Абу Ҳурайра розияллоҳу анҳудан ривоят қилинади: Мен Расулуллоҳ соллаллоҳу алайҳи васалламни: «Ҳеч кимни амали уни  жаннатга олиб кирмайди», деганларини эшитдим. Улар: «Сиз ҳамми, эй Аллоҳнинг элчиси?» дедилар. У зот: "Мен ҳам.  Магар Аллоҳ мени раҳмати ва фазли билан ўраб олгандагина (кира оламан). Тўғри бўлинглар, сизлардан бирортангиз ҳам ўлимни орзу қилмасин. Яхши амалли бўлса, шояд зиёдалашса, Ёмон амалли бўлса, шояд (ёмонликлардан яхшиликка қайтиб) ризолик топса".

Расулуллоҳ мусулмонларни тоат ва ибодатларида адашишларидан огоҳлантирмоқдалар. Ва уларнинг қалбларида ҳавф ва ражо бўлишига ундаганлар. Расулуллоҳ соллаллоҳу алайҳи васаллам саҳобаларига: "Ҳеч бирингизни амалингиз олов (дўзахдан)дан сақламайди ва сизлардан ҳеч кимни амали жаннатга олиб кирмайди", дедилар. Улардан бири: "Сизни ҳам амалларингиз сақлаб қолмайдими ва жаннатга олиб кирмайдими, эй Аллоҳнинг элчиси? ", деди. У зот: "Ҳа мени ҳам, фақат Аллоҳ таоло мени раҳмати ва фазли билан ўраб олса (жаннатга кираман)", дедилар.

Амаллар Аллоҳнинг ризосига олиб борувчи оддийгина сабаблардир. Аллоҳнинг ризоси эса, бу жаннатга олиб борадиган йўлдир. Амалларингиз билан алданманг, яхшилик ва раҳм-шафқатга ишониб қолманг. Лекин амалларингизда фақат тўғриликни талаб қилинг. Аллоҳнинг амрларига бўйсуниб, унинг қайтариқларидан қайтиш орқали Аллоҳ таолонинг розилиги билан сизнинг орангиздаги масофани яқинлаштиринг. Сизлардан ҳеч ким тезроқ ўлиб, жаннатга кираман деб орзу қилмасин. Солиҳ амал қилувчи киши бўлса, кўпроқ яшаб янада кўпроқ савоб амаллар қилиб ва шу сабабидан шояд Аллоҳ таолонинг марҳаматига эришса. Агар ёмон амаллари кўп киши бўлса, кўпроқ тавба қилиб, яхшиликларини зиёда қилиб олса.

Ҳадиси шарифнинг зоҳирига қаралса, "Ҳеч кимни амали уни  жаннатга олиб кирмайди", деган сўзлари Аллоҳ таолонинг ушбу оятига муориз келиб қолганга ўхшайди:

"Мана шу қилиб юрган амалларингиз сабабли сизга мерос қилиб берилган жаннатдир"(Зуҳруф сураси).

"Қилиб юрган ишларингиз туфайли жаннатга киринг" (Наҳл сураси)

Оят ва ҳадиснинг ораси бир неча важҳларга кўра жамланган:

Жумладан, амаллар жаннатга олиб кириши шарт эмас, балки Аллоҳ таолонинг инояти билан кирилади. Амаллар эса оддий сабабдир: чунки амаллар қанчалик буюк бўлмасин, жаннатга олиб кира олмайди. Худди  осмонўпар сарой ҳамда ва катта бир тижорат молини бир дирҳамга сотган сотувчининг савдоси каби. Ушбу нарҳга гарчи сотувчи рози бўлган тақдирда ҳам сотилган нарса билан пул тенг бўлмайди, балки сотувчи ҳаридорга фазл қилиб шунча нарсани кам нархга бериб юборган бўлади. Худди шунингдек, Аллоҳ таоло мўминларга  амаллари ва молларини  жаннатни сотиб олиш учун восита қилиб қўйди. Ибн Аббос розияллоҳу анҳу "Албатта, Аллоҳ мўминлардан уларнинг жонлари ва молларини жаннат эвазига сотиб олди", оятини ўқиганда "қандай ҳам яхши савдо", дер эдилар. 

Жумладан: жаннатга аслида фазл билан кирилади. Ҳадис шунга ҳамл қилинган. Шунингдек, даражаларга ҳам амаллар орқали эришилади. Оят ҳам шунга ҳамл қилинган. Ояти каримадаги "Қилиб юрган ишларингиз туфайли жаннатга киринг" дегани яъни Аллоҳ таолонинг фазли ва марҳамати ила киринг деганидир, ҳадиси шарифдаги "сизлардан ҳеч бирингизни амали жаннатга олиб кирмайди" деган сўзлари Аллоҳнинг фазлисиз кира олмайди, деганидир. Ояти каримада Аллоҳнинг фазли билан киринглар, дейимаганининг сабаби, одамлар Аллоҳ фазл қилади деб ҳотиржам бўлиб қолмасликлари учун. Ҳадиси шарифда Набий соллаллоҳу алайҳи васаллам ўзларининг Аллоҳнинг фазли ва раҳмати билангина Жаннатга киришларини айтдилар. У зотки Аллоҳнинг фазли билан кирсалар, бошқа одамлар батариқи аъло шундай бўлади.

