Бугун, 2 июнь, муборак Рамазон ойининг мағфират даҳаси, 17-кунидир. Тошкент шаҳридаги бир неча жоме масжидларда бу кеча Қуръони Карим хатмонаси яъни, Каломуллоҳнинг сўнгги суралари ўқилиб, чин ихлос ила дуолар қилинади.

Бугун Тошкент шаҳридаги қуйидаги учта масжидда Қуръони Карим хатмонаси якунига етади:

1. “Тўра бува” жоме масжиди. (Мирзо Улуғбек тумани, Султония кўчаси, 70а-уй. Тел.: +998 71 264 03 31)
Қорилар: Усмонов Шахобиддин Нуриддинович, Юнусов Абдурашид Анварович, Мирхабибов Миркамол Миразиз ўғли

2. “Мевазор ” масжиди.
(Манзил: Олмазор тумани, Намуна маҳалласи, Қизилқўшин кўчаси, 10а-уй.. Тел.: +998 71 240 17 45, +90 987-19-81)
Қорилар: Исломов Ёрбек Зокирович, Холматов Воситжон Вахидович, Абдумажидов Абдухамид Абдупаттох ўғли

3. “Масжидул хайр” жоме масжиди. (Юнусобод тумани, Бободеҳқон маҳалласи, Мирзаобод кўчаси, 74-уй. Тел.:+998 71 223-88-08, 212-81-59, +90 922-79-69,)
Қорилар: Маҳмудхонов Муҳаммад Исохон Маҳмуд ўғли

Хатми Қуръондан кейинги дуолар мустажобдир. Рамазоннинг энг баракотли онларини қўлдан бой берманг азизлар.

ЎМИ Тошкент шаҳар вакиллиги Матбуот хизмати

Ставрополь ўлкаси мусулмонлари идораси бошқармасида ўлка муфтийси Муҳаммад ҳожи Раҳимов ва Ўзбекистон мусулмонлари идораси раиси маслаҳатчиси Абдулҳамид Турсун ўртасида учрашув бўлиб ўтди.
Муҳаммад ҳожига Ўзбекистон мусулмонлари идораси раиси, муфтий Усмонхон Алимов ҳазратларининг дуои саломларини етказган Абдулҳамид Турсун домла ушбу ташриф қардош халқларнинг дўстона алоқаларини янада мустаҳкамлаш, диний-маънавий ришталарнинг янада мустаҳкам боғланишига, мусулмонларнинг беҳад қувончига сабаб бўлишини билдирди.
Ўз навбатида муфтий Муҳаммад ҳожи Раҳимов Ставрополь ўлкаси мусулмонлари идораси фаолияти, ислом ва православь жамоаларининг ўзаро алоқалари, ўлкадаги маданий-миллий автономиялари ва диаспоралари билан ишлаш борасида сўзлаб берар экан, жумладан, бундай деди: “Бугунги кунда халқаро терроризм ва экстремизмга қарши самарали курашиш учун жамики миллий ва диний жамоатлар бирлашмоқлари даркор”.
Суҳбат чоғида ёшлар тарбияси масаласига алоҳида эътибор қаратилиб, уларга ислом таълимотининг асл моҳиятини тушунтириш, ёш авлодни ислом маданиятининг беқиёс қадриятлари билан ошно қилиш масалалари юзасидан ҳам фикр алмашилди.

Ўзбекистон мусулмонлари идораси Матбуот хизмати

Ёрдам қўлини чўзиш – савобли амал

Аллоҳга шукр-ки, ўлкамизда тоат-ибодат, қут-барака ойи – рамазони шариф яхши кайфиятда ўтмоқда. Унинг фазилатларидан барчамиз баҳра оляпмиз, имкон қадар кўп ва хўб ибодатлар қилишга ошиқяпмиз. Бир оз хотиржамроқларимиз одатий амалларимиз ила чекланаётган бўлсак, шижоатлиларимиз имкон борида кўп савобли ишлар қилиб қолишга интиляпмиз. Илло, барчамизга аёнки, бу ойда қилинган нафл ибодатининг ажру савоби – фарз амалнинг ажру мукофотига тенглаштирилган, яна шу ойдаги ҳар бир эзгу амалнинг савоби етти юз баробаргача кўпайтириб берилиши башорат қилинган. Бу ойнинг меҳмон эканини билганлар “бир кўнгли бузуқнинг хотирин шод айлаш”га, ёрдамга муҳтож юртдошларимизни йўқлаб, улардан ҳол-аҳвол сўраб, яхши гаплар билан кўнглини кўтариб эса-да ажр олишга шошади. Яна кимдир зиммасидаги масъулиятни зиёдаси билан адо этишга ҳаракат қилади. Бир сўз билан айтганда, бу ойда имонли одамларнинг ҳамма-ҳаммаси одатдагидан ҳам меҳрибон ва масъулиятли бўлиб қолади.

