Юртимиз узра фараҳбахш Рамазон ойи ўзининг файзу футуҳи билан кезмоқда. Мунаввар тонгларда, муазззам шомларда қилинаётган хайрли дуолар диёримизнинг муссаффо осмонидан раҳмат, мағфират ва барака бўлиб ёғилмоқда.

Қуръони каримда батафсил баён қилиб берган: “Эй, имон келтирганлар! Сизлардан олдинги (уммат)ларга фарз қилингани каби сизларга ҳам рўза тутиш фарз қилинди, шояд (у сабабли) тақволи бўлсангиз” (Бақара сураси, 183-оят).

Абу Ҳурайра разияллоҳу анҳудан ривоят қилинган ҳадиси қудсийда Расулуллоҳ саллаллоҳу алайҳи васаллам шундай марҳамат қиладилар: “Аллоҳ таоло: “Одам боласининг ҳамма амали – ўзи учун, фақат рўза – Мен учундир ва унинг мукофотини Мен Ўзим берурман”, деди. Рўза – сақловчидир. Қачон қайси бирингиз рўзадор бўлса, фаҳшдан гапирмасин ва бақир-чақир қилмасин. Агар бирортаси у билан сўкишмоқчи бўлса, “Мен рўзадорман” десин. Муҳаммаднинг жони қўлида бўлган Зот ила қасамки, албатта, рўзадорнинг оғзининг ҳиди Аллоҳнинг наздида мушкнинг ҳидидан хушбўйроқдир. Рўзадорга икки марта хурсандчилик бор: бири – ифтор вақтида оғзини очганда  ва иккинчиси – қиёмат кунида Роббисига рўбарў бўлганда” (Имом Бухорий ва Имом Муслим ривоят қилган).

Муқаддас динимиздаги барча ибодатларда бандалар Аллоҳнинг олдида баробар туради. Жумладан, рамазони шариф рўзасини тутишда ҳам одамлар бир хил даражада очликни бошдан кечирадилар. Уларнинг ораларидан ё бой, ё мансабдор истисно қилинмайди.  Бу борада ҳамма баробар, кучли ва заиф, хос ва омманинг фарқи йўқ. Имом Ғаззолийнинг “Мукошафатул қулуб” асарида келтирилган бир ҳадиси шарифда шундай марҳамат қиладилар: “Менинг умматимга беш хислат берилди, бу аввалгиларга берилмаганди:

1. Аллоҳнинг наздида рўзадорнинг оғзидан мушкдан ҳам яхши ҳид келади.
2. Ифторгача малаклар рўзадор учун истиғфор қиладилар.
3. Бу ойда шайтонлар боғланади.
4. 4.Аллоҳ ҳар куни жаннатни безантиради ва “Солиҳ бандаларим, қалбларидан ёмонлик ва жавобгарликни йўқ қилиш учун шошилинч ҳаракат қилишяпти!” деб буюради.
5. У, ойнинг сўнгги кечасида уларни афв этади.

Аллоҳ таоло бу ойда қиладиган барча ибодату дуоларимизни ва тутадиган рўзаларимизни қабул айласин. Бандачилик қилиб билиб билмай қилган хатоларимизни мағфират айласин.

“Кўкалдош” ўрта махсус ислом билим юрти

Ойбек Маърупов.  

Аллоҳ таолога беҳисоб шукрки, ҳар йили Рамазони шариф кириб келиши билан юртимиз масжидлари хатми Қуръон садолари ила бурканади. Йилдан-йилга масжидларимизда хатми Қуръонлар зиёда бўлиб, тартиб ва ўзгача тароватда ўтмоқда.
Бу йили Республикамиз бўйича 1220 масжидда таровиҳ намозларида Аллоҳнинг каломи бошдан охир ўқилиб, хатми Қуръон қилинади. Уларда жами 2038 нафар қориларимиз иштирок этади.
Жараён шуни кўрсатмоқдаки, йилдан-йилга диёримизда Қуръон ҳофизлари кўпайиб бормоқда. Маълумот учун, ўтган 2018 йилда 1149 масжидда хатми Қуръон ўтказилган бўлиб, уларда 1860 нафар қори қатнашган эди.
Шунингдек, ҳар йилгидек хорижий давлатларнинг таклифларига биноан қориларимиз хатми Қуръонларда иштирок этадилар. Бу шубҳасиз, Яратган Роббимизнинг халқимизга берган энг улуғ инъомидир.
Хатми Қуръонларга марҳабо!

