16 июль куни “Мовароуннаҳр” нашриёти ўз ҳовлисининг Қаффол Шоший мақбараси олд томонида қуриб битказилган “Зарқайнар” номли китоб дўконининг очилиш маросими бўлиб ўтди.

Ушбу тадбирда Ўзбекистон мусулмонлари идораси раиси ўринбосари Иброҳимжон Иномов, “Мовароуннаҳр” нашриёти бош директори Абдужалил Хўжамов, нашриёт директори ўринбосари Исомиддин Алимов, нашриёт ходимлари ҳамда китобхонлар иштирок этди.

Очилиш маросимида сўз олган Иброҳимжон домла Иномов ушбу зиё маскани ҳар томонлама қулай жойда жойлашгани, Ҳазрати имом мажмуасига мос шакл ва кўринишда қўрилгани, айниқса, унинг “Зарқайнар” деб номланиши дўконга янада файз ва тароват бағишлаб турганини таъкидлади. Эндиликда ушбу зиё масканида юртимиз китобхонлари билан бирга хорижлик сайёҳ ва зиёратчилар учун ҳам хорижий тилларда адабиёт ва қўлланмалар нашр этиш, бу бўйича тарғибот-ташвиқот ишларини янада кўпайтириш, китобхонларга ҳар томонлама шарт-шароит яратиш борасида ўз таклиф ва мулоҳазаларини билдирди.  

Тадбир сўнгида “Мавароуннаҳр” нашриёти жамоасининг  халқимиз маънавияти ва маърифатини юксалтириш, нашриётнинг ўзи ва бошқа ҳамкор нашриётларда чоп этилган китобларни китобхонлар учун қулай нархларда етказиш борасидаги эзгу қадами қутлуғ келиши сўраб дуою фотиҳа қилинди.

Ўзбекистон мусулмонлари идораси

матбуот хизмати

Жорий йилнинг 16 июль куни Ўзбекистон мусулмонлари идорасида Ҳиндистон ислом маданияти маркази директори Сиражуддин Қурайши билан учрашув бўлиб ўтди. Мартабали меҳмон билан Ўзбекистон мусулмонлари идораси раиси, муфтий Усмонхон Алимов ҳазратлари, Ислом цивилизацияси маркази директори Шоазим Минаваров ва Имом Бухорий халқаро илмий-тадқиқот маркази директори Шовосил Зиёдов мулоқот олиб борди.

Дастлаб, муфтий ҳазратлари диёримизда диний ибодатларни эмин-эркин ва тинчлик-осойишталикда адо этиб келинаётгани, хайрли ислоҳотлар, улкан ижроотлар ва илғор ташаббуслар амалга оширилаётгани ҳақида сўзлаб, илмий мактаблар ташкил этилгани ва “Қуръони карим ва тажвид” бўйича ўқув курслари очилгани ва бошқа қатор янгиликлар ҳақида батафсил маълумот бердилар.

Давра суҳбатида сўз олган Ислом цивилизацияси маркази директори Шоазим Минаваров Ўзбекистон – ислом маданияти ва тарихига оид кўплаб ёдгорликларни ўз бағрида сақлаб келаётган бебаҳо замин эканини айтиб ўтди. Хусусан, ҳозирда юртимизда 150 мингга яқин қўлёзмалар сақланиши, ўз навбатида, хорижда ҳам Ўзбекистонга оид асарлар мавжудлиги, уларни ўрганишга зарурат жуда ҳам юқори экани нуқтаи назаридан, давлатимиз Раҳбари ташаббуси билан Ислом цивилизацияси маркази ва Имом Бухорий халқаро илмий-тадқиқот маркази ташкил этилганини қайд этди.

Шоазим Минаваров айни кунларда азим пойтахтимиз марказидаги 10 гектарга яқин майдонда Ислом цивилизацияси марказини бунёд этиш ишлари жадал олиб борилаётганини билдирди. Ушбу марказ биносида 200 минг асарга мўлжалланган кутубхона, Ислом тарихига оид музей, шунингдек, ёшларга Қуръони карим, араб тили ва хаттотлик санъатини ўргатадиган курслар ташкил этиш режалаштирилганини зикр қилиб ўтди. Шунингдек, марказ Ислом динининг эзгулик ва бунёдкорликка йўғрилган таълимотларини кенг тарғиб этиш ва муборак динимиз ҳар қандай зулм-зўравонликка қарши эканини етказишни асосий мақсад қилганини баён этди.

