muslim.uz
Саудия “Харамайн Экспресс” тезюрар поездлари қатнови қайта тикланади
Саудия Арабистонида 31 мартдан коронавирус-19 пандемияси туфайли тўхтатиб турилган “Харамайн-экспресс” тезюрар поездлари яна иш бошлайди, хабар бермоқда mynamaz.ru. Бу ҳақда Қироллик темир йўлининг расмий Twitter аккаунтида хабар берилди.
“Харамайн Экспресс” поездлари Жидда, Макка ва Мадина ўртасида қатнайди.
Ўтган йилнинг 21 мартида коронавируснинг тарқалиши бошланиши билан саёҳатни тўхтатиш ҳақидаги қарор қабул қилинганидан сўнг, темир йўл маъмурияти “Харамайн Экспресс” поездида саёҳат қилишни истаган барча мижозлар кейинги душанба кунидан бошлаб веб-сайт орқали бронлаб қўйиш ва чипта олишлари мумкинлигини тасдиқлади.
Ўзбекистон мусулмонлари идораси матбуоти хизмати
Темурийлар меъморчилиги санъати билан боғлиқ шоҳ асар Эрондаги энг кўп зиёрат қилинувчи тарихий масжиддир…
Санъат осойишталик ва камолотга эришиш йўлидаги гўзал бир яратувчиликдир. Кўзни қувнатадиган рамзларга тўла санъат турларидан бири ҳам меъморчиликдир.
Ушбу нафис санъат Темурийлар даврида сезиларли даражада тараққий топиб, у даврдан машҳур меъморчилик санъати намуналари ёдгорлик бўлиб қолган. Темурийлар даври меъморчилик санъати шоҳ асарларидан бири Эроннинг Машҳад шаҳридаги Гавҳаршод масжидидир.
Гавҳаршод масжиди жанубий айвони деворида сулс хатида битилган битик матнида келтирилишича, бу масжид ҳижрий-қамарий 821 – милодий 1417 йили, яъни олти юз йилдан кўпроқ вақт олдин темурий ҳукмдор Шоҳрухнинг умр йўлдоши Гавҳаршодбегим кўрсатмаси ва ёрдами билан бино этилган.
Гавҳаршод масжиди 9400 метр.квадрат майдонда тўрт айвонли масжидлар тарҳи асосида тўртбурчак шаклда қурилган бўлиб, унинг атрофидан тўрт катта айвон, етти катта шабистон (усти ёпиқ кўп устунли макон) ва олтита кириш эшиги жой олган. Мазкур масжиднинг қурилиши ўн икки йил атрофида давом этган.
Гавҳаршодбегимнинг исми ушбу масжид биносининг икки жойида нақшинкор кошинлар ёрдамида битилган. Битиклардан бири кумушранг эшикнинг юқори қисмида, иккинчиси жанубий айвон деворида Гавҳаршодбегимнинг ўғли Бойсунғур қўли билан чиройли ёзувда битилган. Масжид меҳроби жудаям гўзал бўлиб, мармартошдан қурилган.
Ушбу бино «Темурий» деб номланувчи меъморий услубда меъмор Устод Қавомиддин Шерозий томонидан барпо этилган. Ўша давр миниатюра ва меъморчилик санъатларида қўлланувчи асосий бўёқлардан ҳисобланган ложувард, қизил ва сариқ ранглар ушбу санъат шоҳ асарига икки чандон жилва ва гўзаллик бағишлаб турибди.
Темурийлар даври меъморчилик санъатининг ушбу шоҳ асари Эрондаги энг кўп томоша қилинувчи тарихий масжид ҳисобланади.
Ҳамид НАЙЙИРОБОДИЙ,
Эрон Ислом Республикасининг Ўзбекистон Республикасидаги
Фавқулодда ва Мухтор элчиси
uza.uz
Бир савол сўрасам: Ихлос сурасининг фазилатлари ҳақида батафсил маълумот беринг
— “Ихлос” сурасининг савоблари ҳақида кенгроқ тушунтирсангиз. Мен ўзим кўп ўқийман, кўп ўқиса савоби ҳам катта, деб айтишади...
— Уламолар “Ихлос” сураси Қуръоннинг учдан бирига тенглиги, унда Аллоҳнинг Сомад исми борлиги, бошқа сураларда бу исм топилмаслигини айтишади.
