muslim.uz
Нима учун?
Аллоҳ таоло одам боласини азизу-мукаррам қилиб яаратган ва унга Ўзи яратган кўплаб махлуқотларни беминнат хизмат қилдириб қўйган. Бунга Қуръони каримнинг кўплаб ояти карималари далолат қилади.
Жумладан Исро сурасида: «Дарҳақиқат, Биз Одам болаларини азиз-мукаррам қилдик ва уларни барру-баҳрда — қуруқлик ва денгизда (от-улов ва кемаларга) чиқариб қўйдик ҳамда уларга ҳалол-пок нарсалардан ризқу рўз бердик ва уларни Ўзимиз яратган жуда кўп жонзотлардан афзал-устун қилиб қўйдик»,[1] деган.
Жосия сурасида: «У Ўз томонидан (яъни Ўз хоҳиш-иродаси билан) сизларга осмонлардаги ва Ердаги барча нарсаларни бўйинсундирди. Албатта бунда тафаккур қиладигаи қавм учун оят ибратлар бордир»,[2] деб марҳамат қилган бўлса, Тийн сурасида энг гўзал суратда яратганини баён қилаган: «Дарҳақиқат Биз инсонни энг гўзал шаклу шамойилда яратдик».[3]
Шу ва шу каби кўплаб оятлар ҳар қандай ақлли инсонда эътироф юзасидан “Нима учун?” деган саволни пайдо қилиши табиий.
Бундай ҳурмат-эҳтиром кўрсатилиши ва кўплаб махлуқотлардан афзал қилиниши бежизга эмас ёки инсон ўз-ўзидан шунга ҳақли бўлиб қолганидан ҳам эмас, балки булар ўзига хос масъулият ва вазифаларни инсон зиммасига юкланганини тақозо қилади.
Демак, инсон беҳудага эмас, балки маълум бир вазифаларни бажарши учун яратилган экан.
Аллоҳ таоло Зарият сурасининг 56-оятида: «Мен жин ва инсонни фақат Ўзимга ибодат қилишлари учунгина яратдим», деб марҳамат қилган. Абдуллоҳ ибн Аббос розияллоҳу анҳу “Мени танишлари учун яратдим” деган, деб тафсир қилганлар. Демак, инсонга ақл-заковат ва керакли барча имкониятлар берилиб, бунинг шукронасига Аллоҳга ибодат қилиши, маъсият (Аллоҳ қайтарган ишларни) қилмаслиги ва Аллоҳни таниб, Унга итоат қилиш вазифаси юкланган экан.
Инсон дунёга келишидан кўзланган мақсадларнинг яна бири имтиҳон қилинишидир. Аллоҳ одам фарзандини Ўзига итоат қилишга бюрган. Бунинг эвазига охиратда абадий жаннатга киритишини ва кўз кўрмаган ҳамда қулоқ эшитмаган неъматлар билан мукофотлашини ваъда қилган. Ким Аллоҳга ва Унинг ваъдаларига ишонмаса, нафсу-ҳавоси ва шайтоннинг айтганларига қулоқ солиб, иймонсизликда умрини ўтказса, уни абадий жаҳаннамда жазолашини айтган.
Бақара сурасида: «Ва албатта сизларни хавфу хатар, очлик, молу жон ва мева - чеваларни камайтириш каби нарсалар билан имтиҳон қиламиз. Бирор мусибат келганда: «Албатта биз Оллоҳнинг ( бандаларимиз) ва албатта биз у зотга қайтгувчилармиз», дейдиган собирларга хушхабар беринг (эй Муҳаммад)»,[4]деб марҳамат қилган.
Мулк сурасининг 2-оятида: «(Эй инсонлар, У) сизларнинг қайсиларингиз чиройлироқ-яхшироқ амал қилгувчи эканлигингизни имтиҳон қилиш учун ўлим ва ҳаётни яратган зотдир. У қудратли ва мағфиратлидир», деган.
Абу Ҳурайра розияллоҳу анҳудан ривоят қилинган ҳадисда пайғамбаримиз Муҳаммад соллаллоҳу алайҳи васаллам: «Жаҳаннам шаҳавотлар (нафсга ёқадиган лаззатлар) билан ўралган, жаннат эса макориҳ (яъни, кўринишда машаққатлар) билан ўралгандир», деганлар.[5] Аллоҳнинг розилиги ва охиратда жаннатга олиб борадиган ишлар ҳақ ва рост эканини далиллар аниқ кўрсатишига қарамай нафсга қийин ва машаққатли кўриниши бор нарса экани, Аллоҳнинг ғазабига ва оқибатда жаҳаннамга олиб борадиган ишлар нима экани маълум бўлишига қарамай нафсга чиройли кўриниши ҳадисда баён қилинмоқда.
