Август ойида Чеченистонда Шалида йирик масжиднинг очилиши ва Халқаро Қуръон мусобақаси бўлиб ўтди.

Мусобақада 25 давлатдан ҳофизи Қуръонлар иштирок этди. Ушбу мусобақада юртимиз шарафини Йўлдош қори Нуриддинов ҳимоя қилди.

Танлов якунларига кўра биринчи ўрин соҳибига 100 минг АҚШ доллари, иккинчи ўринга 50 минг АҚШ доллари, учинчи ўринга эса 25 минг АҚШ доллари миқдорида мукофот пуллари топширилди

1-ўрин: Ливия
Иштирокчи – Абдурраҳмон ал-Башир Солим
Ривоят: имом Қолуннинг имом Нофеъдан ривояти
Балл: 100

2-ўрин: Яман
Иштирокчи – Абдулмажид Мужоҳид Алий ас-Самовий
Ривоят: имом Ҳафснинг имом Осимдан ривояти
Балл: 99.97

3-ўрин: Сурия
Иштирокчи - Аҳмад Муҳаммад Умар
Ривоят: имом Ҳафснинг имом Осимдан ривоти
Балл: 99.90

Ўзбекистонлик қори Нуриддинов Йўлдошбек имом Ҳафснинг имом Осимдан ривояти асосида тиловат қилиб, 100 балдан 98.37 балл тўплади. Бу эса уни 7-ўринни эгаллашига замин яратди. Бу ҳақда Тошкент ислом институти ахборот хизмати хабар берди.

Ўзбекистон мусулмонлари идораси Матбуот хизмати

Саудия Арабистони 27 сентябрдан хорижликларга сайёҳлик визалар беришни бошламоқчи. Бу ҳақда Al Arabiya телеканали хабар берди (http://kun.uz/). Сайёҳлар визани Саудия Арабистонига келгач олишлари ёки электрон шаклни олдинроқ тўлдириб қўйишлари мумкин.

Таъкидланишича, визалар 51 та давлат фуқароларига 90 кун муддатга берилади. Унинг қиймати 118 долларни ташкил қилади. Бу суммага мажбурий тиббий суғурта ҳам киради. Саудия Арабистони расмийлари визаларни онлайн тартибда расмийлаштириш бир неча дақиқагина вақт олиши ва хорижликларга виза олиш учун элчихонага бошқа мурожаат қилишлари талаб этилмаслигига ваъда берилди.

Ҳозирда Подшоҳлик ҳукумати туристик соҳани ривожлантиришга катта аҳамият бермоқда. Мутахассисларнинг фикрича, сайёҳлик тармоғи иқтисодиётни жадаллаштиришга ва энергия захиралари экспортидан камроқ тобе бўлишга туртки беради. Саудия Арабистони 2030 йилгача йилига 30 миллион киши келишига интилмоқда. Ҳозирда бу рақам 16 миллион кишини ташкил қилади, лекин улар орасида сайёҳлар йўқ.

Бироқ Саудия Арабистони яқин орада туризмдан ҳар йили 47 миллиард АҚШ доллари олишни кўзламоқда.

Ўзбекистон мусулмонлари идораси Матбуот хизмати

Бугун, 4 сентябрь куни Ўзбекистон Республикаси давлат мустақиллигининг 28 йиллиги ҳамда янги 2019-2020  ўқув йили бошланиши муносабати билан Ўзбекистон Мусулмонлари идораси тизимидаги барча таълим муассасаларида байрам тадбири бўлиб ўтди.

Тадбирда билим юрти мудирлари, маънавий-маърифий ишлар бўйича мудир ўринбосарлари, Ўзбекистон мусулмонлари идораси вилоятлардаги вакиллари, ота-оналар ҳамда талабалар иштирок этишди.

Тадбир аввалида билим юртлари мудирлари Ўзбекистон мусулмонлари идораси раиси, муфтий Усмонхон Алимовнинг билим юрти жамоасига мустақиллигимизнинг 28 йиллиги ҳамда янги ўқув йилининг бошланиши муносабати билан йўллаган байрам табригини ўқиб эшиттирди.

Шундан сўнг сўзга чиққанлар йиғилганларни энг улуғ, энг азиз бўлган Мустақиллик байрами ҳамда билим юртига талабаликка қабул қилинганларни талабаликка мушарраф бўлганлари билан қизғин муборакбод этдилар.

Тадбирдан сўнг билим юртлари мажлислар залида анъанага мувофиқ «Мустақиллик ва хотира дарси» бошланди. Дарс Республикамизнинг биринчи Президенти Ислом Каримов хотирасига бағишланган Қуръони карим тиловати билан бошланди.

Мустақиллик дарслари “Жонажон Ўзбекистоним мангу бўл омон!” мавзусида тайёрланган ўқув қўлланмаси асосида олиб борилди. Дарсда мустақилликнинг ўтган 28 йили давомида юртимиздаги барқарор, тинч ва осуда ҳаёт, жамиятимиздаги ўзаро ҳурмат, меҳр-оқибат ва бағрикенглик каби олийжаноб фазилатлар бугунги мисоллар ёрдамида қиёслаш орқали талабаларга етказиш дарснинг асосий мақсади бўлди. Дарс бошланишидан аввал Ўзбекистон Республикаси Давлат мадҳияси тингланди. Мустақиллик дарси қўлланмасидаги муқаддима, мамлакатимизнинг иқтисодий салоҳияти, мустақиллик йилларида олиб борилган маънавий-маърифий ислоҳотлар, истиқлолдан кейин диний қадриятлар ва диний таълимга эътибор ҳамда тинчлик – энг олий неъмат каби мавзулар билим юрти устозлари томонидан батафсил тушунчалар берилди.