Имом Бухорий халқаро илмий-тадқиқот маркази директори Шовосил Зиёдов Самарқанддаги Халқаро илмий-тадқиқот марказини ташкил этишдан кўзланган асосий мақсадлар, алломалар асарларини ўрганиш йўлида амалга оширилаётган илмий тадқиқот ишлари ва Ҳиндистонда ҳанафий мазҳабига оид нодир асарлар кўплиги сабабли ўзаро ҳамкорликни йўлга қўйиш икки томон учун ҳам манфаатли бўлишини таъкидлади.

Сиражуддин Қурайши жаноблари самимий қабул учун миннатдорлик билдириб, Ҳиндистон Ислом маданияти маркази ташкил этилиши, асосий фаолият йўналишлари, унда ташкил этилган ўқув курслари, тўгараклар ҳақида маълумот берди. Шунингдек, Ҳиндистон ҳукумати ва хориж давлатларининг ушбу марказга бўлган эътибори ҳақида  гапириб берди.

Мартабали меҳмон Ислом цивилизацияси маркази билан тузиладиган ўзаро ҳамкорлик меморандуми, албатта, икки томон учун ҳам манфаатли бўлишини, келажакда юксак натижалар беришини алоҳида қайд этди.

Сиражуддин Қурайш сафар якунида Қуръони каримнинг энг қадимий ва нодир нусхаси – Ҳазрати Усмон Мусҳафини зиёрат қилди.

Учрашув дўстона ва самимий руҳда ўтди.

Ўзбекистон мусулмонлари идораси

Матбуот хизмати

Пайғамбар соллаллоҳу алайҳи васаллам буюк мақом ва мартаба соҳибидирлар. У зот Пайғамбарларнинг саййиди, раҳмат Пайғамбари, буюк шафоат соҳиби, мақоми маҳмуд эгасидирлар. Қуйида Набий соллаллоҳу алайҳи васалламнинг Қуръони Каримда келган сифатларини далиллар билан келтириб ўтамиз.

1. Аллоҳнинг мўминларга туҳфаси.

لَقَدْ مَنَّ اللّهُ عَلَى الْمُؤمِنِينَ إِذْ بَعَثَ فِيهِمْ رَسُولاً مِّنْ أَنفُسِهِمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِن كَانُواْ مِن قَبْلُ لَفِي ضَلالٍ مُّبِينٍ

“Батаҳқиқ, Аллоҳ мўминларга ўзларидан Пайғамбар юбориб, неъмат берди. У аларга Аллоҳнинг оятларини тиловат қилиб берадир, уларни поклайдир, китоб ва ҳикматни ўргатадир. Гарчи олдин очиқ-ойдин адашувда бўлсалар ҳам” (Оли Имрон, 164).

2. Расулуллоҳ соллаллоҳу алайҳи васалламни Таврот ва Инжилда васф этилганлари.

الَّذِينَ يَتَّبِعُونَ الرَّسُولَ النَّبِيَّ الأُمِّيَّ الَّذِي يَجِدُونَهُ مَكْتُوباً عِندَهُمْ فِي التَّوْرَاةِ وَالإِنْجِيلِ يَأْمُرُهُم بِالْمَعْرُوفِ وَيَنْهَاهُمْ عَنِ الْمُنكَرِ وَيُحِلُّ لَهُمُ الطَّيِّبَاتِ وَيُحَرِّمُ عَلَيْهِمُ الْخَبَآئِثَ وَيَضَعُ عَنْهُمْ إِصْرَهُمْ وَالأَغْلاَلَ الَّتِي كَانَتْ عَلَيْهِمْ فَالَّذِينَ آمَنُواْ بِهِ وَعَزَّرُوهُ وَنَصَرُوهُ وَاتَّبَعُواْ النُّورَ الَّذِيَ أُنزِلَ مَعَهُ أُوْلَـئِكَ هُمُ الْمُفْلِحُونَ

