8 декабрь санаси мамлакатимизда инсон ҳуқуқлари ва манфаатларининг асоси, Ўзбекистон мустақиллигининг ҳуқуқий манбаси бўлган Конституция қабул қилинганинг 25 йиллиги санасини нишонладик.

Ушбу кунда Республикамизнинг барча ҳудудларида турли тадбирлар ва эзгу ишларга йўғрилган маросимлар ўтказилди. Шифохоналар, мактабларнинг очилиши халқимизга совға бўлди дейиш мақсадга мувофиқдир.

Кеча, 8 декабрь куни Андижон шаҳрида шоир Муҳаммад Юсуф хотирасига бағишланган ҳиёбон ва унинг номи билан аталувчи ихтисослашган мактаб-интернатининг очилиш маросими ўтказилди. Таълим муассасасида шоир ҳаётини акс эттирувчи музей ҳам очилган. Музейда унинг шахси ва адабий меросига доир жуда кўп материаллар тўпланган.

Наманганда Конституция қабул қилинганининг 25 йиллиги арафасида мукаммал таъмирдан чиқарилган «Дўстлик уйи» фойдаланишга топширилди.

Вилоятда 80 дан ортиқ миллат вакиллари истиқомат қилмоқда. Рус, қирғиз, тожик, корейс миллий-маданий марказлари фаолият кўрсатмоқда.

Наманган вилоятининг Қирғизистон билан чегара ҳудудидаги Нанай қишлоғида 216 ўринли мактаб ва 60 ўринли ҳудудий шифохона ҳам фойдаланишга топширилди.

Бу сингари тадбирлар юртимизнинг барча ҳудудларида амалга оширилмоқда.