muslim.uz

mardi, 06 février 2018 00:00

Тошкентда бемор ва унинг қариндошларига қўполлик қилган тиббиёт ходимлари ишдан олинди

Ўзбекистон соғлиқни сақлаш вазири Алишер Шодмонов раислигида 5 февраль куни вазирликнинг навбатдан ташқари ҳайъат йиғилиши бўлиб ўтди. Видеосеклектор тарзида ўтган йиғилишда Қорақалпоғистон соғлиқни сақлаш вазири, Тошкент шаҳар Соғлиқни сақлаш бош бошқармаси ва вилоятлар Соғлиқни сақлаш бошқармалари бошлиқлари, республика тасарруфидаги даволаш-профилактика муассасаси раҳбарлари, олий ўқув юртлари ректорлари ҳамда ихтисослаштирилган тиббиёт марказлари директорлари иштирок этди, дея хабар бермоқда вазирлик ахборот хизмати.

Ҳайъат йиғилишининг биринчи масаласи аҳолидан келиб тушаётган мурожаатлар таҳлилига бағишланди. Президент виртуал қабулхонасига келаётган мурожаатларнинг тиббиётга тегишли қисми ўрганилганда, уларнинг 12,6 фоизи айнан соғлиқни сақлаш ходимлари ҳаракати, бемор ва унинг қариндошларига нисбатан қўпол муомалада бўлинаётгани ҳақида экани маълум бўлди.

Тошкент шаҳар I.Иргашев номли 4-сон клиник шифохонаси травматология бўлимида даволанаётган бемор томонидан юборилган мурожаат ўрганилганда ҳам шифохонада айни шу камчиликларга йўл қўйилаётгани аниқланган. Бемор ва унинг қариндошлари билан ўтказилган суҳбат жараёнида шифохонанинг травматология бўлими мудири Т.Тоғаев ва ҳамшира М.Толипова ҳақиқатан ҳам тиббиёт ходими деонтологияси талабларини қўпол равишда бузиб келгани маълум бўлди.

Бугун биз Президентимиз Шавкат Мирзиёев бошчилигида янгича ишлаш тизимига ўтаяпмиз. Яъни ишимизга баҳони халқ берадиган, халқ давлат идораларига эмас, давлат идоралари халқимизга хизмат қиладиган тизимга. Ҳаётнинг ўзи олдимизга энг асосий мақсад — инсон манфаатларини ҳар томонлама таъминлаш масаласини долзарб вазифа қилиб қўймоқда. Давлатимиз раҳбарининг қатъий талаби ҳам шу. Ҳар бир раҳбар ходим халқ дарди, халқнинг ҳаётий муаммо ва эҳтиёжларини яхши билиши шарт. Шу каби ҳолат бошқа тиббиёт муассасаларида ҳам содир бўлмаслиги, барча ўзига тегишли хулоса чиқариши учун мазкур масала муҳокамасини бугунги навбатдан ташқари бўлаётган ҳайъат йиғилишимизнинг бош масаласи сифатида олиб чиқдик.

Алишер Шодмонов, Ўзбекистон соғлиқни сақлаш вазири

Юқорида кўрсатилган камчиликларга йўл қўйилганлиги ҳамда шифохонада маънавий муҳит бузилганлиги, тиббиёт ходимлари ўртасида этика, деонтология масалалари талабга жавоб бермаганлиги учун Тошкент шаҳар I.Иргашев номли 4-сон клиник шифохонаси бош шифокори С.Алимов, шифохонанинг бош ҳамшираси Ш.Алимова, травматология бўлими мудири Т.Тоғаев ва травматология бўлими ҳамшираси М.Толиповалар ўз вазифаларидан озод этилди.

