ЎМИ матбуот хизмати

“Маънавий ипак йўли ” V халқаро илмий-диний конференцияси ташкилий қўмитасининг кенгайтирилган йиғилиши онлайн форматда ўтказилди. Тадбирда Россия Федерацияси Мусулмонлар диний идораси раиси муовини Рушан Аббясов, Ўзбекистон Республикасининг Россия Федерациясидаги Фавқулодда ва Мухтор элчиси Ботиржон Асадов, Ўзбекистон туризмни ривожлантириш қўмитаси раис муовини Улуғбек Аъзамов, Ўзбекистон мусулмонлари идораси раиси ўринбосари Иброҳим Иномов, Ўзбекистон ва Россия сайёҳлик компаниялари вакиллари иштирок этди.

"Маънавий ипак йўли "халқаро конференциясига тайёргарлик масалалари билан бир қаторда иштирокчилар Ўзбекистонда зиёрат туризмини ривожлантириш масалаларини ҳам кўриб чиқишди.

Ўзбекистоннинг Россиядаги элчиси Ботиржон Асадов мамлакатнинг зиёрат туризмини ривожлантириш ва қўллаб-қувватлашга тайёрлигини таъкидлаб, бундай деди: "Россия фуқароларининг Ўзбекистондаги сайёҳлик оқимини ошириш, Ўзбекистондаги элчихонамиз бизнес ҳамкорлар, сайёҳлик агентликлари ва Россия аҳолисини сайёҳлар учун яратилган шароитлар ҳақида хабардор қилиш бўйича дастурларни амалга оширади. Бундан ташқари, Ўзбекистон ҳукумати туризм тармоғи ва авиакомпанияларни қўллаб-қувватлаш бўйича қонунчилик чора-тадбирлариннинг мажмуини қабул қилди".

Рушан Аббясов зиёрат туризми ҳақида тўхталди: "Жаҳон даражасидаги меъморий обидаларни, сақланиб қолган анъаналарни, ноёб ҳунармандчиликни жорий этувчи йўналишлар ўзаро маданий алмашинувга хизмат қилади, иқтисодий алоқаларни жонлантиради. Маънавий Ипак йўли лойиҳаси доирасида туризм салоҳиятининг муҳокама қилиниши пандемиядан кейинги даврда дунёнинг босқичма-босқич жонланиши шароитида, айниқса, долзарбдир".

2021 йилнинг кузига белгиланган “Маънавий ипак йўли ” V халқаро илмий-диний анжуманининг дастлабки дастурини муҳокама қилди, лойиҳанинг асосий босқичларини белгилаб олди ва кейинги амалий қадамлар рўйхатини тасдиқлади.

Ўзбекистон мусулмонлар идораси раисининг ўринбосари Иброҳим Иномов: "Алоҳида эътирофга лойиқ ушбу халқаро анжуманнинг ўтказилиш жойи дунёга машҳур алломалар, илм-фан уламолари ва атоқли имомларни берган ўзбек замини бўлди", деди.

Ўзбекистон мусулмонлари идораси матбуот хизмати

Ғассон айтади: «Басралик дўстларимиз шундай дейишди: «Бир киши Юнус ибн Убайднинг олдига келиб, ҳоли танглиги, турмуши ғам-ташвишли эканидан шикоят қилди. Юнус: «Шу кўриб турган кўзларингни 1000 динорга сотасанми?» деди. У: «Йўқ» деди. «Эшитиб турган қулоқларингни 1000 динорга сотасанми?» деган эди, яна «Йўқ», деди. «Гапираётган тилингни-чи?» деган эди, яна «Йўқ», деди. «Уриб турган юрагингни-чи?» деган эди, яна «Йўқ», деди. «Икки қўлингни 100 мингга сотасанми?» деган эди, яна «Йўқ», деди. «Икки оёғингни-чи?» деган эди, яна «Йўқ», деди. Шунда Юнус: «Аллоҳ таоло сенга юз минглаб неъматлар ато қилибди-ю, сен бўлса шикоят қилиб ўтирибсан», деди.

«Солиҳлар гулшани» китобидан

2021 йил 20 февраль куни Наманган вилояти Чортоқ тумани Балиқли кўл қишлоғида жойлашган Султон Увайс Қараний зиёратгоҳининг очилиш маросими бўлиб ўтди.

Тантанали маросимда Наманган вилояти ҳокимлиги, Вазирлар Маҳкамаси ҳузуридаги Дин ишлари бўйича қўмита, Туризмни ривожлантириш давлат қўмитаси, Ўзбекистон мусулмонлари идораси вакиллари қатнашди.

Маълумки, Султон Увайс Қараний зиёратгоҳи Чортоқ туман марказидан 35 км узоқликдаги Балиқли кўл қишлоғида жойлашган. Зиёратгоҳда ислом оламининг табаррук авлиёларидан бири Султон Увайс Қаранийнинг мақбаралари мавжуд.

