”Ҳазрати имом" жоме масжиди

имом-хатиби

Ҳабибуллоҳ қори  Садриддин қори ўғли

Бугун, 5 апрель куни “Янги Ўзбекистон” боғида кўчат экиш маросими бўлиб ўтди. Унда Ўзбекистон мусулмонлари идораси раиси, муфтий Нуриддин домла ҳазратлари, турли миллат вакиллари ва диний конфессия етакчилари иштирок этдилар.
Маросимда муфтий ҳазратлари тадбир иштирокчилари қатори ушбу ҳудудда ташкил этилган "Бағрикенглик боғи"га турли дарахт кўчатлари ўтқаздилар ва бундай хайрли амаллар бардавом бўлишини сўраб дуо қилдилар.
Мазкур тадбир Давлатимиз раҳбари ташаббуси билан илгари сурилган “Яшил макон” умуммиллий лойиҳаси доирасида амалга оширилаётганини алоҳида қайд этиш керак. Зеро, ушбу ташаббус барча юртдошларимизни ягона мақсад атрофида бирлаштирди, десак янглишмаган бўламиз.
Чунки айни баҳор кунлари юртимизда амалга оширилаётган кўкаламзорлаштириш ишлари диёримизнинг янада яшиллика бурканишига сабаб бўлмоқда. Лойиҳага кўра, келгуси беш йилда 1 миллиард туп дарахт кўчат экиш мақсад қилинган бўлиб, айни кунларда лойиҳа доирасида кўплаб кўчат экиш, ҳудудларни обод қилиш ишлари жадал давом этмоқда.
Мазкур хайрли лойиҳа доирасида шу йил 1 март куни Ўзбекистон мусулмонлари идораси Уламолар Кенгашининг баёноти ҳам қабул қилинди. Баёнотда “Яшил макон” умуммиллий лойиҳасининг ҳаётимизда тутган ўрни ҳақида сўз юритилиб, динимиз таълимоти асосида барчани ушбу тадбирда фаол иштирок этишга чақириш баробарида, қишлоқ-овуллармиз, маҳалла-кўйларимизни обод қилиш орқали юртимизни боғу бўстонга айлантириш назарда тутилган.
Ушбу савобли лойиҳада юртимиздаги барча масжиду маҳаллаларда уюшқоқлик билан давом этиб, масжидлар ҳудудида яшил маконлар ташкил этиш ва кўчат экиш ишлари фаол давом этмоқда.
Зеро, Ислом динимиз ҳам ерни обод қилиш, кўчат ўтқазиш масалаларига алоҳида фазилатли амал сифатида қарашини Муфтий ҳазратлари таъкидладилар. Анас розияллоҳу анҳудан ривоят қилинган ҳадисда: Расулуллоҳ соллаллоҳу алайҳи васаллам: “Агар бир мусулмон банда кўчат ўтқазса, ёки экин экса, ундан бирон инсонми, қушми ёки ҳайвонми еса, бунинг учун унга садақа қилинганнинг савоби бўлади”, дедилар (Имом Бухорий ва Имом Муслим ривояти).

Ўзбекистон мусулмонлари идораси Матбуот хизмати

Бир неча йилдан буён хориж давлатлари диний идораларидан келган таклифлар асосида қориларимиз чет мамлакатларида диний-маърифий тадбирларда иштирок этиб, таровиҳ намозларини адо этиб бермоқдалар.

Жорий йил Рамазон ойида ҳам қориларимиз АҚШ ва бошқа мамлакатларда хатми Қуръонлар ўтказиб берадилар.

Жумладан, АҚШ даги Туркистон – Америка жамиятининг расмий таклифига биноан Тошкент шаҳридаги “Аҳмаджон қори” масжиди имом-хатиби, 2018 йилги Ўзбекистон Қуръон мусобақаси Ҳакамлар ҳайъати аъзоси Муҳаммадий қори Эргашев АҚШга жўнаб кетди. Муҳаммадий қори Эргашев Нью Жерси штати Довер шаҳрида Рамазон ойи давомида мусулмонларга таровиҳ намозини адо этиб, диний – маърифий суҳбатлар ўтказиб бериши режалаштирилган.

Маълумот учун Туркистон – Америка жамияти АҚШнинг Нью Жерси штати Довер шаҳрида жойлашган. Мазкур жамият 1958 йилда тузилган бўлиб, ҳозирда унга ватандошимиз Абдуллоҳ Хўжа жаноблари раислик қилади.

Сафар тафсилотлари ҳақида порталимиз орқали хабар бериб борамиз.

