Ўзбекистоннинг Бирлашган Араб Амирликларидаги элчиси Бахтиёр Ибрагимов, Ўзбекистондаги Ислом цивилизацияси маркази ва Имом Бухорий халқаро илмий-тадқиқот маркази билан Дубай шаҳрида жойлашган “Жума ал-Мажид” маданият ва мерос маркази ўртасида видеомулоқот ўтказилди, деб хабар бермоқда “Дунё” АА.

Онлайн тадбирда Президенти маслаҳатчиси Шоазим Миноваров, “Жума ал-Мажид” маркази бош директори Муҳаммад Камол, шунингдек, Ислом цивилизацияси ва Имом Бухорий марказларининг илмий ходим ва тадқиқотчилари иштирок этди.

Шоазим Миноваров Ўзбекистондан етишиб чиққан буюк алломаларнинг жаҳон илм-фани равнақига қўшган улкан ҳиссаси ҳақида тўхталиб, уларнинг илмий мероси умумбашарий маданий мерос экани ҳамда бу бой мероснинг тадқиқ этилишида ўзаро илмий ҳамкорликнинг ўрни катталигини таъкидлади. Ҳамкорликни йўлга қўйиш ва уни ҳуқуқий жиҳатдан мустаҳкамлаш учун Англашув меморандумини имзолаш ва шу асосда келгусидаги илмий ҳамкорлик йўналишларини белгилашни таклиф қилди.

Муҳаммад Камол ушбу таклифни қўллаб-қувватлаб, бундай мулоқотлар икки томонлама илмий-маърифий алоқаларни мустаҳкамлашга хизмат қилишига ишонч билдирди. Шунингдек, истиқболда кенг миқёсдаги ўзаро манфаатли ҳамкорликка тайёр экани ва тажриба алмашиш учун барча имкониятлар мавжудлигини маълум қилди.

Видеомулоқот дўстона ва самимий руҳда ўтди.

Ўзбекистон мусулмонлари идораси матбуот хизмати

Ҳарами шарифда намоз ўқиётганимизда бир ёш араб боланинг телефони жиринглаб қолди. Унинг юрагига ваҳима тушди. Ўша ердаги намоз ўқиб турган ҳожиларнинг ҳам фикрлари бўлинди. – Намозда телефон жирингласа, ўша ердаги намозхонларнинг диққати, албатта, бўлинади. Чунки ундан таралаётган мусиқа диққатни жалб қилиш учун қўйилган-да. – Сўнг ҳалиги бола намоз ўқиётган ҳолатида қўлини чўнтагига солди, телефонини олди ва оғзига яқин олиб келиб “мен намоз ўқияпман” деди-да, яна чўнтагига солиб қўйди. Бундай ҳолатда унинг намози нима бўлди?!

Яна бир воқеа! Инсонлар Байтуллоҳнинг эшиги олдига яқинлашиб, тавба қилиб, йиғлаб дуо қилаётганларида, шу пайт бир ўспириннинг телефони жиринглаб кетди. Унинг телефонидан ҳинд қўшиғи янгради. Эътибор қаратайлик, балки бу нарсалар айнан ибодатларимизни самарасиз бўлиши учун ҳам шайтонга қўл келмаяптимикин?!

Қанчадан-қанча кишиларни кўрамиз, тавоф қила туриб бор эътибори ибодатда эмас, Аллоҳ таолода эмас. Аксинча, телефонида, интернетда, изоҳ қолдиришда. Мақоми Иброҳимда, Ҳатим ёнида, Ҳажарул Асвад издиҳомида ҳам шу ҳолат. У ўша ибодатларни фақат жисмонан бажаряпти, холос. Унинг бор диққат-эътибори телфонида. Кимгадир хат ёзяпти ёки кимнидир эшитяпти. Ахир, ибодатнинг асл моҳияти қаерда қолди?!

Аллоҳ таолонинг марҳаматини, раҳматини фикрлаб, чин кўнгилдан тавба қилиш қаерда қолди?!

"Шарм ва ҳаё” китобидан

Вазирлар Маҳкамасининг қарори билан Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита тўғрисидаги низом тасдиқланди.

Низомда қуйидагилар белгиланган:

• Вазирлар Маҳкамаси ҳузуридаги Дин ишлари бўйича қўмитанинг мақоми, асосий вазифалари, функциялари;
• Дин ишлари бўйича қўмитанинг ҳуқуқ ва мажбуриятлари, шунингдек унинг фаолиятини ташкил этиш тартиби;
• Қўмита раҳбарларининг функционал вазифалари ва масъулияти;
• Қўмита фаолиятини молиялаштириш, унинг ходимлари меҳнатига ҳақ тўлаш ва моддий рағбатлантириш тартиби.

