muslim.uz
Ўзбекистон исломий стандартлаштириш соҳасидаги ташкилотга аъзо бўлди
Жорий йилнинг 4 ноябрь куни Саудия Арабистонининг Макка шаҳрида халқаро анжуманда Ўзбекистон делегацияси иштирок этди.
SMIIC-Ислом ҳамкорлик ташкилоти қошидаги халқаро ташкилот ҳисобланиб, унга 38 та мусулмон давлати аъзо бўлган. SMIIC бошқарув кенгашининг 17-йиғилиши 4 ноябрда Макка шаҳрида бўлиб ўтди.
Йиғилиш кун тартибида бир қанча масалалар қаторида Ўзбекистон Республикасини ушбу ташкилотга аъзо қилиш масаласи ҳам ўрин олган эди. Жорий йилнинг 16 октябрь куни SMIIC ташкилотига аъзо қилишни сўраб Ўзстандарт агентлиги бош директори Д. Сатторов томонидан ариза тақдим этилган эди.
SMIIC бошқарув кенгашининг 17-йиғилишида Ўзбекистон Республикаси Ўзстандарт ташкилоти мисолида SMIICнинг аъзолигига бир овоздан қабул қилинди. SMIICнинг бошқарув кенгашининг 17-йиғилишида Ўзбекистон Республикасидан вакил сифатида Ўзстандарт агентлиги бўлим бошлиғи Абдулла Орифбоев ва ЎМИ фатво бўлими мудири Ҳ.Ишматбеков иштирок этди.
ЎМИ Матбуот хизмати
“Меҳр-мурувват карвони” Хоразмда
Кеча 2018 йил 4 ноябрь куни “Вақф” хайрия жамоат фонди томонидан “Меҳр-мурувват карвони” номли хайрия тадбири доирасидаги озиқ овқат маҳсулотлари, ногиронлик аравачалари ва диний-маърифий адабиётлар Хоразм вилоятидаги ўксик қалбларга қувонч улашиш мақсадида Урганч шаҳрига етиб келди.
Урганч шаҳридаги “Қутлуғ қадам” шодиёналар уйида Хоразм вилоятидаги кам таминланган 100 нафар оилага озиқ-овқат маҳсулотлари, 15 нафар шахсга ногиронлик аравачаси, Урганч шаҳар “Имом Фахриддин ар-Розий” ислом билим юртида таълим олаётган барча талабаларга иссиқ кийим-кечаклар улашди ва ушбу билим юртининг икки нафар талабасининг шартнома пулини тўлаб берди.
Шунингдек, Хоразм вилоятидаги 4 та хонадонни таъмирлаб бериш режалаштирилди ва 50 нафар масжид имом-хатибларига диний-маърифий китоблар берилди.
Шунингдек тадбир сўнгида ЎМИ Хоразм вилояти вакиллиги ва ҳомийлар томонидан тадбирда иштирок этган ёрдамга муҳтож оилалар ва ногиронларга хайрия дастурхони ёзилиб ош тортилди.
ЎМИ Хоразм вилояти вакиллиги
Йил охирига қадар "Имом Исо Муҳаммад ат Термизий" филми намойиш этилади
Ўзбекистонда жорий йилнинг сўнггига қадар "Имом Исо Муҳаммад ат Термизий" филми намойиш этилиши маълум қилинди. Бу ҳақда Ўзбеккино миллий агентлиги томонидан ўтказилган матбуот анжуманида маълум қилинди.
Агентлик масъулининг айтишича охирги икки ойда 10 та филмнинг премераси ўтказилади.
"Имом Исо Муҳаммад ат Термизий" филми режиссёр Абдуҳалил Мингноров томонидан тасвирга олинган бўлиб, режиссёрнинг ўзи, Дониёр Ҳафизов ва Абдулла Садриддиновлар Исо ат Термизий ролида суратга тушган.
ЎМИ Матбуот хизмати
Нишонга урилган гаплар: “қалблар ҳалол луқма ейиш сабабли юмшайди”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Мўминларнинг онаси Оиша розияллоҳу анҳо
Расулуллоҳ соллаллоҳу алайҳи васалламнинг қалбларида Оиша розияллоҳу анҳонинг ўзига хос ўрнилари бор эди. Пайғамбаримиз соллаллоҳу алайҳи васаллам Оиша розияллоҳу анҳога бўлган муҳаббатларини зоҳир қилар, махфий тутмас эдилар.