Ўзбекистон мусулмонлари идораси Матбуот хизмати

Рамазон  ойи арафасида, муборак Жума куни Фарғона ва Навоий вилоятларида янги жоме масжидлар қурилиб, намозхонлар ихтиёрига топширилди. 

“Саидаҳмадхон ҳожи” жоме масжиди

Фарғона вилоятининг Данғара туманида жойлашган “Саидаҳмадхон ҳожи” масжиди биноси эскириб қолгани, қолаверса, ноқулай жойда жойлашгани  сабаб, тўлиқ янгидан барпо этилди. Қурилиш ишлари 2 йил давом этди.

Бугун ушбу манзилда бошқа масжидларда такрорланмас, ўзига хос меъморий услубга эга янги байтуллоҳ бунёд бўлди. Масжиднинг очилиши туман аҳолиси учун чинакам байрамга айланди. Янги масжидда жума намозини адо этиш учун ошиққан кўплаб ихлос эгалари ҳовлиларга ҳам сиғмай кетдилар.

Маросимга ташриф буюрган Дин ишлари бўйича қўмита раиси ўринбосари Музаффар Комилов, Ўзбекистон мусулмонлари идораси раиси ўринбосари Шайх Абдулазиз Мансур ҳазратлари ва бошқа уламолар маҳалла аҳлини бундай кўркам ибодат уйи билан муборакбод этиб, янги масжид халқимиз эътиқоди, маърифатини мустаҳкамлашда ҳидоят ва зиё маскани бўлиб кўп йиллар хизмат қилишини Аллоҳдан сўрашди. Бу хайрли ишда кўмакчи бўлган барча эзгу ниятли кишилар ҳақларига дуолар қилинди. 

Байрамга туҳфа сифатида ҳудудидаги ижтимоий ҳимояга муҳтож оилаларнинг 10 нафар фарзандларига суннат тўйи қилиб берилди ҳамда 4 нафар имконияти чекланган фуқароларга ногиронлик аравалари топширилди.

“Шайх Абул Ҳасан Харақоний” жоме масжиди

Шу куни Навоий вилояти Навбаҳор туманидаги янгидан қурилган жоме масжидининг ҳам очилиш маросими бўлиб ўтди. Масжид Республикадаги зиёрат туризми марказларидан бири бўлмиш Нурота туманидаги «Чашма» зиёратгоҳига кетиш йўлида жойлашган бўлиб, бу ердан ўтувчилар йўл-йўлакай намозларини адо этиб олишларига қулай бўлади.

Қурилиш ишлари 2017 йилда бошланган эди. Бугун эса ички биноси 600 кишини сиғдира оладиган кўркам масжид қуриб битказилди.

Энди бу масжидларда Рамазон кечаларида юқори даражадаги шароитларда таровеҳ намозлари адо этилади, хатми Қуръонлар қилинади.  Аллоҳ таоло юртимизда бўлаётган хайрли ислоҳотларни халқимизга муборак қилсин!

Ўзбекистон мусулмонлари идораси Масжидлар бўлими

Ўтган улуғларимиз Рамазон ойида намозда ҳам, намоздан бошқа пайтларда ҳам Қуръонни тиловат қилар эдилар. 

***** 

Рўза уч хилдир:

Биринчиси руҳнинг рўзаси, бу орзуни қисқа қилишдир.

Иккинчиси ақлнинг рўзаси, бу ҳавони нафсга хилоф қилишдир.

Учинчиси аъзоларнинг рўзаси, бу таомдан, ичимликдан ва жимоъдан тийилишдир. 

***** 

Рўза нима? Рўза – Аллоҳ таоло сенинг тилингга, қулоғингга, кўзингга, фаржингга ва қорнингга парда уриб қўйишидир. Сен шуни тушуниб етишинг керак. Аллоҳ таоло рўза сабабли сени дўзахдан тўсади.

