Аллоҳ таоло Қуръони Каримда шундай деб марҳамат қилган:

حَتَّى إِذَا أَتَوْا عَلَى وَادِي النَّمْلِ قَالَتْ نَمْلَةٌ يَا أَيُّهَا النَّمْلُ ادْخُلُوا مَسَاكِنَكُمْ لَا يَحْطِمَنَّكُمْ سُلَيْمَانُ وَجُنُودُهُ وَهُمْ لَا يَشْعُرُونَ

“Токи улар чумолилар водийсига келганларида, бир чумоли: “Эй чумолилар, масканларингга киринглар, Сулаймон ва унинг аскарлари сизларни билмасдан эзиб юбормасинлар”, деди”. (Чумолилар ҳам асалариларга ўхшаб, ажойиб интизомга эга. Ҳали-ҳануз уларнинг жамоат бўлиб яшашлари сири англанган эмас. Бу оятда улар бир-бирларини хавф-хатардан огоҳ этишлари айтилмоқда.) (Намл сураси, 18-оят).

Бир гурух франциялик “олимлар” Қуръонни танқид қилишга уриндилар ва لَا يَحْطِمَنَّكُمْ калимасида тўхталиб, “Қуръон ушбу лафзни ишлатиш билан таъбирда хатога йўқ қўйган. Чунки, حطم (“ҳаттома”) феъли “синдирмоқ” деган маънони англатади. Шиша синдирилади, аммо чумоли синдирилмайди-ку, балки эзилади, ўлдирилади-ку” дейишди.

Бу гапга австралиялик бир олим эътироз билдирди. У бир неча йиллар давомида чумолилар тузилишини ўргана бошлади ва тадқиқот хулосасини эълон қилди. Хулосада ушбу гаплар бор эди: “Албатта, Қуръоннинг мазкур лафзи юз фоиз тўғри! Чунки, чумоли танасининг 70 фоизи шиша моддадан ташкил топган экан”.

Кейин у ушбу хулосани бутун дунёга эълон қилди.

Демак, чумоли эзилмайди, балки синдирилади! Қуръон буни ўн тўрт асрдан бери айтиб келади. Аммо бу ҳақиқат бутун оламга бир неча йиллар олдин маълум бўлди.

Қани айтингчи, бундан ўн тўрт аср олдин бирорта микроскоп, лаборатория мавжуд бўлмаган пайтда ўқиш-ёзишни ўрганмаган Муҳаммад соллаллоҳу алайҳи васаллам инсониятга яқиндагина маълум бўлган илмий ҳақиқатни қаердан билдилар экан?! Албатта, бу хабарни у зотга Аллоҳ таолонинг Ўзи билдиргандир!

Шайх Солиҳ Туркийнинг “Мин роваиъил Қуръан”

номли мақоласидан

Нозимжон ИМИНЖОНОВ

таржимаси

ЎМИ Матбуот хизмати

Расулуллоҳ соллаллоҳу алайҳи васаллам марҳамат қиладилар: “Агар орангизда мункиллаган қариялар, ўтлаб юрган жонзотлар ва эмизикли чақалоқлар бўлмаганида эди, бошингизга балолар ёмғирдек ёғилган бўларди”.

Қашқадарё вилоятининг Чироқчи туманилик фуқаро 1941 йилда урушга кетади. Уруш тугагач, яна армия хизматида давом этади. Бу орада унинг оила аъзоларига унинг бедарак кетгани ҳақида мактуб келиб тушади. Вақт ҳамма нарсага даво. Бора-бора қариндошлар бу шум хабарга кўникиб қолади. Кунлардан бир кун у уйга қайтиб келади ва шундан буён то бугунга қадар унинг исми барча ерда – Тошкент ва Қаршидаги Хотира майдонларидаги китобларда ҳам, ҳокимият ва бошқа ташкилотлар рўйхатида ҳам “бедарак йўқолган”лигича қолиб кетди. Қуйида бобонинг набираси таҳририятимизга йўллаган мактубни ҳавола этамиз.

