XIX Қозон халқаро мусулмон киноси фестивалининг ариза бериш кампанияси бошланди, дея хабар беради фестиваль ташкилий қўмитаси матбуот хизмати.

IQNA маълумотларига кўра, аризаларни тўплаш 2023 йилнинг 1 июнигача давом этади, шундан сўнг танлов дастури эълон қилинади.

Танлов дастурини Россия Ислом институти филология ва минтақашунослик кафедраси мудири Тимур Шайхуллин ва “Евросиё Глобал Коннектинг” агентлиги Бош директори Светлана Слапке (Германия)лар тузишади. Танлов комиссиясини Россия Президенти ҳузуридаги Россия Федерацияси халқ хўжалиги ва давлат бошқаруви академияси маданиятлараро мулоқот амалиёти ва технологияларини моделлаштириш лабораторияси докторанти Нина Кочеляева бошқаради.

Танлов дастурига тўлиқ метражли ва қисқа метражли бадиий ва ҳужжатли филмлар тақдим этилади. Бундан ташқари, фестиваль "Миллий танлов" номинациясини ташкил этди. Фильм лойиҳаси дастурига умумбашарий маънавий-ахлоқий қадриятлар ва маданий анъаналарни акс эттирувчи, тинчлик ўрнатиш, диний бағрикенглик ва инсонпарварлик ғояларини ўзида мужассам этган рус ва хорижий фильмлар киритилиши мумкин.

Бу йил фестиваль 5-9 сентябрь кунлари бўлиб ўтади. Кино анжумани Россия Федерацияси Маданият вазирлиги томонидан қўллаб-қувватланадиган кино лойиҳалари рўйхатига киритилган. XIX Қозон халқаро мусулмон киноси фестивали Татаристон Республикаси Президенти Рустам Минниханов ва Россия Маданият вазирлиги кўмагида, шунингдек, "Россия — Ислом дунёси"стратегик қараш гуруҳи билан ҳамкорликда ўтказилади.

Ўзбекистон мусулмонлари идораси Матбуот хизмати

Тожикистон Диний қўмита раҳбари Сулаймон Давлатзода Душанбе шаҳрилаги Катта масжид расман 2023 йилнинг иккинчи чорагида очилишини айтди.

Asia Plus маълумотларига кўра, Давлатзода масжид Қатар томонининг Душанбега ташрифи чоғида ва Қатар делегацияси иштирокида очилиши кераклигини айтди.

Тожикистон расмийларига кўра, Марказий Осиёдаги энг йирик масжид ҳисобланган ушбу масжид 2020 йилнинг август ойида очилиши керак эди, аммо Covid-19 эпидемияси туфайли қолдирилган эди.

Аввалроқ, Қатар амирининг Тожикистонга ташрифи коронавирус тарқалиши туфайли қолдирилди. Шундай қилиб, масжиднинг пойдеворига биринчи ғишт 2009 йилнинг октябрь ойида Тожикистон Президенти Имомали Раҳмон томонидан қўйилган. Лойиҳанинг қиймати 100 миллион долларни ташкил этади.

Ўзбекистон мусулмонлари идораси Матбуот хизмати

2021 йил 24 февраль куни Тошкент вилояти бош имом-хатиби Жасурбек домла Раупов Бўстонлиқ тумани Қораманас қишлоқ фуқаролар йиғини ҳудудида барпо этилаётган “Оқ ота” жоме масжидининг илк ғиштини қўйиб берган эди.

Шу йил 3 февраль муборак жума куни ушбу масжиднинг очилиш маросими бўлиб ўтди.

Тадбирда Тошкент вилояти бош имом-хатиби Жасурбек домла Раупов, туман имомлари, маҳалла фаоллари, нуроний отахонлар, ҳомийлар ва саховатпеша инсонлар иштирок этди.

