Шайх Муҳаммад Ротиб Нобулисий ҳафизаҳуллоҳ

Ҳар қандай муваффақиятга эришиш учун қуйидаги уч режага асосланган кўплаб қадамларни босиб ўтиш керак:

1- Мақсадни аниқ қўйиш;

2- Тартиб ва низомга амал қилиш;

3- Ўзгартириб туриш, турфа-хиллик касб этиш.

Ҳар бир режа ўзидан олдингиси устига қурилади.

Биринчиси: мақсадни аниқ белгилаб олиш. Ишни бошлашдаги энг биринчи ва энг муҳим қоида бу – “Ишни бошлаган вақтинг зеҳнингда ниҳояси қандай бўлиши ҳақида тасаввур бўлсин”. Муайян мақсадсиз бошланган ҳар қандай иш охирига етмайди. Фойдасиз бекор ишга айланади. Мақсадингизни белгилаб, кейин ухлайверинг дегани ҳам эмас, балки у билан ҳар лаҳза яшашингиз керак!

Мақсадингизни қоғозга тушириб олиб, ҳар куни унга қараб иш кўрсангиз ва уни амалга оширишга Аллоҳнинг изни билан қодир эканингизга ишонсангиз бу нақадар яхши!

Мақсадлар уч хил бўлади: биринчиси, ҳам яқин, ҳам узоқ мақсад. Иккинчиси, яқин мақсадлар. Учинчиси, узоқ мақсадлар.

Ҳам яқин, ҳам узоқ мақсад фақат биттагина. У ҳам бўлса Аллоҳнинг розилиги ва жаннат. Саййидимиз Муҳаммад соллаллоҳу алайҳи васаллам бизга қуйидаги дуони ўргатганлар: “Аллоҳим, биз Сендан розилигингни ва жаннатни сўраймиз”. Бу мусибат-у қийинчиликларни осонлаштириб юборадиган мақсаддир. Биз мусулмонларни бошқалардан ажратиб турадиган мақсаддир. Зеро, бошқалар бу мақсадни билишмайди ҳам. Шу сабаб ҳам ғам-ғуссаларга, машаққатларга дуч келганда баъзилари жонига қасд қилганига, ўзини осиб ёхуд поезд тагига ташлаб ўлдирганига гувоҳ бўламиз.

Яқин мақсадлар ҳаёт давомида туғилиб бораверади. Бирор ишни қилмоқчи бўлсангиз, ўша ишни қилиш бўйича олдингизга мақсад қўясиз. Мана шу яқин мақсад дейилади.

Узоқ мақсадлар эса келажакда амалга оширишга саъй-ҳаракат қилаётган мақсадларингиздир. Гоҳида бундай мақсадлар вафотингиздан кейин ҳам давом этади. Узоқ мақсадлар воқеъликка мос келиши, ўз ишингиз ва мутахасислигингиздан келиб чиқиши лозим. Шак-шубҳа йўқки, ушбу узоқ ва яқин мақсадларни зийнатлаб турувчи тож бу ниятни холис Аллоҳ таоло учун қилишдир. Шундай экан, ҳар куни ниятингизни янгилаб туринг.

Иккинчиси, тартиб ва интизом. Мақсадларни тартибга солиш ҳам муҳим ишлардан саналади. Амалга оширишга ҳаракат қилаётганингиз ҳар қандай мақсад муайян белгиланган вақтда амалга оширилиши керак. Яъни, шу вақтда бошладим, фалон вақтда тугатаман, дея реъжалаш керак ва албатта Аллоҳ хоҳласагина қила олишини ёдда тутиши керак.

Учинчиси, ўзгартириб туриш, турфа-хиллик касб этиш. Бир хилликда давом этиш одамни малоллантириб, зериктириб қўяди. Фақат фаришталаргина битта ишни қилишдан малолланишмайди, зерикишмайди. Бу ҳақда Аллоҳ бизга қуйидагича хабар берган: "Роббингнинг ҳузуридагилар Унга кечасию кундузи тасбиҳ айтурлар. Улар малол олмаслар" (Фуссилат сураси 38-оят).

Доктор Ҳассон Шамси Пошонинг "Метин қоялар" китобидан
Ғиёсиддин Ҳабибуллоҳ, Неъматуллоҳ Исомов таржимаси.

Cавол: Умра ёки ҳажда Ҳажарул асвадни ўпиш учун тиқилинч пайдо қилиш ва бир-бирига озор беришнинг ҳукми қандай бўлади? Шу ерга тиқилишдан кўра бошқа ибодатларни қилиш афзал эмасми?