Йиғилиш якунида ҳар бир тиббиёт ходимининг асосий вазифаси аҳоли саломатлигини янада яхшилаш, оилаларга кириб борган ҳолда мулоқот ўрнатиш, кафолатланган ҳамда бошқа тиббий хизмат турларининг ўз вақтида ва кўнгилдагидек кўрсатилишини таъминлаш экани яна бир бор таъкидланди.

Манба: https://daryo.uz

Published in Ўзбекистон янгиликлари

mardi, 06 février 2018 00:00

Муслима қиз французча “Овоз”да ҳаммани ҳайратга солди

Асл келиб чиқиши суриялик бўлган, Франциядаги нуфузли олий ўқув юрти талабаси Маналь гўзал овоз соҳибларининг Франциядаги “Овоз” кўнгилочар – вокал шоусида иштирок этиб, ҳам мухлислар, ҳам ҳакамлар ҳайъати аъзоларининг олқишига сазовор бўлди.
IslamNews хабарига кўра, у дастлаб “Аллилуйя” (Аллоҳга қаратилган ҳамду сано), ундан кейин эса араб тилидаги машҳур “Ё, илоҳо” (Эй Аллоҳ) қўшиғини ижро этди.
Маълумот учун, Маналь Франциядаги “Овоз” кўнгилочар – вокал шоусида қатнашган биринчи рўмолли иштирокчи бўлди.

Ўзбекистон мусулмонлар идораси Матбуот хизмати

Published in Дунё янгиликлари

mardi, 06 février 2018 00:00

Давлат маслаҳатчиси онлайн мулоқот ўтказади

Ўзбекистон Республикаси Президентининг ёшлар сиёсати масалалари бўйича Давлат маслаҳатчиси – Ўзбекистон ёшлар иттифоқи марказий кенгаши раиси Қаҳрамон Қуронбоев фуқароларни қизиқтирган барча саволларга жавоб беради.

Учрашув бугун, 6 февраль куни соат 19.00 да Тошкент шаҳридаги Ёшлар пресс-клубида ташкил этилади, дея хабар қилди Ўзбекистон ёшлар иттифоқи.

Мулоқотда қатнашиш эркин.

Мулоқотда Ўзбекистонда ёшларга оид давлат сиёсатининг бугунги ҳолати, Ўзбекистон ёшлар иттифоқининг фаолияти, истиқболдаги режалари ҳақида маълумот берилади.

Жонли мулоқотни Ўзбекистон ёшлар иттифоқининг фейсбукдаги расмий саҳифасида онлайн кузатиб бориш, шунингдек, саволлар, мурожаатлар ва таклифларни йўллаш мумкин.

Манба: http://uza.uz

Published in Ўзбекистон янгиликлари

mardi, 06 février 2018 00:00

Буюк зотга эҳтиром

9 февраль – Алишер Навоий таваллуди куни

Қуёш Шарқдан чиқиб Ғарбга ботар экан, унинг нурлари Токиодан Нью-Йорккача бўлган масофада бир марта бўлса ҳам буюк Алишер Навоий ҳайкалини ёритиб ўтиши бор ҳақиқат. Беш ярим асрдан зиёд вақт ўтибдики, Навоий сиймоси, унинг юксак ижодий мероси ҳамон уммон сингари мавжланиб туради. Башарият қалбини шамс каби эзгулик зиёси билан ёритади.

Миллат йўлини ёритиб турган қалби қуёш инсонларни тарих саҳнасидан, халқ хотирасидан асло ўчириб бўлмайди. Не-не мустабид замонлар ҳам улуғ Навоий даҳоси олдида ожиз қолгани рост. Аммо яқин ўтмишдан маълумки, собиқ тузум халқнинг руҳини сўндириш мақсадида унинг буюк аждодларини ёмонотлиққа чиқариш, шахси ва ижодини бузиб кўрсатиш учун атайин бир ёқлама талқин этишга уринди.

