ЎМИ матбуот хизмати

Бугун, 8 сентябрь куни соат 7:00 дан 9:20 гача Ҳазрати Имом мажмуаси очиқ майдонида Тошкент ислом институтининг Модуль таълим шакли бўйича кириш имтиҳонлари бўлиб ўтди. Унда абитуриентлар ихтисослик фанлар мажмуаси ва ижтимоий-гуманитар фанлар мажмуаси фанларидан тест синовидан ўтди.

Тест синовларида абитуриентлар карантин талабларидан келиб чиқиб, дизенфекция тоннелидан ўтказилди, тана ҳарорати ўлчанди, тиббий ниқоб, қўлқоп ва кепка билан таъминланди.

Бугунги имтиҳонни Имом Бухорий номидаги Тошкент ислом институти ректори Уйғун домла Ғафуров кириш сўзи билан очди ва имом домлаларга омад тилади. Анъанага кўра, имтиҳон Муҳаммадали қори Қуръон тиловат қилинди ва Уйғун домла Ғафуров абитуриентларга Аллоҳ таолодан муваффақият тилаб дуо қилди. Шундан сўнг Дин ишлари бўйича қўмита бўлим бошлиғи Бобомурод Рустамов сўзга чиқиб, Модуль таълим тизими ҳақида маълумот бериб ўтди.

Ўзбекистон мусулмонлари идорасида кириш имтиҳонларини ташкил этиш бўйича тузилган махсус ҳайъат томонидан тайёрланган саволлар китоби ва жавоблар вароғи жойлаштирилган қоплар абитуриентлар иштирокида очилди. Ўзбекистон мусулмонлари идораси Таълим бўлими мудири Салоҳиддин Шерхонов жавоблар вароғини тўғри тўлдириш бўйича маълумотлар берди.

Тест синовлари учун 2 соату 20 минут вақт берилди. Пандемия шароитида абитуриентларга қулайлик яратиш учун мандат жавоблари бугуннинг ўзида аср намози вақтида эълон қилинади.

***

Эслатиб ўтамиз, 2020 йили Тошкент ислом институти Модуль таълим тизимига 2020-2021 ўқув йили учун абитуриентлардан ҳужжатлар карантин тартибларидан келиб чиқиб, масафавий тарзда modul.muslim.uz портал орқали 15 июлдан 30 июлгача қабул қилинди.

2020-2021 ўқув йилги қабул имтиҳонларини коронавирус инфекцияси тарқалишини олдини олиш учун очиқ майдонларда ўтказиш белгиланди. Шу боис Ўзбекистон мусулмонлари идораси тасарруфидаги диний таълим муассасаларида ўтказилаётган қабул имтиҳонларини карантин талабларига қатъий амал қилиш, ижтимоий масофани сақлаш, абитуриентларнинг узоқ вақт бир жойда ўтириб қолишига йўл қўймаслик каби қатор чора-тадбирлар амалга оширилмоқда. Жумладан, қабул имтиҳонлари учта фандан иккита фанга ўтказилди, ижодий имтиҳонлар қисқартирилди.

***

Маълумот учун, Тошкент ислом институтида 2019-2020 ўқув йилидан бошлаб ўрта махсус маълумотга эга имом-хатибларни олий маълумотли кадрлар қилиб тайёрлаш мақсадида Модуль таълим тизими жорий қилинди.

Модуль таълим тизимида Ўзбекистон мусулмонлари идораси тасарруфидаги ўрта махсус ислом таълим муассасалари, яъни мадрасаларни тамомлаган, 5 йил ва ундан ортиқ муддат давомида масжидларда фаолият олиб бораётган имом-хатиблар танлов асосида ўқишга қабул қилинади.

Модуль таълим тизимига абитуриентлар номзодларини Ўзбекистон  мусулмонлари идорасининг Қорақалпоғистон Республикаси қозиёти ва вилоятлар вакиллари тавсия этади. Талабалар Модуль тизимида тўлов-контракт асосида 3 йил таълим олади, хориж фуқаролари ўқишга қабул қилинмайди.

Ўзбекистон мусулмонлари идораси

Матбуот хизмати

Ўзбекистон Халқаро Ислом академияси ва Тошкент шаҳридаги Инҳа университети ўртасида ўзаро меморандум имзоланди.