Юқорида айтиб ўтилганидек, бизга берилган имкониятлар, ҳурмат-иззат кўрсатилиши, барча нарсаларни хизматкор қилиб бўйинсундирилгани ва энг гўзал хилқатда яратилишимиз шунчаки табиат қонуни эмас, балки оламлар Роббиси бўлган Аллоҳнинг иродасидир. Аллоҳ бирор ишни беҳикмат қилмайди. Дунёни имтиҳон диёри қилиб, бизларни Ўзига ибодат ва итоат қилишимиз учун яратганини унутмаслигимиз айни саодатимиздир, азизлар!
Ҳошимов Нуриддин,
“Ҳидоя” ўрта махсус ислом билим юрти ўқитувчиси
[1] Исро сураси, 70-ояти маънолари таржимаси
[2] Жосия сураси, 13-ояти маънолари таржимаси
[3] Тийн сураси, 4-ояти маънолари таржимаси
[4] Бақара сураси, 155-156-оят маънолари таржимаси
[5] Имом Бухорий ривояти
Қулоқларингизга ишонманг!
Олимларнинг таъкидлашича, инсон мияси қулоқ орқали секундига 16 герцдан тортиб 20 000 герцгача бўлган частотали таранг-сиқиқ тўлқинларни қабул қилади. 16 герцдан паст бўлган товушларни инфратовушлар дейилиб, табиий ҳолда одамлар бу товушларни эшитиш имкониятига эга эмас. Агар инсон шу тўлқинларни эшита олганида, ўз юраги орқали ўтаётган қон ҳамда тана мускулларининг овозини эшитар эди. Бу эса инсониятни узлуксиз азобда яшашига сабаб бўларди. Тадқиқотлар натижасига кўра, агар инсон 7 герц частотали тўлқинларни эшитса, дарҳол вафот этар экан.
Шунингдек, инсон 20 000 герцдан ортиқ частотали тўлқинлар, яъни ультратовушларни ҳам эшита олмайди. Бордию мазкур товушларни эшита олганида, сайёрамизнинг Қуёш атрофида айланишида содир бўладиган товушларни, фазодаги турли портлашларни ҳамда қабрларда азобланаётган маййитларнинг овозларини ҳам эшитиш имконияти пайдо бўларди.
Ҳа, азизлар! Аллоҳ таоло биз бандалари учун она заминимиз бўлган Ерда барча қулайликларни, ҳатто миямиз қабул қиладиган товушларни ҳам меъёрлаштириб қўйган. Бу Унинг бизга ато этган улкан раҳматидир!
Аллоҳ таоло Қуръони Каримда шундай марҳамат қилган:
قُلْ بِفَضْلِ اللّهِ وَبِرَحْمَتِهِ فَبِذَلِكَ فَلْيَفْرَحُواْ هُوَ خَيْرٌ مِّمَّا يَجْمَعُونَ
“Сен: “Аллоҳнинг фазли ила ва Унинг раҳмати ила. Бас, ана шу билан хурсанд бўлсинлар. У улар жамлайдиган нарсалардан яхшидир”, деб айт”. (Бир умматга икки дунё бахтига эриштирувчи илоҳий китоб берилиши ўша миллатга Аллоҳнинг фазли ва марҳаматидир. Бу миллат ушбу оятга амал қилиб, қанча хурсанд бўлса, арзийди. Аллоҳ таолонинг фазли ва марҳамати бўлмиш Қуръони Каримга иймон келтириб, уни ўзига дастур қилиб олган зотлар ўша энг улуғ фазл ва раҳматга эришган кишилар сифатида қанчалик хурсанд бўлсалар, шунчалик оз. Қуръонга эришиш дунёдаги бошқа ҳамма нарсаларни жамлаб, ўшаларга эга бўлишдан кўра яхшироқдир.) (Юнус сураси, 58-оят).
Аллоҳ таоло барчамизга Ўзининг Каломи ҳамда биз учун манфаатли бўлган овозларни эшитишни насиб этсин!
Интернет маълумотлари асосида
Нозимжон Иминжонов тарйёрлади
Жиддада эшитиш қобилияти заиф бўлганлар учун махсус учрашувлар ташкил этилди
Қодирун лойиҳаси ва Жидда Қуръонни ёд олиш уюшмаси томонидан ташкил қилинаётган ушбу учрашувларда Қуръони каримни ишорат билан ўргатиш ва ёзиш машқлари олиб борилмоқда. Бу ҳақда an7a.com нашрига таяниб ислом.уз сайти хабар берди.
Дастлабки учрашувда 50 нафар эшитиш қобилияти заиф бўлган кишилар иштирок этган. Уларга таълим бераётган ўқитувчилар Муҳаммад Абдураҳмон Воҳидин машқда қатнашганларнинг кўпчилиги Қуръони каримнинг ўттизинчи порасини ёд олиб, Жидда Қуръонни ёд олиш уюшмаси томонидан ўтказилган синовлардан муваффақиятли ўтганларини маълум қилган.