Абдурраҳмон ибн Зайддан ривоят қилинади: «Ибн Мункадир Абу Ҳозимга шундай деди: «Эй Абу Ҳозим, қанчадан-қанча инсонлар билан учрашаман. Уларни умуман танимасам ҳам ёки уларга сира яхшилик қилмаган бўлсам ҳам, ҳаққимга яхшилик сўраб дуо қилишади». Абу Ҳозим унга: «Буни ўз амалингдан деб ўйлама, балки Аллоҳдан деб бил ва У Зотга шукр қил», деди ва ушбу оятни ўқиди:

إِنَّ الَّذِينَ آَمَنُوا وَعَمِلُوا الصَّالِحَاتِ سَيَجْعَلُ لَهُمُ الرَّحْمَنُ وُدًّا

«Албатта, иймон келтирган ва яхши амалларни қилганларга Роҳман муҳаббат пайдр қилур». Марям сураси, 96 оят.

Ҳадиси шарифнинг сўнгида ўлимни орзу қилмаслик ҳақида огоҳлантириш келди. Буни чиройли гумон деб атасак бўлади. Яъни Аллоҳ таоло ҳақида гоўзал гумон қилишдир.

“Ҳадис ва ислом тарихи фанлари” кафедраси мудири Ф.Хомидов

Бугун, 24 июнь куни Қозоғистоннинг Туркистон вилояти Сариоғоч тумани Сариоғоч мадрасасида марҳум Абдусаттор ва Абдуғаффор Самановлар хотирасига бағишланган “Дин руҳониятининг атоқли устозлари” номли халқаро илмий-амалий конференцияда ўзбекистонлик бир гуруҳ уламолар иштирок этмоқда.
Мазкур анжуманда Ўзбекистон мусулмонлари идораси раиси, муфтий Усмонхон Алимов ҳазратлари, раис ўринбосари Иброҳим домла Иномов, Имом Бухорий номидаги Тошкент ислом институти катта устози Муҳаммад Аюбхон домла Ҳомидов, бўлим мудири Муҳаммад Акмалхон домла Шокиров, Тошкент шаҳридаги “Убай ибн Каъб” жоме масжиди имом-хатиби Абдуҳаким қори Матқулов ва Иш бошқарувчи Рустам Жамилов иштирок этмоқда.
Шунингдек, Қозоғистон мусулмонлари идораси раиси, бош муфтий Наврўзбай ҳожи Тағанули бошчилигидаги бир гуруҳ қозоғистонлик уламолар, Қирғизистон мусулмонлари идораси вакиллари ҳам қатнашмоқда.
Халқаро илмий-амалий конференцияда раҳматли Абдусаттор ва Абдуғаффор Шокир ўғилларининг баракали умри ва уларнинг мустақил Қозоғистонда Ислом динининг қанот ёйишига қўшган салмоқли улуши, бугунги мусулмон умматининг масъулияти ва ўзаро тушунишни шакллантириш масалалари каби бир қатор долзарб мавзуларда маърузалар қилинади.
Шунингдек, Сариоғоч мадрасаси ёнида қурилаётган иморатларга дин ходимларининг номларини бериш тантанали тадбирининг очилиши бўлиб ўтади.
Конференция тафсилотларини сайтимизда кузатиб боринг.

Ўзбекистон мусулмонлари идораси Матбуот хизмати

Бугун, 24 июнь Ўзбекистон мусулмонлари идораси раиси, муфтий Усмонхон Алимов бошчиликларидаги бир гуруҳ уламоларимиз Қозоғистоннинг Туркистон вилояти Сариоғоч тумани Сариоғоч мадрасасида марҳум Абдусаттор ва Абдуғаффор Самановлар хотирасига бағишланган “Дин руҳониятининг атоқли устозлари” номли халқаро илмий-амалий конференцияда иштирок этадилар. Мазкур анжуманга бош муфтийлар, дин ходимлари ҳамда руҳоният намояндалари қатнашади.
Халқаро илмий-амалий конференцияда раҳматли Абдусаттор ва Абдуғаффор Шокир ўғилларининг баракали умри ва уларнинг мустақил Қозоғистонда Ислом динининг қанот ёйишига қўшган салмоқли улуши, бугунги мусулмон умматининг масъулияти ва ўзаро тушунишни шакллантириш масалалари каби бир қатор долзарб мавзуларда маърузалар қилинади.
Шунингдек, Сариоғоч мадрасаси ёнида қурилаётган иморатларга дин ходимларининг номларини бериш тантанали тадбирининг очилиши бўлиб ўтади.
Конференция тафсилотларини сайтимизда кузатиб боринг.

