмандлар шундай ўгит берадилар:
Бир одамнинг ёши қирқдан ошса-ю, яхши амаллари ёмонидан ортиқ бўлмаса, бундай киши фурсатни қўлдан бой бермай яхшиликлар сонини кўпайтиришга киришиши зарур. Акс ҳолда жаҳаннамга ҳозирлик кўраверсин...
***
Абу Барза Асламийдан ривоят қилинган ҳадисда: “Расулуллоҳ соллаллоҳу алайҳи васаллам дедилар: “Қиёмат куни банданинг икки қадами то ундан умридан – уни нимада ўтказгани, илмидан –у билан нима қилгани, молидан –уни қаердан касб қилгани ва нимага сарф қилгани, жисмидан –уни нимада қаритгани ҳақида сўралмагунча жойидан жилмайди”.
Олимларнинг бу борада ўтказган тадқиқотларига кўра, ўртача 75 йил умр кўрган инсоннинг умри давомида турли ишларга қанча вақт сарфлаши аниқланган. Унга кўра: 15 йил атрофидаги вақт болалик ва ўсмирлик билан ўтади. Агар бир суткада 8 соатдан ухласа, 25 йил умри уйқу билан ўтади. Агар бир суткада 8 соат касб кор билан машғул бўлса, 25 йил умри ишлашга сарфланади. Агар бир суткада 3 маҳал овқатланса, ҳар овқатланишга ярим соатдан вақт сарфланса, 4 ярим йилдан ортиқроқ умр овқатланишга сарфланар экан.
Саидаброр Умаров тайёрлади