Пайғамбаримиз Муҳаммад соллаллоҳу алайҳи васаллам таваллуд топган рабиъул аввал муборак ой ҳисобланади. Жорий йилги милодий ҳисоб бўйича ушбу ғанимат дамлар 2017 йилнинг 20 ноябридан 19 декабригача давом этади.

Мўмин-мусулмонларимиз ушбу ойда Набий алайҳиссаломни ёд этиб, ул зотнинг ҳаёт йўллари баён этилган китобларни мутолаа қилишади, суннат амалларини кўпроқ бажаришга ҳаракат қилишади ва салоту саломлар айтилади. Бу амаллар билан ул зоти шарифга бўлган муҳаббатимиз янада зиёда бўлади, иншоаллоҳ.
“Мавлид” сўзи луғатда “туғилиш”, “туғилиш они” каби маъноларни англатади. Истеъмолда эса, Муҳаммад алайҳиссаломнинг таваллуд кунлари, ойлари ҳамда шу муносабат билан қилинадиган йиғин ва унда ўқиладиган саловот, дуою зикрларга айтилади.

Мавлид тадбирларини ўтказиш анъаналари 6-7 асрларга келиб, Расулуллоҳ соллаллоҳу алайҳи ва салламга ҳурмат кўрсатиш, хотирлаб туриш мақсадида жорий қилинган. Ибн Ҳажар Асқалоний, Жалолиддин Суютий, Шайх Шаҳобиддин Қасталоний каби машҳур олимлар мавлид кунини нишонлаш, ушбу кунда Расули Акрам ҳақларида қасидалар ўқиш, дуруду салавотлар айтиш дурустлигига фатво берганлар.

Шу ўринда айтиш керакки, Ўрта асрларда ислом оламида тасаввуф катта ўрин тутганлиги сабабли мавлид маросимларига тасаввуф намоёндалари бош бўлишгани манбаларда қайд қилинган.

Диёримиз мўмин-мусулмонлари орасида ҳам қадимдан мавлид ойини нишонлаш одат тусига кирган. Шу муносабат билан робиъул аввал ойи келгач, юртимизда Ўзбекистон мусулмонлари идораси бошчилигида қуйидаги мавлид тадбирлари ўтказилади:

Биринчи, республикамиздаги барча жоме масжидларда Пайғамбаримиз соллаллоҳу алайҳи ва салламнинг сийратлари, юксак ахлоқ-одоблари ва олий фазилатлари ҳақида мавъизалар қилинади. Масалан, диёримиз масжидларида 2017 йилнинг 24 ноябрь куни “Мавлиди Набий муборак” жума тезиси асосида маъруза қилиниши режалаштирилган. Шу муносабат билан жоме масжидларда Имом Жаъфар Барзанжий раҳматуллоҳи алайҳ томонидан Набий алайҳиссалом туғилишлари, ҳаёт йўллари, аҳлоқлари тўғрисида битилган, халқ орасида машҳур бўлган “Мавлиди шариф” китоби ўқилади.

Иккинчи, мўмин-мусулмонларнинг талаб ва истакларига асосан хонадонларда ўтказиладиган мавлид тадбирларида имом-хатиблар ҳам иштирок этиб, Ҳазрати Пайғамбаримиз алайҳиссаломнинг гўзал сифатлари баён этилиб, мавлиди шариф ўқилади.

Учинчи, мавлид тадбирларида масжидлар томонидан ва ҳомийларни жалб этган ҳолда кам таъминланган оилалар, ёлғиз қариялар ва меҳрибонлик уйларига меҳр-мурувват ҳамда хайрия ишлари амалга оширилади.

Тўртинчи, Ўзбекистон мусулмонлари идораси тасарруфидаги диний таълим муассасаларида Мавлид ойи муносабати билан “Расулуллоҳ соллаллоҳу алайҳи ва саллам сийратлари – ибрат мактаби” номли давра суҳбати, “Расулуллоҳ соллаллоҳу алайҳи ва салламнинг умматларимиз” мавзусида “Сийрат” фани бўйича мусобақалар ўтказилиши режалаштирилган.

Бешинчи, уламолар, диний соҳа ходимлари ҳамда имом-хатиблар даврий нашрлар, интернет тармоқлари ва теле, радио дастурларда Муҳаммад соллаллоҳу алайҳи ва салламнинг ахлоқ-одоблари, сийрат ва шамоиллари, тутган йўлларининг бағрикенглиги, ҳеч кимга зулмни раво кўрмасликлари, меҳр-оқибат, эзгулик каби фазилатлар манбаи эканларини тарғибу ташвиқ қилишади. Шунингдек, турли танлов ва мусобақалар ўтказилади.

