Кеча, 17 сентябрь куни Аммон шаҳрида Ўзбекистон ва Иордания ташқи сиёсат идоралари ўртасида илк маротаба сиёсий маслаҳатлашувлар бўлиб ўтди.
ТИВ матбуот хизмати маълумотига кўра, томонлар делегацияларига Ўзбекистон Республикаси Ташқи ишлар вазирининг ўринбосари Дилшод Ахатов ва Иордания Ҳошимийлар Қироллиги Ташқи ишлар ва муҳожирлар масалалари бўйича вазирлик бош котиби Сажа ал-Мажалий бошчилик қилди.
Сиёсий маслаҳатлашувларда Иордания томонидан режалаштириш ва халқаро тараққиёт, саноат ва савдо, рақамли иқтисодиёт ва стартаплар вазирликлари, парламент, шунингдек, Иордания ва Аммон шаҳри савдо-саноат палаталарининг масъул вакиллари иштирок этди.
Делегациялар сиёсий, савдо-иқтисодий, инвестицион, маданий-гуманитар ва бошқа соҳалардаги алоқаларни ривожлантиришга урғу бериб, ҳамкорликнинг ҳозирги ҳолатини батафсил кўриб чиқди, минтақавий ва халқаро муаммолар, БМТ, Ислом ҳамкорлик ташкилоти ва бошқа тузилмалар доирасидаги алоқаларнинг амалий жиҳатлари юзасидан фикр алмашди.
Томонлар икки мамлакат савдо-саноат палаталари ўртасида амалий ҳамкорлик ўрнатиш ва Ишбилармонлар кенгашини тузиш бўйича таклифларни кўриб чиқди.
Ўзбекистон мусулмонлари идораси Матбуот хизмати