Ана шундай ғанимат ойнинг раҳмату мағфират даҳаларида Ўзбекистон мусулмонлари идораси раиси, муфтий Усмонхон Алимов ҳазратлари ҳам юртимиз аҳолиси билан самимий суҳбатлар қилиш, масжидлар ва имом-домлалар фаолияти билан яқиндан танишиш, мўмин-мусулмонларнинг қалб-қўрларидаги гапларини тинглаш, улар билан фикр алмашиш мақсадида бир неча кундан бери сўлим водий вилоятларида хизмат сафарида юрибдилар.

Хайрли дуо, эзгу ният – мазмунли сафар омили

Рамазоннинг биринчи жума кечасида азим пойтахтимиздаги “Ҳазрати Имом” масжидида таровеҳ намозини адо этган муфтий ҳазратлари ўн дақиқа чиройли маъруза қилиб берганларидан сўнг водий халқини рамазон ойи билан қутлаш ва уларга пойтахтдаги намозхонларнинг дуои саломларини етказиш, бошлаётган сафарларининг хайрли ва баракали бўлишини сўраб, жамоадан дуо олган эдилар.

Дуои хайрлар, яхши ниятларнинг ижобати ўлароқ муфтий ҳазратларининг сафарлари сермазмун ва баракотли бошланди. Аслида одамлар билан дилдан суҳбатлашиш, уларнинг ҳолидан хабар олиб, ёрдамга муҳтожларга кўмак бериш, масжидларда жамоат билан намозларни бирга-бирга ўқиб, масжид аҳлига маърузалар қилиб бериш, таровеҳ намозларида Каломуллоҳга сомеъ бўлиш – Аллоҳ таолонинг амри, Пайғамбаримиз Муҳаммад мустафо соллаллоҳу алайҳи васалламнинг суннати, қолаверса, муҳтарам Президентимизнинг бугунги раҳбарлар олдига қўйган вазифаларни бажариш йўлидаги эзгу саъй-ҳаракатлардир.

Сафар машаққатини енгган олий туйғу

Барчамиз сафарга чиққанмиз. Сафарда юриш осон эмаслигини жуда яхши биламиз. Айниқса, иссиқда. Устига-устак рамазон ойида сафар қилиш янада машаққатли бўлади. Бироқ, шундай бўлса-да, ана шундай кунда қийинчиликларни зиммасига олиб, сафарда юрган кишининг қалбида, албатта, ана шу чарчоқларни сездирмайдиган бир туйғу – дин хизмати, халқ манфаати, миллат, Ватан муҳаббатини барча нарсадан устун кўриш туйғуси устувор бўлади.

Тасаввур қилинг, тасодифан, эшигингиз қўнғироғи чалинди. Қўшнилардан бири бўлса керак, дея чиқиб қарасангиз, қаршингизда Ўзбекистон мусулмонлари идораси раҳбари, муфтий ҳазратлари салом бериб турибдилар. Бундан ортиқ ҳаяжонли дақиқа бўлиши мумкинми?! Ана шундай дилга яқинлик учун ҳам водий халқи муфтий ҳазрат борган масжидга қараб ошиқиб, у зотнинг амри маъруфларини, наҳйи мункарларини тинглашга, дуоларини олиб қолишга тўп-тўп бўлиб келишмоқда.

Юракка яқин эътирофлар

Мана шундай ҳузурбахш суҳбатлардан баҳраманд бўлган кишиларимиздан бири ўзининг ўй-кечинмаларини шундай ҳикоя қилади:

“– Беш кун аввал қўнғироқ бўлди. Эртага соат тўққизда фалон жойдаги сўлим оромгоҳлардан бирига боришимни айтишди. “Сафарга чиқишим керак эди”, деб узримни айтдим. Бормасам бўлмаслигини, жуда муҳимлигини тайинлашди. Эртасига бордим, Норин дарёси бўйига, мажнунтолларнинг салқин соясига жой ҳозирланибди. Билсам, маҳалламизга муфтий ҳазрат бошчилигида бир гуруҳ мутасаддилар ташриф буюришибди. Икки соатларча чиройли суҳбат бўлди.

