Яқинда Ўзбекистон мусулмонлари идораси раисининг биринчи ўринбосари Ҳомиджон домла Ишматбеков таржимасидаги Абу Талҳа Муҳаммад Юнус ибн Абдуссаторнинг “Саноқли дақиқаларда тоғдай савоблар” номли китоби чоп этилди.

Китобда киши саноқли дақиқаларда қандай қилиб улкан савобларга эришиш мумкинлиги қизиқарли тарзда баён этилганки, буни китобнинг номидан ҳам англаш мумкин.

Хўш, бир неча сонияда тоғдай савобларга қандай эга бўламиз? Бу ҳақда китобда бундай дейилади: “Кимда ким шу зикрни бозорга кираётганда ёки унда айланиб юрганда бир марта ўқиса, Аллоҳ таоло унга бир миллионта савоб ёзиб, бир миллион гуноҳини авф этади ва жаннатда унинг учун бир қаср бино қилади.

Солим ибн Абдуллоҳ отасидан, отаси бобосидан ривоят қилади: “Расулуллоҳ соллаллоҳу алайҳи васаллам айтдилар: “Ким бозорда: Лаа илаҳа иллаллоҳу ваҳдаҳу шарийка лаҳу, лаҳул мулку ва лаҳул ҳамду юҳйи ва юмийту ва ҳува ала кулли шайъин Қодийр, деб айтса, Аллоҳ унга миллионта савоб ёзади, миллион гуноҳини авф этди ва жаннатда унинг учун бир уй қуради” дедилар” (Ибн Сунний ва Ҳоким ривояти).

Қаранг, бу нақадар фойдали тижорат! Қисқагина бир зикрни айтганимиз эвазига шунча савобга эришсак, шунча гуноҳдан халос бўлсак, жаннатда бизга атаб қаср қурилса!”

Мазкур китобни мутолаа қилар эканмиз, бундай манфаатли тавсияларни кўплаб учратамиз. Агар Қуръон ўқисак, зикру тасбеҳлар билан машғул бўлсак, нафл намозларни адо этсак қанча савобларга эга бўламиз? Нашрда бу ҳақда ҳам батафсил сўз юритилган.

Яна бир ўринда эса бундай дейилади: “Ҳар биримиз бир кеча-кундуз ичида Парвардигоримиз азза ва жалла учун бир соат вақт ажратайлик. Бу соатда қалбимиздан дунё ташвишларини чиқариб, ўй-хаёлимизни Аллоҳ таоло ҳузурида жамлаб, бошқа барча нарсадан узилишга интилайлик. Шу йўл билан инсон Аллоҳ ҳузуридаги ўз ҳоли ва мақомини билиб олса бўлади. Қайси инсоннинг Аллоҳ ҳузуридаги мақоми бўлса, У зотга яқинлиги бўлса, ўша соатда тоат ибодатга ғайрат жўш уради, Аллоҳ азза ва жалланинг таъзими ва муҳаббати билан қалби яйрайди.”

Бундай гўзал тавсиялар ҳар бир ўқувчини руҳлантириб, кўпроқ амал қилишга ундайди.

Хуллас, китобни мутолаа қилган киши ғанимат дақиқаларда дунё ва охират саодатига эришиш йўлида ҳар сонияда улкан савоблар қилиб, гуноҳлардан тавба қилишни ўрганади. Динимизда айтилган ҳар бир амалларни ўз вақтида ихлос билан адо этиш кераклигини ўқтиради. Бир сўз билан айтганда мазкур нашр ҳар бир мўмин-мусулмон учун кўплаб манфаат келтиради.

