Маккаи мукаррама

Маккаи мукаррамадаги зиёратчиларни егулик ва ичимлик суви билан таъминлаш қўмитаси, Масжидул Ҳаром, масжидлар, мамлакатга кириш ва чиқиш пунктлари, Макка шаҳри шифохоналаридаги фавқулодда тиббий марказлар, шунингдек, Подшоҳ Абдулазиз халқаро аэропорти ва Жидда исломий бандаргоҳи ҳудудларида рамазон ойи давомида 20 миллиондан ортиқ рўзадорларни ифторлик таомлари билан таъминлаш ишларини назорат қилишини таъкидлади.

Маккадаги зиёратчиларни егулик ва ичимлик суви билан таъминлаш қўмитаси раиси Доктор Ҳишом бин Абдурраҳмон ал-Фолиҳ қўмита Масжидул Ҳаром зиёратчилари ва эҳтиёжманд кишиларга тақдим этиладиган ифторлик таомлари тарқатилишини назорат қилишини таъкидлаб, Саудия Арабистони ҳукумати ва халқининг Байтуллоҳ зиёратчиларининг Саудия Арабистонига келиб юртларига қайтгунига қадар ибодатларини осон ва қулай адо этишларида барча хизматларни амалга оширишга доимо тайёр эканини таъкидлаб, қўмитанинг бу борада Ижтимоий таъминот ва меҳнат вазирлигининг Маккаи мукаррама шаҳридаги бўлинмаси, таълим-тарбия ишлари бошқармаси ва 57та хайрия муассасалари билан ҳамкорликда иш олиб бораётганини қўшимча қилди. Бу иш учун жами 1000га яқин кўнгилли ажрталаб йигитлар хизматга жалб қилинганини маълум қилди.     

Мадина мунаввара

Мадинаи мунавварадаги Масжидун Набавий ишлари Бош бошқармаси вакиллигидаги  мусҳафлар ишлари идораси муборак рамазон ойининг биринчи ўн кунлигида вакилликнинг Масжидун Набавий зиёратчилари учун кўрсатиладиган хизматлар савиясини орттиришдаги саъй-ҳаракатлари доирасида зиёратчилар учун 35 000 дона Мусҳаф тарқатди.

Шунингдек, Мусҳаф ишлари идораси Масжидун Набавийдаги Мусҳафлар сақланадиган жавонлар тозалигини таъминлаш ва уларни таъмирлаш бўйича иш олиб борди. Бир қатор ислом давлатларидан ташриф буюрадиган зиёратчилар фойдаланишлари учун Масжидун Набавий жавонларига Қуръони карим маънолари таржима қилинган  62 дона китобни ҳамда кўзи ожизлар учун брайл ёзувида чоп этилган 13 дона Мусҳафни жойлаштирди.  

Халқаро алоқалар бўлими ходими

Илёс Аҳмедов тайёрлади.

Куни кеча соат 11.00 да бизнинг Андижон вилояти Шаҳрихон тумани Янги ҳаёт маҳалла фуқаролар йиғини ҳудудидаги “Жўрабой” масжидига Ўзбекистон мусулмонлари идораси раиси, муфтий Усмонхон Алимов ҳазратлари ташриф буюриб, кўнглимизни тоғдек кўтардилар. Ҳазрат жамоамиз билан самимий суҳбат қуриб, ҳозирги кунда юз бераётган ислоҳотларнинг мазмун-моҳияти ҳақида сўзлаб бердилар. Рамазон ойида ибодатларимизни кўпайтириш юзасидан тавсиялар айтдилар.

Суҳбатда фаолларимиздан Олимжон Аҳмедов ва Муҳаммадюсуф Тожиматовлар сўзга чиқиб, юртимиз тараққиёти, динимиз равнақи ва халқимиз фаровонлиги йўлида кеча-ю кундуз тинмай хизмат қилаётган муҳтарам юртбошимизга, муфтий ҳазратлари орқали раҳматлари ва миннатдорчиликларини изҳор қилдилар.

Илоҳо, юртимиз обод, осмонимиз мусаффо, бўлсин, азиз Ватанимизга кўз тегмасин.

Бахтиёржон ҚОДИРОВ,

Жўрабой” жоме масжиди имом-хатиби 

Жазоирнинг “El Djazairia One” телеканали Рамазон ойида Ўзбекистон ҳақида туркум кўрсатувларни намойиш этмоқда. Кўрсатувнинг 4-сонида “Ҳазрати имом” мажмуасидан репортаж намойиш этилди. Кўрсатувнинг мазкур сонида мажмуада сақланаётган бебаҳо хазина – Ҳазрати Усмон розияллоҳу анҳу даврида кўчирилган Қуръони каримнинг асл нусхаси – “Усмон Мусҳафи” ҳақида ҳикоя қилинади.