Бироқ истиқлолнинг дастлабки йилларидан миллий ўзлигимизни англаш мақсадида буюк аждодлар номини тиклаш, уларнинг нодир маънавий меросини асраб-авайлаш, ўрганиш ва кенг тарғиб қилишга алоҳида эътибор қаратилди. Чунончи, буюк мутафаккир номи тикланиб, мустақиллигимизнинг дастлабки йили юртимизда Алишер Навоий йили, деб эълон қилинди. Бугун дунё халқларини ҳайратга солган, айниқса, шеърият мулкида юксак мавқега эга буюк шоир асарларидан баҳраманд бўлмаган эл бўлмаса керак. Шу боис, илм аҳли борки, Алишер Навоийни ўзига устоз, деб билади. Зеро, Биринчи Президентимиз Ислом Каримов таъкидлаганидек, Алишер Навоий халқимизнинг онги ва тафаккури, бадиий маданияти тарихида бутун бир даврни ташкил этадиган буюк шахс, миллий адабиётимизнинг тенгсиз намояндаси, миллатимизнинг ғурури, шаъну шарафини дунёга тараннум қилган ўлмас сўз санъаткоридир.

Алишер Навоийнинг эзгулик, муҳаббат, дўстлик, адолат, тинчлик каби олижаноб фазилатлар, маънавий-ахлоқий қадриятлар тўғрисидаги қимматли фикрлари бугун ҳам ёш авлодни баркамол этиб тарбиялашга хизмат қилмоқда. Шоир номи билан аталувчи вилоятда ҳам ёшларнинг буюк аждодлар меросини пухта ўрганиши учун барча шароит яратилган.

Вилоят марказида қад ростлаган буюк мутафаккирнинг муаззам ҳайкали атрофи ҳамиша гавжум. Хиёбонга туташ муҳташам Ёшлар маркази шижоатли ёшларнинг зиё маскани. Бу ерда фаолият кўрсатаётган 15 дан ортиқ фан, спорт, санъат тўгаракларида кўплаб истеъдод эгалари бўш вақтини мазмунли ўтказмоқда.

Бугунги кунда вилоятда олий таълим муассасаси, маърифат масканлари, меҳмонхона, халқаро аэропорт, эркин иқтисодий зонага буюк Навоий номи қўшиб айтилади. 2001 йилда Навоий шаҳридаги марказий маданият ва истироҳат боғида буюк мутафаккирга муаззам ҳайкал ўрнатилиб, сайлгоҳга Алишер Навоий номи берилди. Истеъдодли ҳайкалтарош Анвар Раҳматуллаев, меъмор Баҳром Абдуллаев ҳамда ҳайкалтарош Павел Подосипников билан ҳамкорликда ишланган ҳайкал боққа маънавий руҳ бағишлаб турибди.

Марказий маданият ва истироҳат боғида қарийб 20 гектар майдонда 11 миллиард сўмликдан ортиқ қурилиш ишлари олиб борилиб, маскан буткул янгича қиёфа касб этди. 2 мусиқали фаввора барпо этилди. Ёзги саҳна, 22 аттракцион, кураш майдони, савдо нуқталари қурилди. Шоир ҳаёти ва ижодига бағишлаб ўрнатилган “Юлдузнинг туғилиши”, “Ўспиринлик”, “Ёшлик” ва “Донишмандлик” деб номланган рамзий ҳайкаллар туркуми кишини фалсафий мушоҳадага чорлайди. Буюк зот босиб ўтган сермазмун умр йўлини тасаввур этишга ундайди. Бу ерга келган ёшу кексанинг қалбига Фарҳоднинг жасорати, Қайснинг матонати, Баҳромнинг заковати жо бўлиши шубҳасиз. Навоийни ўрганиш ёшларни поклик, мардлик, меҳр-оқибат ва садоқатга ошно этади.