Ўзбекистон мусулмонлари идораси Матбуот хизмати

Ўзбекистон Президентининг «Буюк шоир ва олим, машҳур давлат арбоби Заҳириддин Муҳаммад Бобур таваллудининг 540 йиллигини кенг нишонлаш тўғрисида»ги қарори қабул қилинди, деб хабар бермоқда «Дунё» АА мухбири.
Ҳужжатда қайд этилганидек, жаҳон тарихида ўчмас из қолдирган бетакрор сиймолардан бири Заҳириддин Муҳаммад Бобур буюк шоир, қомусий олим, давлат арбоби ва моҳир саркарда сифатида бутун дунёда маълум ва машҳурдир. Унинг беқиёс илмий-ижодий мероси нафақат миллий маданиятимиз ва халқимиз адабий-эстетик тафаккурининг шаклланишида, балки жаҳон адабиёти, илм-фани ва давлатчилиги тарихида алоҳида ўринга эга.
Хусусан, мустақиллик даврида Заҳириддин Муҳаммад Бобурнинг ҳаёти ва фаолиятини ҳар томонлама чуқур ўрганиш, унинг асарларини юртимиз ва хорижий давлатларда тарғиб қилиш борасида кенг кўламли ишлар амалга оширилди. Жумладан, шоир туғилган кун – 14 февраль санаси ҳар йили мамлакатимиз бўйлаб адабиёт ва илм-маърифат байрами сифатида нишонланмоқда.
Давлатимиз раҳбари қарорида жорий йилда Заҳириддин Муҳаммад Бобур таваллудининг 540 йиллигини кенг нишонлаш вазифалари белгиланди. Унга кўра, буюк аждодимиз таваллудининг 540 йиллигига бағишланган тадбирларни ташки этиш ва ўтказиши бўйича ташкилий қўмита тузилади ва унинг таркиби тасдиқланади.
Ташкилий қўмита бир ҳафта муддатда Заҳириддин Муҳаммад Бобур таваллудининг 540 йиллигини нишонлаш бўйича амалга ошириладиган чора-тадбирлар дастурини тасдиқлаши режалаштирилган.
Ушбу дастурдан мамлакатимиздаги Заҳириддин Муҳаммад Бобур номи билан боғлиқ обида ва қадамжоларни, жумладан, ёдгорлик мажмуаларини таъмирлаш ва уларнинг ҳудудларини ободонлаштириш, Бобур Мирзо меросига мансуб қўлёзма, қадимий китоблар, санъат асарлари ва бошқа маданий бойликларни реставрация қилиш, уларни ишончли даражада сақлаш учун зарур шароит яратиш, хорижий мамлакатларда сақланаётган Заҳириддин Муҳаммад Бобурнинг ҳаёти, илмий-ижодий мероси ҳамда у яшаган даврга оид ноёб қўлёзма асарлар ва бошқа маданий бойликларни аниқлаш, уларнинг нусхаларини Ўзбекистонга олиб келиш ҳамда тадқиқ қилишни давом эттириш вазифалари ўрин олади.
Шунингдек, Ўзбекистоннинг хорижий мамлакатлардаги элчихоналари, Ўзбек миллий маданий марказлари, ватандошлар жамиятларида Заҳириддин Муҳаммад Бобур ижодини кенг ўрганиш ва тарғиб қилишга бағишланган маърифий тадбирлар, давра суҳбатлари ташкил этиши назарда тутилмоқда.
Қарорга биноан, Андижон шаҳрида «Заҳириддин Муҳаммад Бобур ижодий меросининг башарият маънавий-маърифий тараққиётидаги ўрни» мавзусидаги халқаро илмий-амалий конференция, Тошкент давлат ўзбек тили ва адабиёти университетида «Заҳириддин Муҳаммад Бобур меросининг Шарқ давлатчилиги ва маданияти ривожида тутган ўрни» мавзусида халқаро илмий-назарий анжуман, Тошкент шаҳрида Заҳириддин Муҳаммад Бобур таваллудининг 540 йиллигига бағишланган адабий-бадиий анжуман ташкил этилади.
Шунингдек, Андижон шаҳридаги «Бобур ва жаҳон маданияти» китоб музейида Бобурнинг ҳаёти, илмий ва ижодий фаолиятига бағишланган асарларнинг қўлёзма ва нашр нусхаларининг кўргазмаси, тасвирий санъат асарлари, миниатюралар, халқ амалий санъати намуналари кўргазмаларини ташкил этиш белгиланмоқда.
Ҳужжатга мувофиқ, Заҳириддин Муҳаммад Бобурнинг ибратли ҳаёти ва бой меросини аҳоли орасида кенг тарғиб қилиш мақсадида «Бобур мероси» халқаро сайёҳлик тарғибот дастурини амалга оширилади.
Шунингдек, 2023 йилда Заҳириддин Муҳаммад Бобур ҳаёти ва асарлари асосида янги спектакллар яратиш, шоир ғазаллари билан ижро этиладиган энг яхши қўшиқлар танловлари ҳамда «Назм ва наво» мақом кечаларини ташкил этиш, Заҳириддин Муҳаммад Бобурнинг болалик даврига бағишлаб суратга олинаётган «Йўлбарснинг туғилиши» бадиий фильмини якунига етказиш, Бобур Мирзо ҳақидаги спектакль ва кўп қисмли мультипликацион фильмни яратиш чора-тадбирлари белгиланди.

