ЎМИ матбуот хизмати

         Жорий йилнинг 23 апрель куни Ўзбекистондаги  Ислом цивилизацияси маркази, Имом Бухорий халқаро илмий-тадқиқот маркази, Ўзбекистон халқаро ислом академияси ҳамда Малайзия исломни англаш инсититутининг  олимлари иштирокида видеоконференция ўтказилди.

         Видеомулоқотда Ислом динининг асл инсонпарварлик, тинчлик ва бағрикенглик моҳиятини жамият аъзоларига  етказишнинг аҳамияти, исломнинг нотўғри талқин қилишнинг салбий оқибатлари, экстремистик фикрлар ва ғояларга қарши маърифат билан курашишнинг аҳамияти,  даъволарга илмий асосланган жавоб ва раддиялар бера оладиган юқори малакали исломшунос олимларни тайёрлаш масалалари бўйича фикр алмашилди.

         Малайзия исломни англаш инсититути директори, профессор Азиза Бахаруддин ва институтнинг шариат, ҳуқуқ ва сиёсат маркази раҳбари, доктор Мохд Фарид Мохд Шахран Ўзбекистон заминидан етишиб чиққан Имом Бухорий, Имом Термизий, Имом Мотурудий каби буюк алломаларнинг Ислом дини ва олам цивилизациясига қўшган беқиёс ҳиссасини эътироф этиб, март ойида Ўзбекистонда ўтказилган халқаро конференцияда иштирок этганларидан мамнун эканликларини таъкидладилар. Малайзия томони иштирокчилари Ўзбекистон Республикаси Раҳбарининг диний эркинлик, динлараро ва миллатлараро тотувликни таъминлаш йўлида олиб бораётган сиёсатига юқори баҳо бердилар. Бу борадаги Ўзбекистон тажрибаси, шунингдек аҳоли бирдамлиги, тинчлик-тотувлик, ўзаро ҳурмат, меҳр-оқибат муҳитидаги ҳаёт тарзини яратувчи “Маҳалла” институти намунаси барча учун ўрнак бўлиши кераклиги тўғрисида фикр билдирдилар. Шу ўринда “Маҳалла” институти фаолиятини, унинг маърифат тарқатишда, ёшларга тўғри тарбиялашдаги ролини ўрганиш ва тажриба алмашишда ҳамкорлик қилиш истагини маълум қилдилар.

         Ўзбекистондаги Ислом цивилизацияси маркази директори Ш.Миноваров ЎЗбекистон Республикаси Президенти Ш.Мирзиёев ташаббуси билан ташкил қилинган Халқаро ислом академияси, Имом Бухорий халқаро илмий-тадқиқот маркази ва Ўзбекистондаги ислом цивилизацияси марказининг мақсадлари ва вазифаларига айнан тинчлик ва бағрикенглик дини бўлган исломнинг моҳиятини тўғри талқин қилиш, уни аҳолига ва айниқса ёшларга тўғри етказиш, бунда буюк аждодларнинг илмий-маърифий меросидан фойдаланиш эканини таъкидлади. У малайзиялик ҳамкорларга Ўзбекистон, унинг тарихи ва улуғ алломалари хусусида билдирилган фикрлар учун ташаккур билдириб, маҳалла институти чиндан ҳам ноёб ҳодиса эканини, асрлар мобайнида ўзбек жамиятида миллатни жипслаштирувчи, ёшларни тўғри тарбия қилишда фаол иштирок этувчи омил бўлиб келаётганини тушунтирди. Ўзбекистондаги диний таълим ва соҳадаги илмий тадқиқотлар, “Маҳалла” институти фаолияти ва аҳамияти, шунингдек, пандемия шароитида Ўзбекистонда диний-маърифий таълим ва изланишлар соҳасида олиб борилаётган ишлар, режалар ҳақида батафсил маълумот берди.  

            Имом Бухорий халқаро илмий-тадқиқот маркази директори Ш.Зиёдов  Ўзбекистон халқаро ислом академияси проректори Б.Мамадиевлар ҳам муассасалари фаолияти, режа ва ислоҳотлари ҳақида маълумот бериб ўтишди.

         Мулоқот давомида томонларнинг ўзаро тажриба, манба ва талаба-тадқиқотчилар алмашиш, ҳамкорликда илмий тадқиқот ва изланишлар олиб бориш, мақола ва тадқиқот натижаларини нашр қилиш каби йўналишларда ҳамкорлик қилиш масалалари мухокама қилинди. 