Бошловчи Ҳазрати Усмон розияллоҳу анҳунинг ҳаётлари, халифалик даврлари, Қуръони каримнинг мусҳафларга кўчирилиши ҳақида манбалар асосида ҳикоя қилади. Ва ўша даврда тўрт нусхада кўчирилган мусҳафнинг Ўзбекистонга келиш тарихи ҳақида сўзлаб беради:

Дастур муаллифининг айтишича, бу сингари кўрсатувлар давомли бўлади. Ўзбекистон ҳақидаги видеолавҳалар жазоирликлар учун Рамазон туҳфаси экани қайд этилди.

ЎМИ Матбуот хизмати

Дунё мусулмонолари ҳар йили муборак Рамазон ойини ўзгача кайфиятда ўтказиб келадилар. Кўп сонли мусулмонларга ифторлик дастурхонлар ёзилиши, масжидларда жамоат бўлиб таробеҳ намозларини адо этишлар, муҳтожларга хайр-саҳоват кўрсатишлари бунга яққол мисол бўла олади.

Юқорида тилга олинган ҳолатларнинг ҳар бири ўзига хос аҳамиятга эга. Хусусан, масжидларда жамоат билан таробеҳ намозларини адо этилиши, мусулмонларнинг бирдамлигини, ҳамжиҳатлиги ифода этади.

Ушбу сўзларнинг исботи сифатида, қуйида яқин қўшниларимиз бўлмиш, Қозоғистон ва Қирғизистонлик мусулмонларнинг Рамазон ойи кечаларида таровеҳ намозларини ҳамжиҳатликда адо этишларига доир фотолавҳаларни кўришингиз мумкин.

Мақсуд Каримов
ЎМИ Матбуот хизмати

Рамазоннинг фазилатлари жуда кўп. Ана шулардан бири рўзадор одамнинг дуоси ижобат бўлишидир.

Аллоҳ таоло Қуръони Каримда шундай деган: 

وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُمْ يَرْشُدُونَ

“Агар бандаларим сендан Мени сўрасалар, Мен, албатта, яқинман. Дуо қилгувчи дуо қилганда ижобат қиламан. Бас, Менга ҳам ижобат қилсинлар ва иймон келтирсинлар. Шоядки тўғри йўлни топсалар”. (Абдуллоҳ ибн Амр розийаллоҳу анҳудан имом Аҳмад Ривоят қиладиларки, Пайғамбаримиз алаҳиссалом: “Қалблар идишга ўхшайди. Баъзилари баъзисидан кўпроқ жойлаштиради. Агар Аллоҳдан бирор нарса сўрайдиган бўлсангиз, ижобат бўлишига қаттиқ ишониб сўранг. Ғофил қалб билан дуо қилган банданинг дуосини Аллоҳ қабул қилмайди”, дедилар. Имоми Бухорий Абу Ҳурайра розийаллоҳу анҳудан ривоят қилган ҳадисда, Пайғамбаримиз алайҳиссалом: “Агар банда шошилишмаса, дуосига ижобат бўлади. Дуо қилдим, қабул бўлмади, демасин”, деганлар.)

Бу Бақара сурасининг 186-ояти бўлиб, у рўза ҳақидаги оятларнинг орасида келган. Бундан олдин мана бу оят келган:

شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ فَمَن شَهِدَ مِنكُمُ الشَّهْرَ فَلْيَصُمْهُ وَمَن كَانَ مَرِيضاً أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللّهُ بِكُمُ الْيُسْرَ وَلاَ يُرِيدُ بِكُمُ الْعُسْرَ وَلِتُكْمِلُواْ الْعِدَّةَ وَلِتُكَبِّرُواْ اللّهَ عَلَى مَا هَدَاكُمْ وَلَعَلَّكُمْ تَشْكُرُونَ

“Рамазон ойики, унда одамларга ҳидоят ҳамда ҳидояту фурқондан иборат очиқ баёнотлар бўлиб, Қуръон туширилгандир. Сиздан ким у ойда ҳозир бўлса, рўзасини тутсин. Ким бемор ёки сафарда бўлса, бас, саноғини бошқа кунлардан тутади. Аллоҳ сизларга енгилликни хоҳлайди ва сизларга қийинчиликни хоҳламайди. Саноғини мукаммал қилишингиз ва сизни ҳидоятга бошлаган Аллоҳни улуғлашингиз учун. Шоядки шукр қилсаларингиз”. (Аллоҳ таоло Ўзининг абадий мўъжизаси, қиёматгача инсониятга ҳидоят бўладиган китоби Қуръони Каримни тушириш вақти қилиб Рамазони шариф ойини ихтиёр қилганининг ўзи бу ойнинг фазилатини юксакка кўтарган. Энди эса, нур устига нур, фазилат устига фазилат қўшиб, рўза ибодатини ҳам шу Рамазон ойида тутишни фарз қилмоқда.) (Бақара, 185).

