muslim.uz
ОИТС бўйича махсус дарс
Ўзбекистон Президентининг 2018 йил 25-январдаги “Одамнинг иммунитет танқислиги вируси келтириб чиқарадиган касаллик тарқалишига қарши курашиш тизимини янада такомиллаштириш тўғрисида”ги қарори ижросини таъминлаш мақсадида жорий йилнинг 1 май куни Ўзбекистон мусулмонлари идорасининг Андижон вилояти вакиллигида вилоятда фаолият кўрсатаётган имом-хатиблар учун ОИТС иллатига қарши курашишга қаратилган махсус дарс ташкил қилинди.
Унда Андижон вилоят ОИТСга қарши курашиш маркази мутахассислари Тиббиёт фанлари номзоди, доцент М.Алимов ва вилоят ОИТСга қарши курашиш маркази бўлими мудири К.Маматов иштирок этди.
Дарсда ОИТСга қарши курашиш маркази мутахассислари ОИТС инфекцияси ва унинг келиб чиқиши, юқиш эҳтимоллари бор ҳолатлар, аҳолининг тиббий маданиятини оширишда имом-хатибларнинг ўрни тўғрисида атрофлича маълумотлар бердилар.
ЎМИ Андижон вилояти вакиллиги
ходими Искандарбек Зокиров
Ўзбекистон ва Туркия мигрантларни ҳимоя қилиш тўғрисида битим имзолади
Фото: Президент матбуот хизмати
Туркия Республикаси президенти Ражаб Тоййиб Эрдўғаннинг 2018 йил 30 апрель – 1 май кунлари Ўзбекистон Республикасига давлат ташрифи давомида "Меҳнат мигрантлари ва уларнинг оила аъзолари ҳуқуқларини ҳимоя қилиш тўғрисида" Битим имзоланди. Бу ҳақда Бандлик ва меҳнат муносабатлари вазирлиги ахборот хизмати хабар қилмоқда.
Ушбу битим Ўзбекистон Республикасининг Туркия Республикасидаги фуқаролари бўлган меҳнат-мигрантлари ва уларнинг оила аъзолари ҳамда Туркия Республикасининг Ўзбекистон Республикасидаги фуқаролари бўлган меҳнат-мигрантлари ва уларнинг оила аъзолари ҳуқуқларини ҳимоя қилиш билан боғлиқ масалаларни тартибга солади.
Ушбу Шартноманинг бажарилишига масъул: Ўзбекистон Республикасидан – Бандлик ва меҳнат муносабатлари вазирлиги, Ички ишлар вазирлиги, Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги; Туркия Республикасидан – Меҳнат ва ижтимоий таъминот вазирлиги ва Ички ишлар вазирлиги.
Ушбу Битимга мувофиқ меҳнат-мигрантларини қабул қилувчи давлатнинг ҳудудида иш берувчилар билан тузилган шартномалар асосида қабул қилувчи давлат қонунларига мувофиқ ишлаши мумкин.
Шунингдек, томонлар ўз мамлакатларидаги миграция оқимларини тартибга солишда ёрдам беришади ва ўз мамлакатларида ноқонуний меҳнат миграциясини тўхтатиш учун ҳамкорлик қилишади.
ЎМИ Матбуот хизмати
Шаҳар имомлари нуронийлар зиёратида
“9-май Хотира ва Қадрлаш куни” муносабати билан Самарқанд шаҳри имом хатиблари қатор хайрия тадбирларини ташкил этдилар.
Байрам муносабати билан иккинчи жаҳон уруши қатнашчилари, меҳнат фронти хизматчилари, меҳнат фахрийлари ҳолидан хабар олинди.
Совға-саломлар ила нуронийларнинг дилларини хушнуд этилди. Умрни қадрлаш, тинчликни авайлаб-асраш тўғрисидаги насиҳатларига қулоқ тутиб, дуоларига ноил бўлинди.
Таъкидлаш лозимки, ҳадиси шарифда “Расулуллоҳ соллаллоҳу алайҳи васаллам: “Кичигимизга раҳм қилмаган ва каттамизнинг ҳаққини билмаган кимса биздан эмасдир”, дедилар” (Абу Довуд ва Термизий ривояти), деганлар.
ЎМИ Самарқанд вилояти вакиллиги
Андижонлик имом-хатиблар учун семинар-тренинг ташкил этилди
Ўзбекистон мусулмонлари идораси раиси, муфтий Усмонхон Алимовнинг 2018 йил 10-апрель кунги №810-сонли топшириғига биноан Ўзбекистон мусулмонлари идорасининг Андижон вилояти вакиллигида жорий йилнинг 1-май куни вилоятда фаолият кўрсатаётган имом-хатиблар учун малака ошириш курси, семинар-тренинг ташкил қилинди.
Ушбу семинар-тренингга Андижон вилоятида фаолият кўрсатаётган нуфузли имом-хатиблардан иборат тарғибот гуруҳи жалб қилинган ҳолда вилоятдаги имом-хатибларнинг касбий маҳорати ва салоҳиятини ошириш мақсад қилиб олинган.