Ўз навбатида биз ҳам барчани диний идора томонидан ташкил этилаётган мана шундай хайрли ишларнинг хайрихоҳи ва иштирокчиси бўлиб, ҳақиқий уммат бўлиш бахтига муяссар бўлишга даъват этамиз.

Ўзбекистон мусулмонлари идораси
Матбуот хизмати

Бугун, 23 ноябрь куни Тошкент ислом университетида Ўзбекистонда диний соҳада амалга оширилаётган ислоҳотларга бағишланган йиғилиш бўлиб ўтди.
Ушбу тадбирда Ўзбекистон Республикаси Президенти девони масъул ходими К.Камилов, Ўзбекистон Республикаси Вазирлар Маҳкамаси ҳузуридаги Ислом цивилизацияси маркази директори Ш.Миноваров ва Республика Маънавият ва маърифат маркази раҳбари А.Қодиров иштирок этиб, тадбирда маъруза қилдилар. Сўзга чиққан нотиқлар давлат ва жамоат ташкилотлари ҳамкорлигида мамлакатимизда диний-маърифий соҳада амалга оширилаётган ислоҳотлар ва уни тарғиб этишда диний соҳа ходимлари олдида турган долзарб вазифалар алоҳида баён қилинди.
Ўзбекистон мусулмонлари идорасининг Тошкент шаҳар ва туманлардаги вакиллари, имом-хатиблар, таълим муассасалари раҳбарлари, маънавият тарғиботчилари ҳамда оммавий ахборот воситалари ходимлари иштирок этишди.
Президентимиз Шавкат Мирзиёев раҳнамолигида мамлакатимизда маънавий-маърифий ислоҳотларни чуқурлаштириш ва самарадорлигини ошириш, миллий ва диний қадриятларни эъзозлаш ва улардан жамият тараққиёти, ёшлар тарбияси йўлида оқилона фойдаланиш масалаларига алоҳида эътибор қаратилаётгани таъкидланди.
Бундан ташқари, давлатимиз раҳбарининг бир қатор нуфузли халқаро анжуманларда қилган маърузалари ҳам жаҳон миқёсида кенг эътироф этилаётгани алоҳида қайд этилди. Жумладан, Президентимизнинг БМТ Бош Ассамблеяси 72-сессияси ва Ислом ҳамкорлик ташкилотининг Фан ва технологиялар бўйича биринчи саммитидаги маърузаларида жаҳолат, халқаро терроризмнинг илдизлари, дунё хамжамиятини ташвишга солаётган муаммо ва уларни бартараф этиш йўллари хусусида аниқ таклифлар ўртага ташланди.
Тадбирда ижтимоий-маънавий муҳитни янада соғломлаштириш, муқаддас динимиз софлигини асрашда тутган ўрни ва ёшларни маънан баркамол этиб тарбиялаш, оммавий маданият ва зарарли ғоялар, турли хавф-хатарларга қарши мафкуравий иммунитетни шакллантиришда имом-хатиблар зиммаларида жуда ҳам муҳим вазифалар мавжудлигини алоҳида қайд этиб ўтилди.
Ўзбекистон мусулмонлари идораси
Матбуот хизмати

Анас ибн Молик розияллоҳу анҳудан ривоят қилинади: Расулуллоҳ соллаллоҳу алайҳи васаллам: “Ким менга битта салавот айтса, Аллоҳ таоло унга ўнта салавот айтади ва ундан ўнта хатони ўчириб, ўн даража кўтаради”, дедилар (Имом Насоий ривояти). 

         Пайғамбаримиз соллаллоҳу алайҳи васалламнинг ҳаётлари ҳар бир мусулмон учун ибрат ва ўрнакдир. Шунинг учун ҳам мусулмон уммати саҳобаи киромлардан тортиб, хозирги кунимизгача бу ишни шараф ила адо этиб келмоқада.

Мавлоно Ҳазиний “Тасаддуқ ё Расулуллоҳ” асарида бундай дейди:

Сиза жон фидо, ё ҳаёт ан-набий,

Қилай ман гадо, ё ҳаёт ан-набий.

Отингиз — Муҳаммад, расули худо

Ки, сиз Мустафо, ё ҳаёт ан-набий.

Ки, хайрул-башар, саййид ал-мурсалин,

Рисолатпано, ё ҳаёт ан-набий.

Мани осийни еткурур равзага

Қачон ул худо, ё ҳаёт ан-набий?

Тавоф айласам хонайи Каъбани,

Будур муддао, ё ҳаёт ан-набий.

Қолай «Жаннатул-Бақя» хокида ман

Ки, етса қазо, ё ҳаёт ан-набий.

Ҳама умматингиз умид айлашур

Ки, рўзи жазо, ё ҳаёт ан-набий.