Алишер Навоий ҳайкали атрофига манзарали дарахтлар экилиб, кўркам кўринишга келтирилди. Бундай янгиланиш ва улкан эътибор Навоий сиймосига қаратилаётган ҳурмат рамзидир. Боғнинг шимолий ҳудуди янги кўринишга кирди. Эскирган бута ва дарахтлар ўрнига нина баргли кўп йиллик ниҳоллар экилди. 4 гектарга яқин майдонда ободонлаштириш ва кўкаламзорлаштириш ишлари олиб борилди.

Навоий шаҳридаги “Фарҳод" ва “Ширин” маданият саройлари ўзига хос маърифат масканига айланган. Ҳар икки масканда ёшлар санъат турлари билан мунтазам шуғулланиши учун барча шароит яратилган. Хусусан, “Фарҳод” маданият саройининг нодир адабиётларга бой кутубхонаси ўқувчи-ёшлар билан доимо гавжум. Саройнинг олд қисмида Фарҳоднинг тоғдан сув келтириш рамзий ҳайкали ва унга туташ майдонда кўзада сув кўтарган уч сулув тимсоли ўрин олган. Бу манзарани теран илғаган ҳар бир инсон кўз олдида Алишер Навоийнинг барҳаёт ғоялари гавдаланади.

Шаҳарнинг серқатнов кўчаларидан бири – Алишер Навоий кўчаси кейинги беш йилда янада кўркамлашди. Шаҳарни Кармана тумани маркази билан боғлаш мақсадида 3 километрдан ортиқ автомобиль йўли янгидан барпо этилди. Йўл атрофида замонавий ва кўркам бинолар, ресторан ва савдо марказлари бунёд этилаётир. Шу йўл бўйида ёш оилалар учун бир неча “Ёшлар уйи" барпо этилаётгани кўчага янада файз бағишламоқда.

Кундан-кун кўркам қиёфа касб этиб бораётган вилоятда шоир ҳаёти ва унинг бой ижодий меросини ўрганишга алоҳида эътибор қаратилмоқда. Айниқса, буюк мутафаккир таваллудининг 577 йиллиги муносабати билан талаба ва ўқувчилар Алишер Навоий ҳаётини акс эттирувчи саҳна кўринишлари намойиш этмоқда. Маданият саройлари ва таълим муассасаларида мушоира кечалар ўтказилаётир.

Нуриддин Раҳимов, ЎзА

http://uza.uz/

Published in Ўзбекистон янгиликлари

mardi, 06 février 2018 00:00

“Киши молини ема сирот узра тутаро...”

Аллоҳ таоло Мулк сурасининг 2-оятида бундай дейди: “(Эй инсонлар) у қай бирингизнинг амалларингиз яхшироқ эканини синаш учун ўлим ва ҳаётни яратди. У қудратли ва кечирувчидир”.

Бутун олам ва барча махлуқотлар қаторида инсон зотини ҳам Аллоҳ таоло турлича қилиб жисмини, миллатини, ирқини бошқа-бошқа қилиб яратди. Уларни ризқлантиришда ҳам молу дунёлар билан таъминлашда ҳам ҳар хил қилди. Бировни бойлик бериб синаса бировни йўқчилик билан синайди.

Ислом динида кучлиларни ожизларга, бойларни камбағалларга ёрдам беришда чақиради. Жаноб Пайғамбаримиз соллаллоҳу алайҳи васаллам шундай деб марҳамат қиладилар: “Кимки бирорта мусулмонни дунё ташвишларидан қутқарса Аллоҳ таоло у бандани қиёмат кунидаги битта ташвишидан қутқаради...” (Имом Муслим, Абу Довуд ва Табароний).

