muslim.uz
Ҳасан домла ҚОДИРОВ: Маърифат улашиш энг эзгу амал
Муфтий ҳазрат халқаро онлайн анжуманда нутқ сўзладилар
Шу йил 17 декабрь куни Ўзбекистон мусулмонлари идораси раиси, муфтий Усмонхон Алимов ҳазратлари Имом Мотуридий халқаро илмий-тадқиқот марказининг истиқболдаги режаларига бағишланган халқаро онлайн анжуманда иштирок этиб, нутқ сўзладилар.
Онлайн халқаро анжуман Марказ фаолиятини халқаро жамоатчиликка тарғиб қилиш, халқаро илмий-тадқиқот муассасалари билан ҳамкорликни йўлга қўйиш, соҳадаги жаҳоннинг етук олимлари билан тажриба алмашиш, Имом Мотуридий ҳаёти ва илмий мероси, мотуридийлик таълимоти асосларини жаҳонга танитиш мақсадида ташкил этилди. Унда ўзбекистонлик ва хорижлик таниқли олимлар, давлат ва жамоат арбоблари, диний таълим муассасалари, илмий марказлар, халқаро ташкилотлар вакиллари ҳамда ушбу Марказ жамоаси иштирок этди.
Унда Президент маслаҳатчиси, Ўзбекистон халқаро ислом академияси ректори Рустам Қосимов, Ўзбекистон мусулмонлари идораси раиси, муфтий Усмонхон Алимов, Дин ишлари бўйича қўмита раиси Абдуғофур Аҳмедов, Таълим, фан ва маданият масалалари бўйича ислом олами халқаро ташкилоти (IСESCO) бош директори, доктор Салим ал-Малик, Ал-Азҳар ислом тадқиқотлари академияси бош котиби доктор Назир Муҳаммад Айяд, Туркиянинг Диёнат ишлари бошқармаси раиси профессор Али Эрбаш, Ибн Халдун университети президенти профессори Ражаб Шентурк каби нуфузли олим, давлат ва жамоат арбоблари иштирок этишди.
Онлайн анжуманда муфтий Усмонхон Алимов ҳазратлари ушбу илму ирфон марказини ташкил этишдан бош мақсад Имом Мотуридий, Имом Насафий каби мутакаллим аждодларимиз меросини илмий ўрганиш, калом илми мактаби анъаналарини қайта тиклаш ва ривожлантириш ҳамда ушбу йўналишда изланишлар олиб бораётган илмий ходимларга муносиб шарт-шароитлар яратиш кабилардан иборат эканини алоҳида таъкидладилар.
Шунингдек, Имом Мотуридийнинг ибратли ҳаёт йўли билан боғлиқ ўрганилмаган жиҳатларни тадқиқ этиш, аллома асарларидаги ақидавий таълимотлар ҳамда адашган тоифаларга қарши раддия бериш борасидаги маълумотлардан кенг фойдаланиш, халқаро ҳамкорликни йўлга қўйиш ҳам асосий вазифа эканини муфтий ҳазратлари қайд этиб ўтдилар.
Шунингдек, анжуманда сўзга чиққанлар Имом Мотуридий илмий меросини ўрганиш ва халқаро жамоатчиликка тарғиб қилиш шарафли ва масъулиятли вазифа эканини таъкидлашди, бу борада юртимизда олиб борилаётган саъй-ҳаракатларни юксак баҳолашди.
Шунингдек, унда Миср, Марокаш, Иордания, Туркия, Покистон, Германия, Босния ва Герцеговина, Россия, Афғонистон, Малайзия, Индонезия, Буюк Британия, Франция, Қозоғистон, Қирғизистон, Тожикистон, Бирлашган Араб Амирликлари, Мавритания, Тунис, Ҳиндистон, Бруней ва Австрия каби мамлакатлардан 50 дан зиёд соҳа вакиллари ва илмий-тадқиқот муассасаларининг раҳбарлари қатнашди.
Халқаро онлайн анжуман иштирокчилари мафкуравий таҳдидларга қарши курашда мустаҳкам ҳамкорлик зарурлигини таъкидлаб, ўзаро тажриба алмашиш, Ислом дини ниқобидаги оқимларнинг ғоялари тарқалишининг олдини олиш борасида қилинадиган ишлар режасини ҳам муҳокама қилишди.
Тадбир сўнгида Таълим, фан ва маданият масалалари бўйича ислом олами халқаро ташкилоти (IСESCO) билан Имом Мотуридий халқаро илмий-тадқиқот маркази ўртасида ўзаро ҳамкорликни йўлга қўйиш бўйича англашув меморандуми имзоланди.
Маълумот учун, ушбу марказга Президентимизнинг жорий йил 11 августда имзолаган “Имом Мотуридий халқаро илмий-тадқиқот марказини ташкил этиш чора-тадбирлари тўғрисида”ги қарор билан асос солинган эди.
