Ҳонконгда масжид қурилиши ўн йиллардан бери ортга сурилмоқда, аммо шаҳарнинг мусулмон аҳолиси масжид яқин кунларда қурилишидан умидвор ҳолда пул йиғишни давом эттирмоқда. Бу ҳақда "nst.com.my" нашрига таянган ҳолда "info.islom" хабар берди.

Ҳонгконгдаги Бирлашган мусулмонлар уюшмасининг фахрий хазиначиси Нади Кастронинг сўзларига кўра, масжид қурилишига атаб ҳар куни хайр-эҳсон қилинмоқда ва уюшма қурилиш бошланиши учун барча саъи-ҳаракатларни амалга ошириб келмоқда. Айни пайтда 300 минг Ҳонконг доллари (38 200 АҚШ доллари) йиғилган. "Биз аста-секин бўлса-да керакли миқдордаги маблағни йиғамиз", дейди у.

Ассоциация бу йил 10 миллион Ҳонгконг долларини (1,27 миллион АҚШ доллари) йиғишни режалаштирмоқда. Мусулмон аҳолиси доимий ўсиб бораётган Шон-Шу ҳудудида масжид қурилиши учун шунча маблағ зарур, бу ерда мусулмон аҳоли сони тинмай ўсиши кузатилмоқда, бироқ ҳалигача ҳеч қандай масжид йўқ.

"Ҳонконгда мусулмонлар сони сезиларли даражада ошди, шунинг учун бизга ибодатларимизни жамоа бўлиб адо этадиган жой керак", дейди Кастро. "Ташкилотимиз фаолияти ижтимоий ёрдам кўрсатишга йўналтирилган. Бизда мактаблар, қариялар уйлари, Ҳонконгдаги мусулмонлар жамоаси узоқ вақтдан бери иштирок этиб келаётган хизматлар бор. Шунинг учун мазкур лойиҳа жуда муҳим. Бу нафақат масжид, балки ижтимоий марказ ҳам бўлади".

Гонконгда 250-300 минг нафар мусулмонлар истиқомат қилади. Уларнинг аксарияти Покистон, Ҳиндистон, Малайзия ва Индонезия каби мамлакатлардан келишган. Хитой мусулмонлари тахминан 40 минг кишини ташкил этади.

Ҳозирги вақтда Ҳонгконгда бешта доимий ва битта вақтинчалик масжид бор, шунингдек, шаҳар бўйлаб ўнлаб мадрасалар, исломий таълим марказлари мавжуд. Зарур биноларнинг етишмаслиги кўп мусулмонларнинг вақтинчалик масжидларда намоз ўқишларига сабаб бўлмоқда.

Шон-шу майдонида масжид қуриш ғояси 1990-йилларда пайдо бўлганди. 2006 йилда Ассоциация ҳукуматдан 9,8 миллион Ҳонконг доллари (1,24 миллион АҚШ доллари) қийматида баҳоланган ер участкасини сотиб олди ва 2011 йилгача лойиҳани якунлаши керак эди.

Аммо маблағ етишмаслиги ва уюшма ичидаги келишмовчиликлар сабабли масжид қурилиши ҳали ҳам бошланмаган. Шу билан бирга, маҳаллий расмийлар лойиҳани келишилган муддатда қурмаганлиги учун мусулмонлар уюшмасига катта жарималар солган.
Саудия Арабистони 2009 йилда масжид қурилиши учун пул ажратишни ваъда қилди. Бироқ тахминан икки йил аввал қироллик ҳукумати жаҳон бозорида нефть нархининг пасайиши ортидан лойиҳани қўллаб-қувватламаслигини айтди.

"2016 йилда улардан иқтисодий қийинчиликларни бошдан кечираётганликлари ҳақида мактуб олдик", деди Кастро. "Биз улар билан музокаралар олиб боришга ҳаракат қилдик, лекин шу пайтгача бирон натижага эришилмади".

Бугунги кунда Ҳонгконгда бешта масжид фаолият юритади. Улар Ковлон масжиди, Чаиван масжиди, Жомия масжиди, Аммар масжиди ва Стенлей масжиди.