         Конференция иши давоимда Ўзбекистондаги Ислом цивилизацияси ва Имом Бухорий халқаро илмий-тадқиқот марказлари, Ўзбекистон халқаро ислом академияси ҳамда Малайзия исломни англаш инсититути ўртасида ўзаро ҳамкорликка оид асос ҳужжат - меморандумни имзолаш, меморандум доирасида келажакда яқиндан ҳамкорлик қилиш, бу каби манфаатли мулоқотларни мунтазам ташкил этишга келишиб олинди.

         Халқаро видеомулоқот Ўзбекистоннинг Куала-Лумпурдаги элчихонаси иштирокида ташкил қилинди.

“Саховат ва кўмак” умумхалқ ҳаракати – давлатимиз ва халқимиз қудратининг амалий намоёнидир.

                       Шавкат Мирзиёев

Куни кеча муҳтарам Президентимиз Шавкат Мирзиёев “Глобал инқироз ва пандемия шароитида мамлакатимиз аҳолиси бандлиги масалалари”га бағишланган видеоселектор йиғилиши аввалида коронавирус инфекциясига қарши кураш доирасида амалга оширилаётган ишларга яна бир бор тўхтала туриб, халқимиз бошига тушган оғир кунларда барчамизни янада баҳамжиҳат, аҳил ва бирдам бўлишга чақирди.

Эътиборимни тортган муҳим жиҳатлардан бири шу бўлдики, муҳтарам Президентимиз ўз нутқида: “...эл бошига иш тушган қийин дамларда бир-бирига елкадош бўлиш, бир-бирига эътибор ва ғамхўрлик кўрсатиш каби энг олижаноб фазилатлар халқимизнинг юрагида, қалбида азалдан мужассам бўлганини, бугун ушбу интилишлар янада кучлироқ жўш ураётганини намоён этади”, дея такидлаб ўтди.

Маълумки, халқимиз азал-азалдан бошига мусибат келганда қўлни қўлга бериб, бир бирига елкадош бўлиб келган. Бунга ёрқин мисол қилиб, иккинчи жаҳон урушида кўрсатилган юксак жасоратни келтиришимиз мумкин. Ўша йилларда мамлакатимизда озиқ-овқат ва бошқа маҳсулотлар тақчиллигига қарамай, халқимиз уйидаги бор будини фронт учун сарфлади. Жумладан, урушнинг тўрт йили давомида Ўзбекистон давлатга 4 806 000 тонна пахта, 54067 тонна пилла, 1 066 000 тонна ғалла, 195 000 тонна шоли, 108 000 тонна картошка, 374 000 тонна сабзавот ва ҳўл мева, 35289 тонна қуруқ мева, 57444 тонна узум, 1 593 000 тонна гўшт, 5 286 000 дона тери топширгани маълум. Бундан ташқари, уруш йилларида Ўзбекистон аҳолиси мудофаа жамғармасига жами 649 900 000 сўм нақд пул ўтказиб берган. Бу рўйхатни яна узоқ давом эттириш мумкин албатта.

Шу боис Президентимиз халқимизнинг тарихий ва маънавий қадриятларини, меҳр-саховат, оқибат ва ҳиммат каби юксак фазилатларини инобатга олган ҳолда, “Саховат ва кўмак” умумхалқ ҳаракатини йўлга қўйиш ташаббусини илгари сурди.

Бу ташаббусни халқимиз кўтаринки руҳда, қизғин кутиб олди. Бинобарин, мана шундай синовли кунларда бир биримизга ғамхўр, меҳр-оқибатли, аҳил-иноқ ва тиргак бўлишимиз инсонийликнинг энг олий намунаси, десак асло муболаға бўлмайди.

Бундай эзгу қадриятлар миллий-диний таълимотларимизда ҳам ўз ифодасини топган. Тарихда ҳам мана шундай мусибатли кунларда халқ дарди ва корига камарбаста бўлиш борасида ибратли воқеалар бўлиб ўтган. Жумладан, Расулуллоҳ соллаллоҳу алайҳи ва саллам даврларида Мадинада қурғоқчилик бўлди. Усмон розияллоҳу анҳу Шомга тижорат ишлари билан кетган эдилар. Қурғоқчилик хабари Усмон розияллоҳу анҳуга етганида бор тижоратларига озиқ-овқат сотиб олиб қайтдилар. Бу хабар Мадинага етгач Мадина тожирлари (тижоратчилар) шаҳардан ташқарига чиқиб, Усмон розияллоҳу анҳунинг карвонларини кутиб туришди. Карвон етиб келганида улар Усмон розияллоҳу анҳуга катта фойдаларни ваъда қилишди у зот эса кўнмадилар. Шунда Мадина тожирлари: “Нима, бундан-да кўпроқ фойда кўзладингми?”, деб сўраганларида, у зот: “Ҳа”, деб жавоб қилдилар. Улар ҳайрон бўлиб: “Кимга, қанча фойдага?”, деб яна сўрашди. Усмон розияллоҳу анҳу: “Бу карвондаги барча озиқ-овқатларни Аллоҳ ва Унинг Расулини розилиги учун Мадина аҳлига эҳсон қилдим”, деган эканлар.