186-оятдан кейин эса ушбу оят келган:

أُحِلَّ لَكُمْ لَيْلَةَ الصِّيَامِ الرَّفَثُ إِلَى نِسَآئِكُمْ هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ عَلِمَ اللّهُ أَنَّكُمْ كُنتُمْ تَخْتانُونَ أَنفُسَكُمْ فَتَابَ عَلَيْكُمْ وَعَفَا عَنكُمْ فَالآنَ بَاشِرُوهُنَّ وَابْتَغُواْ مَا كَتَبَ اللّهُ لَكُمْ وَكُلُواْ وَاشْرَبُواْ حَتَّى يَتَبَيَّنَ لَكُمُ الْخَيْطُ الأَبْيَضُ مِنَ الْخَيْطِ الأَسْوَدِ مِنَ الْفَجْرِ ثُمَّ أَتِمُّواْ الصِّيَامَ إِلَى الَّليْلِ وَلاَ تُبَاشِرُوهُنَّ وَأَنتُمْ عَاكِفُونَ فِي الْمَسَاجِدِ تِلْكَ حُدُودُ اللّهِ فَلاَ تَقْرَبُوهَا كَذَلِكَ يُبَيِّنُ اللّهُ آيَاتِهِ لِلنَّاسِ لَعَلَّهُمْ يَتَّقُونَ

“Сизларга рўза кечасида хотинларингизга яқинлик қилиш ҳалол қилинди. Улар сизга либосдир, сиз уларга либосдирсиз. Аллоҳ сизнинг ўзингизга ҳиёнат қилаётганингизни билди, тавбангизни қабул этди ва сизларни афв этди. Энди уларга яқинлашаверинг ва Аллоҳ сизга ёзган нарсани талаб қилинг. Тонг пайтида оқ ип қора ипдан ажрагунча еб-ичаверинг. Сўнгра рўзани кечасигача батамом қилинг. Масжидларда, эътикофдалигингизда уларга яқинлик қилманг. Булар Аллоҳнинг чегараларидир, унга яқинлашманг. Аллоҳ одамларга Ўз оятларини шундоқ баён этади. Шоядки тақво қилсалар”. (“Эътикоф” сўзи бир нарсани лозим тутиш маъносини билдиради. Шариатда эса, масжитда Аллоҳга яқинлик ҳосил қилиш ниятида ибодатни лозим тутишга айтилади. Пайғамбаримиз алайҳиссолату вассалам Рамазони шарифнинг охирги ўн кунлигида эътикофда ўтирар эдилар. Эътикоф ўтирган одам иложи борича масжиддан чиқмай ибодат билан машғул бўлади. Унда банда Аллоҳ учун ҳамма нарсадан ажраб чиқади. Шунинг учун аёлларга яқинлик қилишдан ҳам ўзини тияди. Ушбу зикр қилинган нарсаларнинг барчаси Аллоҳ таолога боғлиқ нарсалар, Унинг чегаралари. Аллоҳ уларга яқинлашмасликка буюрмоқда, чунки чегарага қанча яқинлашилса, чегарани бузиш эҳтимоли шунча кўпаяди.) (Бақара, 187).

Дуо ҳақидаги оятдан олдин ҳам, ундан кейин ҳам рўза ҳақидаги оятларнинг келиши рўзадор дуога ҳарис бўлиши кераклигига, рўзадорнинг дуоси ижобат қилинишига ишорадир, шунга далолат қилади.

Шунинг учун барчамиз бу ойда барча солиҳ амаллар қатори дуо қилишга ҳам ҳарис бўлишимиз, айниқса, оғиз очиш арафасида дуо қилиб қолишнинг пайидан бўлишимиз керак.

Ҳадиси шарифларда ҳам рўзадорнинг дуоси ижобат қилинишига далиллар кўп.

Абу Ҳурайра розияллоҳу анҳудан ривоят қилинади, Расулуллоҳ соллаллоҳу алайҳи васаллам шундай дедилар: “Уч кишининг дуоси рад этилмайди. (Булар): одил имом (раҳбар, етакчи), оғзини очиш арафасида турган рўзадор ва мазлумнинг дуоси. Аллоҳ таоло мазлумнинг дуосини булутлар тепасига кўтаради, унга осмон эшиклари очилади ва Робб азза ва жалла “Иззатимга қасамки, сенга кейинчалик бўлса ҳам ёрдам бераман” дейди”. Имом Термизий ривоят қилган.

Яна Абу Ҳурайра розияллоҳу анҳудан ривоят қилинади, Расулуллоҳ соллаллоҳу алайҳи васаллам дедилар: “Учта дуо ижобат қилинадиган дуолардан: рўзадорнинг дуоси, мазлумнинг дуоси ва мусофирнинг дуоси”.

Аллоҳ таоло барчамизнинг тутаётган рўзаларимизни, қилаётган ибодатларимизни қабул айлаб, дуоларимизни ижобат этсин, омин!

Доктор Фозил Солиҳ Сомарроийнинг

мавъизаларидан Нозимжон Иминжонов таржимаси