ЎМИ Матбуот хизмати

Кеча оқшом Интернетдан зиёрат туризмига оид материалларни қараётиб Туркия сайтларидан бирида туркиялик сайёҳлар учун Ўзбекистон ҳақида эълон қилинган маълумотномани ўқиб қолдик. Унда юртимиз ва халқимиз бандма-банд жуда чиройли таърифланибди. Ўша бандлардан бирида “Ўзбек ёшлари вақтида турмуш қуради ва улар оилага жуда маҳкамдир”; “Улар ўртача учтадан фарзанд кўради”; “Ўзбекистон аҳолиси юз фоиз саводхон, жумладан, аёллар ҳам”, деб ёзибди.

Шу жумлаларни ўқиб хурсанд бўлдик. Зеро, халқимизда оила муқаддас ва оилалар мустаҳкамлиги туфайли элимиз бир бағир. Шунинг учун оила қураётган ёшлар учун катта тўйлар қилиб, элга дастурхон ёзилади. Зеро, ана шу меҳр-оқибат, ҳамжиҳатлик туйғулари тўйларимизда, маросимларимизда намоён бўлади. Тўй бошлаган одам азбаройи севинчи ичига сиғмаганидан, ҳаммани яхши кўрганидан тўйига, эҳсонига бутун олам халқини чорлагиси келади. Аммо бу имконсиз... Рўзғор боши бўлган одам тўй қиламан деб унинг ортидан қийналиб қолмаслиги керак. Агар тўй қилган киши шу тўй сабабли азият кўрадиган бўлса, у бошлаган йиғин тўй эмас, аза бўлиб қолади.

Инсонлар имкониятига қараб тўй ўтказиши баробарида қавму қариндошлари, қўни-қўшнилари, элу улуснинг ҳам имкониятини чамаламоғи даркор. Ана шу жиҳатдан, тўй росмана тўйдек бўлмоғи учун қариндош-уруғлар, дўсту ёрларнинг ўзи кифоя. Тўйни қандай ўтказиш савобли амал эканини Аллоҳ таоло Каломи шарифида:

وَالَّذِينَ إِذَا أَنْفَقُوا لَمْ يُسْرِفُوا وَلَمْ يَقْتُرُوا وَكَانَ بَيْنَ ذَلِكَ قَوَامًا

“Улар (Раҳмоннинг суюкли бандалари) эҳсон қилганларида исроф ҳам, хасислик ҳам қилмаслар, (тутган йўллари) бунинг ўртасида – мўътадилдир” (Фурқон, 67) деб, ҳазрати Пайғамбаримиз соллаллоҳу алайҳи васаллам:

مَنِ اقْتَصَدَ أَغْنَاهُ اللَّهُ ، وَمَنْ بَذَّرَ أَفْقَرَهُ اللَّهُ ، وَمَنْ تَوَاضَعَ رَفَعَهُ اللَّهُ ، وَمَنْ تَجَبَّرَ قَصَمَهُ اللَّهُ

“Ким тежамкорлик қилса Аллоҳ уни бой қилади. Ким исроф қилса Аллоҳ уни фақир қилади. Ким тавозе қилса Аллоҳ уни обрўсини кўтаради. Ким зулм қилса Аллоҳ уни хор қилади”(Имом Баззор “Кашфул астор”), деб белгилаб берганлар.

Ёзаётган мақолаларимизни, сўзлаётган нутқларимизни бошлаётганимиздек, мамлакатимизда инсон манфаатларини ҳимоя қилиш, аҳолининг турмуш фаровонлигини юксалтириш, ёш оилаларни моддий ва маънавий жиҳатдан қўллаб-қувватлаш, соғлом турмуш тарзини қарор топтириш йўлида катта ишлар амалга оширилмоқда.

Ана шу ишларнинг энг каттаси тўй ва маросимларни тартибга солиш масаласидир. Тўйларимиз ва маъракаларимиз шу даражага келдики, бундан одамларимизнинг ўзлари ҳимоя истаб давлат кўмагига – қатъий чоралар кўрилиши эълон қилинишига муҳтож бўлиб қолди.

Нафсиламри, асъаса-ю дабдабалар, узундан-узун машиналар карвони, шовқин-суронлар, ғат-ғутлар, “севги тарихлари”, “куёвнинг қайнона оғзига торт тутишлари (эсласангиз ғижинингиз келиб кетади)”, ҳисобсиз тоғоралар, ҳеч қачон ҳеч ким эгнига илмайдиган сарпо-суруқлар... ҳамманинг жонига тегди.

Одамлар тўйларнинг яқинлари даврасида ихчам, кўнгилга ёқадиган хурсандчилик билан ўтишини истаб нажоткор куч ахтариб қолди.