Дарҳақиқат, муқаддас ислом динида мусулмон киши ўзи яшаб турган жамиятдаги барча инсонларга наф келтиришга, улардан зарарни даф қилишга ундалади. Чунки, инсонларга яхшилик қилиш икки дунё саодатига олиб борувчи йўллардин биридир. Аллоҳ таоло марҳамат қилиб айтади:

لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ وَمَا تُنْفِقُوا مِنْ شَيْءٍ فَإِنَّ اللَّهَ بِهِ عَلِيمٌ

(سورة آل عمران/92)

яъни: “Суйган нарсаларингиздан эҳсон қилмагунингизгача сира яхшиликка (жаннатга) эриша олмайсизлар. Ниманики эҳсон қилсангиз, албатта, Аллоҳ уни билувчидир”. (Оли Имрон сураси, 92-оят).

Абу Мусо розияллоҳу анҳудан ривоят қилинган бир ҳадисда Пайғамбаримиз (с.а.в.) марҳамат қилиб айтдилар:

"عَلَي كُلِّ مُسْلِمٍ صَدَقَةٌ قَالُوا يَا رَسُولَ اللهِ، أَرَأَيْتَ إِنْ لَمْ يَجِدْ ؟ قَالَ: يَعْمَلُ بِيَدِيهِ فَيَنْفَعُ نَفْسَهُ وَ يَتَصَدَّقُ قَالُوا: يَا رَسُولَ اللهِ، أَرَأَيْتَ إِنْ لَمْ يَسْتَطِعْ؟ قَالَ : يُعِينُ ذالحْاَجَةِ الْمَلْهُوفَِ قَالُوا: أَرَأَيْتَ إِنْ لَمْ يَفْعَلْ؟ قَالَ: يَأْمُرُ بِالْمَعْرُوفِ أَوْ بِالْخَيْرِ قَالُوا: أَرَأَيْتَ إِنْ لَمْ يَفْعَلْ ؟ قَالَ: يُمْسِكُ عَنِ الشَّرِّ فَاِنَّهَا لَهُ صَدَقَةٌ" (متفق عليه)

яъни: “Ҳар бир мусулмон кишиси садақа-эҳсон қилмоғи лозим. Саҳобалар савол қилиб сўрашди: Эй Аллоҳнинг Расули! Агар садақа қилишга бирор нарса топа олмаса нима қилади? Пайғамбаримиз (с.а.в.) айтдилар: Қўли билан меҳнат қилади, ўзига ҳам фойда келтиради ва садақа ҳам қилади. Улар сўрашди: Эй Аллоҳнинг Расули! Агар бунга қодир бўлмаса, нечора қилади? Ул зоти шариф дедилар: Қийналган, муҳтож кишига ёрдам қилади. Саҳобалар савол беришди: Эй Расулуллоҳ! Агар буни ҳам қила олмаса нима қилади? Пайғамбаримиз (с.а.в.) жавоб бериб айтдилар: “Яхшиликка ёки хайриятга йўллайди” Саҳобалар сўрашди: Буни ҳам қила олмаса-чи,? Расулуллоҳ (с.а.в.) марҳамат қилиб айтдилар: “Ўзини ёмонликдан тияди, шу нарса ундан садақа бўлади”.

Демак, инсон қўлдан келганча хайр-эҳсон қилиши билан ҳам ўзгаларга наф келтиради, ҳам ўзининг номаи амолига яхшиликлар битиб қўяр экан. Айниқса, кириб келган Рамазони шариф ойларида бундай ишларга камарбаста бўлиш савобларни бир неча юз ва ҳатто минг ажру-савобларга сазовор бўлади.

Яхшиликнинг чеки-чегараси йўқ. Меҳрга, мурувватга муштоқ кўнгилларни зиёрат этиш ҳам - бир яхшилик. Сўзимни сўнгида муҳтарам Президентимизнинг айтган қуйидаги сўзлари билан ниҳояламоқчиман: “Мен, мана шу ташаббусни чин дилдан қўллаб-қувватлаб, бу савобли ишга муносиб ҳисса қўшаётган барча ватандошларимизга, саховатли тадбиркорларимизга муқаддас китобларимизда айтилган: “Яхшиликнинг мукофоти – фақат яхшиликдир”, деган гапни яна бир бор эслатмоқчиман”.

