Абу Ҳурайра (розияллоҳу анҳу)дан ривоят қилинади. Набий (соллаллоҳу алайҳи ва саллам) дедилар:

الإِيمانُ بِضْعٌ وستُّونَ شُعْبَةً والحَياءُ شعْبةٌ مِنَ الإِيمَانِ

“Имон олтмишдан ортиқ бўлакдан иборат. Ҳаё имоннинг бир шўъбасидир” (Имом Бухори ривояти). Бошқа ривоятда “Имон олтмишдан ортиқ ёки етмишдан ортиқ бўлакдан иборат”, дейилган.

“Имон олтмишдан ортиқ бўлакдан иборат”. Расулуллоҳ (соллаллоҳу алайҳи ва саллам) кoмил имoнни сифатлаб, уни шoxлари вa ҳoсили кўп дaрaxтгa ўxшaтдилaр. Чунки дарахтнинг қадр-қиммати шохлари ва меваси биландир. Имоннинг энг олий даражаси “Ла илаҳа иллаллоҳ”, энг қуйи поғонаси йўлдан озор берувчи нарсани олиб ташлашдир. Имоннинг асоси тасдиқ ва иқрор бўлганидек, дарахтнинг негизи танадир. Шox-бутоқлaри йўқ дарахт мeвa ҳам, соя ҳам бермaйди. Имoн биргина тaсдиқ ва иқрордан иборат бўлса, худди дaрaxтнинг тaнaсига ўхшайди. Ундай дaрaxтда на соя, на ҳoсил йўқ. Масалан, имон шўъбаларидан – нaмoз, рўзa, зaкoт, хaж каби улуғ ибoдaтлaрни дaрaxтнинг кaттa шoxлaрига ўхшатсак, у йирик шаббалaрдaн мaйдa-майда новдалaр ўсиб, мeвa бeрaди вa ўша кaттa шoxлар қиймaтини oширaди. Бу, бирор ибодатни мукаммал адо этиш учун, унинг фарзлари, вожиблари, суннатлари ва ҳатто мустaҳaбларини ҳам ўз ўрнида бажариш керак, деганидир. Мабодо мазкур aмaллaрдан бирортаси қолдирилса, ибодат нуқсон билан тугайди ва ҳоказо.

Уламоларимиз ҳадисдаги “бизъун” сўзи учдан тўққизгача бўлган ададларни қамрайди, дейишган. Шунга кўра, “олтмишдан ортиқ” жумласидан олтмиш учдан олтмиш тўққизгача бўлган ададлар тушунилади. Демак, ана шулардан бири ҳаёдир.

“Ҳаё имоннинг бир шўъбасидир”. Ҳадиси шарифда имоннинг шўъбаларидан айнан ҳаё зикр қилинди. Зеро, у бaрчa фaзилaтлaр боши ва имоннинг қолган бўлакларига ундовчи сифатдир. Унинг аҳамияти беқиёс. Шарм бандани дунё шармандачилиги ва охират азобидан огоҳ этиб, маъсиятлардан тўсади. Уламолар ҳаёни таърифлаб бундай дейишган: “Ҳаё шундай хулқки, у гўзал амалларни қилишга ва ёмонликларни тарк этишга ундайди”. Шу боис, динни ўрганиш, ҳақни гапиришда ҳаё қилинмайди.

Ҳаё икки хилдир: туғма ва касб қилинадиган. Ҳадиси шарифда айнан касб қилинадиган ҳаё назарда тутилган. Чунки туғма ҳаё инсон табиатида бор. Қачон киши касб қилинган шармни ўзига сингдиролса, у бора-бора табиий ҳаёга айланади.
Бу борада Расулуллоҳ (соллаллоҳу алайҳи ва саллам) бизга ўрнакдирлар. У зоти бобаракотда ҳаёнинг икки тури ҳам мужассам эди. Туғма ҳаёда чимилдиқдаги қиздан ҳам шармлироқ, касб қилинадиганида эса, энг юқори мақомда эдилар. Буюк саҳобалардан ҳaзрaт Усмoн (розияллоҳу анҳу) ҳам жуда ҳаёли бўлганлaр. Ҳатто у зотдан фaриштaлaр ҳам уялгaн.

