Хабарингиз бор, эртага, 15 март куни Самарқанд вилоятида “Имом Бухорий меросининг ўзига хос хусусиятлари ва бугунги кундаги тарбиявий аҳамияти” мавзусида ўтказиладиган халқаро анжуманда қатнашадиган Тожикистон ва Афғонистон делегацияси вакиллари юртимизга ташриф буюришган.

Меҳмонлар бугун куннинг иккинчи ярмида Самарқанднинг диққатга сазовор тарихий обидалари ва замонавий иншоотларига саёҳатини давом эттирдилар. Жумладан, Имом Бухорий мажмуасини зиёрат қилишди, Қуръон тиловат қилиниб, буюк муҳаддис бобомиз ҳақига бағишланди.

Шундан сўнг меҳмонлар Ҳадис илми мактаби ва Имом Бухорий халқаро илмий-тадқиқот марказида талабалар ва илмий тадқиқотчи олимларга қилинган шароитлар ва илмий-тадқиқот ишлари билан танишди.

Дастлаб меҳмонлар Ҳадис илми мактабидаги шароитларни кўздан кечиришди. Мактабнинг ташкил этилиш мақсадлари ва келажакда кутилаётган натижалар, мактабда талабаларнинг ўқишга қабул қилиш тизими ва мутахассислик, ўқув режасидаги фанлар ва ўқув адабиётлари таркиби ҳамда уни ислом оламидаги нуфузли уламолар томонидан эътироф этилганлиги, ўқитишда қўлланиладиган замонавий методлар ҳақида маълумот берилди.

Ташриф давомида уламолар талаба-ёшлар билан суҳбат қуришди, уларга илмий савол беришди. Талабаларнинг мавзунинг моҳиятини яхши англаган ҳолда, аниқ, лўнда ва тезда берган жавобидан мамнун бўлишиб, уларнинг билим ва малакасига таҳсин айтишиб, албатта, ушбу олийгоҳдан келажакда яна Имом Бухорий, Имом Термизий каби уламолар етишиб чиқишига ишонч билдирдилар.

Шунингдек, қардош халқлар уламолари таълим сифатини янада ошириш учун ўз тажрибалари билан ўртоқлашди, қўшимча ўқув дарсликларини ўқиш бўйича тавсиялар бердилар.

Имом Бухорий халқаро илмий-тадқиқот марказида бўлган меҳмонлар бу ерда илмий-тадқиқотчиларга қилинган шароит, амалга оширилган хайрли ишлар билан танишиш асносида марказнинг ташкил этилиши, мақсад ва вазифалари, халқаро ҳамкорлик ва илмий-тадқиқот йўналишида олиб борилаётган ишлар ҳақида маълумотларга эга бўлишди.

Сафар жараёнлари ва халқаро анжуман ҳақидаги маълумотларни сайтимизда кузатиб боринг.

Ўзбекистон мусулмонлари идораси матбуот хизмати

Бугун, 14 март куни Ўзбекистон муслмонлари идораси раиси, муфтий Усмонхон Алимов ҳазратлари, Дин ишлари бўйича қўмита раиси Абдуғофур Аҳмедов, вилоят бош имом-хатиби Зайниддин Эшонқулов, Диний идора иш бошқарувчиси Рустам Жамилов ва бошқа мутасаддилар Самарқандга ташриф буюрган Тожикистон Республикаси делегациясини “Жартепа” чегара масканида кутиб олдилар.

Шунингдек, Ўзбекистон мусулмонлари идораси раисининг биринчи ўринбосари Ҳомиджон қори Ишматбеков Самарқанд вилоятида бўлиб ўтадиган анжуманга Афғонистон Ҳаж ва Вақф ишлари вазири бошчилигидаги уламоларни Сурхондарё вилоятида кутиб олди.

Бугун меҳмонлар Самарқанд вилоятидаги муборак қадамжоларни зиёрат қиладилар.

Эслатиб ўтамиз, эртага 15 март куни бўлиб ўтадиган халқаро анжуманда Ўзбекистон, Афғонистон ва Тожикистондаги диний соҳа раҳбарлари, етук уламолар, мутахассис ва мутасадди вакиллар иштирок этади.

Сафар жараёнлари ва анжуман ҳақидаги маълумотларни сайтимизда кузатиб боринг.

Ўзбекистон мусулмонлари идораси  ва

Эртага, 15 март куни Самарқанд вилоятида “Имом Бухорий меросининг ўзига хос хусусиятлари ва бугунги кундаги тарбиявий аҳамияти” мавзусида халқаро конференция ўтказилади. Унда Ўзбекистон, Афғонистон ва Тожикистондаги диний соҳа раҳбарлари, етук уламолар, мутахассис ва мутасадди вакиллар иштирок этади.