“Қашқадарё вилоятининг Чироқчи туманидаги “Бешчашма” МПТ, Мирзатўп қишлоғида яшовчи Хидир бува Эшалиев 1926 йил туғилган. 1944 йил ҳарбий хизматга чақирилган. Ўша йилнинг 12 апрелидан собиқ иттифоқ армиясининг 125-зенит полки таркибида 1945 йилнинг 9 майига қадар немис-фашистларига қарши курашган. Ғалаба қўлга киритилгандан сўнг 1949 йилнинг 4 декабригача Қизил байроқли Болтиқ флоти таркибидаги 90648-сонли ҳарбий қисмда ўқчи вазифасида хизмат қилган. 

Лекин ўша даврнинг талотўпларида нимадир бўлиб, бедарак йўқолганлар рўйхатига кириб қолган. 1949 йил ҳарбий хизматдан қайтиб келиб, Чироқчи тумани ҳарбий бўлимидан рўйхатдан ўтган бўлса-да, бедарак йўқолганлар рўйхатида тураверган. Қаршидаги ва Тошкентдаги Хотира майдонида ҳамда Қашқадарё хотира китобида ҳам бедараклар рўйхатида турибди... 

Уни байрамларда, тантаналарда ҳеч ким йўқламайди. Чунки 1944 йил бедарак кетган деган хат келган. “Катталар”нинг кўзининг олдида 68 йилдан бери яшаб-ишлаб юрган бўлса ҳам бедарак. Чунки 44-йил шундай хат келган. Бобо ҳозир 92 ёшда. Буни қарангки, бедарак кетган деган одам қайтиб келса, яна 69 йил яшаса, уйланса, болали-чақали, невара-чеварали бўлса...ким ўзи у одам, деб сўрайдиган одам бўлмаса...” 

Хидир бобонинг невараси Илҳом Эшалиев.

Набиранинг айтишича, Хидир бобо ўта камсуқум, юқоридаги ишларга шу пайтгача аҳамият бермай юрган, бир инсон сифатида ҳаёт кечирган инсонлардан бири. Аммо бобо кунлардан бир кун тўлқинланиб кетади, кўзига ёш олиб йиғлайди. “Ёшлигимнинг энг чиройли дамлари қон кечиб, жангларда ўтди. Бошимдан жуда кўп қийинчиликларни ўтказдим. Лекин ким ёки нима учун? Мени ҳамон бедарак кетган деб юришибди. Биров ҳолимдан хабар олмайди. Менга мол-давлат керакмас, шу давлатим мени эсласин дейман”, дея ўкинади. 

Бобонинг набираси Илҳом Эшалиев таҳририятимизга мурожаат қилиш билан бирга Президент виртуал қабулхонасига ҳам мурожаат қилади. Буни қарангки, бобони йўқлаб келишади. Унга бир қути совға ҳам улашади. Аммо Илҳом Эшалиевнинг айтишича, гап совғада, аниқроғи, моддий манфаатда эмас. Ҳужжатларда ҳаммаси рисоладек бўлиши зарур. Унинг Чироқчи туман ҳокимияти ва бошқа мутасадди ташкилотларига қилган мурожаатлари самарасиз қолган. “2011 йил Президент девонига қилинган мурожаатдан сўнг уч-тўрт кун “югуриб” қолишганди. Лекин ҳеч нарса қилиб беришмади, ўшанда кўзбўямачилик бўлганди”, дейди бобонинг набираси Илҳом Эшалиев.

Назаримизда, бу масала марказида улкан мантиқсизлик ётибди. Бобонинг паспорти, ҳарбий гувоҳномаси, урушда олган медали бор, аммо у ҳамон “бедарак”. Хидир бобонинг қариндошлари томонидан Россия Федерациясига юборилган мурожаатга кўра, Россия ҳарбий қўмондонлиги Хидир Эшалиевни ҳақиқатда ҳам ўша йиллари урушда қатнашганини, ундан кейин яна ҳарбий хизматда бўлганини тасдиқлаган ва бу ҳақда зарур маълумотнома тақдим этган.

Хуллас, гаплар ана шунақа...

Мана яна ҳадемай, “Хотира ва қадрлаш куни” етиб келади, яна уруш ва меҳнат фахрийларини йўқлаб табриклашади, яна Хидир бобо ана уруш ветеранлари рўйхатига кирмай қолаверадими? Ёки биргина отахонни мукофотланганлар рўйхатига қўшиб қўйиш давлатимизга шунчалик оғир келяптими? Бу одам ким учун қон кечган эди ўзи?..