Очилиш маросими, одатдагидек, Қуръони карим тиловати билан бошланиб, Аллоҳнинг байти қурилишига ҳисса қўшган барча азиз инсонларнинг ҳақларига хайрли дуолар қилинди.

– Янги масжидимизга икки йил олдин илк ғишт қўйилган эди, – дейди "Оқ ота" жоме масжиди имом-хатиби Фахриддин Мирзаев. – Бугун бу жоме мўмин-мусулмонлар ихтиёрига топширилди. Масжидимиз 600 ўринли, гумбази баландлиги 18–20 метр. Ўн ўринли таҳоратхонада барча шароитлар яратилган. Имом-хатиб хонаси, мажлислар зали ҳам жуда гўзал тарзда барпо этилди.

Ўзбекистон мусулмонлари идораси
Тошкент вилояти вакиллиги
Матбуот хизмати

Бисмиллаҳир Роҳманир Роҳим

Каҳф сураси Қуръони каримнинг ўн саккизинчи сураси бўлиб, у Маккада нозил бўлган, бир юз ўн оятдан иборат. Суранинг етмиш бир ояти қиссалардан иборат. “Каҳф” сўзи “ғор” маъносини англатади. Унинг бундай номланишига сабаб, ундаги асосий қисса қаҳрамонлари ёш йигитлар ўз замонидаги золим подшоҳ барча иймонли кишиларни бутпараст бўлишга мажбур қилган вақтда унинг зулмидан қочиб, иймонларини сақлаш мақсадида ғорга кириб олади ва ўша ерда илоҳий мўжиза содир бўлади.

Улар Аллоҳга таваккул қилиб: “Эй, Роббимиз! Бизларга ўз ҳузурингдан раҳмат ато этгин ва бизларнинг ишимизни Ўзинг тўғрилагин!” деб дуо қилишади. Уларнинг дуоси ижобат бўлиб, улар ғорда уч юз йил ухлатиб қўйилади ва муҳофаза қилинади.

Аллоҳ таоло сурада ғор эгаларини узоқ йиллик уйқудан тургизганидек, қиёмат кунида ҳам барчани қайта тирилтириши ҳақ эканини одамларга хабарини бериш учун ушбу қиссани ибрат қилиб келтиради. Шу билан бирга, ҳар бир замонда иймон аҳли бардоши етадиган синовга учраши, кофирлар эса вақтинча улардан устун келиши мумкинлигини тушунтиради. Бу қисса орқали иймон аҳлининг иймони зиёда бўлиши, Аллоҳдан ўзгага ибодат қилмаслиги, ҳаётида дуч келадиган қийинчиликларга бардош берса, Аллоҳ унга нусрат бериши ва нажот топиши хабари берилади.

Сурада яна ибрат олиш учун икки боғ эгаси ҳаётидан намуна келтирилади. Ундан ибрат шуки, бизга берилган ҳар бир неъмат учун Аллоҳ таолога доимо ҳамд айтишимиз, унга шукр қилишимиз, берилган неъматлар Аллоҳнинг фазли эканлиги ва ҳар бир иш Аллоҳнинг ҳоҳиши билан амалга ошишишини англаб етмоғимиз лозим.

Кейинги қиссада Мусо алайҳиссалом ва солиҳ банда ҳақида баён қилинади. Бу қиссадан бизга энг гўзал фазилатлардан бири сабрли бўлиш нақадар улуғ ҳикмат экани, шунингдек, илм олиш ва маърифатли бўлишга доимо интилиш, бу йўлда бор имкониятни ишга солиш лозимлигини ўргатади. Ҳар бир инсон бу дунёда ўзидан афзал бўлган бошқа илмли, тажрибали, қувватли, тақводор, Аллоҳнинг хос бандалари борлигинини англаши лозим.

