Уламолар ташрифи билан мувозий тарзда Дин ишлари бўйича қўмита маъсул ходими О.Арипова, Ўзбекистон халқаро ислом академияси масъул ходими Г.Фузаилова, Ўзбекистон мусулмонлар идораси масъул ходими М.Абдуллаева ва бошқалар ҳам аҳоли, айниқса, хотин-қизлар билан мулоқот қилиб, уларнинг дарду ташвишларини тингламоқда.

Миришкор тумани “Помиқ” маҳалласида бўлган ишчи гуруҳ аъзолари аёллар билан суҳбатлар қуриб, уларга миллий маънавиятимиз, қадриятларимизни, муқаддас динимизнинг асл моҳиятини англатмоқда. Қизлар тарбиясига янада эътиборлироқ бўлишга чақирмоқда.

Тадбирларда Президентимиз томонидан хотин-қизларни жамиятда ўз ўринларини топишлари учун олий таълим муассасаларига киришда имтиёзлар қўлланиллаётгани, имтиёзли уй-жойлар тақдим этилаётгани, ҳунармандчилик ва тадбиркорлик фаолиятини олиб бориши учун имкониятлар тақдим қилинаётгани тўғрисида батафсил маълумотлар берилмоқда.

Ташрифлар давомида адашиб турли экстремистик оқимлар таъсирига тушиб қолган фуқаролар билан суҳбатлар қилиниб, уларнинг ижтимоий мослашувига кўмаклашиш бўйича тавсиялар берилди.

* * *

Миришкор туманидаги “Жейнов” маҳалласида ишчи гуруҳ аъзолари ва бошқа тегишли аёллар иштирокида семинар ташкил этилди.

Семинарда туман отинойиларига оилаларга кириб борганда юртимизда диний-маърифий соҳада амалга оширилаётган ислоҳотларни ҳаққонй тарзда етказиш зарурлиги қайд этилди.

Семинар доирасида ташкил этилган “Миллий либос – маънавият кўзгуси” кўргазмада ҳудудда истиқомат қилувчи туркман, араб, татар, қозоқ, тожик, ўзбек миллатлари вакиллари тақдим этган миллий либослар тадбирга ўзгача файз бағишлади.

Худди шундай мулоқотлар тумандаги Гулистон қишлоқ фуқаролар йиғинида ҳам бўлиб ўтди.

Мулоқотлар давом этади.

Марямхон АБДУЛЛАЕВА,

ЎМИ масъул ходими

Марямхон АБДУЛЛАЕВА,

Ўзбекистон мусулмонлари идораси

хотин-қизлар масаллари бўйича бўлим мутахассиси

Сохта салафийлар “Тўрт мазҳаб имом­лари шариат масалаларида му­сулмонлар ўртасини бўлиб ташлаганлар”, дея даъво қилишади. Чиндан ҳам шундайми?

Тўрт мазҳаб имомлари ва фақиҳларининг ихтилофи шариатнинг фуруъий масалаларида бўлган, холос. Аммо ақида ва усулуд динда эса уларнинг ўртасида ҳеч қандай зиддият йўқ. Фуруъий масалалардаги айрим кичик баҳслар саҳобалар замонидан бери мавжуд.

Мисол учун, Ибн Аббос розийаллоҳу анҳу­мо “авл”¹ – илми фароизга тегишли масала ҳақида Умар розийаллоҳу анҳуга хилоф қил­ган. Умар розийаллоҳу анҳу фикрига эса жумҳур саҳобалар бир овоздан қўшилишган. Бу ҳақда Ибн Аббос розийаллоҳу анҳумо бирор нарса демаган. Лекин ижмо, кейин Умар ва саҳобалар розийаллоҳу анҳумнинг “авл” ҳақидаги фикрларини ҳақ деб топган.

Саҳобалар Расулуллоҳ соллаллоҳу алай­ҳи ва салламнинг Меърож кечасида Рабби­ларини кўрганлари ҳақида ҳам ихти­лоф қилишган. Ибн Аббос, Абу Ҳурайра ва улардан бошқа саҳобалар: “Ал­батта, Расулуллоҳ соллаллоҳу алайҳи ва саллам ўз Раббилари­ни кўрганлар”, деган. Ойша, Абдуллоҳ ибн Масъуд розийаллоҳу анҳумо: “Расулуллоҳ соллаллоҳу алайҳи ва саллам Раббиларини кўрмаганлар, балки Жаброил алайҳиссалом­ни кўрганлар”, дейишган.