Ўзбек халқи кекса авлодни доим ардоқда, эътиборда тутиб келган, ҳурматини жойига қўйган. Халқ хизматида бўлган, олис ўтмиш йўлини босиб ўтган бундай кишиларни ҳеч ким дилини оғритишга ботинмаган, аксинча, дуосини олишга интилган. Хидир бобо Эшалиевнинг бу муаммоси ҳал этилса, ҳам савоб бўларди, ҳам бир кишининг қадри тикланарди, ҳам ҳақиқат қарор топарди.

Таҳририят

Бу ҳақда уламоларимиз нима дейди?

БИСМИЛЛАҲИР РОҲМАНИР РОҲИЙМ

Қарияларни эъзозлашга динимизда алоҳида эътибор
берилган. Имон­ эътиқодли, ихлосли ва нуроний кексаларнинг фазилатларини билиш ҳамда уларнинг ҳақларини адо этиш бошқалар учун вожибдир. Бундай хайрли ишлар Пайғамбаримизнинг (соллаллоҳу алайҳи ва саллам) суннатларига мувофиқдир. У зот кишиларга кексаларнинг фазилатларини билдириб, уларнинг ҳақларига риоя этишни шарт қилганлар. 
Имом Термизий Анасдан (розияллоҳу анҳу) ривоят қилган ҳадиси шарифда Муҳаммад (соллаллоҳу алайҳи ва саллам) кексаларни улуғлаш ҳақида бундай деганлар: “Ёш йигит кекса кишини ёши улуғлиги учун ҳурмат қилса, Аллоҳ таоло уни ҳам кексайганида ҳурмат қилинадиган инсонлар қаторига қўяди”. Бир йигит бобосига дерди: “Бобожон, мен ҳам сизнинг ёшингизга етсам дейман...” “Илоё, ниятингга ет, болам, узоқ яшай десанг, кексаларни ҳурмат қил...” деди бобоси. Кексаларга ҳурмат халқимизнинг азалий ибратли қадриятларидан ҳисобланади... 9 май куни юртимизда “Хотира ва қадрлаш куни” деб белгиланди. Ушбу байрам шарофати билан кекса отахону онахонларимиз халқимиз эъзозида бўлиб, моддий ва маънавий жиҳатдан қўллаб­-қувватланади. “Хотира ва қадрлаш” куни юксак ахлоқнинг ёрқин бир кўриниши, ҳавас қилса ярашгулик байрамга айланди. Бу кун тарихнинг оғир синовларини бошдан кечирган, фидокорона меҳнат қилган табаррук ёшдаги отахон, онахонларимизга ҳурмат ва эҳтиром кўрсатиш айёмидир. “Қадр кўрсатган қадр топади” – халқимизнинг доно ҳикмати ҳам шуни таъкидлайди.

Қадрлаш ўзликни англаш демакдир. Бу сўз замирида имон бутлиги, одоб-­ахлоқ, аждодлар мероси, шунингдек, атрофимиздаги инсонларга чуқур ҳурмат мужассам.

Ўзбекистон мусулмонлари идораси раиси, муфтий Усмонхон Алимов ҳазратларининг “Оилада фарзанд тарбияси” китобидан 

БИСМИЛЛАҲИР РОҲМАНИР РОҲИЙМ

Кексаларни ва ўзидан катталарни эҳтиром қилиш ўз қадр-қийматини билган ҳар бир жамиятнинг энг аҳамиятли қадриятларидан бири ҳисобланади. Бу қадриятлар уларга амал қилган жамиятларда ўзига муносиб олиймақом жой олади. Мазкур жамиятларда ҳар бир инсон кексаларни эъзозлаш бўйича ўзининг масъулиятини яхши билади ва бажаради. Ана шунда ҳар бир иш ва шахс ўз ўрнини топади.
Қадимда бобо ва момоларимиз динимиз таълимотларига амал қилиш жараёнида бу борадаги кўрсатмаларни ҳам гўзал тарзда амалга оширганлар ва барчага ўрнак бўлганлар.
Мусулмонлар орасида кексалар доимо қадрланиб келган, чунки Ислом шариатида бу ишга алоҳида аҳамият берилади. Зотан, қарилик инсон ҳаётининг ожизлик ва заифлик босқичи ҳисобланади. Шунинг учун ёш, бақувват чоғида жамиятга хизмат қилган кишиларга қариган чоғларида яхшилик қилиш уларнинг яхшилигини яхшилик билан қайтариш сирасидаги ишлар қаторига киради. Ислом шариатида ҳар бир қарияга ўзига яраша имтиёз бе-рилган. Уларнинг ҳар бири жамиятда эъзозланиш ва эҳтиром қилиниш ҳаққига эгадир. Мазкур ҳолатларнинг барчаси мусулмонлар яшайдиган жамиятда яққол кўзга ташланиб туради.