“У (Қуръон) мўминлар учун (илоҳий) эслатма ҳамдир”
(Аъроф сураси, 2-оят).

Muslim.uz | https://taplink.cc/muslimuz
@muslimuzportal | @mp3muslim | @diniysavollar

#Quron #Қуръон

Саудия Арабистони Подшоҳлигининг Жидда шаҳрида 2023 йил 23 январидан 23 апрелига қадар давом этадиган “I Халқаро Ислом санъати биенналеси (Икки йилда бир маротаба ўтказиладиган кўргазма)”нинг очилиш маросими бўлиб ўтди. 

Нуфузли кўргазмада мамлакатимиз тарихи ва маданиятига оид сара Исломий топилмалар, нодир экспонатлар ҳам намойиш этилмоқда. Унда жумладан, Ўзбекистон мусулмонлари идораси Кутубхонаси фондида сақланаётган Катта Лангар Қуръонининг икки саҳифаси ҳам тақдим этилди. 

Мазкур кўргазмада Ўзбекистондаги нодир экспонатлар намойиши  мамлакатимиздаги Маданият ва санъатни ривожлантириш жамғармаси ташаббуси билан амалга оширилди. 

“I Халқаро Ислом санъати биенналеси”да бутун дунёдан келтирилган исломий мерослар, қўлёзмалар, тангалар, ҳаттотлик ва наққошлик ижодлари, либослар ва бошқа юзлаб ноёб экспонатлар ҳам ўрин олган.

Диний идора тизимида ушбу кўргазмага тайёргарлик жараёни бир неча босқичда кечди. Хусусан, Ўзбекистон мусулмонлари идораси раиси, муфтий Нуриддин домла ҳазратлари Диний идора Кутубхонаси фондидаги Катта Лангар Қуръонининг сақланиш жараёни билан яқиндан танишиш асносида Катта Лангар Қуръони ва шу каби бебаҳо меросларни асраб-авайлаш, уларни келажак авлодга бус-бутун етказиш ва тадқиқ этишни алоҳида таъкидлаб, уларнинг халқаро кўргазмалардаги тақдимотларини талаб даражасида ўтказиш ва хайрли натижалар бўлишини сўраб дуои хайр қилдилар.

Шунингдек, Жиддадаги кўргазмада қатнашадиган Диний идора вакилига сафар олди Ўзбекистон мусулмонлари идораси раисининг ўринбосари Жалолиддин домла Ҳамроқулов мазкур намойиш динимиз ва юртимизга манфаатли бўлиши ва унинг муваффақиятли ўтишини сўраб хайрли дуолар бердилар.

Мазкур кўргазмада иштирок этиш ва унга тайёргарлик кўриш мақсадида Ўзбекистон мусулмонлари идораси Кутубхона бўлими мудири Камолиддин Маҳкамов Жидди шаҳрида бўлиб, Биеннале махсус гуруҳи вакиллари ва Франциянинг Лувр музейи реставратори бирга Катта Лангар Қуръонининг икки саҳифасини кўргазма залидаги махсус жиҳозга жойлаштирди. Ва кўргазма давомида иштирокчиларга юртимизнинг нодир экспонати ҳақида маълумот берди.

Маълумот учун, 2022 йилнинг 23 ноябрда Париж шаҳрининг Лувр музейида “Ўзбекистон воҳалари хазиналари. Карвон йўллари чорраҳасида” мавзусида Ўзбекистон музей ашёлари кўргазмаси очилиш маросими бўлиб ўтди. Унда Президентимиз Шавкат Мирзиёев ва Франция Президенти Эммануэль Макрон ҳам иштирок этди. Мазкур кўргазмада Ўзбекистон мусулмонлари идораси Кутубхонаси фондидаги Катта Лангар Қуръонининг икки саҳифаси ҳам тақдим этилди. Ушбу кўргазма 2023 йил 6 мартига қадар давом этади.