Тобеинлар замонида фуруъ² масалалари­да мужтаҳидларнинг ихтилофлари ҳам кўзга ташланади. Ҳар бир Ислом ўлкасининг ўз мужтаҳидлари бўлган. Масалан, Ироқ ва Ҳижознинг ушбу мужтаҳидлари машҳур бў­лишган: Урва ибн Зубайр, Солим ибн Аб­дуллоҳ ибн Умар, Алқама ибн Мусаййиб, Нофеъ, Сулаймон ибн Ясор ва бошқалар. Шунингдек, бошқа исломий ўлкаларнинг мужтаҳидлари ҳам илмда донг таратишган.

Табаа тобеинлар ва мужтаҳид имомлар замонида ижтиҳодий фуруъ масалаларида ихтилоф давом этди. Ушбу замонларнинг яхшилиги ҳақида эса Расулуллоҳ соллаллоҳу алайҳи ва саллам гу­воҳлик берганлар.

Мужтаҳидларнинг фуруъ масалаларидаги ихтилофлари мусулмонларни бўлиб, уларни фирқа-фирқа қилиб ташламаган. Асҳоби ҳаволар³ эса – муътазилалар ва хаворижлар⁴ Ислом умматини пароканда қиладиган фир­қалар­дан ҳисобланади.

Фуруъ масалаларида фақиҳларнинг ихтилофларидан зарар кўрилмаган. Бу ихтилофлар мусулмонларни ажратиб ташлашга олиб бориши мутлақо мумкин эмас.

“Бир масалада ижтиҳодлар кўп бўлиши­нинг сабаби нима? Ахир, Қуръон ҳам, араб тили ҳам бир-ку! Фақиҳ­лар фуруъ маса­лала­ридаги ихтилофни қўйиб, барча ижтиҳодла­рини битта қилишса бўлмас­миди?” деган савол туғи­лиши табиий.

Мен бу саволга бундай жавоб бераман: “Бу мушкул ишдир. Чунки Китоб ва суннатнинг насс⁵-далиллари таркиблар ҳамда хилма-хил услубларга эга, арабий лафзлардан таш­­кил топган бўлса-да, лекин улар бир-бири­га зид эмас. Булар ўз атрофидаги фикр­ларнинг саноғида ва улардан олинадиган ҳукмларнинг навларида бир хил.

Имом Шотибий бу масалаларни жамлаган. Ибн Саййид уни “Мужтаҳидлар ўртасида хилофга олиб борадиган сабаблар” деб сарлавҳа қўйиб, қуйи­дагича баён этган:

1. Лафзларда бўладиган муштараклик бу лафзлар­нинг таъвилларга эҳти­молидир. Бу уч қисмга бў­ли­нади:

а) ёлғиз бир лафзнинг ўрнидаги муштарак­лик бўлиб, “қуруъ” сўзи кабидир. Бу сўз ҳайзга далолат қил­ганидек, покликка ҳам далилдир.

б) сўзнинг тусланишидаги муштараклик. Аллоҳ таолонинг: وَلَا يُضَارَّ كَاتِبٌ وَلَا شَهِيدٌ

“Котиб ҳам, гувоҳ ҳам зарарланмайди” (Бақара сураси, 282-) оятида “Ва ла юзоорра” сўзи котиб ёки гувоҳ томонидан ўз ишида зиёда ва камчилик билан зарар келиши жоиз эмас, деган маънога эҳтимол қилинади. Шунингдек, у котиб ёки гувоҳга ўз мажбуриятларини бажараётган пайтда зарар бериш жоиз эмас, деган маънога ҳам эҳтимол қилади.