Шунингдек, дарсда мустақиллик халқимизнинг озодлик, ҳуррият, эркинлик шабадасидан тўйиб-тўйиб нафас олиши, ўзининг ҳақиқий инсоний бахти ва истиқболини яратиш имкониятига эга бўлиши, истиқлолимизнинг дастлабки кунлариданоқ халқимизнинг эътиқод эркинлиги кафолатланиши, динимизни ўрганишга, илмий изланишларга кенг имкониятлар пайдо бўлганлигида эканлиги таъкидланди.      

   Мустақиллик дарслари педагогиканинг замонавий усуллари кенг қўлланган ҳолда, техника воситаларидан ҳамда видеоматериаллардан унумли фойдаланиб ўтилди.

       Шундан сўнг билим юртларида жадвал асосида дарс машғулотлари бошланди.

“Хожа Бухорий” ўрта махсус ислом билим юрти

  Кўкалдош ўрта махсус ислом билим юрти

  Қорақалпоғистон Республикаси Нукус шаҳрида жойлашган Муҳаммад ибн Аҳмад ал-Беруний ўрта махсус ислом билим юрти

  Имом Фахриддин ар-Розий ўрта махсус ислом билим юрти

  Мир Араб ўрта махсус ислом билим юртида

  Мир Араб ўрта махсус ислом билим юртида ўтказилган билимлар куни

  «ЖЎЙБОРИ КАЛОН» ЎРТА МАХСУС ИСЛОМ БИЛИМ ЮРТИ

Ўзбекистон Мусулмонлари идораси матбуот хизмати

Шимолий минтақаларда майда туёқли, кийиксимонлар оиласига мансуб кичик жуссали ҳайвон яшайди. Бу кийикнинг лотинча номи Moschus moschiferus бўлиб, у “миск чиқарувчи кийиклар” турига киради.

Танасининг узунлиги 1 метр, думи 4-6 сантиметр, ердан баландлиги 70 сантиметр, вазни 11-18 килограмм келади. Орқа оёқлари олд оёқларидан бироз узунроқдир. Эркагининг юқори лаблари остидан  7-9 сантиметр узунликдаги тишлари чиқиб туради. Ушбу жонзотлар Шарқий Сибир, Шарқий Ҳимолай, Тибет, Сахалин ороли ва Кореяда тарқалган бўлиб, асосан тоғлардаги қояларда яшайди. Шунингдек, уларда миск ишлаб чиқарадиган безлар мавжуд.  Ушбу без жигарранг тук билан қопланган тери халтачаларда жойлашган.

Миск кийикнинг қорин (киндик) қисмида шаклланади. Кейин ўша ердаги қўнғирранг тери халтачаларга тўлгач, кийик харсангтошга қорнини ишқайди. Ишқаланиш натижасида киндик атрофидаги халтачалар ичи тўла миск билан ерга тўкилади. Унинг ранги қора бўлади. Миск изловчилар тоғлардан ана шу халтачаларни териб келадилар.

Вояга етган эркак кийикнинг битта безида 10-20 грамм табиий миск мавжуд бўлиб, қимматбаҳо маҳсулот ҳисобланади. Мискнинг кимёвий таркиби жуда мураккаб: ёғ кислоталари, мум, ароматик ва стероид бирикмалар ва холестерин эстерлари. Миск ҳидининг асосий ташувчиси макроциклли миск кетонидир.

Ушбу мискни халқ тилида мушк ҳам дейилиб, парфюмерия саноатида ҳамда тиббиётда ишлатилади. Қадимда араблар ва тибетликлар мискдан эркаклик жинсий қувватини оширишда фойдаланишган.

“Миск” калимаси Қуръони Каримнинг Мутоффифин сурасининг 25-оятида Аброрларнинг васфида келган.

Ибн Шиҳоб раҳимаҳуллоҳ Анас розияллоҳу анҳудан қилган ривоятида: “…Сўнг жаннатга киргизилдим, қарасам унда маржондан бўлган қуббалар бор экан. Ва тупроғи миск экан…”, – деб айтилади. Муттафақун алайҳ.

Интернет маълумотлари асосида Нозимжон Иминжонов тайёрлади

Аввал хабар берганимиздек, шу кунларда барча ҳудудларда имом-хатиблар ва имом ноиблари  ўртасида ўтказилаётган  “Энг маърифатли имом” кўрик танловининг иккинчи босқичи – вилоят босқичи ўтказилиб, муносиблар аниқланмоқда.

 Жиззах вилоятида ҳам 13 та туман-шаҳарларда ғолиб бўлган имомлар танловнинг вилоят босқичида ўзаро билим юзасидан беллашдилар.

 Ҳакамлар ҳайъати иштирокчиларни Ислом илмлари бўйича билимлари, шунингдек, маънавий-маърифий тарғибот ишларидаги фаолликлари, ташаббускорлиги бўйича белгиланган тартибда баҳолаб бордилар.

Якуний натижаларга кўра Жиззах шаҳар «Раваллиқ» жоме масжиди имом-хатиби Бекмуҳаммад Алибоев биринчи ўринни қўлга киритиб, танловнинг Республика босқичида иштирок этиш ҳуқуқини қўлга киритди.

Шунингдек, танловга ҳамоҳанг равишда турли номинациялар бўйича масжидларда фаол хизмат кўрсатиб келаётган ходимлар тақдирландилар.

Ўзбекистон мусулмонлари идораси Масжидлар бўлими