Нуфузли халқаро анжуман қуйидаги мавзуларга бағишланади:

1. Имом Бухорий меросининг ўзига хос хусусиятлари, афзалликлари;

2. Имом Бухорий меросининг бугунги кундаги аҳамияти ва миллатлараро тотувликни таъминлашдаги ўрни;

3. Марказий Осиё давлатларида миллатлараро тотувлик ва диний бағрикенглик, яхши қўшничилик ва ҳамжиҳатлик, диний-миллий қадриятларни асраб-авайлаш ҳамда Ўзбекистонда сўнгги йилларда диний-маърифий соҳада амалга оширилаётган ижобий янгиланишлар ва ўзгаришларни тарғиб қилиш.

Халқаро анжуманда ўз она тилида чиқиш қилган ҳар бир маърузачининг нутқи таржимонлар томонидан тегишли тилларга таржима қилинади.

Ушбу халқаро тадбир тафсилотларини сайт ва ижтимоий тармоқларимиз орқали кузатиб боринг.

Ўзбекистон мусулмонлари идораси матбуот хизмати

Бугун, 13 март куни Ўзбекистон мусулмонлари идораси раиси, муфтий Усмонхон Алимов ҳазратлари, Дин ишлари бўйича қўмита раиси Абдуғофур Аҳмедов Самарқанд вилояти Ургут туманида барпо этилган “Ургут” марказий жоме масжидининг очилиш маросимида иштирок этдилар. Меҳмонларга Самарқанд вилояти бош имом-хатиби Зайниддин домла Эшонқулов, Диний идора Иш бошқарувчиси Рустам ҳожи Жамилов ҳамроҳлик қилди.
Масжиднинг очилиш маросимида Самарқанд вилояти ҳокими Эркинжон Турдимов, Ургут тумани ҳокими Ботир Жабборов, таниқли уламолар, тажрибали имом-домлалар, мўйсафид отахонлар, вилоят мутасаддилари ва юзлаб намозхонлар иштирок этдилар.
Тадбир аввалида қурбонлик сўйилди ва Қуръони карим оятлари тиловат қилиниб, хайрли дуолар қилинди
Файзли тадбирда муфтий Усмонхон Алимов ҳазратлари масжид жамоасини маҳобатли жоме билан муборакбод этдилар, муҳтарам Президентимиз ташаббуслари билан юртимизда диний-маърифий соҳада амалга оширилаётган хайрли ишлар ва улкан ислоҳотлар ҳақида сўзлаб бердилар. Айниқса, масжид-мадрасаларни обод этилиши, қадамжою-зиёратгоҳларни гўзал ҳолатга келтирилиши, мўмин-мусулмонларимизга кенг имкониятлар берилаётганини батафсил гапириб бердилар. Мана шундай эътибор ва ғамхўрликдан намозхонларимиз чексиз мамнунликларини ўз сўзларида изҳор этдилар ва қувончлари юз-кўзларидан яққол намоён бўлди.
Маълумот ўрнида, янги масжид қибласи мутахассислар қуёшнинг ёзги энг сўнгги ботиш ва қишдаги энг сўнгги ботиш нуқталари ҳисобга олиниб, ушбу икки нуқта орлиғи уч қисмга бўлиб, чап томондаги бўлак белгиланди. Шунингдек, кечаси Олтин қозиқ юлдузига қараб мўлжал олинди.
Масжид майдони бир гектардан ошиқ, хонақосининг ҳажми 45х55 метр, яъни 2500 кв/м.ни ташкил қилади. Жоме икки қаватдан иборат бўлиб, 8000 нафарга яқин намозхонни ўз бағрига сиғдира олади. Хонақоҳ ўртасида 34 метрли баланд гумбаз қад ростлаган. Унинг айланаси 18 метрни ташкил этади.
Масжиднинг тўрт томонида иккитаси 40 метрли ва яна иккитаси 43 метрли бўлган тўрт минора қурилган. Замонавий таҳоратхонадан бир вақтнинг ўзида 100 киши фойдаланиши мумкин. Масжид ходимлари учун 2 қаватли маъмурий бино барпо этилган.
Муфтий ҳазратлари ўз дуоларида ушбу масжидни Аллоҳ таоло қиёматга қадар мўмин-мусулмонларга хизмат қилишини насиб этиши ва унинг қурилиши ва фаолиятини йўлга қўйишига ҳисса қўшганларга улуғ-савобларни ато этишини Ҳақ таолодан илтижо қилиб сўрадилар.

