Табиатдаги гўзал ҳодисалардан бири – қутбдаги шафақдир. У қутб ёғдуси деб аталади. Қутб ёғдуси Қуёшнинг ҳаракатига  боғлиқ. Қуёш очиқ фазога жуда катта миқдорда иссиқлик тарқатади ва ўзидан электр билан зарядланган зарралар оқимини чиқариб туради. Ана шу зарралар Ер атмосферасининг юқори қатламларида – ер юзасидан 80 километрдан то 1000 километргача бўлган баландликда ҳаво атомлари ва молекулалари билан тўқнашади ва улар сариқ, қизил, тўқ сариқ рангларда нур сочади. Қутб ёғдуси шундай рўй беради.

Қутб ёғдуси улкан қизил-яшил ўқ-ёйга ўхшаб кўринади ва ўз кўринишини ўзгартириб, ранг-баранг товланиб, гоҳ пайдо бўлиб, гоҳ йўқолиб туради. Қорамтир осмонни ёриб ўтган бу ранглар баъзан ҳавода қизил шокилали кўм-кўк пардадек осилиб туради.

Қутб ёғдуси Ернинг шимолий ва жанубий қутблари яқинларида содир бўлади. Бунга сабаб шуки, Ер шари улкан магнитдан иборат. Ҳар қандай магнитда бўлганидек, унинг ҳам иккита қутби бор. Электр билан зарядланган қуёш зарралари бизнинг сайёрамизга етиб келганда, улар ернинг магнит кучлари таъсирида шимолий ва жанубий магнит қутбларига оғади, натижада бу ҳудудларда қутб ёғдуси кузатилади.

Олимлар Қуёшда доғлар миқдори кўпайган пайтларда қутб ёғдуси кучлироқ ва тез-тез бўлишини пайқашган. Қуёшнинг айнан доғлари бор қисмидан отилиб чиқадиган зарраларнинг ўта кучли оқимлари қутб ёғдуси келиб чиқишига сабаб бўлар экан.

Қутб ёғдуси – Ернинг магнит майдони Қуёшдан келаётган ўта зарарли нурларга қарши курашаётганининг исботидир. Ўша зарарли нурлар бизни ёндириб юбориши ўрнига Аллоҳнинг фазли билан магнит майдони ўша нурларни биздан узоқлаштириб туради. Биз эса унинг аксини қутб ёғдуси сифатида кўрамиз.

Кўриб турибмизки, қутб ёғдуси улкан аҳамиятга эга нарса экан. Аллоҳ таоло Қуръони каримда бундай деб марҳамат қилган:

 فَلَا أُقْسِمُ بِالشَّفَقِ وَاللَّيْلِ وَمَا وَسَقَ وَالْقَمَرِ إِذَا اتَّسَقَ لَتَرْكَبُنَّ طَبَقاً عَن طَبَقٍ

“Шафақ билан қасамки. Кечаси ва у ўраб олган нарсалар билан қасамки. Ва тўлин ой билан қасамки. Албатта, сизлар табақама-табақа минасизлар” (Иншиқоқ сураси, 16-19-оятлар).

Қуйида Ер шарининг шимолий ва жанубий минтақаларида жойлашган давлатлар осмонида кузатилган қутб ёғдуларини кўрасиз. Ушбу расмлар Швеция, Норвегия, Исландия, Россия каби давлатларда тасвирга туширилган.

Интернет материаллари асосида

Нозимжон Иминжонов тайёрлади.

Бугунги кунда мамлакатимиз мусулмонларига Ҳаж зиёратини адо этиш учун бир қатор қулайликлар яратилмоқда. Уларни Саудия Арабистонига етказилиши, саломатликларини доимий назорат қилиш, иссиқ иқлим шароитларидан келиб чиқиб таомланишлари масаласида тайёргарлик ишлари олиб борилган. Етти минг нафардан зиёд ўзбекистонликлар жорий йилда Ҳаж ибодатини ўтайдилар. Уларнинг хавфсизлиги, ибодатларининг тўла-тўкис бўлишида ҳукуматимиз томонидан олиб борилган ишлар таҳсинга сазовордир.
Айни пайтда мамлакатимиз зиёратчиларининг бир неча гуруҳи Саудия Арабистонида бўлиб турибдилар ва уларнинг кайфиятлари юқори эканини кўриш мумкин.

Кеча, 1 август куни Наманган вилояти ва Тошкент шаҳридан 468 нафар зиёратчи Мадина шаҳрига етиб боришган бўлса, улар Мадина шаҳрида Масжидун Набавийдан юз метр узоқликдаги «Жавҳарат ал-Рашид» меҳмонхонасига жойлаштирилган.

Шу кунларда ушбу муборак шаҳарда 934 нафар юртдошларимиз ўз ибодатларини адо этмоқда.

Мадина шаҳрида ҳожиларимиз муқаддас зиёратгоҳлар: Масжиди Қубо, Масжиди қиблатайн ва Уҳуд тоғларини зиёрат қилгач, уч кечаю тўрт кундуздан кейин Макка шаҳрига йўл оладилар.
Бугун, 2 август куни Тошкент шаҳри ва Андижон вилоятидан 460 нафар зиёратчилар Мадина шаҳридан Макка шаҳрига жўнаб кетдилар. Ҳозирда Макка шаҳрида 912 нафар зиёратчи ибодатларини адо этмоқдалар.

Ҳожиларимиз Макка шаҳрида Масжидул Ҳарамдан 8000 метр узоқликда жойлашган тўрт юлдузли “Аброж ал-Ҳидоя” меҳмонхонасига жойлашишдилар.

Мадина ва Макка шаҳарларида меҳмонхоналарда 24 соат давомида хизмат кўрсатиш ташкил этилган бўлиб, зиёратчиларимиз учун барча шароитлар муҳайё қилинган.

ЎМИ Матбуот хизмати

Ислом динининг устунларидан саналган Ҳаж зиёрати Аллоҳ таоло ваъда қилганидек инсонларни ўтган ҳаётларидан хулоса чиқаришга ва гуноҳ ишлари учун тавба қилишлари, Ўзи кечиришини сўрашлари зарур бўлган ибодатдир.

Ҳаж мавсумининг кўнгилдагидек, хавотирсиз ва турли хавф-хатарларсиз ўтиши учун Саудия Арабистони ҳукумати турли чораларни кўрмоқда. Шундай ишлардан бири эса Каъбатуллоҳ устига ёпиладиган янги каъбапўшнинг ўрнатилишидир.

Аrabnews интернет нашрининг хабар беришига қараганда, Масжидул Ҳаромда Каъбани ҳаж мавсумига тайёрлаш ишлари ўз якунига етказилган.

Хабарда кисванинг пастки қисми тахланиб, ердан уч метр баландликка кўтариб қўйилгани, унга зарар етмаслиги учун икки метрлик оқ мато билан ўралган.

Қирол Абдулазиз мажмуасининг Каъба Кисва учун масъул раҳбари Аҳмед ал Мансурийнинг айтишича бу йилги каъбапўш мустаҳкам тикилган бўлиб, техник ишлар юқори аниқликда олиб борилган.

Зиёратчилар орасида кисвадан йиртиб олиш билан боғлиқ янглиш қарашнинг мавжудлиги, каъбапўшни оқ пахта мато билан ўраш сингари чораларни кўришга мажбур қилмоқда.

Ўзбекистонлик зиёратчиларни янглиш фикрларга бормаслик ва каъбапўшни йиртишга уринмасликка ҳамда ибодатларда бирор нарсани восита қилмасликка чақирамиз!

ЎМИ Матбуот хизмати