Муҳтарам Президентимиз 2017 йил 7 июль куни Увайс Қараний зиёратгоҳига ташриф буюрганларидан сўнг, зиёратгоҳнинг 6 гектар майдонида ободонлаштириш ва кўкаламзорлаштириш ишлари амалга оширилиб, 1500 тупдан ортиқ манзарали дарахтлар ва гул кўчатлари экилди.

Султон Увайс Қараний мақбараси тўлиқ қайта қурилди.

1400 ўринга мўлжанланган масжид ва таҳоратхона, мақбара ёнида айвон, замонавий меҳмонхона, миллий музей ва кутубхона, 3 та фаввора, дам олиш айвонлари ва хизмат кўрсатиш шохобчалари қурилди.

Увайс Қараний зиёратгоҳининг жанубий томонида оналари Биби Наима она зиёратгоҳи жойлашган. Биби Наима она зиёратгоҳида ҳам қурилиш ва бунёдкорлик ишлари амалга оширилди. 4 гектар майдон ободонлаштирилиб, 1000 тупдан ортиқ манзарали дарахтлар экилди. Буларнинг барчаси зиёратгоҳнинг кўркига кўрк бағишлаб турибди.

Ушбу зиёратгоҳнинг тантанали очилиш маросимида сўзга чиққанлар Президентимиз ташаббуси билан ушбу муборак маскан бугун ўзгача чирой очгани, зиёратчилар учун барча қулайлик ва шароитлар яратилгани, кейинги 4 йил ичида мамлакатимизда қурилиш соҳасидаги янги, замонавий жаҳон стандартларига тўлиқ жавоб берадиган бинолар, иншоотлар қад ростлаётгани, тарихий обидаларимизни қуриш ва реконструкция қилишга алоҳида эътибор қаратилаётганини таъкидладилар.

Шунингдек, ушбу зиёратгоҳ зиёрат туризмини ривожлантириш борасида навбатдаги муҳим қадам бўлгани, бир сўз билан айтганда Наманган вилоятининг ташриф қоғозига айланиши эътироф этилди.

Шу куни иштирокчилар зиёратгоҳдаги бунёдкорлик ва қурилиш ишлари билан яқиндан танишдилар.

Шундан сўнг, Султон Увайс Қаранийга бағишланган илмий конференция бўлиб ўтди. Конференция ишида 100 га яқин маҳаллий ва хорижлик олимлар, профессор-ўқитувчилар он-лайн тарзда иштирок этди.

Унда сўзга чиққанлар сўнгги йилларда диний-маърифий соҳада амалга оиширилаётган кенг кўламли ислоҳотлар, улуғ алломаларимизнинг ибратли ҳаёти ва бой илмий меросини ўрганиш ва халқимизга етказишнинг аҳамияти ҳақида тўхталиб, буюк аждодларимиз қадамжоларининг обод этилиши халқимиз маънавиятининг янада юксалишига боис бўлаётганини қайд этдилар.

Тантанали очилиш маросими доирасида мажмуада Қурбонлик қилиниб, тадбир иштирокчиларига дастурхон ёзилиб, эзгу дуолар қилинди.

Дин ишлари бўйича қўмита

Ахборот хизмати

Бугун, 20 февраль куни Наманган вилоятидаги Султон Увайс Қараний зиёратгоҳи мажмуасининг тантанали очилиш маросими ва илмий конференцияси бошланди. Анжуманда Ўзбекистон мусулмонлари идораси раиси, муфтий Усмонхон Алимов ҳазратлари, Дин ишлари бўйича қўмита раиси Абдуғофур Ахмедов ва Наманган вилояти ҳокими Шавкат Абдураззақов ҳамда 100 нафарга яқин маҳаллий ва хорижлик уламолар, соҳа мутахассислари иштирок этмоқда.

Анжуман Қуръони карим тиловати ва эзгу дуолари билан бошланди.
Сўзга чиққан нотиқлар сўнгги йилларда муҳтарам Президентимиз томонларидан амалга оширилган ислоҳотлар натижасида, хусусан, Наманган вилоятига ташрифлари чоғида берган тавсиялари туфайли вилоятда салмоқли ўзгаришлар ва янгиланишлар амалга оширилгани, ўтган вақт давомида Султон Увайс Қараний зиёратгоҳида кенг кўламли бунёдкорлик ишлари амалга оширилиб, мажмуа таркибидаги жоме масжид, мақбара, музей қайта таъмирланди, янги кутубхона ва меҳмонхона бунёд этилиб, ён-атроф обод этилганини алоҳида қайд қилдилар.

Анжуман иши давом этмоқда.
Ташриф ва тадбирларда меҳмонларга Наманган вилояти бош имом-хатиби Абдулҳай домла Турсунов ва Диний идора Иш бошқарувчиси Рустам Жамилов ҳамроҳлик қилмоқда.

Ўзбекистон мусулмонлари идораси Матбуот хизмати