Дин ишлари бўйича қўмита дин ишлари соҳасида ягона давлат сиёсати амалга оширилишини таъминлашга масъул ваколатли давлат бошқаруви органи ҳисобланади. У ўз фаолияти юзасидан Вазирлар Маҳкамасига бўйсунади ва ҳисобот беради.

Қўмитанинг ўз ваколатлари доирасида қабул қилган ва норматив-ҳуқуқий тусга эга бўлган қарорлари давлат бошқаруви органлари, маҳаллий ижро этувчи ҳокимият органлари, хўжалик бирлашмалари, юридик ва жисмоний шахслар томонидан бажарилиши мажбурий ҳисобланади.

Дин ишлари бўйича қўмита юридик шахс ҳисобланади, Ўзбекистон Республикаси Давлат герби тасвири ва ўз номи давлат тилида ёзилган муҳр ва бланкаларга, мустақил балансга, шахсий ғазна ҳисобварақларига, шу жумладан, чет эл валютасидаги шахсий ғазна ҳисобварақларига эга бўлади. Тошкент шаҳри, Шайхонтоҳур тумани, А.Навоий кўчаси, 12-уй манзилида жойлашади.

Қўмита тизимига қуйидагилар киради:
• Марказий аппарат;
• Қорақалпоғистон Республикаси, вилоятлар ва Тошкент шаҳар ҳудудий бошқармалари.

Дин ишлари бўйича қўмитанинг асосий вазифалари:
• виждон эркинлиги ва диний ташкилотлар тўғрисидаги қонунчилик ҳужжатларига мувофиқ дин ишлари соҳасида ягона давлат сиёсатини амалга ошириш;
• Ўзбекистон Республикасининг дунёвий давлат тамойилини амалий рўёбга чиқариш, фуқароларнинг виждон эркинлиги кафолатларини ҳимоя қилиш;
• диний мутаассиблик ва экстремизм ғояларини тарқатиш, турли конфессиялар ўртасида адоватни юзага келтиришга қаратилган хатти-ҳаракатларга йўл қўймаслик чораларини кўриш;
• жамиятда диний-маърифий муҳит барқарорлиги ва эътиқод эркинлигига таҳдид туғдириши мумкин бўлган омилларни ўрганиш, таҳлил қилиш ва уларнинг олдини олиш чораларини кўриш;
• давлат органларининг диний ташкилотлар билан ўзаро алоқаси ва ҳамкорлигини мувофиқлаштириш ҳамда давлат сиёсатида қонунчилик ҳужжатларида белгиланган тартибда рўйхатдан ўтказилган диний ташкилотлар манфаатларини акс эттириш;
• аҳоли орасида конфессиялараро тотувлик ва диний бағрикенгликни мустаҳкамлаш бўйича тарғибот ва ташвиқот ишларини олиб бориш;
• фуқароларнинг хорижий давлатларга ҳамда чет эл фуқароларининг Ўзбекистонга зиёрат туризмини амалга ошириши учун шарт-шароитлар яратиш;
• экстремизм, сепаратизм ва мутаассиблик ғоялари таъсирига тушиб қолган шахсларни, айниқса, ёшлар ва хотин-қизларни соғлом ҳаётга қайтариш, жамиятда тинчлик ва тотувлик муҳитини мустаҳкамлаш борасида маърифий-тарбиявий ишларни олиб бориш, бу борада илғор хорижий тажриба асосида таклифлар тайёрлаш ва бошқалар.

Яқинда Британия музейидан мамлакатимизга 6 нақшинкор тарихий кошин қайтарилди. Улар мазкур музейнинг Яқин Шарқ департаменти катта куратори Ж.Симпсон томонидан Ўзбекистоннинг Буюк Британиядаги элчихонасига Ватанимизга қайтариш учун топширилган. Кошинларнинг умумий оғирлиги 25 кг бўлиб, 3 қутига жойлаштирилган.

Маълумот учун, кошинлар 2020 йилда Ўзбекистон Республикаси ҳудудидан ноқонуний олиб чиқиб кетилган ҳамда Лондоннинг Хитроу аэропортида қўлга олинган.

Британия мутахассислар фикрига кўра, XIII-XIV асрларга оид ушбу тарихий ёдгорликлар Самарқанддаги Шоҳи Зинда мажмуасига тегишли экани эҳтимол қилинган. Шунингдек, томонлар келишувига кўра, кошинлар 17 майдан 1 августга қадар Британия музейида намойиш этилган.

Шу муносабат билан Ўзбекистон Республикаси Бош вазири ўринбосари, Туризм ва спорт вазири Азиз Абдуҳакимов Британия музейи директори Хартвиг Фишерга кўрсатилган амалий ёрдам учун миннатдорчилик йўллаб, ҳар икки давлат ўртасидаги маданий-гуманитар соҳалардаги ўзаро манфаатли ҳамкорлик бундан кейин ҳам давом этишига ишонч билдирди.

Ўзбекистон мусулмонлари идораси матбуот хизмати