muslim.uz
Қозоғистонда "Вақф" фондига янги раҳбар тайинланди
Қозоғистон мусулмонлари идораси раиси Серикбай ҳожи Ўраз «Вақф (Уакып)» хайрия жамоат фондининг янги тайинланган президенти Қайрат Азимов билан учрашди. Бу ҳақда muftyat.kz хабар берди.
Қозоғистон бош муфтийси Қайрат Муратулини янги лавозимга тайинлангани билан табриклаб, унинг истиқболдаги фаолиятига омад тилади. Учрашувда диний соҳа ходимларининг ижтимоий муаммолари, республика даражасидаги тадбирларни ўтказиш, илф фанни ривожлантириш борасида суҳбатлашилди.
Серикбай ҳожи Ўраз бугунги кунда Фонд маблағлари ҳисобидан 350 нафар диний соҳа вакиллари стипендиялар олаётганини айтиб ўтиб, бунинг учун миннатдорлик билдирди.
Маълумот учун, Қозоғистонда 6 189 нафар диний соҳа хизматчилари фаолият юритади. Уларга маош тайинлаш бўйича янги лойиҳа амалга оширилиши режалаштирилаётгани айтиб ўтилган.
ЎМИ Матбуот хизмати
Расулуллоҳ соллалоҳу алайҳи васалламнинг шаклу шамойиллари
ЎМИ Матбуот хизмати
Зубайр ибн Аввом
Машҳур саҳобалардан Зубайр ибн Аввом ибн Ҳувайлид Асадий Қурайший розияллоҳу анҳунинг насаби Пайғамбаримиз Соллаллоҳу алайҳи васаллам насаблари билан Килобда туташади. У Хадича онамиз розияллоҳу анҳу сингари Бани Асад уруғидан. Пайғамбаримиз Соллаллоҳу алайҳи васаллам аммалари София бинти Абдулмутталиб розияллоҳу анҳонинг ўғли бўлган.
Ибн Саъд раҳматуллоҳи алайҳ “Тобақотул Кубро” асарида София бинти Абдулмуттолиб розияллоҳу анҳо ўғли Зубайрга қаттиққўллик билан тарбия бераётганини кўриб одамлар: “Ахир уни жуда қийнаб юбординг”, деганларида: “Мен уни пишисин, қатъиятли бўлсин дейман”, деб айтганини келтирган.
Йиллар ўтиб, онанинг орзуси ушалди. Зубайр ибн Аввом розияллоҳу анҳу баланд бўйли, ўта чидамли бўлиб вояга етди. Унда вафодорлик, бирсўзлик, сахийлик каби фазилатлар мужассам эди. Бир куни Расулуллоҳ (соллаллоҳу алайҳи ва саллам) унинг қўлидан тутиб: “Ҳар бир пайғамбарнинг хос ёрдамчиси бўлган, менинг хос ёрдамчим Зубайр ибн Аввомдир” деб марҳамат қилдилар (Имом Ҳоким).
Зубайр розияллоҳу анҳу олдинига фақирона ҳаёт кечирди. Аёли Асмо розияллоҳу анҳо уй ишларидан ташқари чорва боқиш, ўтин териш кабилар билан турмуш ўртоғига ёрдамлашди. Кейинроқ Зубайр ибн Аввом розияллоҳу анҳу тижорат билан шуғулланиб, бойиб кетди. Аммо сахийлиги туфайли уйида бирор нарса турмаган. Катта маблағ тушса, уйигача етиб бормай, йўлдаёқ одамларга тарқатиб юборарди.
Оиша розияллоҳу анҳо ривоят қилади: «Пайғамбаримиз Соллаллоҳу алайҳи васаллам Зубайрнинг уйида чироқ ёниб турганини кўрдилар ва “Эй Оиша, Асмо фарзандли бўлганга ўхшайди. Унга исм қўймай туринглар. Мен ўзим қўяман”, дедилар. У зот чақалоқни Абдуллоҳ деб атадилар ва хурмо билан танглайини кўтардилар”» (Имом Термизий).
Ҳазрат Умар розияллоҳу анҳу маслаҳат олган олти саҳоба, “аҳли шўро”нинг бири Зубайр ибн Аввом розияллоҳу анҳу бўлган.