“Улар ўз ҳузурларидаги Таврот ва Инжилда ёзилган ҳолида топиладиган, уларни яхшиликка буюриб, ёмонликдан қайтарадиган, уларга покиза нарсаларни ҳалол қилиб, нопок нарсаларни ҳаром қиладиган, устиларидаги юкни енгиллатиб, кишанларни ечадиган уммий, Набий, Пайғамбарга эргашадилар. Бас, унга иймон келтириб, ёрдам бериб ва уни қўллаб-қувватлаган ҳамда унга нозил бўлган нурга эргашганлар–ана ўшалар нажот топгувчилардир”, деди. (Аллоҳдан гуноҳларини кечишини сўраганларидан сўнг, у зот икки дунёнинг яхшилигини ҳам сўрадилар. Фақат охиратнинггина эмас, бу дунё ва у дунёнинг яхшиликларини сўрадилар. Бу ҳаммага ўрнак бўлиши керак. Мусо (а.с.) танлаб олинган етмиш нафар номидан қилган илтижолари охирида “Биз сенга тавба қилдик”, дедилар. Муҳаммаднинг (с.а.в.) сифатлари ҳақиқий Таврот ва ҳақиқий Инжилда ёзилган. Шундай бўлишини Аллоҳ таоло қадимда Мусо (а.с.) билан бирга мийқотга келган Бани Исроилнинг етмишта вакилига ҳам айтган. Кейинчалик шундай бўлди ҳам. Қанчадан-қанча аҳли китоблар ёки бу китоблардан бўлажак Пайғамбарнинг сифатлари ҳақида маълумот олганлар Муҳаммадни (с.а.в.) кўришлари билан иймонга келдилар.) (Аъроф, 157).

3. Расулуллоҳ соллаллоҳу алайҳи васалламнинг барчага пайғамбар этиб юборилганлари.

قُلْ يَا أَيُّهَا النَّاسُ إِنِّي رَسُولُ اللّهِ إِلَيْكُمْ جَمِيعاً الَّذِي لَهُ مُلْكُ السَّمَاوَاتِ وَالأَرْضِ لا إِلَـهَ إِلاَّ هُوَ يُحْيِـي وَيُمِيتُ فَآمِنُواْ بِاللّهِ وَرَسُولِهِ النَّبِيِّ الأُمِّيِّ الَّذِي يُؤْمِنُ بِاللّهِ وَكَلِمَاتِهِ وَاتَّبِعُوهُ لَعَلَّكُمْ تَهْتَدُونَ

“Сен: “Эй одамлар, албатта, мен сизларнинг барчангизга, осмонлару ернинг мулки Уники бўлган, Ундан ўзга илоҳ йўқ бўлган ва тирилтириб ўлдирадиган Аллоҳнинг Пайғамбаридирман. Бас, Аллоҳга ҳамда Унинг Аллоҳ ва Унинг калималарига иймон келтирадиган уммий элчисига–Пайғамбарига иймон келтиринг. Ва унга эргашинг, шоядки ҳидоят топсангиз”, деб айт”. (Бурунги Пайғамбарлар ўз қавмлари ва ўз замонларига, ўзларидан сўнг янги Пайғамбар келгунча бўлган даврга Пайғамбар бўлганлар. Улар инсоният тарихининг маълум бир даври учун масъул бўлганлар. Аммо Ислом Пайғамбари Муҳаммад (с.а.в.) бутун олам халқларига ва қиёматга қадар кечадиган замонларга Пайғамбар бўлиб келдилар. У кишининг шариатлари вақт ўтиши билан эскириб қолмайди, балки барча вақт ва маконга салоҳияти бор шариатдир. Шунинг учун ҳам Муҳамадга (с.а.в.) бутун инсониятга қарата, мен барчангизга Пайғамбарман, деб айтиш ҳуқуқи берилган.) (Аъроф, 158).

وَمَا أَرْسَلْنَاكَ إِلَّا كَافَّةً لِّلنَّاسِ بَشِيراً وَنَذِيراً وَلَكِنَّ أَكْثَرَ النَّاسِ لَا يَعْلَمُونَ

“Биз сени барча одамларга фақат хушхабарчи ва огоҳлантиргувчи қилиб юбордик. Лекин одамларнинг кўплари билмаслар” (Сабаъ, 28).

4. Расулуллоҳ соллаллоҳу алайҳи васалламнинг барчанинг иймон келтиришига ҳарисликлари, умматларига меҳрибонликлари.

لَقَدْ جَاءكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَؤُوفٌ رَّحِيمٌ

“Батаҳқиқ, сизларга ўзингиздан бўлган, сизнинг машаққат чекишингиз унинг учун оғир бўлган, сизнинг (саодатга етишингизга) ташна, мўминларга марҳаматли, меҳрибон бўлган Пайғамбар келди”. (Ояти каримада Пайғамбаримизнинг (с.а.в.) асосий сифатларидан бир нечаси зикр қилинмоқда. Дунё тарихида У зотдек (с.а.в.) кишиларга марҳаматли, меҳрибон инсон бўлган эмас. Бу улкан ҳақиқатни Пайғамбаримиз (с.а.в.) сийратлари ва ҳадисларидан билиб оламиз.) (Тавба, 128).