Аммо ҳамманинг кўнглида зўр бир андиша: “одамлар нима дейди?”

Аслида тўй – бирор воқеа-ҳодисага бағишлаб зиёфат ва ўйин-кулгилар билан ўтказиладиган тантана. Шундай экан, у азиятга эмас, чинакам шодиёнага сабаб бўлмоғи керак. Унинг тўй эгасига қандай жабру азиятга айланиб кетгани барчанинг кўз ўнгида ошкора намоён бўлиб турибди. Шундай эса-да, шулардан яна биргина мисол келтириб қўямиз.

Муҳтарам Президентимиз айтганидек, олдида тўйи бор одам санаторияга бормайди, дўхтирга кўринмайди. меҳнат таътили нима билмайди... соғлигини бой беради. Айни куч йиғиш даврида бўлган боласини танаси талаб қилиб турган егуликлардан қисади, унинг жисмонан росмана куч йиғиб олишига шароит қилиб бера олмайди. Айни ўқиш-ўрганиш даврида бўлган боласини китоб олишидан, тўгаракка қатнашидан қисиб унинг тўлақонли билим олишига имконият ярата олмайди.

Кекса ота-онага муносабат ҳам бундан беҳроқ эмас. Улардан Аллоҳ таоло омонатини сўраб қолса, шунга тадбирли бўлайлик деб яна қисиниш ва йиғиниш, яна уларнинг калорияга бой овқатлари ўрнига илму амал кун ўтарчилик...

Элимиз дуога қўл очганда “тўй тўйга улашсин” деган эзгу тилакни билдиради. Тасаввур қилинг, катта қарздорликни зиммасига олиб тўй қилаётган одамга шу дуо татийдими?..

Ўзбекистон мусулмонлари идорасининг “Тўй, маросим ва маъракаларни меёърида ўтказиш ҳақида” чиқарган Фатвосида “Шариатимизда жорий бўлган никоҳ ҳамда ақиқа тўйларини қариндош ва яқин қўшнилар доирасида, дабдабасиз, исрофгарчиликсиз ўтказиш мақсадга мувофиқдир. Зеро, никоҳ тўйидан мақсад шаръий никоҳни эълон қилиш бўлса, ақиқадан мурод жонлиқ сўйиб, Аллоҳга шукрона келтиришдир. Бу икки мақсад озчилик доирасида ҳам ҳосил бўлаверади. Суннат ва мучал тўйларини ўтказиш шариатимизда буюрилмаган”, дейилган.

Шариати ҳукми шундай экан, ўзимизни бунчалик қийнашнинг нима кераги бор! Бундан нима манфаат топамиз. Бизнинг фикримизча, кимўзарчиликка тўй қилишдан ҳам ўзимиз соғлигимизни бой берамиз, ҳам қарамоғимиздаги фарзандларимизни қийнаймиз, ҳам сарфлаган ҳисобсиз маблағларимиздан ҳеч қанча савоб олмаймиз, аксинча, улардан сўраладиган даражада гуноҳга ботамиз. Чунки Фатвонинг давомида “Исроф” дегандан фақат таомнинг ортиб қолиши ёки оёқ ости бўлишини тушунмаслик керак. Балки ноўрин жойга қилинган эҳсон ҳам исрофдир.Чунки хайр-эҳсон ва зиёфат беришдан асосий мақсад муҳтож ва фақирларга моддий ёрдам кўрсатишдир”. деб ёзиб қўйилган.

Ривоят қиладиларки, бир чолу кампир бутун умр йиққан терганига катта туя сотиб олиб, унинг гўштини пишириб, бутун халққа таом тарқатибди. Кечки пайт эса зиёфат дастурхонидан ўзлари учун бирор егулик топа олмабди.

Оломонга нима? Чақирсангиз келиб еб-ичиб кетаверади-да. Шариатимиз буюрмаган суннат тўйларини қилиб, беш тонналаб ош дамлаб минглаб одамларни тўйга чақирган “саховатли” кимсаларни ҳам кўрдик. Ўша довруқли тўйининг тўрида ўтириб ошини еб кетганлар бугун унинг саломига алик олмайди.