Усмон ибн Аффон розияллоҳу анҳунинг замонига келиб Зубайр ибн Аввом розияллоҳу анҳу энг кўзга кўринган арбобларидан бирига айланди.
Зубайр ибн Аввом Расулуллоҳ (соллаллоҳу алайҳи ва саллам)дан бир лаҳза ҳам ажрамади. Доимо хизматларида бўлиб, буюрилган ишни сидқидилдан адо этарди. У киши Пайғамбаримиз Соллаллоҳу алайҳи васалламдан жами ўттиз саккизта ҳадис ривоят қилди. Ҳижрий ўттиз тўртинчи санада (милодий 656) Басрада вафот этди.
Кўкалдош ўрта махсус ислом билим юрти
4-курс талабаси маърупов Ойбек
Манбалар асосида тайёрлади
"Мурувват карвони” Қашқадарёда
2018 йил 18 ноябрь куни “Вақф” хайрия жамоат фонди томонидан “Мурувват карвони” номли хайрия тадбири доирасидаги озиқ овқат маҳсулотлари, ногиронлик аравачалари ва диний-маърифий адабиётлар Қашқадарё вилоятидаги ўксик қалбларга қувонч улашиш мақсадида Қарши шаҳрига етиб келди.
Қарши шаҳридаги “Гулшан” кошонасида вилоятдаги кам таминланган 100 нафар оилага озиқ-овқат маҳсулотлари, 15 нафар ногиронлги бор шахсларга ногиронлик аравачаси, Китоб шаҳар “Хожа Бухорий” ўрта махсус ислом билим юртида таълим олаётган барча талабаларга кийим-кечаклар улашди ва ушбу билим юртининг икки нафар талабасининг 6,5 млн сўм ярим йиллик шартнома пулини тўлаб берилди.
Шу куннинг ўзида фонд томонидан шаҳар ва туман бош имом-хатиблари орқали вилоятидаги 182 та жоме масжидларга тўрт турдаги диний-маърифий китоблар берилди. Шунингдек тадбир сўнгида ЎМИ Қашқадарё вилояти вакиллиги ва ҳомийлар томонидан тадбирда иштирок этган ёрдамга муҳтож оилалар ва ногиронлги бор шахсларга хайрия дастурхони ёзилиб ош тортилди.
Самарқанддаги халқаро конференцияда Имом Бухорий мероси ўрганилди
Самарқанд давлат университетида ўтказилган халқаро илмий-амалий конференцияда Туркия, Тожикистон, Қирғизистон, Қозоғистон диний идора вакиллари, диншунос олимлари Имом Бухорий илмий мероси ва уларнинг ҳозирги замонда ўрганилишини муҳокама қилди.
Анжуманда мазкур хорижий мамлакатлардаги олий ўқув юртларининг файласуфлари, профессор-ўқитувчи ва талабалари ҳам иштирок этди.
Конференцияда Имом Бухорийнинг илмий мероси, у қолдирган ҳадислар ва улардан миллий қадриятларни тарғиб қилишда фойдаланиш усуллари хусусида фикр юритилди. Шунингдек, XVIII-XIX асрларда, Имом Бухорийдан аввал ҳамда кейин ёзилган қуръоншунослик ва ҳадисшуносликка оид асарлар таҳлил қилинди.
Маърузаларда бугунги глобаллашув жараёнларида сохта мафкураларнинг инсон онгига таъсири, шахс идеалини шакллантиришда маърифатнинг ўрни ҳақида фикр юритилди.
Халқаро анжуман давомида мамлакатларнинг соҳага ихтисослашган олий ўқув юртлари ўртасида ҳамкорликни йўлга қўйиш масалалари бўйича таклифлар берилди. Бу борада эришилган келишувлар асосида7 2019 йилда шартномалар тузилиши режалаштирилмоқда.
“Имом Бухорий маънавий мероси ва ҳозирги замон” мавзусидаги ушбу тадбир якунида Имом Бухорий ҳаёти фаолияти ҳақида ҳикоя қилувчи видеофильм намойиш этилди.
15 ноябрь куни бошланган анжуманнинг давоми сифатида кеча – 16 ноябрда Самарқанд бўйлаб саёҳат, кутубхоналар ва музейларга ташрифлар уюштирилди.
ЎМИ Матбуот хизмати