5. Аллоҳ таолонинг Пайғамбаримиз соллаллоҳу алайҳи васалламга саловот айтиши ва бандаларни у зотга саловот айтишга буюргани.

إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيماً

“Албатта, Аллоҳ ва Унинг фаришталари Пайғамбарга саловот айтурлар. Эй иймон келтирганлар! Сиз ҳам унга саловот айтинг ва салом юборинг”. (Араб тилида “саловот” сўзи “салот”нинг жами бўлиб, дуо маъносини англатади. Арабчада намоз ҳам “салот” дейилади. Чунки намозда ҳам дуо маъноси бор. Аммо “салот” Аллоҳ таоло томонидан бўлганида “дуо” маъносини йўқотади. Аллоҳ таолонинг Пайғамбаримизга (с.а.в.) саловот айтишининг маъноси у зотга (с.а.в.) ўз раҳматини юбориши, улуғлаши, мақомларини кўрсатиши ва фаришталар ҳузурида шаънларига мақтовлар айтишини англатади.) (Аҳзоб, 56).

6. Пайғамбар соллаллоҳу алайҳи васалламга ёмонлик қилганлар қаттиқ азобланади.

إِنَّ الَّذِينَ يُؤْذُونَ اللَّهَ وَرَسُولَهُ لَعَنَهُمُ اللَّهُ فِي الدُّنْيَا وَالْآخِرَةِ وَأَعَدَّ لَهُمْ عَذَاباً مُّهِيناً

“Албатта, Аллоҳга ва Унинг Расулига озор берадиганларни Аллоҳ бу дунё ва охиратда лаънатлади ҳамда уларга хорловчи азобни тайёрлаб қўйди”. (Аллоҳга озор бериш–Аллоҳга ширк келтириш, унга осий бўлиш, Уни Ўзига мос бўлмаган сифатлар билан сифатлаш, динга, Пайғамбарларига, китобларига тил теккизиш. Пайғамбарга (с.а.в.) озор бериш, ўша вақтда у зотга қарши чиқиш, жисмоний ва маънавий зарба бериш, шахсларига, оилалари ва умматларига нисбатан ёмонлик қилиш, иғво, бўҳтон қилишдан иборатдир. Ҳозирда ҳам худди шундай: ким у кишининг шахсларига, динларига, шариатларига, оилаларига, китобларига, суннатларига, умматларига тил теккизса, у зотга (с.а.в.) озор берган бўлади.) (Аҳзоб, 57).

7. Муҳаммад соллаллоҳу алайҳи васаллам набийларнинг сўнггисидир.

مَّا كَانَ مُحَمَّدٌ أَبَا أَحَدٍ مِّن رِّجَالِكُمْ وَلَكِن رَّسُولَ اللَّهِ وَخَاتَمَ النَّبِيِّينَ وَكَانَ اللَّهُ بِكُلِّ شَيْءٍ عَلِيماً

“Муҳаммад сизлардан бирон эркакнинг отаси бўлган эмас. Лекин Аллоҳнинг Расули ва Набийларнинг сўнггисидир. Аллоҳ ҳар бир нарсани ўта билгувчидир” (Аҳзоб, 40).

8. Расулуллоҳ соллаллоҳу алайҳи васаллам шоҳид, хушхабар айтувчи, огоҳлантирувчи, Аллоҳнинг динига даъват қилувчи, сирож ва мунирдирлар.

 يَا أَيُّهَا النَّبِيُّ إِنَّا أَرْسَلْنَاكَ شَاهِداً وَمُبَشِّراً وَنَذِيراً وَدَاعِياً إِلَى اللَّهِ بِإِذْنِهِ وَسِرَاجاً مُّنِيراً

“Эй Набий, албатта, Биз сени гувоҳлик бергувчи, хушхабар элтгувчи ва огоҳлантиргувчи. Ўз изни ила Аллоҳга даъват қилгувчи ҳамда нурли чироқ қилиб юбордик”. (Ушбу оятда Пайғамбаримизнинг (с.а.в.) тўртта вазифалари ва битта сифатлари зикр қилинмоқда. Ҳа, Муҳаммад (с.а.в.) жоҳилият зулматларидаги нурли чироқдирлар. Турли зулматлар ичида йўлини топа олмай, уриниб-суриниб юрган кишиларни Исломнинг ёруғ йўлига бошловчи нурли чироқдирлар.) (Аҳзоб, 45-46).