Ўзбекистон мусулмонлари идораси Матбуот хизмати
Ўзбекистон делегацияси Иордания Ҳошимийлар Қироллигида бўлди
Жорий йилнинг 19-21 февраль кунлари Уммон шаҳрида Ўзбекистон Республикаси ва Иордания Ҳошимийлар Қироллиги ташқи сиёсат идоралари юридик хизматлари ўртасида ҳамкорликнинг шартнома-ҳуқуқий масалалари бўйича маслаҳатлашувлар бўлиб ўтди. Бу ҳақда Ташқи ишлар вазирлиги хабар берди.
Учрашувда икки давлат расмийлари ўртасидаги маслаҳатлашув якунига кўра имзоланган Ўзбекистон ─ Иордания битимларининг ҳуқуқий мақомига аниқлик киритилди, уларни амалга оширишнинг ҳолати тўғрисида маълумот алмашилди ҳамда истиқболли ҳужжатларнинг лойиҳаларини ишлаб чиқишни фаоллаштиришга келишиб олинди.
Ташриф доирасида юртимиз делегацияси вакиллари Иорданиянинг турли вазирлик ва идораларида бўлиб қатор учрашувларда иштирок этди. Учрашувларда икки томонлама ҳамкорлик шартномалари муҳокама қилинди.
Шунингдек, учрашув доирасида икки мамлакатнинг туризм, қишлоқ хўжалиги тармоқларидаги, инвестицияларни рағбатлантириш ва ҳимоя қилиш соҳасидаги илғор тажрибаси ҳамда бошқа масалалар юзасидан маълумотлар алмашилди. 2019 йилдаги икки томонлама ҳамкорлик тадбирлар режалари кўриб чиқилди.
Ўзбекистон мусулмонлари идораси Матбуот хизмати
Индонезиялик шайх Иброҳим Зайнул самарқандлик уламолар авлоди бўлган
Айни вақтда Бухорода давом этаётган форум доирасида Ўзбекистоннинг зиёрат туризми салоҳиятини оширишга ва хорижий тажрибага асосланиб янги туризм маҳсулотларини шакллантириш мавзусида мулоқотлар бошланди.
Унда ислом динининг тарқалишида ўзбек олимларининг ҳиссаси, мусулмон сайёҳлар учун халқаро рейтинг ва унинг мамлакат нуфузини оширишдаги ўрни, туризмнинг маданий меросга таъсири каби мавзулар муҳокама қилинди. Хорижий меҳмонларнинг маърузалари тингланди.
Мухлис Ҳанафи, Индонезиядаги “Истиқлол” музей директори: – Индонезия ҳудудида ислом динининг тарқалишида Ўзбекистон олимларининг ўрни беқиёс. Бухоро Хожа Абдулхолиқ Ғиждувоний, Хожа Ориф ар-Ревгарий, Хожа Маҳмуд Анжир Фағнавий, Хожа Али Ромитаний, Хожа Муҳаммад Бобойи Самосий, Саййид Амир Кулол, Хожа Баҳоуддин Нақшбанд каби илм оламида танилган инсонлар юрти.
Милодий 9-15 асрларда юртингизда илм ва маданият энг юксак даражага етгани тарихий ҳақиқат. Бизнинг кўпгина манбаларимизда исломнинг энг машҳур намояндалари дарёнинг ортидан келгани қайд этилган.
Шаҳарлар мисолида айтадиган бўлсак, Бухоро, Самарқанд, Хоразм каби шаҳарларингиз Арабистондаги Боғдод ва Халафа билан машҳурлик борасида рақобатлаша олади. Бухоро Қоҳира, Самарқанд Бобил, Рим каби шаҳарлар билан илм- фан борасида тенгсиздир.
Индонезиядаги уламолар учун дарслик сифатида фойдаланиладиган суфийлик тариқати асосчиси Баҳоуддин Нақшбанднинг асарлари биз мусулмонлар қалбида ўчмас из қолдирган.
Биздаги таниқли Шайх Иброҳим Зайнул юртингизнинг машҳур зотлари – Самарқандийлар авлоди бўлгани ҳақида китобларимизда келтирилган. Аммо, биздаги аҳолининг катта қисми исломни араб давлатларидан кириб келган деб ўйлайди.
Агарда уларга юртингиз ҳақида кўпроқ тарғибот ишлари олиб борилса, зиёрат туризми учун қулайликлар яратилса, бундай тушунчадан чекинган бўларди.
Хорижий меҳмон ўз нутқида 1956 йил Индонезиянинг биринчи Президенти юртимизга келиб, Имом Бухорийни зиёрат қилгани ҳақида ҳам эслаб ўтди. Айни вақтда Нақшбандийнинг энг кўп издошлари яшаётган ушбу мамлакат билан Ўзбекистон давлати алоқалари ривожланишидан ҳар икки давлат манфаатдор бўлишини эса алоҳида қайд этди.
Ўзбекистон мусулмонлари идораси Матбуот хизмати
Мақолалар