Ўзбекистон мусулмонлари идораси Матбуот хизмати

Поклик Ислом шиорларидан. Тарихга назар солсак, ҳеч бир тузум, гуруҳ ёки дин уни иймон даражасига кўтармаган. Исломда эса поклик имондан ҳисобланиб, инсонларни маънан ва жисмонан озодаликка чақиради.

Қуръони каримда мусулмонларга пок нарсалар, пок таомлар, покиза жуфтлар ҳалол қилингани ҳақида кўрсатмалар келган. Бадан поклиги, энг муҳими, қалб поклиги ҳақида сўз кетади. Барча нарса покликка таянилган, покликка қаратилган. Хусусан, намоз ўқиш учун нафақат бадан, балки кийим-бош ва жой поклиги ҳам зарур (“Тафсири Ҳилол”).

Аллоҳ таолонинг буйруқ ва қайтариқларида соғлиқ меъёрлари акс этади. Маълум ишларни тақиқлаб, қолганларига рухсат беришида инсоннинг руҳий ва жисмоний ҳолати аҳамият касб этади. Шу сабабдан ҳам биринчи бўлиб совунни мусулмон кимёгарлари ихтиро қилдилар.

Совун кашф қилинмасидан олдин одамлар турли ёғлардан фойдаланишган. Таркибининг кўп қисми зайтун мойи бўлиб, унга “ал-қали” дейилган махсус туз аралаштирилган. Сўнг қайнатиб, қолипларга солиб, қотишини кутишган.

XIII асрга келиб совуннинг ҳар хил рецептлари ўйлаб топилди. Масалан, мусулмон олими Розийнинг қўлёзмаларида совуннинг рецепти бундай келтирилади: “Озгина кунжут мойини олиб унга калий, ишқор ва оҳак солиб аралаштиринг ва қайнатинг. Тайёр бўлган маҳсулотни қолипга қуйиб, қаттиқ ҳолга келгунча ўз ҳолида қолдиринг”.

X асрда яшаган қуртубалик олим Абулқосим Халаф ибн Аббос Заҳровий бу соҳанинг отаси бўлиб, ғарбда “Абулқосис” номи билан танилган. Мутафаккир Пайғамбаримиз алайҳиссаломнинг поклик ҳақидаги ҳадисларидан илҳомланиб, тиббиётга бағишланган 30 жилдли “Тасриф” асарини ёзди. Китоб ўша даврдаги жарроҳлик асбоблари ва усуллари ҳақида бўлиб, амалиётда кенг қўлланилди.

Заҳровий фақат тиббиёт ҳақида эмас, балки китобнинг 19-жузини тўлиқ косметикага бағишлади. Аслида, бу косметологияга қўшилган буюк ҳисса эди. Мазкур китоб мусулмонларнинг косметология соҳасига қўйган тамал тоши деса, муболаға бўлмайди. Сабаби, асар 1000 йил олдин ёзиб қолдирилган.

Заҳровий Ислом асосларида белгиланганидек, соч, тери, тиш ва бошқа тана аъзоларига аҳамият беришни таъкидлади. Милкни мустаҳкамлаш ва тишларни оқартириш устида тажриба ўтказиб, амалиётда кенг қўллади. Атир-упа, хушбўйликлар ҳақида изланишлар олиб борди ва прессланган махсус қолипдаги хушбўй шарчалар ҳақида ёзиб қолдирди. Бу эса, замонавий юмалоқ атирларни эсга солади (Snodgrass, Mary Ellen (2005). World clothing and fashion. 153b.).

Заҳровийнинг асарлари ўтган юз йилларда турли Европа тилларига таржима қилиниб, олимлар томонидан чуқур ўрганилди (Abu al-Qasim Muslim physician and author. Encyclopedia Britannica). Айнан унинг меҳнати туфайли тиббиётнинг жарроҳлик ва косметология соҳасида кўп ютуқларга эришилди.

Манбалар асосида
Мунаввар НИЁЗАЛИЕВА
тайёрлади.