وَمَا أَرْسَلْنَاكَ إِلَّا مُبَشِّراً وَنَذِيراً

“Биз сени фақат хушхабарчи ва огоҳлантиргувчи этиб юборганмиз, холос” (Фурқон, 56).

9. Расулуллоҳ соллаллоҳу алайҳи васаллам очиқ огоҳлантирувчидирлар.

قُلْ يَا أَيُّهَا النَّاسُ إِنَّمَا أَنَا لَكُمْ نَذِيرٌ مُّبِينٌ

“Сен: “Эй одамлар! Мен сизлар учун фақат бир очиқ огоҳлантиргувчиман, холос”, деб айт” (Ҳаж, 49).

إِنَّا أَرْسَلْنَاكَ بِالْحَقِّ بَشِيراً وَنَذِيراً وَإِن مِّنْ أُمَّةٍ إِلَّا خلَا فِيهَا نَذِيرٌ

“Албатта, Биз сени ҳақ ила хушхабарчи ва огоҳлантиргувчи этиб юбордик. Қайси бир умматки бўлса, унда огоҳлантиргувчи бўлган”. (Эй Пайғамбар, албатта, Биз сени ҳақ дин ва ҳақ китоб ила мўминларга хушхабарчи, кофирларга огоҳлантирувчи–қўрқитувчи қилиб юбордик. Сенинг Пайғамбар бўлишинг ажабланарли иш эмас, янгилик ҳам эмас.) (Фотир, 24).

10. Зоҳирда ҳам, ботинда ҳам Пайғамбар соллаллоҳу алайҳи васалламга бўйинсўниш.

فَلاَ وَرَبِّكَ لاَ يُؤْمِنُونَ حَتَّىَ يُحَكِّمُوكَ فِيمَا شَجَرَ بَيْنَهُمْ ثُمَّ لاَ يَجِدُواْ فِي أَنفُسِهِمْ حَرَجاً مِّمَّا قَضَيْتَ وَيُسَلِّمُواْ تَسْلِيماً

“Йўқ, Роббингга қасамки, сени ўз ораларида чиққан келишмовчиликларга ҳакам қилмагунларича, кейин, чиқарган ҳукмингга дилларида танглик топмасдан, бутунлай таслим бўлмагунларича, зинҳор мўмин бўла олмаслар!” (Демак, иймоннинг, мўминликнинг бир шарти–ҳар бир нарсада Пайғамбарни (с.а.в.), яъни, Ислом динини ҳакам қилиб олиш зарурлигидир. Мўмин-мусулмонман деган одам, мўмин-мусулмонмиз деган жамият ўзининг ҳар бир ишини Исломнинг ҳукми ила олиб бориши керак. Шу билан бирга, ушбу ҳукмга ҳам ичидан тўла рози, ҳам сиртидан бутунлай таслим бўлиши керак. Бу ҳақиқатни Аллоҳ таоло қасам билан таъкидлаб айтмоқда. Пайғамбаримиз (с.а.в.) ҳам ўз ҳадисларидан бирида: “Менинг жоним қудрат қўлида бўлган зот билан қасамки, ҳавою нафси мен келтирган нарсага тобеъ бўлмагунча, бирорта одам мўмин бўла олмайди”, деганлар.) (Нисо, 65).

11. Аллоҳга ва Расулига итоат қилганнинг мартабаси.

وَمَن يُطِعِ اللّهَ وَالرَّسُولَ فَأُوْلَـئِكَ مَعَ الَّذِينَ أَنْعَمَ اللّهُ عَلَيْهِم مِّنَ النَّبِيِّينَ وَالصِّدِّيقِينَ وَالشُّهَدَاء وَالصَّالِحِينَ وَحَسُنَ أُولَـئِكَ رَفِيقاً

“Ким Аллоҳга ва Расулга итоат қилса, бас, ана ўшалар Аллоҳ неъмат берган набийлар, сиддиқлар, шаҳидлар ва солиҳлар билан биргадирлар. Ва уларнинг рафиқлари қандай ҳам яхши!” (Нисо, 69).

12. Аллоҳ таолонинг Набий соллаллоҳу алайҳи васалламга фазлу марҳамати.