Амр ибн Осс розияллоҳу анҳудан ривоят қилинишича, албатта, Набий соллаллоҳу алайҳи васаллам у кишини Зотус салосил қўшинига қўмондон этиб юбордилар. У киши (Амр розияллоҳу анҳу) дедилар: “У зот соллаллоҳу алайҳи васалламнинг олдиларига бордим ва: “Инсонларнинг қайсиниси сизга маҳбуброқ?” дедим. У зот соллаллоҳу алайҳи васаллам: “Оиша” дедилар. “Эркакларданчи?” дедим. У зот соллаллоҳу алайҳи васаллам: “Унинг отаси” дедилар. “Кейин ким?” дедим. У зот соллаллоҳу алайҳи васаллам: “Кейин Умар ибн Хаттоб” дедилар. Шу тарзда (бир неча) кишиларни санадилар”.
Муттафақун алайҳ.
*****
Аёлнинг ақли ва дини ноқислигининг сабаби
«Саҳиҳайн»даги Абу Саид ал-Худрий розияллоҳу анҳунинг ҳадиси:
«Расулуллоҳ соллаллоҳу алайҳи васаллам Қурбон ҳайити ёки Рамазон ҳайити куни намозгоҳга чиқа туриб, аёллар ёнидан ўтдилар ва: «Эй аёллар жамоаси, садақа қилинглар, чунки, мен дўзах аҳлининг кўпи сизлар эканингизни кўрдим» дедилар.
Улар «Нима сабабдан шундай, эй Расулуллоҳ?» деб сўрашди.
У зот «Лаънатни кўпайтирасизлар ва эрга нонкўрлик қиласизлар. Ақли ва дини ноқис бўла туриб, сизларнинг бирингиздан кўра эҳтиёткор эркакнинг ақлини кеткизувчироғини кўрмадим» деб жавоб бердилар.
Улар «Динимизнинг ва ақлимизнинг ноқислиги нима, эй Расулуллоҳ?» дея сўрашди.
У зот «Аёлнинг гувоҳлиги эркак гувоҳлигининг ярмига тенг эмасми?!» дея сўрадилар.
Улар «Тенг» дейишди.
У зот «Мана шу ақлининг ноқислигидандир. Аёл ҳайз кўрганда, намоз ўқий олмай, рўза тута олмай қолмасмиди?!» дедилар.
Улар «Шундай» дейишди.
У зот «Мана шу динининг ноқислигидандир» дедилар».
*****
Ким уни, яъни намозни муҳофаза қилса, намоз у учун нур, бурҳон (ҳужжат) ва дўзахдан нажот бўлади.
Абу Бакр Сиддиқ розияллоҳу анҳу
*****
Ушбу тўрт нарса биз учун яхшироқ ва боқийроқдир:
- Субҳаналлоҳ.
- Алҳамдулиллаҳ.
- Лаа илаҳа иллаллоҳ.
- Аллоҳу акбар.
“Ховатир роқия журнали”
*****
Аллоҳнинг тақсимига рози бўлинг! Худди ҳамма нарсаси бор киши каби бўлинг! Аллоҳнинг сиз учун ёзиб қўйгани сиз хоҳлаган нарсалардан яхшироқ, латифроқдир.
“Ховатир роқия журнали”
*****
Дунё уч кун...
- Кеча ўтди ва у ҳаргиз қайтмайди.
- Бугун яшаяпмиз ва у ҳам узоқ давом этмайди.
- Эртага эса, қаерда бўлишимизни билмаймиз.
Шундай экан, инсонларни кечир, халқни Холиққа қўйиб бер. Мен ҳам, сен ҳам, улар ҳам, барчамиз кетувчимиз. Қалбингнинг туб-тубидан сенга ёмонлик қилганни кечир!
“Ховатир роқия журнали”
*****
Ер юзида Ислом динини илк қабул қилган инсоннинг аёл киши бўлгани аёлларнинг фахрланишлари учун етарлидир.
Бу аёл биз мўминларнинг онаси Хадийжа розияллоҳу анҳодир.
*****
Агар 30 долларлик соат тақсанг ёки 3000 долларлик соат тақсанг ҳам, барибир, бир хил вақтни кўрсатади.
Агар 30 долларлик сумкага эга бўлсанг ёки 300 долларлик сумкага эга бўлсанг ҳам, барибир, ичидаги нарса ўзгармайди.