в) таркиб жиҳатидан муштараклик. Аллоҳ таоло­нинг: إِلَيْهِ يَصْعَدُ الْكَلِمُ الطَّيِّبُ وَالْعَمَلُ الصَّالِحُ يَرْفَعُهُ

“Хуш сўз Унга юксалур ва яхши амални ҳам (Аллоҳ Ўз даргоҳига) кўтарур” (Фотир сураси, 10-) оятида “ҳо” лафзи яхши амалга қайтиши эҳтимол қилинади. Шу­нингдек, хуш сўзга ҳам.

2. Лафзни ҳақиқий ва мажозий маъноларга буриш. Бу ҳам уч қисм:

а) ёлғиз лафзга қайтувчи нарса. Набий соллаллоҳу алайҳи ва салламнинг ушбу сўзла­рига ўхшаш: “Раббимиз дунё осмонига тушади”. “Тушади” деган лафз ҳақиқатан тушишга ва мажозий тушишга эҳтимол қилинади. Лекин Аллоҳнинг комиллиги ва улуғ­лигига муносиб бўлган нарса уни ўз ҳақиқатидан буриб юборади. Аҳли сунна вал жамоа наздида эса унинг мажозга ҳамл қилиниши вожиб бўлади. Аммо мужасси­малар⁶ эса уни аслича қолдиришган.

б) лафзнинг аҳволига қайтадиган нарса. Аллоҳ таолонинг қуйидаги сўзига ўхшаш:

بَلْ مَكْرُ اللَّيْلِ وَالنَّهَارِ

“Балки кеча ва кундузнинг макри” (Сабаъ сураси, 33-) ­оятида макр кофирлардан бўлганига эҳтимол қилинади. Бу эса ҳақиқатдир. Макр кеча ва кундуздан бўлганига ҳам эҳтимол қилинади, бу эса мажозийдир.

в) таркиб жиҳатига қайтадиган нарса имконсиз нарсани мумкин бўлган нарса шаклида келтириш, буйруқ феълини хабар суратида келтириш, мадҳни айблов сийғаси билан келтириш ва ҳоказо.

3. Далилни ҳукм билан мустақил бўлиш ва бўлмаслик ўртасида айлантириш. Лайс ибн Саъднинг Абу Ҳанифа, Ибн Абу Лайло ва Шибрима билан байъ ва шарт масаласида келтирган ҳадисига ўхшаш. Шу ўринда Лайс ибн Саъд байъ ва шартдан қайтарилган ҳадисни мустақил қилди, бу ўринда бошқалар мустақил қилишмади.

Далилни умумий ва хос маъноларга буриш. Аллоҳ таолонинг:

لَا إِكْرَاهَ فِي الدِّينِ

“Динга мажбурлаб киритиш йўқ” (Ба­қара сураси, 256-) ояти одамларнинг ҳам­масини Ислом динини қабул қилиш­ларига зўрлашни бекор қиладиган умумий ҳолатми? Ёки аҳли китобларнинг жизяни⁷ қабул қи­лишлари билан уларга умумий айтганми? Ёхуд оят улар туфайли нозил бўлган кишиларга тегишлими?

4. Ровийларнинг ва ҳадисни ривоят қилиш йўлларининг саноғидаги ихтилоф. Гоҳида ривоят мужтаҳидга саҳиҳ йўл орқали етиб келса, бошқаси уни саҳиҳ деб топмайди. Гоҳо эса уларнинг баъзисига бир лафз билан етиб келса, бошқасига бошқа лафз орқали етиб келади. Чунки ҳадислар улуғлигига кўра маъно билан ҳам ривоят қилинади.
5. Ижтиҳод ва қиёс⁸нинг жиҳатлари. Яъни, қиёснинг йўлларидаги ва шартла­ридаги ихтилофлар. Ижти­ҳоднинг василаларидаги, иллатидаги ва зобиталаридаги ихтилофлар.
6. Китоб ва суннатда насх^­нинг⁸борлиги. Шу ўрин­да жумҳур уламолар насх­нинг мавжудлигини айтишса, бошқалари уни инкор этадилар. Унинг борлигини айтгувчилар эса носих-мансух оят ва ҳадислар тўғрисида ихтилоф этишади. Чунки Набий соллалло­ҳу алайҳи ва салламдан бу ҳақда чегараланган баён келмаган. Саҳобалардан эса жуда кам нарса келган.
7. Далилларнинг мубоҳ­ликни ва ундан бошқасини эҳтимол қиладиган бир қан­ча йўлларга биноан келиши.