وَلَوْلاَ فَضْلُ اللّهِ عَلَيْكَ وَرَحْمَتُهُ لَهَمَّت طَّآئِفَةٌ مُّنْهُمْ أَن يُضِلُّوكَ وَمَا يُضِلُّونَ إِلاُّ أَنفُسَهُمْ وَمَا يَضُرُّونَكَ مِن شَيْءٍ وَأَنزَلَ اللّهُ عَلَيْكَ الْكِتَابَ وَالْحِكْمَةَ وَعَلَّمَكَ مَا لَمْ تَكُنْ تَعْلَمُ وَكَانَ فَضْلُ اللّهِ عَلَيْكَ عَظِيماً

“Агар сенга Аллоҳнинг фазли ва раҳмати бўлмаганида, улардан бир тоифаси сени адаштиришга уринган эдилар. Улар фақат ўзларини адаштирадилар, холос. Сенга ҳеч зарар етказа олмайдилар. Аллоҳ сенга китобни ва ҳикматни туширди ҳамда билмаган нарсангни билдирди. Ва сенга Аллоҳнинг фазли улуғ бўлди”. (Яъни, Аллоҳ таоло ўз фазли ва марҳамати ила оятлар тушириб, ҳақиқатни баён қилмаганида, Тўъма ибн Убайрақнинг қавми, уни одамлар олдида оқлашни талаб қилиб, айбни яҳудий шахсга ағдариб, Пайғамбарни адаштиришга уриниб қолган эдилар. Аммо бу ишлари билан улар ўзларини адаштирадилар, холос. Хар қанча уринсалар ҳам Пайғамбарга (с.а.в.) зарар етказа олмайдилар. Аллоҳ доимо ўз Пайғамбарини сақлайди. Мазкур ҳодисада ноқулайликдан сақлаб қолгани ўзига хос фазлу карамдир. Лекин асосий фазли ва ҳақиқий марҳамати: “Аллоҳ сенга китобни (Қуръонни) ва ҳикматни (суннатни) туширди ҳамда билмаган нарсангни билдирди. Ва (шу билан) сенга Аллоҳнинг фазли улуғ бўлди”.) (Нисо, 113).

13. Аллоҳ ва Расули бирор ишга буюрса, бандаларда ҳеч бир ихтиёр қолмайди.

وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْراً أَن يَكُونَ لَهُمُ الْخِيَرَةُ مِنْ أَمْرِهِمْ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالاً مُّبِيناً

“Ҳеч бир мўмин эркак ва ҳеч бир мўмина аёл учун Аллоҳ ва Унинг Расули бир ишга ҳукм қилганида, ўз ишларини ўзларича ихтиёр қилмоқ йўқ. Ким Аллоҳга ва Унинг Расулига осий бўлса, бас, батаҳқиқ, очиқ адашиш-ла адашибди” (Аҳзоб, 36).

14. Муҳаммад соллаллоҳу алайҳи васаллам умматлари учун ҳужжатдирлар.

يَا أَيُّهَا النَّاسُ قَدْ جَاءكُم بُرْهَانٌ مِّن رَّبِّكُمْ وَأَنزَلْنَا إِلَيْكُمْ نُوراً مُّبِيناً

“Эй одамлар! Сизга Роббингиздан бурҳон келди ва сизга аниқ нурни нозил қилдик”. (Бу бурҳон Қуръони Каримдир. Ушбу бурҳон Аллоҳнинг ягоналигининг бурҳонидир. Ушбу бурҳон Пайғамбар алайҳиссаломнинг ҳақликлари бурҳонидир. Ушбу бурҳон Исломнинг икки дунё саодатига элтувчи дин эканлигининг бурҳонидир. Аллоҳ таоло Ўз бандаларига раҳм этиб, уларга икки дунё бахтига эришиш дастури қилиб нозил этган бу Қуръон аниқ нурдир.) (Нисо, 174).

15. Муҳаммад соллаллоҳу алайҳи васаллам карамли Расулдирлар.

إِنَّهُ لَقَوْلُ رَسُولٍ كَرِيمٍ

“Албатта у(Қуръон) карамли Расулнинг сўзидир”. (Қуръони Каримни Пайғамбаримиз саллоллоҳу алайҳи васалламга нисбат берилиши У зот (с.а.в) у каломни тиловат қилувчи ва кишиларга етказувчи эканлигидандир.) (Алҳааққаҳ, 40).

16. Муҳаммад соллаллоҳу алайҳи васаллам буюк хулқ соҳибидирлар.

وَإِنَّكَ لَعَلى خُلُقٍ عَظِيمٍ

“Ва албатта, сен улкан хулқдасан” (Қалам, 4).

17. Расулуллоҳ соллаллоҳу алайҳи васаллам барча оламлар учун раҳматдирлар.