Биз, бугунги кун мусулмонлари ҳам мазкур бобо ва момолари-мизга муносиб бўлишимиз, барча гўзал одобларимизга амал қилиб, кексаларни эъзозлаш, уларга иззат-икром кўрсатиш ишларини қойилмақом тарзда йўлга қўйиб боришимиз лозимдир.
Катталарни улуғлаш, эъзозлаш, авайлаш барча пайғамбар алайҳиссаломларнинг суннати ва мусулмон жамиятларининг асосий белгиларидан биридир. Ҳозирги кунда инсонпарварлик борасидаги динимиз таълимотларини ўрганиб, уларга амал қилишни йўлга қўйиб бориш жараёнида кексаларни эъзозлашдек буюк инсоний фазилатни яхшилаб йўлга қўйиб бориш ҳаммамиз учун ниҳоятда фойдали бўлади.
Кексаларга кўрсатиладиган ҳурмат ва эъзоз мусулмонлар жамиятида шариат таълимоти асосида амалга оширилади. Яъни бу борада Қуръони карим оятларидан, Набий алайҳиссаломнинг ҳадисларидан, уламоларнинг ижмоъларидан ва улуғларнинг амалларидан далиллар, ҳужжатлар бордир.

Шайх Муҳаммад Содиқ Муҳаммад Юсуф ҳазратларининг «Кексаларни эъзозлаш» китобидан

17-21 апрель кунлари Дубай шаҳри ҳокими, Бирлашган Араб Амирликлари Вазирлар кенгаши раиси, БАА амирининг ноиби Муҳаммад бин Рошид Ол Мактум раҳбарлигида Дубай шаҳрида ўтказилаётган 7-халқаро араб тили анжуманида нутқ сўзлаган Ислом ҳамкорлик ташкилоти бош котиби доктор Юсуф Усаймин, араб тили жаҳонда тарқалган тиллар орасида 4-ўринни эгаллаши, дунёдаги 66 давлат аҳолиси араб тилида сўзлашиши, уларнинг адади 470 миллиондан ортиқ эканини таъкидлади.  

 Доктор Юсуф Усаймин маърузасида ИҲТга аъзо 57 давлатдан 22 тасининг араб давлатлари экани, мазкур давлатларда араб тили Ислом маданияти тамаддуни пойдевори, шунингдек, араб миллатининг фаровонлик омилларидан бўлиб  эътироф этилишини таъкидлаб, БМТ Бош Ассамблеясининг  1973 йилда ўтказилган 28-давра анжуманида араб тилидан жаҳонда БМТ ва унинг турли жойлардаги бўлинмаларида расмий иш юритилувчи олтинчи расмий тил сифатида фойдаланишга қарор қабул қилинганини қўшимча қилди.

Шунингдек, нотиқ араб тилидан 1969 йилда ташкил этилган Ислом ҳамкорлик ташкилоти фаолиятида расмий тил сифатида фойдаланиб келинаётгани, араб тили БМТнинг Таълим, илм-фан ва маданият масалалари бўйича халқаро ташкилоти – ЮНЕСКО ҳамда Африка Иттифоқи ва улардан ташқари бир қатор халқаро ташкилотларнинг ҳам расмий тилларидан бири саналишини айтиб ўтди.