Бу ҳадисларнинг барчаси ҳам саҳиҳ бўлиб, уларнинг баъзиларини муж­та­ҳидлар ҳужжат қилиб олишган бўл­са, баъзиларини эса йўқ.

Мухтасар айтганда, сох­­та салафийлар айтаёт­га­­нидек, аҳли сунна вал жамоа маз­ҳаблари мусул­монларни бўлиб ташла­маган, балки муж­та­ҳидларни бирор фуруъий масалада далил-ҳуж­жатлар асосида баҳсла­шиб, ҳақиқатни онгли равишда англаб етишга чорлаган. Зотан, адолатли ва асосли баҳс тараққиётга хизмат қилади.

Доктор Абдулқодир Исо Диябнинг

“Ал-Мийзан ал-одил литамйизал ҳаққи

минал ботил” китобидан

Тошкент шаҳар

“Ал-Бадр” жоме

масжиди имом ноиби

Муродуллоҳ МАЖИДОВ

таржимаси

Ўзбекистоннинг АҚШдаги элчиси Жавлон Ваҳобов БМТнинг Дин ва эътиқод эркинлиги масаласи бўйича махсус маърузачиси Аҳмад Шаҳид билан музокаралар ўтказди, деб хабар бермоқда «Дунё» АА.

Махсус маърузачи янги таҳрирдаги «Виждон эркинлиги ва диний ташкилотлар тўғрисида»ги қонуннинг қабул қилинишини қутлар экан, мазкур ҳужжат диний эркинликни таъминлаш бўйича қонунчилик тизимига кўплаб ижобий ўзгаришлар олиб келганини таъкидлади.

Суҳбат чоғида ушбу қонуннинг қабул қилиниши барча динлар ва эътиқодлар учун инклюзив маконни қўллаб-қувватлаш имконини берувчи самарали ҳуқуқ-тартиботни таъминлашга қаратилган ўзаро ҳамкорликнинг янги босқичини бошлаб бергани қайд этилди.

Аҳмад Шаҳид Ўзбекистон ҳукуматининг унинг офиси ва бошқа халқаро тузилмалар ҳамда экспертлар ҳамжамияти билан ҳамкорлигининг изчиллигига юқори баҳо бериб, мамлакатимиз билан ўрнатилган конструктив мулоқотни давом эттиришга тайёрлигини тасдиқлади.

Шу нуқтаи назардан, Аҳмад Шаҳид жорий йил сентябрь ойида Ўзбекистонга сафар қилиб, Нью-Йорк шаҳри университети (CUNY-RBI) ҳузуридаги Ральф Банч номидаги халқаро тадқиқотлар институти ва Эссекс университети ҳуқуқшунослик мактаби (Essex-HRC) ёрдамида техник кўмак дастурини ишга туширишга тайёрлигини маълум қилди.

Сафар дастурида тегишли давлат идоралари, фуқаролик жамияти ва диний ташкилотлар вакиллари учун қатор семинар ва тренинглар ўтказиш кўзда тутилган. Шунингдек, БМТ доирасида қўлланилаётган инсон ҳуқуқлари кўрсаткичларига асосланган миллий мониторинг ва баҳолаш тизимини ишлаб чиқишда маслаҳат ёрдами кўрсатилади.

БМТ махсус маърузачиси «Декларациялар мулоқоти» халқаро форумини ўтказиш режасини олқишлаб, мазкур анжуман якунлари бўйича «Бухоро декларацияси» қабул қилиниши алоҳида аҳамият касб этишини таъкидлади. У Ўзбекистон тарихан диний ва конфессионал хилма-хилликнинг бой меросига эга маърифатли ислом маркази бўлиб келган, деб фикр билдирди.

Аҳмад Шаҳид «Бухоро декларация»си лойиҳасини ишлаб чиқишда зарур маслаҳат ёрдами кўрсатишини, шунингдек, декабрь ойида ушбу халқаро конференция ишида иштирок этиш учун Ўзбекистонга яна бир бор сафар қилишини тасдиқлади.

Ўзбекистон мусулмонлари идораси матбуот хизмати