Навбатдаги қиссада Аллоҳ таолонинг марҳамати билан бутун дунёни ўз ҳукмида тутиш шарафига муяссар бўлган, шарқ ва ғарбга ҳукмронлик қилган одил ва оқил подшоҳ Зулқарнайн қиссаси баён қилиниб, унга бутун ер юзига ҳукмронлик, илм ва ҳикмат берилгани, барча нарсага эришиш учун сабаб йўллари бериб қўйилгани, унинг фатҳ юришлари, золимларни жазолаб, иймонли халқларга ёрдам бергани, Яъжуж ва Маъжуж қавми ер юзида бузғунчилик қилмаслиги ҳамда уларни йўлини тўсиш учун темир ва мис қоришмасидан иборат улкан девор қургани зикр қилинган. Бу қиссада ҳар бир раҳбар ва амалдорлар қандай сифатга эга бўлиши кераклигига жавоб берилади.

Каҳф сурасининг фазилати тўғрисида ҳадисларда бундай баён қилинган. Абу Дардо розияллоҳу анҳудан ривоят қилинган ҳадисда Набий алайҳиссалом бундай деганлар: «Ким Каҳф сурасининг аввалидан ўн оятини ёдласа, Дажжол (ёмонлиги, фитнаси)дан сақланади», (Имом Муслим, Имом Абу Довуд, Имом Термизийлар ривояти).

Бошқа бир ривоятда: «Ким «Каҳф» сурасининг охиридан ёдласа, Дажжолдан сақланади», дейилган.

Саҳл ибн Муоз ибн Анас Жуҳанийдан, у киши отасидан ривоят қилган ҳадисда Расулуллоҳ соллаллоҳу алайҳи васаллам: «Ким Каҳф сурасининг аввали ва охирини ўқиса, оёғидан бошигача нурга кўмилади (нурли бўлади). Ким уни тўлиқ ўқиса, унинг учун осмон билан ер масофасича нур пайдо бўлади (порлайди)», дедилар (Имом Аҳмад, Имом Табароний ривояти).

Абу Саъийд розияллоҳу анҳудан ривоят қилинган ҳадисда эса Набий соллаллоҳу алайҳи васаллам: «Ким «Каҳф» сурасини Жума кечасида қироат қилса, унга икки жума орасича нур зиё сочади», дедилар (Имом Ҳоким, Имом Байҳақий ривояти).

Бошқа ривоятда: «У билан Байтул Атийқ орасича нур зиё сочади», дейилган.

Имом Бухорий, Имом Муслим ва Имом Аҳмад ривоят қилган ҳадисда Абу Исҳоқ қуйидагиларни айтади: Ал-Барроснинг қуйидагиларни айтаётганини эшитдим: «Бир киши Каҳф сурасини ўқиди. Ҳовлида ҳайвон бор эди. Ҳайвон безовта бўла бошлади. Одам қараса, уни булут ўраб турибди. Бўлган ҳодисани Расулуллоҳ соллаллоҳу алайҳи васалламга айтиб берган эдик, у зот: «Эй фалончи, ўқийвер, у Қуръон тиловати учун тушган сакийнадир», дедилар.

Ҳофиз Абу Бакр ибн Мурдавайҳ Ибн Умар розияллоҳу анҳудан ривоят қилган ҳадисда Расулуллоҳ соллаллоҳу алайҳи васаллам: «Ким Каҳф сурасини жума куни ўқиса, қиёмат куни унинг қадами остидан нур чиқиб, осмону фалакни ёритади ва унинг икки жума орасидаги хатолари кечирилади», дедилар. Ким ҳар жума куни Каҳф сурасини тадаббур билан ўқиса, унга амал қилса дунё ва охират яхшилигига мушарраф бўлади.