Ҳаёт бамисоли пасту баландликдан иборат йўлга ўхшайди. Гоҳида бировнинг ёрдамига муҳтож бўлинади. Қарз олишга мажбур бўлади. Аллоҳ таоло Қуръони каримда шундай марҳамат қилади: “Аллоҳга чиройли қарз берадиган (унинг йўлида ўз бойлигидан сарфлайдиган) киши бормики унга бир неча баробар кўп қилиб қайтарса. (Бақара, 245)

Бу оятда муҳтож бўлган кишиларга беғараз ва беминнат ўз мол-мулкини, маблағини сарф қилиши “Аллоҳга қарз” деб аталмоқда. Ислом динида садақа бергандан кўра қарз берганнинг савоби кўпроқ. Чунки садақа ва эҳсонлар ҳар кимга ҳам берилиши мумкин. Лекин қарз фақат муҳтожларга берилади. Пайғамбаримиз соллаллоҳу алайҳи васаллам айтадилар “Жаннатга кирдим ва унинг эшигига садақа ўн (баробар савоб) билан, қарз ўн саккиз (баробар савоб) билан (мукофотланади)” деган ёзувни кўрдим... (Табароний ривояти)

Қарз берувчи муҳтож кишига очиқ юзли юмшоқ кўнгилли бўлишлиги керак бўлса ўз навбатида ҳожатини битириб , мушкулини осон қилган одамга қарздор хам ваъдага имкон қадар вафо қилишлиги лозим.

Расуллоҳ соллаллоҳу алайҳи васаллам марҳамат қиладилар: “Ким бировдан қайтариб бериш ниятида қарз олса, Аллоҳ уни қарзини узишига ёрдам беради Ким молига талофот етказиш учун олса, Аллоҳ унинг ўзига талофат етказади”.

Шунинг учун қарзни ўзишга қодир бўлиб уни адо қилмаса, гуноҳкор бўларкан. Ислом динида энг савобли амаллардан бири дин учун, ватан ҳимояси учун шаҳид бўлишдир. Ҳаттоки шаҳид бўлган инсон қиёмат куни хисоб ва сўроқ қилинмайди. Аммо бировнинг ҳақи зиммасида бўлса шуни ҳисоби қилинади. Расуллоҳ соллаллоҳу алайҳи васаллам айтадилар. “Шаҳиднинг қарздан бошқа ҳамма гуноҳлари кечирилади” (Имом Муслим ривояти).

Қаранг, бировнинг ҳақи шаҳиддан ўтилмас экан, албатта, бошқалардан ҳам кечилмайди!

Шунинг учун ҳам халқимизда марҳумнинг жанозасини ўқишдан олдин унинг адо қилинмай қолган қарзи бўлса ўз зиммасига олувчи борми? деб сўралади. Бунинг сабаби марҳумнинг руҳи бу дунёдаги қарзига боғланган ва уни адо қилмагунича ором топмас экан. Ҳозирги кунда энг долзарб бўлган масалалардан бири электр энергияси, газ ва сувга ўхшаш кундалик эҳтиёжимиз учун фойдаланиладиган неъматларнинг тўловини вақтида қилмасдан қарздор бўлиш ҳам мусулмончилик одобига хос бўлмаган ишлардандир. Бу дунёда адо қилинмаган қарзлар учун қиёматда номаи аъмолидаги савобли амалларидан олиб берилади. Бу дунё –охиратнинг экинзори. Имкон қадар савобли амалларни кўп қилишлик зиммамиздаги ҳақларни қарзларни адо қилиб яшашимиз зарур.

Бу дунё беш кунлик дейилади. Таъбир жоиз бўлса, аслида бу дунё уч кунлик: кечаги кунимиз ўтиб кетди; эртанги кунимизни Аллоҳ насиб қиладими, йўқми, билмаймиз; энг муҳими, бугунги кунимиздир. Қанча яхшилик бўлса шу бугун қилиб қолайлик, бировларнинг кечаги ва бугунги хақларини бугун адо қилайлик. Токи умримиз баракали, охиратимиз бехавотир бўлсин!

Отабек ЗАЙНИДДИНОВ,

Китоб тумани “Алақўйлиқ” жоме масжид имом-хатиби

ЎМИ Матбуот хизмати

Published in Мақолалар