Баъзи уламолар: “Қуръоннинг ўзи учга бўлингани учун: учдан бири ҳукмлар, учдан бири ваъда ва ваъидлар (қайтариқлар), яна учдан бири исм ва сифатлар. “Қул ҳуваллоҳу аҳад” шу уч бўлакнинг бир бўлаги, яъни исм ва сифатлар бўлагидир. Шу маънода бу сура “Ихлос” деб номланади”, дейдилар.
“Ихлос” сурасининг сифатлари ҳақида бир қанча ривоятлар келган. Улардан айримларини келтирамиз:
Расулуллоҳ соллаллоҳу алайҳи васаллам: “Ким уч нарсани иймон билан адо этса, жаннатнинг хоҳлаган эшигидан киради ва хоҳлаган ҳурга уйланади: ким қотилни афв қилса, махфий равишда бировнинг қарзини тўласа ва ҳар фарз намозидан сўнг “Қул ҳуваллоҳу аҳад”ни ўн марта ўқиса”, дедилар. Шунда Абу Бакр розияллоҳу анҳу: “Биттасини қилса-чи, Ё Аллоҳнинг Расули?” деб сўрадилар. У зот: “Биттасини қилса ҳам”, дедилар” (Абу Яъло Мусилий Жобир розияллоҳу анҳудан ривоят қилган).
“Бир киши Набий соллаллоҳу алайҳи васалламнинг ҳузурларига келиб, камбағаллиги ва ночорлигидан шикоят қилди. Шунда Расулуллоҳ соллаллоҳу алайҳи васаллам унга: “Қачон манзилингга кирсанг, одам бўлса-бўлмаса, салом бергин, сўнг менга салом йўллагин ва “Қул ҳуваллоҳу аҳад”ни бир марта ўқигин”, дедилар. Ҳалиги киши шундай қилди. Натижада Аллоҳ таоло унга шу даражада ризқ бердики, ҳатто қўшнилари-ю қариндошларига ҳам мўл-кўл ёғдирди” (Ҳофиз Абу Мусо Мадиний Саҳл ибн Саъддан ривоят қилган).
“Ким “Қул ҳуваллоҳу аҳад”ни ҳар куни эллик марта ўқиса, қиёмат куни: “Тур, эй Аллоҳни мақтовчи! Жаннатга кир!” дейилади” (Тобароний Жобир ибн Абдуллоҳдан ривоят қилган).
“Ким вафот билан ниҳоя топадиган касаллигида “Қул ҳуваллоҳу аҳад”ни ўқиса, қабрида фитналанмайди, қабр сиқишидан омонда бўлади ва фаришталар унинг қўлидан тутиб, сирот кўпригидан жаннатга олиб ўтадилар” (Тобароний ва Абу Нуъайм Абдуллоҳ ибн Шиххирдан ривоят қилганлар).
Муҳаммад Айюб ҲОМИДОВ
Ироқдан 79 нафар қирғизистонлик бола ватанига қайтарилди
«Мээрим» («Меҳр-шафқат») гуманитар миссияси доирасида бугун Қирғизистоннинг 79 нафар фуқароси - болалар Ироқдан ўз ватанига қайтарилди, деб хабар бермоқда «Дунё» АА.
«Кабар» давлат агентлигининг хабар беришича, болаларни ватанга қайтариш Қирғизистон раҳбариятининг сиёсий иродаси ва мамлакатнинг ташқи ишлар, соғлиқни сақлаш ва ижтимоий ривожланиш идоралари, ҳуқуқни муҳофаза қилиш маҳкамалари, мамлакатнинг Кувайтдаги элчихонаси, шунингдек, БМТ Болалар жамғармаси (ЮНИСEФ) кўмагида амалга оширилди.
"Болаларни олиб келиш Ироқда қолган оналарнинг розилиги ва уларнинг Қирғизистондаги қариндошларининг болаларни тарбиялаш учун оилага қабул қилиш истаги билан амалга оширилди", дейилади манбада.
«Кабар»нинг таъкидлашича, республика ҳукумати ватанга қайтарилган болаларга ҳар томонлама ёрдам кўрсатади. Уларнинг тезроқ реабилитация қилиниши, интеграциялашуви, хавфсиз ва тинч ҳаётга қайтишини таъминлаш бўйича барча чоралар кўрилади.
Ўзбекистон мусулмонлари идораси матбуоти хизмати
Шамоилул Мустафо (12-қисм): Аллоҳ таоло Пайғамбар алайҳиссаломга мулойимлик билан хитоб қилади (Аудио)
Янгиликлар