Ҳазиний дуоси бўлурму қабул,

Бу ғарқи гуно, ё ҳаёт ан-набий?!

Абдуллоҳ  ПАРПИЕВ

тайёрлади

2017 йил 22 ноябрь куни Наманган вилоят ҳокимлигининг катта мажлислар залида вилоят ҳокимининг ўринбосари Ҳ. Маткаримов раислигида Ўзбекистон мусулмонлари идорасининг вилоят, шаҳар, туманлардаги вакиллари, вилоятда фаолият кўрсатаётган 186 та масжид имом-хатиблари, Республика Маънавият ва маърифат марказининг ҳудудий бўлимлари раҳбарлари, Олий таълим муассасаларининг маънавий-маърифий ишлар бўйича проректорлари, ўрта махсус касб-ҳунар таълими ва халқ таълими бошқармаси бошлиғининг маънавий-маърифий ишлар бўйича ўринбосари, фуқароларнинг ўзини ўзи бошқариш органлари фаолиятини мувофиқлаштириш бўйича вилоят, туман(шаҳар) кенгашининг диний-маърифий масалалар бўйича раис ўринбосарлари иштирокида “Ўзбекистонда диний-маърифий соҳада амалга оширилаётган ислоҳатлар: моҳият ва мақсадлар” мавзусида тарғибот тадбири ўтказилди.

Тадбирда Ўзбекистон Республикаси Президенти Девони масъул ходими Ш. Исломов, Ўзбекистон мусулмонлари идораси Масжидлар бўлими мудири Раҳимберди Раҳмонов, Республика Маънавият ва маърифат маркази Миллий ғоя ва мафкура тадқиқотларини ташкил қилиш бўлими бошлиғи Ш.Тўраевлар иштирок этди.
Йиғилишда нотиқлар томонидан Ўзбекистон Республикаси Президенти Ш.Мирзиёевнинг Бирлашган Миллатлар Таашкилоти Бош Ассамблеясининг 72-сессияси ва Ислом ҳамкорлик ташкилотининг фан ва технологиялари бўйича биринчи саммитида сўзлаган нутқларининг мазмун-моҳияти, жаҳон афгор оммасидаги ижтимоий-сиёсий вазиятлар, инқироз ва инқилоблар сабабидан келиб чиқаётган муаммолар, диний экстремизмнинг аянчли оқибатлари, ёшларни жисмонан соғлом, маънан баркамол этиб тарбиялаш, уларнинг онги ва дунёқарашини “оммавий маданият” каби салбий таъсирлардан ҳимоялашнинг муҳим йўналишлари тўғрисида кенг маълумотлар берилди.

Шунингдек, Ўзбекистонда диний-маърифий соҳада амалга оширилаётган ислоҳотлар, имом-хатибларнинг ижтимоий-маънавий муҳитни янада соғломлаштириш, муқаддас динимизнинг софлигини асраш, ёшлар тарбияси, жиноятчилик, хуқуқбузарликларни олдини олиш борасида тутган ўрни ва вазифалари юзасидан тегишли тавсия ҳамда кўрсатмалар берилди.

Тадбирда 18 октябрь куни Тошкент шаҳрида ўтказилган “Ислом ҳамжиҳатлиги: Ўзбекистон-Озарбайжон мисолида” мавзуидаги халқаро конференция иштирокчиларининг юртимизда ҳукм сураётган диний бағрикенглик ҳақида билдирган фикр-мулоҳазалари намойиш этилди.

Ўзбекистон мусулмонлари идорасининг
Наманган вилоят вакиллиги

Кеча, 21 ноябрь куни Нигерияда масжид портлатилиши оқибатида камида 50 нафар одам ҳалок бўлгани хабар қилинмоқда.

Сешанба куни содир бўлган портлаш террорчи-худкуш томонидан амалга оширилган бўлиб, портлаш Боко Ҳарам террорчи гуруҳи томонидан амалга оширилгани тан олинган.

Адамава штатидаги Муби масжидида содир бўлган портлаш, 2016 йилнинг декабрида Мадагали шаҳарчасида содир этилганига қараганда даҳшатлироқ бўлгани маълум қилинмоқда. Ўтган йилги бозордаги терактда 45 нафар одам ҳалок бўлган эди.

Кеча содир бўлган терактда худкуш ўзини масжидга урган ва бу ердаги ибодат билан машғул бўлган одамлар ўртасида бомбани портлатган. Террорчининг тахминан 17 ёшлар атрофида экани айтилмоқда.

Маълумот учун, Боко Ҳаракат террорчилик гуруҳи томонидан 2009 йилдан буён содир этилган терактларда 20 мингдан ортиқ одамлар ҳалок бўлган. Улар 2,6 миллион нафар одамларни уйсиз қолдирган.