Шу билан сафарга чиқиб кетдим. Орадан яна икки кун ўтди. Кеча уйга келсам, муфтий Усмонхон домла ҳазратлари, устоз Абдулҳай домла ва бир неча илм аҳллари, уламоларимиз хонадонимизга ташриф буюришибди (афсуски, меҳмонларга мезбонлик қилолмадим). Ҳол-аҳвол сўраб, “қандай камчиликларингиз бор? Қай ишингизда кўмакчи бўлайлик? Фарзандларингизни ўқитасизми, ёрдам берайлик? Уй керакми? Жой керакми? Биздан не хизмат?” деб лутф қилишибди... Субҳоналлоҳ! Бу не кунлар-ки, катталар кичикка илтифот қилиб келса!? Бу қандай дориламон давр-ки, энг катта раҳбарлар хизмат сўраб эшигингиз қоқишса…

Куни кеча қариндошларимиз келишди. Улар ҳам эшитишибди. “Таклиф қилсангиз келишга вақт ажратаолмайдиган кишилар ўзлари келишса-я!?” деб ҳайрон бўлишди...

Муфтий ҳазратнинг мухлисларидан яна бири айтади: “Муфтий ҳазрат қаерда маъруза қилишларини эшитсам, ўша ерга етиб боришга ҳаракат қиламан. Чунки у киши одамларни Қиёмат, дўзах азоблари билан қўрқитмасдан, балки энг эзгу ишлардан, улуғ ажру савоблардан, жаннат сифатларидан сўз юритиб, кўнглимизни кўтарадилар ва хайрли ишларга ҳавасманд қилиб қўядилар”.

Ҳақиқатан, бу иш ҳазрати Пайғамбаримиз соллаллоҳу алайҳи васалламнинг: “Одамларга хушхабар беринглар, бездирманглар, осонлаштиринглар, қийинлаштирманглар”, деган (Имом Муслим ривояти) ҳадиси шарифларига тўла мос келади.

Дин ва миллат ғамида

Муфтий ҳазратлари сафар чоғида илм аҳлларини бошида кўтариб юрадиган ажойиб табиатли халқимиз вакиллари билан учрашиш билан чекланмасдан, масжидларнинг имом-хатиблари билан ҳам суҳбатлар ўтказиб, уларга фойдали йўл-йўриқлар кўрсатмоқдалар. Зотан, улар билан учрашувларда, бугунги имом ўз устида мунтазам ишламоғи, нафақат, диний илмни, балки дунёвий илмларни ҳам пухта билмоғи, дунёда юз бераётган ўзгаришларни зийраклик билан кузатиб бормоғи, воқеа-ҳодисалар юзасидан ўзининг қатъий фикрига эга бўлмоғи айтилмоқда.

Яна муфтий ҳазрат имом-хатибларга имомлик бу – пешволик эканини айтиб, уларни одамларнинг, хусусан, ёшларимизнинг тарбиясига ижобий таъсир кўрсатиш учун сўзи билан иши бир бўлиши кераклигига, Жалолиддин Румий ҳазратлари таъбири билан айтганда, “Ё аслинг каби кўрингил, ё кўринганинг каби бўл” шиорига амал қилиб яшашга даъват этмоқдалар.

Мана шундай мазмунли сафар давом этмоқда, таассуротлар билан яна ўртоқлашамиз, иншоаллоҳ.

Ўзбекистон мусулмонлари идораси Матбуот хизмати

Илм-фан ҳар куни Қуръоннинг ҳақлигини таъкидлайдиган янгидан янги ҳақиқатларни кашф қилмоқда. Ана шундай ҳақиқатлардан бири борлиқдаги барча нарсанинг гапириши, уларнинг муайян овози борлигидир.