Кўпни кўрган нуроний отахону онахонларимиз гапириб беради: ота-боболаримиз тўй ва маъракада ҳаддидан ошмаган, уларнинг ҳаётида кимўзарчиликка дастурхон ёзиш кузатилмаган, тўйларни ихчамгина, ёру дўстлар даврасида одмигина дастурхон атрофида  ўтказган. Ана ўша келин-куёвлар қўша қариб 90-100 ёшни қоралаган, невара-ю эварали бўлиб, орасини ўлим ажратмагунча бир-бирига садоқатли умр йўлдоши бўлиб ибратли умр кечирган.

Ушбу масалага шахсан давлат раҳбари эътибор қаратаётгани, Олий Мажлис Сенати “Тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солиш тўғрисида” қарор лойиҳаси ишлаб чиқилгани, унда Вазирлар Маҳкамасидан бошлаб, жамики вазирликлар ва тегишли ташкилотларнинг вазифаси аниқ белгилаб берилгани тўй ва маросимлар шахсий иш эмас, мамлакат ва миллат тақдирига дахлдор ижтимоий аҳамиятга эга масала эканини кўрсатади. Зеро, халқимизнинг миллий табиатига ярашмайдиган, оилаларнинг моддий аҳволини оғирлаштирадиган, уларнинг турмушини издан чиқарадиган ҳолатларга барҳам беришни бугун ҳаётнинг ўзи талаб қилмоқда.

Хулоса қилиб айтганда, азизлар, ўзимиз ўзимизнинг оёғимизга банд солиб олганмизки, ана шундан халос бўлайлик. Ҳаётимиз бутунлай ўзгариб кетади. тўйу маросимларимиз том маънода халқимизнинг эзгу қадриятларини ўзида мужассам этадиган, одамларимиз ўртасида ўзаро аҳиллик ва меҳр-мурувват туйғуларини мустаҳкамлашга хизмат қиладиган азалий вазифасига қайтади. Илло, бундай тадбирлар эл-юртимизнинг маданияти, маънавий савияси даражасини яққол кўрсатувчи омиллардан биридир.

ЎМИ Матбуот хизмати

Борлиқ, олам, унинг асли бир экани ҳақида сўз юритамиз. Аллоҳ таоло шундай деган:

أَوَلَمْ يَرَ الَّذِينَ كَفَرُوا أَنَّ السَّمَاوَاتِ وَالْأَرْضَ كَانَتَا رَتْقاً فَفَتَقْنَاهُمَا وَجَعَلْنَا مِنَ الْمَاء كُلَّ شَيْءٍ حَيٍّ أَفَلَا يُؤْمِنُونَ

“Куфр келтирганлар осмонлару ер битишган бўлган эканини, бас, Биз уларни очганимизни ва сувдан ҳар бир тирик нарсани қилганимизни билмайдиларми? Иймон келтирмайдиларми?” (Ояти карима маъноси хусусида тафсирчилар бир неча хил маънолар айтганлар. Биринчиси, Ибн Умар ва Ибн Аббослардан (р.а.) ривоят қилинган бўлиб, осмон ёпиқ эди, Биз уни очдик ва ёмғир-қор ёғдирдик, оқибатда ўша сув ила ҳамма тирик нарсалар пайдо бўлди, деган маъно чиқади. Иккинчиси, унга кўра осмонлару ер йўқ эди, уларни Биз яратдик, сўнгра сувдан тирик нарсаларни пайдо қилдик, маъноси бўлади.Учинчиси, Ҳасан, Қатодалардан (р.а.) ривоят қилинган бўлиб, осмонлару ер бир-бирига битишган бир нарса эди, уларнинг орасини Биз очдик, сўнгра сувдан тирик нарсаларни пайдо қилдик, маъноси бор.Тўртинчиси ҳозирги замон баъзи тафсирчиларнинг фикрлари бўлиб: осмону ер, юлдузлару қуёш ҳамма-ҳаммаси бир бутун эди, Аллоҳнинг иродаси ила кўп айланиш ва ички портлашлар оқибатида парчаланиб, алоҳида-алоҳида бўлиб кетди: қуёш алоҳида, ер алоҳида, ой алоҳида, юлдузлар алоҳида ва бошқа нарсалар ҳам; сувдан эса, барча тирик нарсалар, инсон, ҳайвон ва набототлар пайдо қилинди. Булар, ояти кариманинг маъносини тушунишга уринишдир. Оятнинг ҳақиқий маъносини Аллоҳнинг Ўзи билади.) (Анбиё сураси, 30-оят).