Дубай шаҳрида ўтказилаётган 7-халқаро араб тили анжумани иштирокчиси, Ислом ҳамкорлик ташкилоти таркибидаги Таълим, фан ва маданият масалалари бўйича Халқаро ислом ташкилоти – АЙСЕСКО (ISESCO) бош котиби Доктор Абдулазиз Усмон ат-Тувайжирий  ISESCO га аъзо бўлмаган давлатлар ва дунёдаги мусулмонлар камчиликни ташкил этувчи давлатларда араб тилини ўргатишга ташкилотининг муҳим ҳисса қўшаётганига тўхталди.  Шунингдек, мазкур давлатларда АЙСЕСКО (ISESCO) ташкилоти ташаббускорлигида араб тилини ўргатишга оид кафедралар ва илмий марказлар ташкил этиш, иқтидорли мударрисларни юбориш ва таълим грантлари ажратишга доир ишлар амалга оширилганини айтди. 

 Дубай шаҳри ҳар йили 80та давлатдан 2000га яқин вакиллар иштирокида халқаро араб тили анжуманини ўтказишга мезбонлик қилиб келмоқда. Мазкур анжуманда араб тилидаги 70 дан ортиқ тадқиқот ишлари ва илмий мавзулар муҳокама этилади. 

Халқаро алоқалар бўлими ходими

Илёсхон Аҳмедов тайёрлади

ЎМИ Матбуот хизмати

Қуръони карим мўъжизаси австралиялик Антонионинг ақлини ва қалбини забт этди ва у ҳақ динни топиб мусулмонлар сафидан жой олди. Мусо Антонионинг Исломни қабул қилиши бундай бўлган:

Антонио 17 ёшга тўлганда диний масалага доир саволлар унинг оромини олади. Бу эса унинг турли эътиқодларга оид кўплаб китобларни ўқиб чиқишига сабаб бўлади.  У Қуръони каримга етиб келгунига қадар жуда кўп адабиётларни ўқийди. Фақат Қуръони каримни ўқиганидан кейингина ўзини қийнаётган саволларга жавоб топганига ишонч ҳосил қилади.

У вақт ўтказмасдан исломга киради ва орадан тўққиз йил ўтиб воиз бўлади.

Муса Антонио Шимолий Америка, Осиё ва Австралия мусулмонларига инглиз тилида эфирга узатиладиган “Иқраъ” халқаро телеканалида ишлайди.  У «Исъал аш-шайх» (олимдан сўранг) кўрсатуви муаллифи ва бошловчисидир. Кўрсатувда, асосан, Исломга яқинда кирган мусулмонларнинг саволларига жавоб берилади.

Мусо Антонио Мисрга борганда “Ал-Ахрам” газетаси мухбири  у билан суҳбат уюштиради. Ўша суҳбатда Антонио ўзининг Исломга киришидан олдинги ва мусулмон бўлган кезлардаги ҳаёти ҳамда Ғарбдаги янги мусулмонларнинг турмуш тарзи ҳақида сўзлаб беради.

Қуръони карим билан танишиш

Мен Австарлияда туғилдим ва бутун ҳаётимни шу ерда ўтказмоқдаман. Отамнинг келиб чиқиши италиялик, онам эса ирландиялик. Ёшлик чоғларимданоқ динга оид саволлар мени безовта қила бошлади. Шунинг учун мен турли динларни ўргана бошладим, шунингдек, Исломни ҳам.

Ислом ҳақида ўқишни бошлаган кунларимда шу динга кириш  хаёлимга ҳам келмаган эди.  Аксинча, мен босниялик мусулмон дўстларимнинг ҳар доим Ислом энг зўр дин деб айтган гапларини инкор қилиш учун ушбу дин ҳақида маълумот олишни ният қилган эдим. 

Мен Ислом ҳақида кўпроқ ўқий бошлаганимда унинг насронийлик билан кўплаб умумий жиҳатлари мавжуд эканига гувоҳ бўлдим. Ахир ҳар бир мусулмон Аллоҳ таолога, Унинг пайғамбарлари Иброҳим, Нуҳ, Мусо ва Исо алайҳиссаломларга имон келтиради, тўғрими.

Ўшанда ушбу икки дин ўртасидаги иккита фарқдан бошқа нарса топмадим: Муҳаммад соллаллоҳу алайҳи васаллам ва Қуръони карим.

Исломни ўрганишни бошлаган кезларда Исломдан ақлни шоширадиган ва ҳақни ифодалайдиган нималарнидир топаман деб ўйламаган эдим. “Чўлу биёбонда яшайдиган сомалиликлар, афғонлар, араблар эътиқод қиладиган дин қандай қилиб ҳақ дин бўлиши мумкин”, деб ўйлар эдим мен. Бироқ менинг хом хаёлларимнинг акси бўлиб Ислом ҳақ дин ва соғлом фикрга мос келишини фаҳмладим.

