Татаристон муфтийси Шайх Камил ҳазрат Самигуллин муфтий Нуриддин домла Холиқназаров ҳазратларига табрик йўллади. Унда жумладан шундай дейилади:
– Менинг Сизни Ўзбекистон мусулмонлари идораси раиси лавозимига сайланганингиз билан самимий табрикларимни қабул қилгайсиз.
Сизга ушбу масъул лавозимда Аллоҳ таоло Ислом ва барча ўзбек уммати манфаатига хизмат қилиш ишларидаги барча самимий ният ва эзгу ишларингизни муваффақиятли рўёбга чиқариш имконини берсин, сизга тўғри қарорларни кўрсатсин, ўз атрофингизда ҳамфикр инсонларнинг содиқ жамоасини тўплаш имконини ато этсин, мустаҳкам соғлиқ, сабр-тоқат ва узоқ йиллик самарали касбий йўлни бахшида этсин.
Аллоҳ таоло Сиз ва Сизнинг яқинларингизни эзгу ният ва ишларингиз учун ўз раҳматини дариғ тутмасин.

Шайх Камил ҳазрат Самигуллин,
Татаристон муфтийси

Доғистон муфтийси Ахмед Абдулаев 2021 йил 21 октябрь куни Уламолар Кенгашида Диний идора раиси, муфтий лавозимига сайланган Нуриддин домла Холиқназаров ҳазратларига табрик йўллади. Унда жумладан шундай дейилади:
– Доғистон Республикаси муфтияти ва шахсан ўз номимдан чин дилдан Сизни Ўзбекистон мусулмонлари идораси раиси лавозимига сайланганингиз билан табриклайман! Сизга мустаҳкам соғлиқ, фаровонлик, Ўзбекистон мусулмонлари манфаати йўлида яратувчанлик фаолиятингизда муваффақиятлар тилайман.
Аллоҳ таолодан жамиятнинг маърифати ва уйғунлашувига қаратилган Сизнинг барча саъй-ҳаракатларингиз Ўзбекистон халқининг маънавий юксалиши, ахлоқий такомиллашуви, ўзаро тушуниш ва тотувликнинг мустаҳкамланишига хизмат қилишини сўраб қоламан.

Сизга тинчлик, Ҳақ таолонинг раҳмати ва баракотини тилайман. Омин!
Ҳурмат билан,

Ахмед Абдулаев,
Доғистон Республикаси муфтийси

Бугун, 21 октябрь куни Ўзбекистон мусулмонлари идорасида ўтказилган пойтахт имом-хатиблари йиғилишида Тошкент шаҳри бош имом-хатиби вазифасига тайинланган Раҳматуллоҳ домла Сайфуддиновга Юнусобод туманидаги “Минор” жоме масжиди имом-хатиби вазифаси ҳам юклатилди.
Шу кунга қадар “Минор” жоме масжиди имом-хатиби вазифасида ишлаб келаётган Фозилжон домла Убайдуллаев Юнусобод тумани Бодомзор даҳасидаги “Мирза Юсуф” жоме масжиди имом-хатиби вазифасига ўтказилди.
Аллоҳ таолодан улкан муваффақиятлар тилаймиз.

Ўзбекистон мусулмонлари идораси Матбуот хизмати

Зиёуддин домла Мирсодиқов
"Бўтабува" жоме масжиди имом-хатиби

Бугун, 20 октябрь куни Туркия Диёнат ишлари бошқармаси раиси ўринбосари Селим Аргун бошчилигидаги делегация Ўзбекистон мусулмонлари идорасига ташриф буюрди.
Мартабали меҳмонларни Диний идора раисининг биринчи ўринбосари Ҳомиджон домла Ишматбеков ва раис ўринбосари Ўткир Ҳасанбаев кутиб олди.
Учрашувда Селим Аргун марҳум муфтий Усмонхон Темирхон ўғли раҳимаҳуллоҳнинг вафотлари юзасидан ҳамдардлик билдирди. Ўз навбатида, куни кеча бўлиб ўтган Уламолар Кенгашида Нуриддин домла Холиқназаров муфтий лавозимига сайланганлари муносабати билан Туркия Диёнат ишлари бошқармаси раиси, доктор Али Эрбош жанобларининг табрикларини етказди.
Ўзаро мулоқотда икки давлат алоқалари янги босқичга кўтарилгани, диний идоралар билан ҳамкорликни ривожлантириш борасида яхши натижаларга эришилгани алоҳида қайд этилди. Шунингдек, диний адабиётларни нашр этиш ва хайрия тадбирларини ўтказишдаги ҳамкорлик масалаларига алоҳида урғу қаратилди.
Ташриф якунида муфтий Нуриддин домла Холиқназаров ҳазратлари ҳам меҳмонлар билан суҳбатлашиб, эътибор ва эҳтиром учун миннатдорлик билдирдилар.
Томонлар бир-бирларига эсдалик совғалари тақдим этдилар.

Ўзбекистон мусулмонлари идораси Матбуот хизмати