Ушбу оятнинг маъноси Саудия Арабистонида бўлиб ўтаётган Қуръон эъжози конференциясида геология бўйича машҳур олим доктор Алфред Крунерга ўқиб берилди. Оятнинг маъносини ўқиган олим “Бўлиши мумкинмас... Бу ҳақиқатларнинг қайсидир китобда бундан ўн тўрт аср олдин зикр этилиши мумкин эмас. Ахир биз бу илмий ҳақиқатларга бир неча йиллар олдин эришдик. Ўта замонавий илмий воситалардан фойдаланиб, чуқур изланиш ва ўрганишлардан сўнг, хоссатан, атом физикаси орқали бу ҳақиқатни кашф этдик. Коинотдаги барча нарсаларнинг асли бир эканини башарият бундан бир минг тўрт юз йил олдин билган бўлиши мумкин эмас. Лекин бугунги замонавий илмий воситалар ўн тўрт аср олдин Муҳаммад (соллаллоҳу алайҳи васаллам) айтган нарсаларни исботлай олади” деди.

Барчамиз инсоннинг Ойга чиқиш тажрибасини яхши эслаймиз. Бу тажриба содир бўлмасидан олдин олимлар қандай орзуларни қилишарди? Ой сатҳидан топиладиган ноёб моддалар ҳақида хаёл суришарди. Ўша моддаларни Ерга олиб тушиш ҳақида ўйлашарди. Улар “Ойда шундай моддалар борки, ундан олиб тушсак, ер юзида давоси топилмайдиган касалликларга ўша моддалар шифо бўларди. Агар ўша моддалар ердаги моддаларга қўшилса, инсониятга маълум бўлмаган янги моддалар ҳосил бўларди”, деб орзу қилишарди. Улар шу тарзда ердаги моддаларнинг ёнига яна бир янги модда қўшиш ҳақида хаёл суришарди. Хаёлларга берилиш кучайди, бошлар орзуларга тўлиб кетди... 

Албатта, у самодан келган ваҳийдир! 

Кейин нима бўлди? Инсон Ойга чиқди, Ой сатҳида юрди. Ой сиртидаги қоялардан намуналар олиб, Ерга қайтди. Қарашса, Ой сатҳидан олинган моддалар билан Ер сатҳидаги моддаларнинг таркиби бир хил экан. Ойдаги қоялар билан Ердаги қояларнинг таркиби бир хил, уларнинг асли бир экан. Шунинг ўзи уларнинг иймон келтиришлари учун етарли далил эмасми?! Аллоҳ субҳанаҳу ва таоло бизга Қуръони Каримда хабар берган Осмонлар ва Ернинг асли бир эканининг назарий исботи, бу хабар ўн тўрт асрдан бери ўқиб, ўрганиб келинаётгани Аллоҳнинг борлигига, Яратувчилигига далил бўлиши учун етарли эмасми?! 

Профессор Алфред Крунер “Бугунги замонавий илмий воситалар ўн тўрт аср олдин Муҳаммад (соллаллоҳу алайҳи васаллам) айтган нарсаларни исботлай олади” деди. У жуда маккор кимса эди. Ҳатто у бу ҳақиқатлар Аллоҳ таолонинг Китобида айтилганига гувоҳлик келтириб қўймаслиги учун жавоб беришдан қочишга уринди. Шунинг учун у ҳар бир гапида “Муҳаммад айтган нарса” дер эди.

Шунда мажлисда ўтирган мусулмон олимлар “Биз сенга Муҳаммад соллаллоҳу алайҳи васаллам бу гапларни Аллоҳнинг ваҳийси билан гапирганларини, ўзларича гапирмаганларини исботлаб берамиз. Сенга бир неча набавий ҳадисларни келтирамиз. Уларда эъжоз бор. Бизга ўша ҳадисларни шарҳлашда ёрдам бериб турасан.

Бухорий ва Муслим Абу Ҳурайра розияллоҳу анҳудан ривоят қилишган ҳадисда Расулуллоҳ соллаллоҳу алайҳи васаллам “То араблар ерига ривожланиш ва анҳорлар келмагунча қиёмат қоим бўлмайди” деганлар. Яъни экинзорлар, боғлар, дарёлар келмагунча.

Доктор Крунердан “Расулуллоҳ соллаллоҳу алайҳи васаллам айтганларидек, араблар диёрига боғлар, дарёлар келганми?” деб сўралди. У “Ҳа” деди. “Бу қачон бўлган?” деб сўралганда, у “Биринчи музлик даврида. Олам бу воқеани анча олдин бошдан кечирган” деди.