Қуръони карим мўъжизаларининг илмий тасдиғини топаётгани ҳақидаги материалларни ўқиганимдан сўнг Ислом мени ўзига оҳанрабодек торта бошлади. Айнан ана шу Қуръон мўъжизалари менинг онгимни ва қалбимни забт этди ва Исломга киришга даъват қилди. Мени Исломнинг эзгуликка ундаши, чиройли қилишга чақириши ўзига тортгани йўқ. Чунки динларнинг барчаси амалда ана шу ишларга даъват қилади.

Ҳар бир муаллиф ўзининг китобига автография ёзади. Ўйлашимча, Қуръони каримдаги илмий мўъжизаларни ўзида мужассам этган ояти карималар ушбу Каломнинг автобиографиясига ўхшайди ва Қуръони каримни Аллоҳ таоло нозил қилган, Муҳаммад соллаллоҳу алайҳи васалламнинг ижоди эмас.  

Ислом ҳаётимни буткул ўзгартириб юборди

Мен Исломга кирган чоғимда 17 ёшда эдим. Кейин ўрта мактабни тугатдим. Мусулмон бўлганимдан кейин мен вақтимнинг ярмини мазкур динни ўрганишга, қолган ярмини эса ўқишга сарф эта бошладим.  

Мусулмон бўлгунимга қадар мен одатий австриялик оддий болалардан ҳечам фарқ қилмас эдим. Менинг ҳам ҳамма болалардек, учрашиб юрадиган қизим бор эди ва ичкилик ичар эдим...

Турмуш тарзимни тўлиқ ўзгартиришим учун бир йил керак бўлди. Учрашиб юрадиган қизимни қаттиқ севишимга қарамай, у билан алоқани уздим. Чунки у Исломга киришни истамади. Спиртли ичимли ичишни бас қилдим, чўчқа гўштини емай қўйдим ва фақат динимиз рухсат берган ҳайвон гўштларни едим.

Мусулмон дўстларим намоз ўқимасалар-да, мен беш вақт намозни вақтида ўқидим.

Ота-онамнинг муносабати

Мен улардан бир оз вақт Исломга кирганимни яшириб юрдим. Лекин улар вақт ўтиши билан одатларимда ўзгаришлар юз берганини, турмуш тарзим бошқача бўлиб қолганини ва Қуръони каримни кўп ўқиётганимни сезиб қолишди.

Дин – оврўпаликларнинг аксари, хусусан, австралияликлар учун ҳам шунчаки маданиятнинг бир қисми ҳисобланади. Аслида улар ўз динининг талабларини бажармайдилар. Бир куни бувим: “Нега сен турк бўлишга қарор қилдинг?” деб сўраб қолди. Унинг бундай дейишининг сабаби, бувимнинг тушунчасига кўра, Ислом турк маданиятининг бир қисмидир.

Ниҳоят вақти етиб келди. Онамдан менга фақат ҳалол гўштдан овқат пиширишини илтимос қилдим. Буни эшитиб онам: “Уйга ҳеч қачон ҳалол гўшт олиб келмайман!” дея хитоб қилди. Ҳозир эса ҳар куни ҳалол гўштдан таом тайёрлайди.  

Ота-онам Ислом мени фақат яхши тарафга ўзгартирганига гувоҳ бўлганларидан кейин улар ўз фикрларини ўзгартириб менинг қароримни маъқуллашди ва динимга рози бўлишди.

Дўстларимга келсак, улар мен учун росмана хурсанд бўлишди. Энг яқин дўстларимдан бири эса менга эргашиб мусулмон бўлди. Бу ҳодиса мен унга Ислом ҳақида гапириб берганим ва Ислом ҳақида ўқишга китоблар берганимдан сўнг юз берди.

Бир марта ўқитувчиларимиздан  бири менга бундай деб қолди: “Сен жуда ўзгардинг. Илгари муаммо устига муаммо чиқариб юрар эдинг. Энди эса тарбияли, вазмин ва маданиятли йигитга айландинг. Ҳатто сенинг сўзлашиш услубинг ҳам ўзгарди”.