Ўзбекистон мусулмонлари идораси Матбуот хизмати
Россиянинг Дарбанд шаҳридаги энг қўҳна масжид 2022 йилга келиб реставрация қилиб бўлинади
Доғистондаги Дарбанд шаҳрида саккизинчи асрда бунёд этилган Жума масжидининг реставрация ишларини 2022 йилда якунлаш режалаштирилган. У Россияда энг қадимги масжид ҳисобланади Айни пайтда реставраторлар томонидан ишнинг дастлабки босқичида аниқланган бир қатор хусусиятларни ҳисобга олган ҳолда лойиҳа қўшимча ишланмоқда. Islam.ru хабарига кўра, бу ҳақда Дарбанд музей-қўриқхонаси директори Виктор Чесноков "ТАСС" агентлигига маълум қилди.
2019 йилда бошланган реставрация ишларига 300 миллион рублдан зиёд маблағ сарфлаш режалаштирилган.
"Ишлар 2022 йилда якунланишини режалаштириб турибмиз. Реставрация жараёнлари давом этмоқда, ишларни профессионал ёндошувга эга Татаристон компанияси олиб боряпти, ҳамма ишлар жуда эҳтиёткорлик билан бажариляпти", – деди директор.
"Цнру реставрация" компанияси раҳбари Юрий Егорушкиннинг қайд етишича, иш лойиҳа ҳужжатларини янада ривожлантиришни талаб қиладиган бинонинг бир қатор хусусиятларини очиб берган.
Жумладан, гумбазни мустаҳкамлаш ишлари давомида Доғистон ва Шимолий Кавказ учун хос бўлмаган ғайриоддий "сурия" ғишт териш усули аниқланди.
"Ушбу бўшлиқни ички тўлдириш учун бошқа ўлчамдаги ва бошқа хусусиятлардаги ғишт талаб қилинди, уни Туладаги заводлардан бирига буюртма беришга тўғри келди, бунга эса вақт кетди", - дейди Егорушкин.
Azon.uz маълумотларига кўра, Жума масжиди 733-733 йилларда барпо этилган бўлиб, ЮНЕСКОнинг маданий мерос рўйхатига киритилган. Масжид кучли зилзиладан сўнг 1368-1369 йилларда қайта тикланган. Совет даврида – 1938-1943 йилларда мазкур обидадан турма сифатида фойдаланилди. 1943 йилда масжид мусулмонларга қайтариб берилди.
Ўзбекистон мусулмонлари идораси матбуот хизмати
Расулуллоҳ соллаллоҳу алайҳи васаллам ҳаётларидан лавҳалар: Тортишувни бас қилинг! (Аудио)
ЎМИ матбуот хизмати
Унутилаётган суннатлар (26-суннат): Сут ичиб, оғизни чайқаш
Абдуллоҳ ибн Аббос розияллоҳу анҳумодан ривоят қилади: "Расулуллоҳ соллаллоҳу алайҳи васаллам сут ичдилар, сўнгра, сув билан оғизларини чайқадилар. Сўнгра: “Унда ёғ бор”, дедилар" (Имом Термизий ривояти).
Сут А, Е, К, С, D, В, РР каби витаминлар, минерал моддалар ва аминокислоталарга жуда бой. Сут ёғлари ҳайвон ёғлари орасида энг тўлақонлиси ҳисобланади.
Сутни ҳар куни истеъмол қилиш юрак-қон томир тизимини мустаҳкамлайди ва юрак хуружи ҳамда инсульт хавфини 37 фоизга камайтиради.
Шунингдек сут мия ва асаб тизими учун фойдали, суякларни мустаҳкамлайди, иммунитетни ошириб, инфекциялардан ҳимоялайди, ошқозон касалликларида ва артериал қон босимини пасайтиришга ёрдам беради.
Қаранг, бу жуда ҳам осон, аммо савоби улкан, гуноҳларни кетказувчи, жаннатга етказувчи бўлган амалдир. Лекин дангасалигимиз, бепарволигимиз оқибатида бунга эътибор бермаймиз, амал қилмаймиз. Кўпчилигимиз ҳатто билмаймиз ҳам. Аввал билмасак, энди билиб олдик. Энди билганимизга амал қилайлик ва бошқаларга ҳам етказайлик.
Зеро, Расулуллоҳ соллаллоҳу алайҳи васалламнинг суннатларини ёйилишига хизмат қилиш у зотга бўлган муҳаббат ва эҳтиромнинг юксак намунаси ҳисобланади. У зот соллаллоҳу алайҳи васаллам суннатларини аниқлик билан етказганларнинг ҳаққига: “Менинг гапимни эшитиб, ёдлаб, сингдириб, сўнгра етказган одамни Аллоҳ неъматлантирсин”, деб дуо қилганлар (Имом Термизий ривояти).
Аллоҳ таоло барчамизга ҳар бир ишда Расулуллоҳ соллаллоҳу алайҳи васалламнинг суннатларига амал қилишимизга тавфиқ ато этсин, омийн!
Аллоҳумма солли ва саллим ъала Муҳаммадин ва ъала оли Муҳаммад
Даврон НУРМУҲАММАД