Крунердан “Бу ҳақиқатни Расулуллоҳ соллаллоҳу алайҳи васалламга ким хабар берган?” деб сўралди. У “Эҳтимол, у буларни ушбу илмларда илғор бўлган римликлардан ўргангандир” деди.

Олимлар “Араблар ерига боғу роғлар, дарёлар яна қайтадими?” деб сўрашди. У “Ҳа. Бу илмий ҳақиқат” деди.

Шунда олимлар “Келажакда бўладиган ишларга қандай қилиб “Бу илмий ҳақиқат” деяпсан?” деб сўрашди. У “Чунки иккинчи музлик даври аллақачон бошланган. Бунинг илк кўринишларидан бири сўнгги йилларда Европа мамлакатларида қишнинг қаттиқ келиши, қорли бўронлар бўлаётгани... Ҳар йили қиш олдинги йилдагидан қаттиқроқ, совуқроқ келмоқда. Шимолий Қутбдаги муз бўлаклари аста-секинлик билан жануб томонга силжиб келмоқда. Ҳар йили Европага, Арабистон ҳудуди жойлашган минтақаларга яқинлашмоқда. Аммо жуда секинлик билан яқинлашмоқда. Узоқ муддатдан кейин бу яқинлашиш кўпаяди. Натижада, иссиқ араб ерларида ҳаво пасайиб, боғлар, дарёлар ҳосил бўлади...” деб жавоб берди.

Ажабланарлиси шундаки, узоқ асрлардан бери ўтган йили қишда Саудия ҳудудини қор қоплади. Ўшанда ҳарорат нолдан анча пастга тушиб кетди.

Охирида Доктор Крунердан “Шундай қилиб Русулуллоҳ соллаллоҳу алайҳи васалламга “Араб ерларига боғлар ва дарёлар қайтади” деб римликлар хабар беришганми?!” деб сўралганда, у “Йўқ! Бундай бўлиши мумкин эмас! Бу ҳақида унга самодан келган ваҳий хабар берган!” деб жавоб берди. 

Шайх Муҳаммад Мутаваллий

Шаъровий раҳимаҳуллоҳнинг

“Ал-Адилла ал-мааддийя ала вужудиллаҳ”

номли асари асосида

Нозимжон ИМИНЖОНОВ

тайёрлади

ЎМИ Матбуот хизмати

Ёшлар масалалари бўйича республика идоралараро кенгашининг 2018 йил 22 январдаги 1-сонли мажлис баёни ижроси юзасидан жорий йилнинг май ойи давомида “Ҳадиси шариф билимдони” танлови ўтказилади.
Танловда Ўзбекистон мусулмонлари идораси тасарруфидаги диний таълим муассасалари талабалари, ёш имом-хатиблар ҳамда ҳадис илмига қизиқиши бўлган 14 ёшдан 30 ёшгача бўлган фуқаролар иштирок этишлари мумкин.
Танловда иштирок этиш истагида бўлган фуқаролар 2018 йилнинг
20-25 апрель кунлари мобайнида Ўзбекистон мусулмонлари идорасининг Қорақалпоғистон Республикаси қозиёти, Тошкент шаҳри ва вилоятлар вакилликларида рўйхатга олинади.
Танловнинг биринчи босқичи 2018 йилнинг 1-5 май кунлари давомида вилоятлар кесимида ўтказилади.

Танловда иштирок этиш шартлари.
Танловда диний таълим муассасалари талабалари, ёш имом-хатиблар ҳамда ҳадис илмига қизиқиши бўлган камида 40 та ҳадисни (арабча матни билан) ёддан билган 14 ёшдан 30 ёшгача бўлган фуқаролар иштирок этишлари мумкин.
Танлов учта шартдан иборат бўлади:
- Имом Бухорий ва Имом Термизийнинг ҳаёти ва илмий фаолиятини ёритиб бериш;
- берилган ҳадисни шарҳлаб бериш (ҳадисни таржима қилиш ва ундан олинадиган фойдаларини баён қилиш);
- ҳадисни араб тилидаги матнини ровийлари билан ёддан айтиб (берилган боблар бўйича биттадан ҳадис айтиш) бериш.

Танловнинг Республика босқичини ўтказиш вақти қўшимча эълон қилинади.

Ўзбекистон мусулмонлари идораси