Фақат Ислом ҳақиқий эркинлик бера олади

Исломга киргунимга қадар миямда ҳар доим ҳақиқий эркинлик нима ўзи? деган савол айланиб юрар эди. Ҳар доим ушбу саволга энг оқилона жавобни коммунистлар ва марксистлар топган бўлса керак деб ўйлардим.

Бу идеологияларни ўқир эканман, уларнинг ҳар бири инсонни нима биландир чегаралаб қўйганини сезиб қолар эдим, мутлақо эркинликни ҳеч қайси сиёсий, диний ва мафкуравий мактаб ваъда қила олмас эди.

Ҳатто мутлақ эркинликни ваъда қилувчи анархистларнинг ҳам ўз қоидалари, нормалари, принциплари ва чекловлари бор эди.

Умумий хулоса шу эдики, инсон ўз эҳтирослари, ёқимсиз одатлари ва табиий кўникмаларига эргашиб яшаши мумкин эмас. Ҳамма нарсада тартиб-интизом бўлмоғи керак.

Ҳар бир инсон ўзига қуйидаги саволни бериб кўрмоғи керак: қайси тизим ҳақиқат ва тўғриси? Мен мусулмон эканимдан келиб чиқиб айтаманки, фақат Ислом шахс эрки ва жамият ҳурлигини мувофиқлаштира оладиган энг тўғри тизим.

Ислом ҳар бир нарсага изоҳ беради. Ҳақиқий эркинликни мен Исломда топдим. Исломга кирганингиз заҳоти сиқилишдан, тажангликдан ва беоромликдан халос бўласиз. Қалбингиз дунёнинг ортидан чопмайди ва нафсингизни қалбингиз ва ақлингиз билан енгасиз.

Ислом бизга хабар берадики, ҳисобсиз бойлик билан ҳам инсон бахтли бўла олмайди. Агар унга бир катта водий тўлдириб олтин берилса, ўша бойлик уни хотиржам қила олмайди. Аксинча, у тийиқсиз истак билан иккинчи водийни ҳам истай бошлайди. Ислом арконларини маҳкам ушлаган киши эса намоз ўқиб ўзида хотиржамлик ва эркинликни ҳис қилади, унинг жамики ваҳималари ўзидан ўзи ўтиб кетади. 

Ҳақиқий эркинликни ҳис қилиб яшаган мусулмон бу дунё ҳаёти нима эканини, ўзининг яратилишидан мақсад нима эканини жуда яхши билади ва вафот этганидан сўнг қаерга боришини ҳамма билади. Зеро, адоғи борми, йўқлигини билмасдан қоронғу тунелда пайпасланиб юриб бораётган одам билан чароғон тунелда охирини яққол кўриб дадил юриб бораётган одам ўртасида катта фарқ бор.

Динга янги кирган мусулмонларни қўллаб-қувватлаш

Янги мусулмонлар одатда жамият ва оиланинг уларга нисбатан салбий муносабати қаршисида жуда ҳам заиф бўладилар. Шундай ёшлар борки, ана шу сабабга кўра мусулмон бўлганини ота-онасидан сир сақлаб юрадилар. Кўплаб оилалар Исломга кирган қизларига рўмол ўрашни  ва бошқа амалларни бажаришни тақиқлайдилар. Шунинг учун Ислом ташкилоти Исломга янги кирган ёш қизлар учун  махсус ётоқхона ҳам барпо этди.

Ҳар бир мусулмоннинг вазифаси янги мусулмонга ёрдам кўрсатиш ва уни барча масалаларда қўллаб-қувватлашдан иборатдир. Кўпинча улар оиласини ташлаб чиқиб кетади ва туғишганларидан узилади ва янги дўстлар ахтаради.

Ислом маркази янги мусулмонларни қўллаб-қувватлаш учун зарурий воситаларга эгадир. Муаммо фақат ҳақиқатан ёрдамга муҳтож янги мусулмонни қандай топиш ва унга ушбу ташкилот ёрдамига қандай масалаларда суяниш лозимлигини етказишдан иборатдир.

Муаллиф: Муслим АБДУЛЛАЕВ,

Таржимон: Дамин ЖУМАҚУЛ

ЎМИ Матбуот хизмати