Аллоҳ таоло Қуръони Каримда шундай деган:

تُسَبِّحُ لَهُ السَّمَاوَاتُ السَّبْعُ وَالأَرْضُ وَمَن فِيهِنَّ وَإِن مِّن شَيْءٍ إِلاَّ يُسَبِّحُ بِحَمْدَهِ وَلَـكِن لاَّ تَفْقَهُونَ تَسْبِيحَهُمْ إِنَّهُ كَانَ حَلِيماً غَفُوراً

“Унга етти осмону ер ва улардаги кимсалар тасбеҳ айтур. Унинг ҳамди ила тасбеҳ айтмаган ҳеч бир нарса йўқ. Лекин уларнинг тасбеҳини англамассизлар. Албатта, у ҳалийм ва сермағфират зотдир”. (Араб тилида тасбиҳ айтиш “Аллоҳни поклаб ёд этиш” маъносини англатади. Ушбу ояти карима бутун борлиқ, барча мавжудот Аллоҳ таолони айбу нуқсондан поклаб тасбиҳ айтишини таъкидламоқда.) (Исро сураси, 44-оят).

Бу улуғ оят бизга бир иш ҳақида хабар бермоқда. Биз у ишни билмасдик, лекин у мавжуд. Биз Аллоҳнинг Китобида келган барча нарсага иймон келтирганмиз. Лекин бу Китобга иймон келтирмаганларни қандай қониқтирамиз?

Бу оят ҳақида тафаккур қилиб кўрган инсон барча махлуқотлар Аллоҳга ҳамд, тасбеҳ айтишини англаб етади. Инсон ҳам, дарахтлар ҳам, юлдузлар ҳам ва бошқа нарсалар ҳам тасбеҳ айтади. Лекин менинг эътиборимни тортган нарса шуки, Аллоҳ таоло: “Лекин уларнинг тасбеҳини англамассизлар” деди. “Лекин уларнинг тасбеҳини эшитмайсизлар” демади. Демак биз махлуқотларнинг тасбеҳини эшитишимиз мумкин, лекин уни тушуна олмаймиз. Тушуниш, англаш эшитишдан кейин содир бўлади.

Бошқача қилиб айтганда, агар биз бир инсонга “Сен бизнинг гапимизни тушунмайсан” десак, бу дегани биз унинг олдида гапирамиз, аммо ўша одам бизнинг айтган гапимизни тушунмайди, фаҳмламайди деганидир.

Аллоҳ таоло юқоридаги оятда атрофимиздаги барча махлуқотлардан чиқадиган тасбеҳ овозларини эшита олишимизга очиқ-ойдин ишора қилди. Лекин улар чиқараётган овознинг маъносини англолмаймиз.

Бу ҳақиқатни бугунги замонавий илм ҳам кашф этди!

Олимлар “Албатта, баъзи ўсимликлар ўзидан инсон эшита оладиган даражада товуш тебранишлари чиқаради” дейишди. Инсон эса 20 гц (сониясига 20 марта тебраниш) билан 20000 гц (сониясига 20000 марта тебраниш) оралиғидаги товуш тебранишларини эшита олади. Лекин ушбу ўсимликлар чиқарадиган товуш жуда заиф бўлиб, уни бир неча минг марталаб кучайтирилгандагина эшитиш мумкин бўлади.

Борлиқдаги ҳар бир нарса гапиради ва ўзидан товуш тебранишларини чиқаради. Ўсимликлар, дарахтларнинг муайян овози бўлиб, уларнинг ўзи бошқа овозлардан ҳам таъсирланади. Мана шулар бугунги замонавий ботаника фани кашф қилган ҳақиқатлардир.

Кейин олимлар тадқиқотлар натижасида баъзи юлдузлар ўзидан овоз чиқаришини сезиб қолдилар. Маълум бўлишича, Аллоҳ таоло Қуръонда “Ториқ” деб номлаган нейтрон юлдузлар болғанинг овозига ўхшаш овоз чиқарар экан. Бундан ташқари қора туйнуклар ҳам овоз чиқарар экан. Кейинги вақтларда олимлар нарсалар чиқараётган овозларни ёзиш имконига ҳам эга бўлдилар.

Лекин кашф этилган нарсаларнинг ичида энг ажойиби шуки, ҳар бир тирик ҳужайра ҳам товуш тебранишлари тарқатар экан. Очиқ-ойдин овоз чиқарадигани бу – юрак ҳужайралари экан. Калифорния университетининг Кимё бўйича устози доктор “Компютер ёрдамида кўрилганда, ҳар бир ҳужайра муайян овоз чиқарар, бир ҳужайранинг овози бошқасиникидан фарқ қилар экан” деган илмий хулосани тақдим этди!

