Хабар берганимиздек, Ўзбекистон мусулмонлари идораси раиси ўринбосари Иброҳимжон домла Иномов шу йил 6-8 сентябрь кунлари Россия Федерациясининг Санкт-Петербург шаҳрида ўтказилган “Диний олам: эпидемиологик вазиятни тартибга солиш шароитидаги диний фаолият” мавзусидаги халқаро анжуманда иштирок этганди.

Хориж сафари давомида Иброҳимжон домла Иномов Санкт-Петербург шаҳридаги Ўзбекистон Республикаси Бош консуллиги ва “Ўзбекистон ҳаво йўллари” компанияси вакиллари билан бирга “Торговий дом Балтийский берег” МЧЖнинг 100 нафардан ортиқ меҳнат муҳожирига маърифий учрашув ўтказди.

Суҳбат давомида ҳамюртларимиз "Ўзбекистон Республикаси Мустақиллигининг 30 йиллиги" эсдалик нишони топширилди, уларга меҳнат фаолиятлари тугаши билан Ватанга, оилалари бағрига соғ-омон етиб олиши тиланди. Шунингдек, йиғилганларга бир-бирига ўзаро ҳурмат билан муносабатда бўлиши, ўзбек халқининг анъана ва маданиятини сақлаб қолишга чақирилди. Ўзлари бўлиб турган мамлакат қонунчилигига қатъий риоя қилиш, бирон бир низоларга йўл қўймасликнинг муҳимлигига эътибор қаратилди, хориж шароитларидаги қийинчиликларни қатъиятлик билан енгиш зарурлиги таъкидланди.

Ҳамюртларимизга сохта ислом ғояларининг ҳалокатли оқибатлари ҳақида тушунтиришлар берилди, йиғилганлар турли хил таъқиқланган ва шубҳали интернет-сайтлардан чиқаётган хавф-хатардан огоҳ этилди.

Агар юртдошларимизда диний мавзуда саволлар пайдо бўлиб қолса, текширилган манбаларга мурожаат қилиш зарурлиги айтилди, шу муносабат билан www.muslim.uz сайти тавсия этилди.

Учрашув охирида йиғилганларнинг ҳам диний мавзу бўйича саволларига батафсил жавоб берилди.

Ўзбекистон мусулмонлари идораси матбуот хизмати

Мир Араб ўрта махсус ислом билим юрти мударриси

Тожиддинов Абдусамад

Корея сайёҳлик ташкилоти ҳар йили мусулмон сайёҳларга “2021 йил Кореяда ҳалол ресторан ҳафталиги”ни ўтказади.
Бу йилги тадбир 1 сентябрдан 31 октябргача пандемия туфайли бутун дунё бўйлаб “ЮТУБ” ва “ТИК-ТОК” орқали жонли узатилади.

КТО Кореяда ҳалол таомларни ўрганадиган “Ҳалол ТВ”нинг бир қатор видеоларини намойиш этиш режа қилинган.

Ҳалол ресторан ҳафталиги – КТО (Корея сайёҳлик ташкилоти) томонидан 2015 йилдан буён анъанавий тарзда ўтказиладиган тадбирдан мақсад – Кореядаги ҳалол ва мусулмон ресторанларини мусулмон сайёҳлар орасида оммалаштиришдир.

Корея мусулмонлари федерацияси (КМФ) маълумотига кўра, ҳозирда Жанубий Кореяда 120-130 мингга яқин мусулмон аҳоли истиқомат қилади.

ЎМИ Халқаро алоқалар бўлими

Имом Кисоий ҳикоя қилади:

«Бир аёлни кўриб қолдим. У ўғилчасини илм ҳалқасига боришга ундарди. Болакай боришни истамай қочиб, югуриб юрарди. Шунда аёл: «Ўғилчам борақолгин, бўлмаса мана бу чўпонга ўхшаб қўй боқиб юраверасан», дея менга ишора қилди.

Шунда мен ўзимга-ўзим дедим: «Қара, сени билимсизлик ва жаҳолатга мисол сифатида, зарбулмасал кўрсатиляпсан!».

Кейин бўлса, Кисоий қўйларини бозорга олиб чиқиб сотдида, илм талабида сафарга чиқиб кетди. Ўша вақтда ёши қирқда эди.

Шоир қандай тўғри айтган:

Илмда ютуққа эришган у билан ҳамиша яшашда давом этади,

Инсонлар вафот этсаларда, илм аҳли ҳаёт бўлаверадилар.

Муҳаммад Ҳасан Деду дейди:

«Қачонки иймон қалбларга чуқур ўрнашар экан, бирон бир башарий қувватнинг унинг олдида тўсқинлик қила олиши имконсиздир. Ана, Фиръавннинг сеҳргарларининг қалблари қачонки иймон шароби ила қопланиб тўлгач, Фиръавнни дарахтга хочлаб осиш ёки қатл этиш ила кўрсатган таҳдидидан асло қўрқмадилар ва албатта дедилар: «Бас, нима ҳукм қилсанг, қилавер. Сен фақат ҳаёти дунёда ҳукм чиқарасан, холос», (Тоҳа сураси, 72-оят).

Изоҳ: Фиръавн ўз қаричи билан ўлчар эди. У таҳдид, азоб-уқубат, қийнаш, чопиш-кесиш, ўлдириш билан одамларни измимда ушлаб тураман, деб хаёл қиларди. Аммо инсоннинг қалбига ҳақиқий иймон кирганида, унинг бу чоралари заррача ҳам таъсир қилмай қолишини англамасди. Унинг собиқ сеҳргарлари қалбига ана шундай иймон жо бўлган эди. Энди улар Фиръавннинг ҳеч қандай дўқ-пўписаларидан қўрқмасдилар. «Улар: «Биз сени зинҳор ўзимизга келган очиқ-ойдин (мўъжиза)лардан ва бизни яратган зотдан устун қўймаймиз. Бас, нима ҳукм қилсанг, қилавер. Сен фақат ҳаёти дунёда ҳукм чиқарасан, холос. Албатта, биз Роббимиз хатоларимизни ва сен бизни мажбур қилган сеҳрни мағфират қилиши учун иймон келтирдик. Аллоҳ яхши ва боқийдир», дедилар». (Тоҳа сураси, 72-73 оятлар) тафсиридан.

Манба: arabicuz

Маълум қилганимиздек, бир гуруҳ уламолар Бухоро вилоятининг олис ва узоқ туманларидаги масжид, маҳаллаларга ташриф қилиб, масжид қавми, мўйсафид отахонлар, кенг аҳоли вакиллари ва ёшлар билан учрашувлар ўтказиб келмоқдалар.

Хусусан, бугун Тошкент шаҳар “Убай ибн Каъб” масжиди имом-хатиби Абдулҳаким домла Матқулов Бухоро шаҳридаги “Пири Дастгир” жоме масжидига ташриф буюриб, "Масжид одоблари", "Умр – ғанимат" мавзуларида маъруза қилдилар. Устоз Абдулҳаким домла чиройли ва сермазмун мавъизалари билан барчани кўнглини шод этдилар.

Масжид аҳли устознинг марузаларини тинглаш билан бирга, диний ва илмий қизиқтирган саволларига ҳам жавоблар олдилар. Ушбу учрашув масжид жамоасида катта таассурот қолдирди. Намозхонлар Аллоҳдан диёримизнинг тинчлиги, фаровонлиги ва заҳматкаш халқимизнинг ҳақларига дуои хайрлар қилдилар. Аллоҳ устозларимизнинг илмларини зиёда, умрларини узун қилсин!

Ўзбекистон мусулмонлари идораси Матбуот хизмати