muslim.uz
Имом Аҳмад ва новвой (Аудиоҳикоя)
ЎМИ Матбуот хизмати
Имом-хатиблар учун ўқув семинар ташкил этилди
Имомларнинг касб маҳоратини ошириш, бугунги кун билан ҳамнафасликларини таъминлаш замон талабига айланди. Имомлар билимини доимий равишда янгилаб боришда ўқув-семинарларини ташкил этиш муҳим аҳамиятга эга.
Шундай тадбирлардан бири жорий йилнинг 16-18 октябрь кунлари Самарқанд вилояти имом-хатиблари учун ташкил этилди.
Имом-хатибларнинг билим савиясини юксалтириш, дунёқарашини кенгайтириш ҳамда жамоат ишларидаги фаоллигини янада оширишга қаратилган ўқув-семинарнинг дастлабки босқичи 16 октябрь куни вилоятнинг бешта ҳудудида бошланди.
Самарқанд, Каттақўрғон шаҳри, Пастдарғом, Пайариқ ва Ургут туманида махсус ташкил этилган жойларда семинар машғулотлари мутахассис маърузачилар томонидан юқори савияларда олиб борилмоқда.
Маърузачилар Имом Бухорий халқаро илмий-тадқиқот маркази ва вилоятдаги олий таълим муассасалари илмий ходимлари, профессор ўқитувчилари орасидан танлаб олинган.
Семинар машғулотлари 17-18 октябрь кунлари ҳам давом эттирилади.
ЎМИ Матбуот хизмати
Ўзбекистон делегацияси Сибирда
Ўзбекистонлик диний уламолар Россия Федерациясининг Сибир ўлкасига Новосибир мусулмонлари идораси таклифига биноан хизмат сафарига юборилдилар.
Ўзбекистон мусулмонлари идораси раиси ўринбосари Иброҳим Иномов бошчилигидаги делегация аъзолари Новосибир мусулмонларига диний-маърифий мавзуларда маърузалар қилиш, маҳаллий аҳоли ва меҳнат мигрантлари билан учрашувлар ўтказиш мақсадида ташриф буюрдилар. Шунингдек, сафар доирасида бузғунчи ғояларни тарғиб этишни мақсад қилган гуруҳлар таъсирига тушиб қолмаслик, уларнинг қарашлари нотўғри экани ҳақида тушунтириш ишлари ҳам олиб борилади.
Новосибир вилояти муфтийси Салим Шакирзяновнинг фикрича ўзбекистонлик уламоларнинг маърузалар билан иштирок этиши мўмин-мусулмонларнинг билимларини янада ошишига катта хизмат қилмоқда.
Ўзбекистон мусулмонлари идораси Матбуот хизмати
Муфтий ҳазратлари Ислом олами уюшмаси Олий кенгашида иштирок этади
Бугун, 16 октябрь куни Ўзбекистон мусулмонлари идораси раиси, муфтий Усмонхон Алимов ҳазратлари Ислом олами уюшмаси бош котиби Муҳаммад бин Абдулкаримнинг таклифига биноан Уюшма Олий кенгаши 43-сессиясида иштирок этиш учун Саудия Арабистонига жўнаб кетдилар.
Муфтий ҳазратлари 2012 йилдан буён Ислом олами уюшмаси Олий кенгашининг аъзоси ҳисобланадилар. 2012 йил 16–18 июнда Муфтий ҳазратлари Макка шаҳрида бўлиб ўтган Уюшма таъсис кенгашининг йиғилишида ҳам қатнашганлар.
Маълумот ўрнида айтиш керакки, Ислом олами уюшмаси Олий кенгаши аъзолигига мусулмон оламининг 60 нафар нуфузли уламолари, дин арбоблари, муфтийлар ҳар 5 йилда қабул қилинади. Ўзбекистон мусулмонлари идораси раиси, муфтий Усмонхон Алимов ҳазратларининг мазкур Олий кенгашга аъзоликлари навбатдаги, иккинчи беш йиллик муддатга узайтирилган.
Ислом олами уюшмаси Олий кенгаши 43-сессиясида муҳокама қилинган масалаларни сайтимиз орқали ёритиб борамиз.
Ўзбекистон мусулмонлари идораси Матбуот хизмати
Дуоларимизда ота-оналаримизни унутмайлик!
Бир шайхнинг ҳузурига шогирдларидан бири келиб:
— Устоз, дуоларим қабул бўлмаябди нега шундай бўлаябди экан? — деб сўради. Шайх:
— Ота-онанг борми? — деб сўради. Шогирд йигит:
— Ҳа бор, Аллоҳга шукр ота-онам тирик, ҳаёт… Шайх кулиб:
— Мен сендан ота-онанг тирикми деб сўрамадим. Ота-онанг қилаётган дуоларингда борми? — деб сўрадим. Шогирд бошини эгиб:
— Йўқ ота-онамни дуоларимда зикр қилмас эканман — деб, нима учун дуолари ижобат бўлмаётганини англаб, шайхнинг ҳузуридан чиқиб кетибди.
Дарҳақиқат кўпинча дуоларимизда ота-оналаримиз ҳақларига дуо қилишни унутиб қўямиз. Ғанимат дунёда ғанимат бўлган ота-оналаримиз ҳақларига дуо қилишни кўпайтириш барчаларимзга насиб айласин!
Ҳалилуллоҳ Раимқулов
Ховос тумани «Хизиробод»
жоме масжиди имом-хатиби
ЎМИ матбуот хизмати