Ўзбекистон Республикаси Ахборот технологиялари ва коммуникацияларини ривожлантириш вазирлиги матбуот хизмати хабарига кўра, келишув доирасида томонлар биргаликдаги мақсад ва вазифаларни белгилаб олишди. Унда ахборот технологиялари ва ахборот хавфсизлиги халқаро алоқалари соҳасида юқори малакали кадрлар ва мутахассисларни тайёрлаш бўйича ҳамкорлик, таълим соҳасидаги илмий ва илмий-техник тадқиқотлар, конференциялар, семинарлар, давра суҳбатлари ва бошқа тадбирларни ҳамкорликда ўтказиш ва ҳамкорликда олиб борилган ишлар натижалари борасида илмий, ўқув ва услубий қўлланмаларни нашр этишга келишилди.

Ўзбекистон мусулмонлари идораси матбуот хизмати

Бисмиллаҳир Роҳманир Роҳийм.

Аллоҳ таолога беадад ҳамду санолар бўлсин.

Пайғамбаримизга мукаммал ва батамом салавоту дурудлар бўлсин.

Севикли Пайғамбаримиз Муҳаммад соллаллоҳу алайҳи васалламга муҳаббатли бўлиш мукаммал мўминлик белгисидир. Бу ҳақда Анас розияллоҳу анҳудан ривоят қилинган ҳадисда Расулуллоҳ соллаллоҳу алайҳи васаллам:

عَنْ أَنَسٍ رَضِيَ اللهُ عَنْهُ قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ:”لاَ يُؤْمِنُ أَحَدُكُمْ حَتَّى أَكُونَ أَحَبَّ إِلَيْهِ مِنْ وَالِدِهِ وَوَلَدِهِ وَالنَّاسِ أَجْمَعِينَ “مُتَّفَقٌ عَلَيْهِ.

“Сизлардан бирортангиз мен унга фарзанди, отаси ва барча инсонлардан маҳбуброқ бўлмагунимча (комил) мўмин бўла олмайди”, дедилар (Муттафақун алайҳ)

Ушбу ҳадисда комил мўмин бўлиш учун Расулуллоҳ соллаллоҳу алайҳи васалламга муҳаббатли бўлиш лозимлиги баён қилинмоқда.

Чиндан ҳам, Пайғамбаримиз соллаллоҳу алайҳи васаллам мўминлар учун барча муҳаббат қилинадиган кишиларидан кўра, севишликка ҳақлидирлар. Бу ҳақда Аллоҳ таоло бундай марҳамат қилади:

﴿النَّبِيُّ أَوْلَى بِالْمُؤْمِنِينَ مِنْ أَنْفُسِهِمْ﴾

“Набий мўминлар учун ўзларидан кўра ҳақлидир”. (Аҳзоб сураси, 6-оят)

Аммо сўнгги йилларда севикли Пайғамбаримиз соллаллоҳу алайҳи васалламнинг шаънларига ёлғон тўқувчилар, у зотга атаб турли мазах (карикатура)ларни ишлаб чиқувчилар пайдо бўлиб, кўпайиб бормоқда. Бундай одобсизликни қилувчилар ҳақида Шайх Муҳаммад Содиқ Муҳаммад Юсуф раҳимаҳуллоҳ бундай деган эдилар: “Биз Расулуллоҳ соллаллоҳу алайҳи васалламни яхши танимадик, танита олмадик. Агар улар у зотни танишганида, бундай беодобликларга журъат қила олишмас эди”.

Дарҳақиқат, Расулуллоҳ соллаллоҳу алайҳи васалламни ҳимоя қилиш у зотнинг сийратларини, суннатларини кўпроқ ўрганиш, уларга аввало ўзимиз амал этишимиз билан бўлади.

Ҳабибимиз соллаллоҳу алайҳи васалламнинг суннатларини севишимиз ва гўзал хулқимиз ила аҳли-оиламиз ҳамда бутун инсониятни ҳам севдира олишимиз билан бўлади.

Ҳасан Басрий раҳматуллоҳи алайҳ айтадилар:

فكان عالمة حبهم إياه إتباع سنة رسوله

“Инсонларнинг Аллоҳга бўлган муҳаббатларининг аломати Расулуллоҳ соллаллоҳу алайҳи васалламнинг суннатларига эргашишдадир”.

Аллоҳ таоло ҳар бир ишда умматларига намуна бўлган, Роббул аъламийн Ўзининг каломида: “Расулуллоҳда гўзал ўрнак бор” дея мақтаган севикли Пайғамбаримиз Расулуллоҳ соллаллоҳу алайҳи васалламнинг гўзал хулқлари, муборак суннатларига ҳаётимизнинг ҳар бир сониясида эргашимизга ва унда бардавом бўлишимизга тавфиқ ато этсин!

Даврон НУРМУҲАММАД

ЎМИ матбуот хизмати