Агар 300 метрлик уйда яшасанг ёки 3000 метрлик уйда яшасанг ҳам, барибир, ёлғизликни ҳис қилиш бир хил бўлади.
Охир-оқибат автобуснинг олди ўриндиғига ўтирсам ҳам ёки орқа ўриндиғига ўтирсам ҳам, барибир, манзилимга бир вақтда етиб боришимни тушуниб етдим.
Фарзандларимизга бой бўлишларини эмас, балки, қандай қилиб бахтли бўлишларини ўргатайлик. Ана ўшанда улар катта бўлганларида, нарсаларнинг нархига эмас, қийматига, қадрига назар соладиган бўладилар.
Қалбимизни фоний дунёга эмас, балки, абадий Охират ва Жаннатга боғлайлик!
*****
Тирикнинг ёлғизлиги — унинг ёнида бирор киши бўлмаслигидир. Ўликнинг ёлғизлиги — унинг учун бирор киши дуо қилмаслигидир.
*****
Ибн Умар розияллоҳу анҳумо шундай деганлар:
«Албатта, мен ташқарига, инсонларга салом беришим ва улар менга салом беришлари учун чиқаман».
*****
Атрофимиздаги шахсларнинг ҳақиқатини фақат Аллоҳ билади. Шунинг учун доимо:
“Эй Аллоҳ, менга яхшиликни раво кўрадиган кишига мени рўпара қил ва уни менга рўпара қил! Менга ёмонликни раво кўрадиган кишидан мени буриб юбор ва уни мендан буриб юбор!” деб айтинг.
“Ховатир роқия журнали”
*****
«ҚАЛБЛАР ҲАЛОЛ ЛУҚМА ЕЙИШ САБАБЛИ ЮМШАЙДИ».
Имом Аҳмад ибн Ҳанбал раҳимаҳуллоҳ
*****
Агар аёл ўқиб-ўрганса, турмушга чиқса, яхши кўрса, ихлосли бўлса, ҳомиладор бўлса, фарзандни дунёга келтирса, эмизса, тарбия қилса, ишласа, безовталик ва қўрқувга бардош берса, охирида буларнинг ҳаммасини ноқис ақл билан қилган бўлса!
Агар ақли ноқис бўлмаганда қандай бўларди?!!
“Ховатир роқия журнали”
*****
30 ёшларида мусулмон бўлдилар. 36 ёшларида вафот этдилар. 6 йил...
Эй Саъд ибн Муоз розияллоҳу анҳу! Вафотингиз сабабли Раҳмоннинг Арши титраши учун ўша 6 йил мобайнида нима амал қилдингиз?!!
*****
- Менга жаннатнинг неъматларини васф қилиб бер, дея сўради.
- У ерда Расулуллоҳ соллаллоҳу алайҳи васаллам борлар, деди.
“Ховатир роқия журнали”
*****
Соғлом ҳолингда чириган бўйра устида ухлашинг бемор ҳолингда олтин кароват устига ётқизиб қўйилишингдан яхшидир.
«Алкалимут тоййиб»
*****
Тилдан кўра қамоқда узоқроқ сақлашга лойиқ ҳеч нарса йўқ.
Абдуллоҳ ибн Масъуд розияллоҳу анҳу
*****
Қанча кўп гапирсанг, шунча кўп хато қилаверасан. Аммо Аллоҳни қанча кўп зикр қилсанг, гуноҳларинг ҳам шунча кўп ўчирилаверади.
Таржима қилинди
Интернет материалларидан тўплаб, таржима қилувчи
Нозимжон Иминжонов
Муфтий ҳазратлари Испаниядаги анжуманда иштирок этади
Бугун, 4 ноябрь куни Ўзбекистон мусулмонлари идораси раиси, муфтий Усмонхон Алимов ҳазратлари Кавказ мусулмонлари идораси раиси, шайхулислом Оллоҳшукур Пошшозоданинг таклифига биноан Испаниянинг Мадрид шаҳрида бўлиб ўтадиган анжуманда иштирок этиш учун жўнаб кетдилар.
Ушбу анжуман Кавказ мусулмонлари идораси, Испания Адлия вазирлиги ва Халқаро “Эвсен” фонди ҳамкорлигида ташкил этилган. Унда Ислом бирдамлиги ва динлараро мулоқот мавзулари муҳокама қилинади. Кўплаб давлат ва дин арбоблари, таниқли уламолар қатнашади.
Ўзбекистон мусулмонлари идораси Матбуот хизмати