وَمَا أَرْسَلْنَاكَ إِلَّا رَحْمَةً لِّلْعَالَمِينَ

“Биз сени фақат оламларга раҳмат қилиб юбордик” (Анбиё, 107).

18. Аллоҳ таолонинг Ўзи Муҳаммад соллаллоҳу алайҳи васалламнинг Расул эканликларига гувоҳлик берди.

مُّحَمَّدٌ رَّسُولُ اللَّهِ وَالَّذِينَ مَعَهُ أَشِدَّاء عَلَى الْكُفَّارِ رُحَمَاء بَيْنَهُمْ تَرَاهُمْ رُكَّعاً سُجَّداً يَبْتَغُونَ فَضْلاً مِّنَ اللَّهِ وَرِضْوَاناً سِيمَاهُمْ فِي وُجُوهِهِم مِّنْ أَثَرِ السُّجُودِ ذَلِكَ مَثَلُهُمْ فِي التَّوْرَاةِ وَمَثَلُهُمْ فِي الْإِنجِيلِ كَزَرْعٍ أَخْرَجَ شَطْأَهُ فَآزَرَهُ فَاسْتَغْلَظَ فَاسْتَوَى عَلَى سُوقِهِ يُعْجِبُ الزُّرَّاعَ لِيَغِيظَ بِهِمُ الْكُفَّارَ وَعَدَ اللَّهُ الَّذِينَ آمَنُوا وَعَمِلُوا الصَّالِحَاتِ مِنْهُم مَّغْفِرَةً وَأَجْراً عَظِيماً

“Муҳаммад Аллоҳнинг Расулидир. У билан бирга бўлганлар кофирларга шиддатли, ўзаро раҳимдилдирлар. Уларни Аллоҳдан фазл ва розилик тилаб, рукуъ ва сажда қилган ҳолларини кўрурсан. Уларнинг сиймоси сажда асаридан юзларида (балқийдир). Ана ўша, уларнинг Таврот ва Инжилдаги мисолларидир. Бу худди уруғини ёриб чиқариб, қувватланиб, йўғонлашиб, поясида тик туриб, деҳқонларни ажаблантирган бир экинга ўхшайдир. Кофирларнинг ғазабини қўзиш учун. Аллоҳ улардан иймон келтириб ва солиҳ амалларни қилганларга мағфират ва улуғ ажрни ваъда қилди”. (Саҳобалар, оталари ёки болалари кофирлар сафида бўлсалар, уларга қарши ҳам қаттиққўл бўлганлар. Аммо ким бўлишидан қаттий назар, мусулмонга меҳрибон бўлишган. Уларнинг асосий сифатларидан бири — ҳамма ишни Аллоҳнинг фазли ва розилиги учун қилишлари. Яна бир сифатлари — улар доим рукуъ ва сажда холатида, яъни, ибодат холатида бўладилар. ) (Фатҳ, 29).

19. Расулуллоҳ соллаллоҳу алайҳи васалламда гўзал ўрнак бор.

لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِّمَن كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيراً

“Батаҳқиқ, сизлар учун–Аллоҳдан ва охират кунидан умидвор бўлганлар учун ва Аллоҳни кўп зикр қилганлар учун Расулуллоҳда гўзал ўрнак бор эди”. (Пайғамбаримиз (с.а.в.) аҳзоб урушида ҳам, одатдагидек, энг гўзал намуналарни кўрсатдилар. Хавф-хатар тасвирлаб бўлмайдиган даражада катта эканига қарамай, заррача қўрқмасдан, Мадинани ҳимоя қилишга чиқдилар. Салмони Форсийнинг (р.а.) фикрларини қабул этиб, ҳандақ қазишни бошладилар. У зот (с.а.в.) шундай хатарли ва нозик бир пайтда мўмин-мусулмонлар учун ишонч, орзу-умид, хотиржамлик тимсолига айландилар.) (Аҳзоб, 21).

20. Муҳаммад соллаллоҳу алайҳи васалламнинг қиёматдаги мақомлари.