«Каҳф» сурасини тез-тез ўқиб туриш ва оятлари маъносини тафаккур қилиш орқали ҳар бир инсон ҳаёти давомида учраши мумкин бўлган турли хил фитналардан четда бўлади, берилган барча неъматларни Аллоҳнинг фазлидан деб билади. Ушбу неъматлар шукрини банда Аллоҳ таолога доимий ҳамд айтиш ва унга ибодат қилиш билан адо этиши мумкин. Аллоҳ таоло яна бир оятда “Агар берилган неъматларга шукр қилсангиз, неъматларимни зиёда қилиб бераман” деб марҳамат қилади. Сурадаги ибратли қиссаларни ўрганиб чиққанимиздан кейин Аллоҳ таоло сурани бежизга ҳамд айтиш билан бошламагани ҳикмати аён бўлади.

“Тафсири ҳилол”,

“Қуръони карим маъноларининг таржима ва тафсири”,

“Қуръони азим мухтасар тафсири” асосида

Дилшод МУҲАММАД АЛИ тайёрлади.

Самарқанд. Ҳали эсимни ҳам тўла англаб етмаган болалик чоғларимда бу сўз қулоғимга ўзгача оҳангда эшитилар, кўз олдимда сеҳрли маскан сингари гавдаланар, номи оҳанрабодек ўзига чорлар эди. Бироз улғайиб, туғилиб ўсган жой, юрт, Ватан каби тушунчаларни бирмунча англаб, юртимиз манзиллари ҳақида мактаб партасида олган дастлабки тасаввур ва билимларимдан англадимки, номи сеҳрли туюлган Самарқанд замини кўҳна ва навқиронлиги, қадимийлиги билан ўзгача экан. 1-синфни тугатган йилим бобо-бувим билан кўҳна кентга борганимиз, шаҳар кўчаларида юриб, томоша қилганимиз жуда маҳобатли ва сирли кўринган кўк гумбазли обидалар узуқ-юлуқ кўз ўнгимда ҳамон...

Айни кезларда пойтахтдан Самарқанд сари йўл олар эканмиз, ҳар гал шаҳарга кираверишда ўзгача шукуҳ ва руҳият чулғаб олади. Буюклар шаҳри бўлган бу кентнинг ўзига хос ҳавоси, олами бор. Не-не зотлар ўтмади бу заминдан, қанчадан-қанча буюкларга Ватан, паноҳ бўлди. Асрлар силсиласидан, қанча талотўп даврлару жангу-жадаллардан омон қолган маҳобатли обидалар, кўк билан қўшилиб кетган гумбазлар, тарихий масканларнинг сеҳри ўзгача.

Ҳар қандай инсонни ўзига ром айлаб, олис ўтмишдан сўзлаётган мисоли қўр тўкиб турган тарихий-маданий ёдгорликлар ҳақиқатан сеҳрли кўринади. Бири иккинчисини такрорламайдиган кўринишга эга бу обидалар аждодларимиздан мерос бетакрор ва беқиёс бойликларимиздир. Шаҳарнинг навқиронлигини, тарихи олисларга бориб тақалишини, не зотларнинг пойқадами қолганини сўзсиз далиллаб тургувчи ёдгорликлар Самарқанднинг ташриф қоғозига айланиб бўлган.

Самарқанд юртимизнинг қадим шаҳри сифатида нафақат юртдошларимиз, балки дунё сайёҳларини, тарихчию маданият олами ҳамда илму урфон вакилларини ўзига чорлаб келади. Шу сабаб шаҳардан маҳаллий ва хорижий сайёҳлар, олиму нуфузли меҳмонлар қадами узилмайди. Маълумотларга кўра, Самарқанд шаҳридаги биргина “Регистон” ансамблига 2022 йилда 1 миллион 28 мингга яқин маҳаллий ва хорижий туристлар ташриф буюрган.

Президентимиз ташаббуси билан ташкил этилган Самарқанд туризм маркази сайёҳлар оқимини янада оширмоқда. Эндиликда Самарқандни Ўзбекистоннинг “Туризм дарвозаси”га айлантириш ва келажакда сайёҳлик хизматлари ҳажмини 10 баробарга ошириш мўлжалланмоқда.