Ўзбекистон мусулмонлари идораси Матбуот хизмати

Инсон учун беҳисоб неъматлар ичида "тил" деган улуғ неъмат ҳам берилган. Барча аъзолардан биттадан гуноҳ содир бўлса, тилдан бир нечта гуноҳлар, яъни ғийбат, ёлғон, чақимчилик, ёлғон қасам, туҳмат, манманлик, ҳақорат, беҳаё сўзларни сўзлаш ва ҳоказо... чиқади. Тилни сақлаш ҳақида жуда кўп оят, ҳадислар келган. Тил ҳақида келган ояту ҳадисларнинг ижросини ҳар ким ҳам таъминлай олмайди. Бу борада улуғларимиз бизга ўрнак бўлганлар.

Улуғ олим, эшон, мударрис, мутасаввиф, ҳаттот, ҳофизу Қуръон, Қори Абдураҳим: Мадиёр Қурбоновдан кейин Бухоро шаҳар "Тагбандбофон" масжидида мутаваллий вазифасида бир неча йил ишлаганлар. У кишидан сўнг бу ишни ўғиллари, устоз Абдулбосит домланинг оталари, Абдуссамад Раҳимов давом эттирганлар. Биз талабалик давримизда Абдуссамад домло оталари қори Абдураҳим ҳақларида сўзлаб, "отамиз ҳар ойнинг охирида масжиднинг ҳадия қуттиларини очиб, тушган пулларни санаб, банкка топширар эдилар. Пулни санаганда Ўзбек тилида, "бир, икки, уч... етмиш саккиз, етмиш тўққиз, ҳаштод, ҳаштоди як, ҳаштоду ду...ҳаштоду нў, тўқсон, тўқсон бир, тўқсон икки", деб, етмиш тўққиздан тўқсонгача бўлган оралиғни тожик тилида санар эканлар. "Нега бундай санайсиз"?, деб савол берсалар, "саксан” дегани ўзбек тилида рақамни англатсада, тожик тилида “итсан” (кучуксан) деганидир. Қўпол сўзга ўхшаб қолгани учун, Аллоҳдан шарм қилиб, ўша жойини тожик тилида санайман", дер эканлар.
Қойил нақадар фасоҳат ва балоғатли тил. Аллоҳ у зотни раҳмат қилсин.

Саид ибн Жубайрдан ривоят қилинади: Расулуллоҳ соллоллоҳу алайҳи ва саллам: "Одам фарзанди эрталаб уйқудан уйғонган пайтда, жасадининг барча аъзолари уйғонади ва улар тилга айтишади: "Орамизда сен Аллоҳдан (кўпроқ) қўрқ! Чунки, сен тўғри бўлсанг, биз тўғри бўламиз. Сен эгри йўлга кетсанг, биз ҳам эгри йўлга кетиб қоламиз", дейди", дедилар. (Термизий ривояти).

Умар ибн Ҳаттоб розияллоҳу анҳу  Абу Бакр Сиддиқ розияллоҳу анҳуни қўли билан тилини чўзаётганини кўриб қолди ва:
- Эй Расулуллоҳнинг халифаси, нима қилаяпсиз?!- деди.
Шунда Абу Бакр Сиддиқ:
- Бу мени кўп ҳалокатли жойларга етаклайди. Расулуллоҳ соллоллоҳу алайҳи ва саллам: "Жасадда Аллоҳга шикоят қилмайдиган бирорта аъзо йўқ. Шулардан энг ғазабнок ва ўткири тилдир", деганларини эшитганман, дедилар.
(Абу Дунё ривояти).

Ҳазрат Хўжа Али Ромитаний айтадилар: "Тилни Худо яратди, оғизга зиндон қилди, ҳамда ўттиз иккита соқчини қўйди".

Саъдий Шерозий айтадилар:

Кимки, андишасиз сўзласа жавоб,
Сўзи эътиборсиз, чекар изтироб.
Ё ўйлаб сўзлагил инсон мисоли,
Ё жим туравер ҳайвон мисоли.
(Бўстон китобидан).

Аллоҳ Таоло мўминларни сифатлаб: "Улар беҳуда (сўз ва ишлар)дан юз ўгирувчидирлар", дейди. (Мўминун сураси 3-оят).

Бесуяк тилни тарбиялаш учун улуғларимиз турли хил тарбия услубларини қўллаганлар. Абу Бакр Сиддиқ р.а. беҳуда гап гапирмаслик учун оғизларига тош солиб юрар эканлар.
Ҳар бир мўмин тилини чиройли услуб билан тарбияламоқлиги даркор, чунки инсонни жаннатга ҳам дўзахга ҳам киришига кўпинча тили сабаб бўлади.
Аллоҳ тилларимизни фасоҳатли қилсин!

Шофиркон туман "Қори Фазлиддин" масжиди имоми М. Исоев.