ЗАФАР ХАЙРУЛЛАЕВ

Дин ишлари бўйича қўмита бош мутахассиси

ЎМИ матбуот хизмати

Ўзбекистон Республикаси Президенти Шавкат Мирзиёев бугун, 22 апрель куни глобал инқироз ва пандемия шароитида мамлакат аҳолиси бандлиги масалаларига бағишланган видеоселектор йиғилиши аввалида коронавирус инфекциясига қарши кураш доирасида юртимизда амалга оширилаётган ишларга яна бир бор алоҳида тўхталиб ўтди.

“Бугунги кунга қадар 424 нафар юртдошимиз бу касалликдан халос бўлиб, реабилитация режимига ўтказилгани барчамизга, бутун эл-юртимизга катта куч беради.

Юзага келган вазиятни тўғри тушуниб, карантин қоидаларига оғишмай амал қилаётган, кўрилаётган чора-тадбирларни кенг қўллаб-қувватлаётган барча юртдошларимизга яна бир марта раҳмат айтаман.

Фурсатдан фойдаланиб, кечани кеча, кундузни кундуз демасдан, ҳақиқий қаҳрамонлик кўрсатиб, ушбу касалликка қарши курашаётган жонкуяр шифокорларимизга, улар билан бир сафда туриб хизмат қилаётган хорижий врачларга, шунингдек, ички ишлар, фавқулодда вазиятлар ва мудофаа вазирликлари ҳамда миллий гвардия ходимларига ўз номимдан, халқимиз номидан яна бир бор миннатдорчилик билдираман”, деган давлат раҳбари.

Шавкат Мирзиёев сўзида давом этаркан, жорий йилнинг 20 апрель куни ўтказилган йиғилишга эътибор қаратиб, шундай деган:

“20 апрель куни бўлиб ўтган видеоселектор йиғилишида биз халқаро ва миллий талабларга тўлиқ амал қилган ҳолда, мамлакатимизда карантин режимини босқичма-босқич юмшатиш, шу асосда тезроқ нормал ҳаётга қайтиш бўйича дастлабки чора-тадбирларни белгилаб олган эдик.

Бугунги кунда вирусдан холи ҳудудлардаги бир қатор саноат корхоналарида, қурилиш майдонларида, фермер ва кластер хўжаликларида, санитар-эпидемиологик нормаларга қатъий амал қилган ҳолда, ишлар аста-секин бошланди.

Айниқса, “кўкламнинг ҳар бир дами – ғанимат!” Деган даъватни ўзлари учун ҳаётий шиорга айлантириб, далаларимизда, томорқаларда тер тўкиб, ҳалол меҳнат қилаётган фидойи деҳқон ва фермерларимизга, кластер хўжаликлари раҳбарлари ва ишчи-хизматчиларига ўз раҳматимни айтаман”.

Бугунгача Ўзбекистон Республикаси Президенти Шавкат Мирзиёев йиғилиш ва давлат аҳамиятига молий тадбирларда видеоконференц алоқа орқали иштирок этаётган эди.Ушбу йиғилишларда иштирок этган вазирлар ва давлат ташкилотлари раҳбарлари ҳам ниқобларда намоён бўлганди. Президенти Шавкат Мирзиёев бу галги йиғилишни бевосита ўтказди ва унда иштирок этган давлат идоралари раҳбарларини ҳам ниқобсиз ҳолатда кўриш мумкин. Президентнинг таъқидлашича, мамлакатда коронавирусга қарши кураш давом эттирилади.

“Албатта, биз коронавирус пандемиясига қарши курашни бир лаҳза ҳам тўхтатмаймиз. Бу одамларимиз, аҳолимизнинг соғлиғи, ҳаёти билан боғлиқ ўта муҳим масала.

Айни пайтда, биз 34 миллионли халқимизни озиқ-овқат ва бошқа зарур маҳсулотлар билан кафолатланган ҳолда таъминлаш, фуқаролар даромадларининг пасайиб кетишига йўл қўймаслик, ёрдам ва кўмакка муҳтож юртдошларимизни қўллаб-қувватлашдек ғоят долзарб вазифани ҳам кечиктирмасдан ҳал қилишимиз керак.

Бунинг учун иқтисодиётимизнинг етакчи тармоқлари барқарор ишлаши шарт. Кўриниб турганидек, биз бир вақтнинг ўзида қатор мураккаб вазифаларни ечишимиз зарур.