Ўзбекистон мусулмонлари идораси Матбуот хизмати

Абдулҳай Турсунов

Наманган вилояти бош имом-хатиби

Ҳазрат Мир Алишер Навоий ислом арконларидан, диний билимлардан етарлича хабардор бўлганларини яхши биламиз. Ҳазратнинг «Сирожул-муслимин» номли асари айнан ислом рукнларига бағишланган.
Китобнинг битилиш сабабида келтирилишича, кунларнинг бирида бир самарқандлик ростгўй, билимдон зот Ҳазрат Навоийнинг ҳузурига келиб, Хожа Убайдуллоҳ Аҳрорнинг илтимосини етказади. Хожа Аҳрор Ҳазрат Навоийдан ислом динидаги рукнлар, фарз, суннат ва вожиб амаллар хусусида содда, ҳаммага тушунарли тилда назмий рисола битишни илтимос қилган эканлар.
Навоийнинг ўзлари ҳам анча пайтдан бери худди шу мавзуда асар битишни режалаштирган экан. Шу боис тез кун асар ёзиб битказилади.
Биз қутлуғ Рамазон ойида ушбу асардан олинган, рўза ҳақидаги парчаларни эътиборингизга ҳавола этамиз:

Эрур тўртунчиси исломнинг савм,
Ки, ўтган кимсага тақво била явм.
Чу рўза фарз бўлди йилда бир ой,
Анинг ижросида бўл нафсфармой.
Ани бил субҳдин то шом чоғлиқ,
Таому шурбу шаҳватдин йироғлиқ

Тақво билан кун ўтказувчи кимса учун Исломнинг тўртинчи рукни рўзадир. Бир йилда бир ой рўза тутиш фарздир. Уни бажариш учун инсон ўз нафсини қўлга олиши керак бўлади. Шуни билки, тонг отганидан то шом киргунича, ейиш, ичиш ва жинсий яқинликдан узоқ бўлиш керак.
Эрур бу рўзада ният санга фарз,
Валекин неча авло айладим арз.
Навофилда вале ниятни қилмоқ,
Санга жоиздурур туштин бурунроқ.

Рўзадан аввал ният қилиш фарздир. Лекин имкон даражасида тушдан аввлроқ ният қилиш маъқул саналади.
Чибин ё пашшадек ҳар жинси ҳосил,
Эмас бўғзунгға кирса рўза ботил.

Агар чивин ёки пашшадек нарсалар томоққа кирса рўза бузилмайди.
Тузу сирка тоторға аҳли идрок,
Тегурса, тил учун, эрмас анга бок.

Ақли комил кишилар туз ёки сиркани тил учи биан татиб кўрсалар бунинг зиёни йўқ.
Яна улким, ҳижомат қилсаю қасд,
Ғам эрмас, рўзаға чун қилмамиш қасд.

Яна ҳижома қилдирса, яъни қон олдирса бу ҳам рўзага зиён етказмайди.
Гар ўтмак тифл учун чайнар аноси,
Раводур гар, яна йўқтур ғизоси.
Вале билмак керактур они макруҳ,
Керак макруҳдин хотирда андуҳ.

Шунингдек она ўз боласига нон чайнаб берса, ўзи ютиб юбормаса, бу ҳам рўзани синдирмайди. Лекин бу макруҳ саналади. Имкон қадар макруҳ амалларга йўл бермаган яхшироқдир.
Унутиб гар есанг, ичсанг, эмас ғам,
Эрур ул рўза боқий, эй мукаррам.

Билмасдан еб-ичиб қўйса, кейин рўзани давом эттириб кетаверса, бунда ҳам рўзага зарар етмайди.
Шунингдек ҳазрат Навоий рўзанинг кафортига ҳам алоҳида тўхталиб ўтганлар:

Ғизо еб рўза улким, қилса зойил,
Ва ё нафси бўлиб шаҳватға мойил.
Кафорат олтмиш мискинга итъом,
Эрур ё олтмиш кун савми ноком.

Агар қасдан кимдир таомланиб, шаҳватини қондириб, рўзани бузса, (бир кун учун) олтмиш нафар мискинни тўйдириши ёки олтмиш кун рўза тутиши керак бўлади.

Ким, ул кунларнинг ўлғай иттисоли,
Йўқ эрса солим эрмас рўза ҳоли.
Ва ё бир банданинг кўнглин қилиб шод,
Анга Тенгри йўлинда қилмоқ озод.

Шу тариқа рўза тутилмай қолган кунларнинг ўрнини тўлдириш мумкин. Акс ҳолда рўза мукаммал бўлмайди. Ё бўлмаса бир банданинг кўнглини шод қилиб, уни қулликдан қутқариш керак бўлади. Валлоҳу аълам!

Рустам ЖАББОРОВ, ЎзА
Ўзбекистон мусулмонлари идораси матбуот хизмати