*****

Бир кекса кишига: “Сиз қари одамсиз. Бу рўза сизни заиф қилиб қўяди-ку” дейишди. Шунда у киши: “Мен бу рўзани узоқ сафар учун тайёрлаяпман. Аллоҳ таолонинг тоатига сабр қилиш Унинг азобига сабр қилишдан осонроқдир” деб жавоб бердилар.

*****

Бишр раҳимаҳуллоҳга: “Шундай одамлар борки, фақат Рамазон ойида ибодатга қаттиқ бериладилар” дейилди Шунда Бишр ҳазратлари: “Улар Аллоҳ таолонинг ҳаққини фақат Рамазонда танийдиган нақадар ёмон кишилар экан. Албатта, солиҳ киши йилнинг ҳаммасида қаттиқ ибодат қилади” дедилар.

*****

Солиҳлардан биридан “Ражаб ойи афзалми ёки шаъбон ойими?” деб сўради. Шунда у зот: “Сен шаъбоний эмас, раббоний бўл” дея жавоб бердилар. Яъни фақат шаъбон ойида ибодат қилиб, нафл рўза тутувчи эмас, балки бутун умр давомида Аллоҳнинг тоатида бўлгин” дедилар.

*****

Бир киши солиҳларнинг биридан чўри сотиб олди. Янги хўжайин рамазон ойи яқинлашганда таомлар, ичимликларни захира қила бошлади. Жория ундан бунинг сабабини сўради. Хўжайини “Рамазон яқинлашяпти. Шунга тайёргарлик кўряпмиз” деб жавоб берди. Бу гапни эшитган жория: “Сизлар фақат Рамазон ойида рўза тутасизларми? Менинг аввалги хўжайинимнинг барча кунлари Рамазондек эди. Мени ўша кишига қайтариб беринг” деди.

 ***** 

Интернет маълумотлари асосида

Нозимжон Иминжонов тайёрлади

Саҳоват, инфоқ-эҳсон кўрсатиш чин мўминлик сифатларидандир. Зеро, яхшилик, хайру-эҳсон билан Ҳақ ризолигига эришилади, инсонлар  орасида меҳр-муҳаббат кучаяди. Шунинг учун ҳам шариатимиз ҳожатманд инсонни ҳожатини чиқариш, ўзаро ёрдам кўрсатишга буюради. 

Пайғамбиримиз саллалоҳу алайҳи васаллам

وَلأَنْ أَمْشِيَ مَعَ أَخٍ لِي فِي حَاجَةٍ، أَحَبُّ إِلَيَّ مِنْ أَنْ أَعْتَكِفَ فِي هَذَا الْمَسْجِدِ يَعْنِي مَسْجِدَ الْمَدِينَةِ شَهْرًا، ...وَمَنْ مَشَى مَعَ أَخِيهِ فِي حَاجَةٍ حَتَّى يُثْبِتَهَا، أَثْبَتَ اللَّهُ قَدَمَيْهِ يَوْمَ تَزُولُ الأَقْدَامُ

  رواه الإمام الطبراني

яъни: “Бир биродаримнинг ҳожатида юриш мен учун мана бу масжидда (яъни Масжиди Набавийда) бир ой эътикоф ўтиришдан яхшироқдир. Ким биродарининг ҳожатини раво қилиб бергунигача у билан бирга юрса, Аллоҳ уни қадамлар тойиладиган кунда (қиёмат кунда)собитқадам қилади (қадами тойилмайди)” (Имом Табароний ривояти). 

Тошкент шаҳридаги “Омина” жоме масжиди имом-хатиби Юсуф домла Муҳиддинов яқинда ижтимоий ҳимояга муҳтож оилага мансуб, олийгоҳда таҳсил олаётган бир талабанинг тўйини ўтказиб берди. Имом домла икки ёшнинг никоҳини ўқиб, оқ фотиҳа берди, ҳамда валима тўйи харажатларини ўз хисобидан амалга ошириб берди. 

Маълумки, муборак ҳадисларда ўзига муносиб икки ёшнинг бошини қовуштириш ишига ғайрат қилишга буюрилган. Яхшилик билан қурилган ушбу оилани жамиятга намуна бўлгувчи бахтиёр оилалардан бўлишини Аллоҳ таоло насиб этсин.  

ЎМИ Матбуот хизмати