1-май куни ташкил қилинган илк семинар тренингда имом-хатиблар учун Ўзбекистон мусулмонлари идорасининг Андижон вилояти вакили, вилоят бош имом-хатиби Н.Холиқназаров Ўзбекистон Республикаси Президентининг “Диний-маърифий соҳа фаолиятини тубдан такомиллаштириш чора-тадбирлари тўғрисида”ги Фармонинининг мазмун ва моҳияти, унинг хаётга тадбиқи, Ўзбекистонда диний соҳа ривожи учун олиб борилаётган ишлар, ислоҳатлар, имом-хатибларнинг халқ билан ишлашларида нималарга эътибор қаратишлари лозимлиги, вилоятда ижтимоий-маънавий муҳит барқарорлигини сақлашда имом-хатибларнинг вазифалари ва тутган ўрни тўғрисида кенг маълумотлар бериб ўтдилар.
Ўтказилган семинар-тарнингда имом-хатиблар ҳам фаол иштирок этиб, ўзларининг қизиқтирган саволларига батафсил жавоблар олдилар.
Нурилло ҚОДИРОВ
ЎМИнинг Андижон вилояти вакиллиги
ходими
Қалб хотиржамлиги сиридан хабардормисиз?
Хизмат тақозоси билан, одатдагидек, чет давлатга сафар қилдим. Лекин бу гал айрим сабабларга кўра, сафарим чўзилиб кетди. Мана, келганимга ҳам тўққиз ойдан ошиб қолди. Шаҳарнинг кенг ва ёруғ кўчаларидан бирида юриб боряпман-у, аммо хаёлим уйимда, ёлғиз қолган қизларимда. Улардан хавотирланиб: «Уларга бирор нарса бўлдимикин?», «Соғ-омон юришганмикин?» − дея ўйлаб кетяпман. Шу пайт хаёлимни бир фикр чулғаб олди: «Эй Абдуллоҳ! Бу нимаси? Агар қизларинг учун қайғурадиган акалари ёки ҳимоя қиладиган боболари бўлганида, хавотирланармидинг? Йўқ, хавотир олмас эдинг, ҳатто ўйламасдинг ҳам. Шундай экан, уларни ҳимоя қилувчи Зот Аллоҳ таоло бўлса-ю, сен нега қайғурасан!
Қандай хавотир олишинг мумкин?!» Агар мен ҳозир уларнинг ёнида бўлганимда, бордию, Аллоҳ таоло уларнинг тақдирига қандайдир мусибатни битиб қўйган бўлса, мен нима қила олардим? Буларни ўйлаб борар эканман, ич-ичимдан қандайдир хотиржамликни ҳис қила бошладим…
Кутилмаганда бошимга бир ташвиш тушиб қолди. Кейин ундан халос бўлиш йўлларини излай бошладим. Шундай бўлса-да, эртага нима бўлар экан? − деб қўрқардим. Кейин: «Шунчалик нодон бўламанми?! Ишларимни ўзим бошқара оламан, ғам-ташвишларни елкамда кўтара оламан, деб ўйлаяпманми?! Ахир, гўдаклигимда, худди ёстиқ каби ерга ташлаб қўйилган пайтимда, ким мени асраган?! Ўшанда ҳеч нарсага тушунмас, гапира олмас эдим.
Агар бир чаён олдимга ўрмалаб келса ё бирор чивин атрофимда учиб юрса, ҳатто ўзимни ҳимоя қила олмаганман–ку! Ўшанда ҳам ўз ишларимни ўзим бошқарганманми?! Ундан олдин-чи, ким мени асраган? Буларнинг барчасини қилишга Қодир бўлган Зот энди мени ташлаб қўяр эканми?!» деб ўйладим.
Хаёлимдан шундай фикрлар ўтаркан, елкамдан тоғ ағдарилгандай бўлди. Тунда эса хотиржам уйқуга кетдим…
Хотиржамликнинг калити, иймон ҳаловатига етиш йўли – бу дуодир. Доимо дуо қилиб, Аллоҳ таолодан каттаю кичик ҳожатингизни сўранг. Дуо қилишнинг ўзи ҳам бир ибодатдир. Бунда сўзамол бўлиш шарт эмас. Энг муҳими қалбнинг тайёрлиги, дуо қилувчининг ихлосли бўлишидир.
Кўпинча, паст овозда айтилган, содда бўлиб кўринган, лекин ихлос биланқилинган дуо инсонлар кўнглини юмшатадиган, ҳамма қойил қоладиган, бироқ тил учида қилинган дуога нисбатан қабул бўлиши осонроқ бўлар экан.
Агар сиз солиҳ инсонларнинг суҳбатидан доимо баҳраманд бўлсангиз, Аллоҳ таоло доимо қалбингизда бўлса ва ҳар доим дуо қилиб юрсангиз, ҳар кечангиз «Лайлатул-қадр» бўлади. Агар сиз бунда нафснинг роҳати, руҳнинг ҳаловатидан бошқа нарсага эриша олмасангиз ҳам, майли, шунинг ўзи ҳам етарли. Бу орқали сиз Охират саодати, Ҳақ таолонинг розилигига эришасиз-у, нега етарли бўлмасин?!
Али Тантовийнинг «Роваиъут-Тантовий» китобидан
Ҳамидуллоҳ НАЖМИДДИНОВ таржимаси