Ҳатто танамизни ташкил этган ҳужайралар ичидаги ДНК ҳам ўзига хос овоз чиқариши кашф этилди. Кўринишидан у эртаю кеч тасбеҳ айтади ва бошқалар айтган тасбеҳдан ҳам таъсирланади.

Мен ўйлайманки, банданинг Аллоҳ таолога тасбеҳ айтиши унинг ДНКсининг ишлаш низомига таъсир қилади. ДНК эса бизнинг ҳаётимиз ва касалликларимизни идора қилади. Шунинг учун бизнинг айтадиган тасбеҳимиз тузалиши қийин бўлган касалликлардан шифо топишимизга сабаб бўлади. Валлоҳу аълам.

Делфинлар, сувараклар, қушлар, асаларилар ва бошқа барча тирик жонзотлар ўзидан товуш чиқариши ҳам маълум бўлди.

Олимлар кашф этишдики, вируслар ҳам товуш тебранишлари чиқарар экан.

Бугунги кунда олимлар “Борлиқдаги ҳар бир нарса муайян, ўзига хос овоз чиқаради” деб ҳисоблайдилар.

Улар “Албатта, ҳар жойда бир Қувват бўлиб, у ҳамма жойда ҳукмронлик қилади, бошқаради ва биз кўрадиган ёки ҳис этадиган ҳар бир нарсага таъсир ўтказади” дейишди.

Ушбу қувват барча нарсани Яратувчиси Аллоҳ таолонинг қуввати эмасми?! Нега энди мазкур овозлар Аллоҳга бўйинсўниб, Уни улуғлаб, Унинг неъматларига шукр ўлароқ айтилган тасбеҳлар бўлмаслиги керак?! Албатта, улар тасбеҳлардир!

Агар ҳар бир нарса эртаю кеч малолланмасдан, чарчамасдан Аллоҳга тасбеҳ айтса, нега энди биз Унга тасбеҳ айтишни унутиб қўямиз?!

Нега ҳар бир сўзимиз зикрдан иборат бўлмаслиги керак?!

Мавжудотларнинг ичида энг кичиги бўлган вируслар ҳам тасбеҳ айтиб турганда, нега мукаррам қилиб яратилган биз инсонлар, мўминлар тасбеҳ айтмаслигимиз керак?!

Шу эътибордан ҳам Набий соллаллоҳу алайҳи васаллам ҳадисларида “Субҳаналлоҳи ва биҳамдиҳи” жумласи Аллоҳ таолога энг маҳбуб калима эканлигини айтганлар.   

“Унинг ҳамди ила тасбеҳ айтмаган ҳеч бир нарса йўқ. Лекин уларнинг тасбеҳини англамассизлар. Албатта, у ҳалийм ва сермағфират зотдир” деб марҳамат қилган Зот покдир!

Аллоҳ таолодан бизни тасбеҳ айтувчилардан қилишини сўраймиз!

Абдуддоим Каҳелнинг мақоласидан

Нозимжон Иминжонов таржимаси

Ўзбекистон Республикаси Президентининг 2018 йил 16 апрелдаги “Диний-маърифий соҳа фаолиятини тубдан такомиллаштириш чора-тадбирлари тўғрисида”ги ПФ-5416-сон Фармонида белгиланган вазифалар ижросини таъминлаш мақсадида Ўзбекистон мусулмонлари идораси тасарруфидаги диний таълим муассасалари ҳамда илмий мактабларда 2018 йилнинг 10 июнидан бошлаб “Қуръони карим ва тажвид” бўйича пуллик ўқув курслари ўз фаолиятини бошлаши ҳақида хабар берган эдик.

Бугун, 1 июнь куни Ўзбекистон мусулмонлари идораси тасарруфидаги барча диний таълим муассасалари ҳамда илмий мактабларда курсларда билим олиш истагини билдирганларнинг ҳужжатларини қабул қилиш бошланди.

Маълумот учун, ўқув курсларига 2018 йилнинг 1-3 июнь кунлари соат 09:00 дан 17:00 гача ҳужжатлар қабул қилинади.

ЎМИ Матбуот хизмати