وَيَوْمَ نَبْعَثُ فِي كُلِّ أُمَّةٍ شَهِيداً عَلَيْهِم مِّنْ أَنفُسِهِمْ وَجِئْنَا بِكَ شَهِيداً عَلَى هَـؤُلاء وَنَزَّلْنَا عَلَيْكَ الْكِتَابَ تِبْيَاناً لِّكُلِّ شَيْءٍ وَهُدًى وَرَحْمَةً وَبُشْرَى لِلْمُسْلِمِينَ

“Ҳар бир умматга ўзидан гувоҳ олиб келган кунимизда сени анавиларга (умматингга) гувоҳ қилиб келтирамиз. Сенга китобни ҳар бир нарсани баён қилувчи этиб, мусулмонларга ҳидоят, раҳмат ва хушхабар қилиб нозил этдик”. (Яъни, қиёмат куни ҳар бир умматга Пайғамбарини гувоҳ этганимиздек, сени ҳам умматингга гувоҳ қилиб келтирамиз. Сенга Қуръони Каримни нозил қилишдан мақсад ҳар бир нарсани баён қилиб беришдир. Қуръон мўминлар учун Аллоҳнинг раҳматидир, мусулмонлар учун ҳидоятдир. Қуръони Карим мўминлар учун хушхабардир, уларга иймонлари орқасидан келадиган яхшиликлар хушхабарини беради.) (Наҳл, 89).

21. Муҳаммад соллаллоҳу алайҳи васалламга эргашганнни Аллоҳ таоло яхши кўради.

قُلْ إِن كُنتُمْ تُحِبُّونَ اللّهَ فَاتَّبِعُونِي يُحْبِبْكُمُ اللّهُ وَيَغْفِرْ لَكُمْ ذُنُوبَكُمْ وَاللّهُ غَفُورٌ رَّحِيمٌ

“Сен: “Агар Аллоҳга муҳаббат қилсангиз, бас, менга эргашинг. Аллоҳ сизга муҳаббат қилади ва сизларни гуноҳларингизни мағфират қилади”, деб айт” (Оли Имрон, 31).

22. Муҳаммад соллаллоҳу алайҳи васаллам ҳам Аллоҳнинг бандасидирлар.

وَأَنَّهُ لَمَّا قَامَ عَبْدُ اللَّهِ يَدْعُوهُ كَادُوا يَكُونُونَ عَلَيْهِ لِبَداً

“Ва, албатта, Аллоҳнинг бандаси Унга ибодат қилиб турганда улар унинг атрофида от ёлидек тўпланиб, босиб юборай дейишди”. (Бу оятда жинларнинг Пайғамбар алайҳиссалом ҳузурларига иккинчи бор келиб Қуръон эшитганлари пайти тасвирланяпти.) (Жин, 19).

Сўзимиз охирида мавзуга алоқадор бир ҳадисни кўриб ўтамиз.

Анас розияллоҳу анҳудан ривоят қилинади, албатта, Расулуллоҳ соллаллоҳу алайҳи васаллам “Сизлардан бирингиз, токи мен унга боласидан ҳам, отасидан ҳам ва барча инсонлардан ҳам маҳбуброқ бўлмагунимча, комил мўмин бўлмайди” дедилар. Муттафақун алайҳ.

Нозимжон ИМИНЖОНОВ

таржимаси

Мақола муаллифи: МУҲАММАД РАЖАБ МУНЪИМ

Жорий йилнинг 15 июль куни Ҳиндистон Ислом маданияти маркази раҳбари Cиражуддин Қуреший Имом Бухорий мажмуасига ташриф буюрди. Бу ҳақда Имом Бухорий халқаро илмий-тадқиқот маркази
Матбуот хизмати хабар берди.

Меҳмонни Имом Бухорий халқаро илмий‑тадқиқот маркази вакиллари ва мажмуа мутасаддилари кутиб олди. Зиёрат давомида меҳмон илмий‑маданий меросга бўлган қизиқишини айтди.

Зиёратдан сўнг Имом Бухорий халқаро илмий‑тадқиқот марказининг фаолияти ва унда сақланаётган қўлёзмалар билан яқиндан танишиш истагини билдирди. Марказ олиб бораётган ишлар билан ва мавжуд қўлёзмалар билан танишиб, келажакда илмий‑амалий ҳамкорлик йўлга қўйилса, икки давлат муносабатларини мустаҳкамлаш билан бир қаторда марказларнинг илмий ходимларини малакасини оширишда икки томонлама манфаатли бўлишини таъкидлади. Шунингдек, у фахрий меҳмонлар дафтарига ўзининг тилакларини ёзиб қолдирди.

Учрашув сўнгида Ҳиндистон Ислом маданияти маркази ва Имом Бухорий халқаро илмий‑тадқиқот маркази илмий ходимларининг халқаро конференция, симпозиумларда иштирок этиш ва малакасини ошириш каби масалаларда ҳамкорлик қилишга оғзаки келишилди.

ЎМИ Матбуот хизмати