Бу борада Ўзбекистон Республикаси Президентининг 2022 йил 24 декабрдаги “Самарқанд вилоятининг туризм ва транспорт салоҳиятидан самарали фойдаланиш, вилоятни “Самарқанд — Янги Ўзбекистоннинг туризм дарвозаси” концепцияси асосида ривожлантириш бўйича қўшимча чора-тадбирлар тўғрисида”ги қарори муҳим дастуриламал бўлади.

Қарорга кўра, Самарқанд вилоятига хорижий ва маҳаллий туристлар оқимини кўпайтириш, янги туризм инфратузилмаси объектлари салоҳиятидан самарали фойдаланиш учун зарур шарт-шароитларни яратиш, янгидан модернизация қилинган Самарқанд халқаро аэропортида хорижий авиаташувчи компаниялар учун барча имкониятларни яратиш, ҳудуднинг транспорт-логистика тизимини ривожлантириш, кўрсатилаётган хизматлар сифатини янада яхшилаш борасида қатор чора-тадбирлар ўз аксини топган.

Жумладан, республика ҳудудларида ва хорижий мамлакатларда Самарқанднинг туризм салоҳияти ҳамда Самарқанд халқаро аэропорти имкониятларини намойиш этувчи “Самарқанд — Янги Ўзбекистоннинг туризм дарвозаси” тарғибот кампанияси йўлга қўйилади, туристларга хизмат кўрсатиш учун туризм ахборот марказлари ташкил этилади. БМТнинг Бутунжаҳон туризм ташкилоти Бош Ассамблеясининг 2023 йилдаги навбатдаги 25-сессияси Самарқанд шаҳрида ўтказилиши муносабати билан тайёргарлик ишлари кўрилади.

Бу каби саъй-ҳаракатлар кўҳна Самарқанднинг сайёҳлик салоҳиятини янада ошириб, ташриф буюрувчилар сонининг янада кўпайишига хизмат қилади.

Bahriddin, [06.02.2023 17:07]
Шу ўринда таъкидлаш жоизки, яқинда The Times нашри 2023 йилда дунёнинг бориш тавсия этилган 13 та жойи рўйхатини эълон қилди. Мамлакатдан тортиб аниқ манзилгача бўлган бу рўйхатда Ўзбекистон ва Самарқанд ҳам мавжуд. Нашр Чарлстон ва Самарқанддаги маданий йўналишлар эътибор учун курашаётганини алоҳида қайд этади. Шунингдек, Самарқанд туризм маркази ҳам тилга олинган. “Шаҳар ташқарисидаги Silk Road Samarkand юқори даражадаги меҳмонхоналар ва гастрономияни ваъда қилади”, дея қайд этилган.

Дарҳақиқат, дунёнинг энг кўркам, сайёҳатбоп манзиллари қаторида юртимизнинг, хусусан, навқирон Самарқанднинг эътироф этилиши биз учун ғурур ва шарафдир.

Давлат раҳбарининг юқоридаги қарори асосида “Самарқанд — Янги Ўзбекистоннинг туризм дарвозаси” таърифининг берилиши ва ушбу ғоя асосида сайёҳликни янада ривожлантириш борасидаги амалий ишлар алоҳида эътибор ва эътирофга муносиб. БМТнинг Бутунжаҳон туризм ташкилоти Бош Ассамблеясининг 25-сессияси Самарқанд шаҳрида ўтказилиши ҳам бежиз эмас. Ўзининг бой тарихига, тараққиёт босқичларига эга кўҳна шаҳар, минглаб зиёлиларга ошён, илм-фан равнақига макон бўлган кўҳна замин юртимизнинг номини дунёга тараннум этилишида, туризм ривожида муҳим ўрин тутади.

Навқирон Самарқанднинг кўзни қамаштиргувчи кўк гумбазлари, маҳобатли обидалари, ўзгача сеҳрли оҳанрабоси ҳамиша барқарор бўлиб, етти оламни ўзига чорлайверади...

Муҳтарама Комилова