Ҳозирги оғир пайтда аҳолимизнинг ёрдам ва кўмакка муҳтож қатламларини аниқ, манзилли асосда қўллаб-қувватлаш мақсадида “саховат ва кўмак” умумхалқ ҳаракатини йўлга қўйиш ҳақидаги ташаббусни халқимиз, жамоатчилигимиз кўтаринки руҳда, қизғин кутиб олгани барчамизни, албатта, хурсанд қилади.

Бу масала бўйича муҳтарам фахрийларимиз, олимлар, маданият ва санъат арбоблари, ҳурматли уламоларимиз, бизнес ҳамжамият вакиллари, ёшларимиз томонидан телевидение ва рўзномаларда, ижтимоий тармоқларда билдирилаётган фикрлар, самимий муносабат бундай эзгу интилиш халқимизнинг юрагида, қалбида мужассам эканини яққол тасдиқлайди.

Бу самимий фикр-мулоҳазалар эл бошига иш тушган қийин дамларда бир-бирига елкадош бўлиш, бир-бирига эътибор ва ғамхўрлик кўрсатиш каби энг олижаноб фазилатлар халқимизнинг юрагида, қалбида азалдан мужассам бўлганини, бугун ушбу интилишлар янада кучлироқ жўш ураётганини намоён этади.

Шу маънода, улуғ шоир ва мутафаккир алишер навоий бобомизнинг “саховатли инсоннинг бошига жаннат дарахтлари соя солади” деган сўзларида чуқур ҳикмат бор, албатта.

Мен, мана шу ташаббусни чин дилдан қўллаб-қувватлаб, бу савобли ишга муносиб ҳисса қўшаётган барча ватандошларимизга, саховатли тадбиркорларимизга муқаддас китобларимизда айтилган: “яхшиликнинг мукофоти – фақат яхшиликдир”, деган гапни яна бир бор эслатмоқчиман.

Албатта, эҳтиёжманд, кам таъминланган инсонлар ва оилаларга меҳр ва ҳурмат билан ёрдам қўлини чўзадиган барча тадбиркорлар ва фермерларга, хўжалик бирлашмалари вакилларига, вазирлик, идора ва ташкилотларнинг ишчи-ходимларига бу қилган яхшиликлари бир неча бор зиёда бўлиб қайтади.

Таъкидлаб айтаман: ўз навбатида, давлатимиз, жамиятимиз саховатпеша тадбиркорларни ҳар томонлама қўллаб-қувватлайди.

Уларга ҳеч қандай оғирлик тушмайди.

Шу маънода, “саховат ва кўмак” умумхалқ ҳаракати давлатимиз ва халқимиз бирлигини, унинг беқиёс қудратини ёрқин намоён этиб, янги тарихимиз саҳифаларидан мустаҳкам ўрин олади, деб ишонаман”, дейди мирзиёев.

24 апрель куни бошқа мамлакатлар қаторида Ўзбекистонда ҳам муқаддас Рамазон ойи бошланади. Бунгача давлат раҳбари алоҳида қарор имзолади. Президент ўз нутқида Ўзбекистон халқини ушбу улуғ ой билан муборакбод этди.

“Мана, жонажон ватанимизга рамазони шариф кириб келмоқда.

Ушбу улуғ айём муносабати билан нуроний отахон ва онахонларимизни, қадрли ака-ука, опа-сингилларимизни, иймон-эътиқодли халқимизни чин қалбимдан муборакбод этаман.

Барчангизга тинчлик-омонлик, оилавий хотиржамлик, бахту саодат ёр бўлишини тилайман.

Бугунги ўткинчи қийинчиликларга қарамасдан, рамазони шариф ҳар доимгидек хонадонларимизга, дилларимизга қувонч, юртимизга файзу барака бахш этади, бир-биримизга бўлган меҳр-оқибатимизни янада зиёда қилади, деб ишонаман.

Фурсатдан фойдаланиб, узоқ-яқин мамлакатлардаги мўмин-мусулмон биродарларимизни ҳам самимий табриклаб, уларга ўз номимдан, халқимиз номидан тинчлик ва фаровонлик тилайман.

Ҳаммамизга аёнки, аллоҳ таолонинг марҳамати билан шаҳри рамазонда эзгу ниятлар ижобат бўлади.

Мана шу муборак ойда барчамиз тутган рўзаларимиз, қилаётган дуои фотиҳаларимиз, хайрли амалларимиз шарофати билан барча мамлакатлар қатори эл-юртимизни ҳам ушбу офатдан тезроқ халос этишини яратган парвардигордан сўраб қоламиз”.