Жавоб: Бисмиллаҳир Роҳманир Роҳийм.

Минг афсуски, сиз айтган дилхираликлар учраб турибди. Зиёратчилар, эркакми, аёлми, қандай қилиб бўлса ҳам Ҳажарул асвадни ушлаш, ўпиш илинжида ўша томонга интилиб бир-бирига азият бериб қўймоқдалар.

Уламолар бир овоздан Ҳажарул асвадни ўпишда ҳеч кимга озор бермасликни шарт қилганлар. Чунки мўмин кишига озор етказиш гуноҳ амалдир. Суннат амал бўлган Ҳажарул асвадни ўпаман деб гуноҳга йўл қўйилмайди. Расулуллоҳ соллаллоҳу алайҳи васаллам Умар розияллоҳу анҳуга шундай тавсия қилганлар: “Эй, Умар, сиз кучли одамсиз, Ҳажарга етишиш учун тиқилинч қилманг, кучсизларга озор бериб қўясиз. Агар бўш жой топсангиз, уни ўпинг. Йўқса, унга юзланиб, таҳлил ва такбир айтинг” (Имом Аҳмад ривояти).

Демак, ўзгаларга озор бермай Ҳажарул асвадни ўпишнинг иложи бўлса, шундай қилади. Акс ҳолда Ҳажарул асвадга узоқдан қўл кўтариб ишора қилади.

Ўз ўрнида тиқилинчга кирмасдан нафл тавоф, нафл намоз, Қуръон тиловат қилиш, зикр ва Каъбага қараб ўтириш каби ибодатлар билан машғул бўлса, катта савобга эга бўлади. Валлоҳу аълам.

Ўзбекистон мусулмонлари идораси Фатво маркази

Аллоҳ таоло инсон зотини нима амалга буюрган бўлса, ҳаммасида инсон учун фойдалар бор. Асосий мақсад Аллоҳнинг ризолигини топиб, У Зотнинг раҳматига етишишдир.

Масалан, таҳорат олган киши покиза бўлгани боис касаллик юқтирувчи бактериялардан омон бўлади. Танасини сув ювиб тургани боис қон айланиши фаоллашади. Намоз ўқиш бўғинларда туз йиғилишига қаршилик қилади, қон айланишини яхшилайди. Закот бериш кишига ўзи­нинг қилган ишидан мамнунлик бағишлаб кай­фиятини кўтаради, юрак касалликларидан, хафақонликдан асрайди. Ҳажга борган одам узоқ йўлни яёв босиб ўтади. Бир жойда ўтираверган кишининг ичига йиллар давомида шумлик, сершубҳалик, бадгумонлик ва шуларга ўхшаш иллатлар йиғилиб қолади. Йўл юрган инсон эса ўзи сезиб-сезмай ана шу иллатлардан халос бўлиб, енгил тортиб қолади.

Рўзанинг фойдалари ҳақида тиб­биёт мутахассислари бундай дейди: иммунитетни кўтаради, семиришга монелик қилади, буйракда тош йиғилишидан сақлайди, тўқималарда тўпланиб қоладиган за­ҳарли моддалардан тозалашга ёрдам бе­ради, шаҳвоний майлни камайтиради, қон томирлари торайишининг олдини олади, қон айланишини фаоллаштиради, қон босими ортишига қаршилик қи­лади, юракнинг атрофини ёғ қоплаб қолишига йўл қўймайди, бўғинлар шиши қайтишига фойда бе­ради, ичак яллиғланишига, бавосил, зотилжам, бронхиал астма, аллергия, экзема, қанд, саратон, тутқаноқ, паришонхотирлик, ўпка ва жигар касалликлари, камқонликка қарши курашишда фойда беради.

Бу фойданинг бир жиҳати игнатерапияга ҳам ўхшайди. Игнатерапиянинг моҳияти фаол ишлаб турган ҳужайраларни игна санчиш билан ҳаракатдан тўхтатиб қўйиб, ялқовланиб, ўлиш арафасига келиб қолган ҳужайраларни ишлашга мажбур қилиш экан. Рўзада ҳам одам оч юргани боис танасига ўн бир ой давомида йиғилиб қолган ортиқча ёғлар эриб ишлатилиб кетар экан-да, одамнинг жисми ортиқча юклардан қутулиб енгиллашиб қолар, ўша ёғларнинг остида ўлимини кутиб ётган бечора ҳужайралар яна фаол ишлаб кетар экан.

Ана бизга Раббимизнинг буюк марҳамати!

Робия ЖЎРАҚУЛОВА тайёрлади.