Ўзбекистон мусулмонлари идораси Матбуот хизмати

Бугун, 23 июнь куни юртимиз ва хориждаги диний-маърифий соҳа вакиллари иштирокида “Термизий уламоларнинг ислом тамаддуни ва жаҳон цивилизацияси ривожига қўшган ҳиссаси” мавзусида халқаро онлайн анжуман ўтказилди. Унда Туркия, АҚШ, Ҳиндистон, Покистон, Россия, Ироқ, Миср, Афғонистон каби давлатлар олимлари ва Ўзбекистондан 40 га яқин таниқли уламолар, нуфузли университет ва илмий-тадқиқот марказлари вакиллари иштирок этди.

Халқаро онлайн анжуманда Ўзбекистон мусулмонлари идораси раиси, муфтий Усмонхон Алимов ҳазратлари масофавий тарзда маъруза билан қатнашиб, унда жумладан бундай дедилар:

“Бу заминдан Термизий номи билан Ислом оламига машҳур бўлган юзлаб алломалар етишиб чиққан. Имом Абу Исо Термизий, Ҳаким Термизий, Варроқ Термизий каби Термизий алломалар номи билан боғлиқ бугунги нуфузли онлайн анжуманда Афғонистон, Ироқ, Туркия, Марокаш каби хорижий мамлакатлар ва юртимизнинг кўзга кўринган олимларнинг иштирок этаётгани Термизий алломаларига эҳтиромининг яққол ифодасидир.

Буюк илм соҳиби бўлган ҳамда юксак эътирофга муносиб кўрилган алломаларимизнинг ибратли ҳаёт йўллари ва бой маънавий меросини ҳар томонлама тадқиқ этиш биз учун ҳам илмий, ҳам амалий жиҳатдан муҳим аҳамиятга эга.
Имом Термизий, Ҳаким Термизий каби муҳаддис ва алломаларнинг авлоди бўлиш ҳар биримизнинг зиммамизга улкан масъулиятни юклар экан, айниқса ёшларимиз уларга муносиб авлод, илм-маърифат нурини таратгувчи маёқ бўлишлари зарурдир”.

Шунингдек, унда ислом олами қадимдан ўрганиб келиётган Имом Термизий илмий меросининг мазмун-моҳиятини тўла очиб бериш, ушбу мероснинг ўзига хос хусусиятларини жаҳон афкор оммасига намоён этиш, унинг афзаллик ва тарбиявий аҳамиятини кенг ёритиш, халқимиз, айниқса, ёш авлодни ёт ғоялардан ҳимоя қилиш, сўнгги йилларда юртимизда диний-маърифий соҳада амалга оширилаётган ижобий янгиланиш ва ўзгаришлар ҳақида хабардор қилиш каби масалалар кенг муҳокама қилинди.

Тадбир сўнгида иштирокчилар халқаро анжуман баёнотини қабул қилишди.

Ўзбекистон мусулмонлари идораси матбуот хизмати

Ўзбекистонга зиёрат туризимини тарғиб қилиш ва ўзаро ҳамкорликни ривожлантириш мақсадида Ўзбекистон мусулмонлари идораси делегацияси Қозоғистон сафарга чиқди.

Ўзбекистон мусулмонлари идораси Масжидлар бўлими мудири Муҳаммадназар Қаюмов, “Муслим тур” зиёрат шўъбаси раҳбари Жаҳонгир Саломов ва Муҳтасиблик бўлими раҳбари Исомиддин Зуҳриддиновлардан иборат делегация аъзолари Олма-ота шаҳрига ташриф буюриб, “Қозоқ травил” тур компанияси раҳбари Асқад Турғунбаев билан музокара ўтказди.

Самимий мулоқот чоғида “Қозоқ травил” тур компанияси раҳбари яқин кунларда Самарқанд ва Бухоро шаҳарларига саёҳат қилишини маълум қилди. Шунингдек, яқин ойларда Қозоғистон зиёратчиларининг юртимизга, Ўзбекистон зиёратчиларининг эса қўшни давлатга зиёратини ташкил этиш бўйича келишиб олинди.

Шунингдек, зиёрат туризми делегацияси сафар давомида Нурсултон шаҳрига боришди. Ташрифи давомида делегация аъзолари Қозоғистон Касаба уюшмалари федерацияси раисининг биринчи ўринбосари Нурлан Ўтешов, Халқаро алоқалар бўлими раҳбари ва Қозоғистон республикаси ўзбек этно-маданий маркази раиси Шуҳрат Пўлатовлар билан учрашув ўтказди.

Суҳбат асносида Ўзбекистон ва Қозоғистон ўртасида зиёрат туризмни ривожлантириш, қардош халқлар ўртасида туристик саёҳатларни йўлга қўйиш каби масалалар бўйича ўзаро фикр алмашиб, яқин ойлар ичида зиёратларни йўлга қўйиш бўйича келишиб олинди.

Ўзбекистон мусулмонлари идораси матбуот хизмати