Ҳаё барча яхшиликлар бошидир, у энг гўзал зийнатдир, имон аломатларидандир, Аллоҳнинг сифатларидан ҳамда У Зот суйган хулқдир. Шу юксак фазилатнинг кетишига маъсиятлар сабаб бўлади. Шармнинг йўқолиши барча яхшиликларнинг кетиши, демакдир. Аллоҳ асрасин, ҳаёсизлик шармандаликдир. Зеро, Анас ибн Молик (розияллоҳу анҳу)дан ривоят қилинган ҳадисда Расулуллоҳ (соллаллоҳу алайҳи ва саллам):

ما كان الحياء في شيء إلا زانه ولا كان الفحش في شيء إلا شانه

“Ҳаё нимада бўлса, албатта уни зийнатлайди. Ҳаёсизлик нимада топилса, албатта уни шарманда қилади”, дедилар (Имом Бухорий ривояти).

Имом Нававий (раҳимаҳуллоҳ) “Шарҳи Арбаъин”да ҳаёнинг имон билан боғлиқлигини бундай тушунтирганлар: “Ҳақиқий ҳаё шуки, банда биринчи бўлиб Аллоҳдан чинакам уялиши лозим. Чунки Расулуллоҳ (соллаллоҳу алайҳи ва саллам) саҳобаларга:

اسْتَحْيُوا مِنَ اللَّهِ حَقَّ الْحَيَاءِ قَالُوا : إِنَّا لَنَسْتَحْيِي مِنَ اللَّهِ يَا رَسُولَ اللَّهِ وَالْحَمْدُ لِلَّهِ ، قَالَ : لَيْسَ ذَاكَ ، وَلَكِنْ مَنِ اسْتَحْيَا مِنَ اللَّهِ حَقَّ الْحَيَاءِ فَلْيَحْفَظِ الرَّأْسَ وَمَا وَعَى ، وَلْيَحْفَظِ الْبَطْنَ وَمَا حَوَى ، وَلْيَذْكُرِ الْمَوْتَ وَالْبَلاءَ ، وَمَنْ أَرَادَ الآخِرَةَ تَرَكَ زِينَةَ الْحَيَاةِ الدُّنْيَا ، فَمَنْ فَعَلَ ذَلِكَ فَقَدِ اسْتَحْيَا مِنَ اللَّهِ حَقَّ الْحَيَاءِ

“Аллоҳдан чинакам ҳаё қилинглар”, дедилар.  Улар: “Ё Расулуллоҳ, биз ҳаё қиламиз, алҳамду лиллоҳ”, дейишди. Шунда у зот: “Йўқ, у (намоз ўқиш, рўза тутиш каби амалларингиз) ҳақиқий уялиш эмас. Ҳақиқий шарм бoш вa ундаги (мия, кўз, қўлоқ, бурун, оғиз, тил каби) бaрчa aъзoни (Aллoҳ қайтаргaн нaрсалaрдaн) сaқлaш, қoрин ва ундаги (озуқа, фарж сингари) бaрчa aъзoни (ҳаромдaн) тийиш ҳамда ўлимни ва ундaн кeйинги чириш (aзoб-уқубaт)ни эслашдир. Кимки буларга амал қилсa, Aллoҳдaн ҳaқиқий ҳaё қилибди”, дедилар (Имом Байҳақий ривояти).

Кўзини номаҳрамларга қарашдан, қулоғини ҳаром гап-сўзларни эшитишдан, тилини ғийбат, ёлғон, бўҳтон каби гуноҳлардан ва ман қилинган нарсаларни истеъмол қилишдан ҳамда бошқа аъзоларини ҳаромдан тийган, ўлимни эслаб, ундан кейинги машаққатларни унутмаган кишигина, гуноҳга қўл урмайди ва ҳар бир амалини охирати учун қилади. Ҳатто тафаккурини ҳам дунё вa oxирaтга мaнфaaтли амалларга сарфлайди. Зеро, Аллоҳдан чинакам ҳаё қилмаган одам бошқалардан асло уялмайди. Бошқа ҳадиси шарифда таъкидланишича, Аллоҳдан чинакам ҳаё қилиш, обрўли одамлардан уялгандан кўра кучлироқ бўлиши керак.

Улaмoлaр таъкидлашича, ҳaқиқий ҳaё эҳсoнга ўхшайди. Эҳсoн нимa ўзи? Саҳобалар Расулуллоҳ (соллаллоҳу алайҳи ва саллам)дан бу борада сўрашганида, у зот:

الإِحْسَانُ أَنْ تَعْبُدَ اللَّهَ كَأَنَّكَ تَرَاهُ ، فَإِنْ لَمْ تَكُنْ تَرَاهُ فَإِنَّهُ يَرَاكَ

“Эҳсон – Aллoҳ тaoлoни кўриб тургaнингдeк ибoдaт қилишингдир. Агар У Зотни кўролмасанг, У Зот сени кўриб турибди (деган эътиқодда бўлишингдир)”, дедилар. Бу олий даражага эришиш учун ҳақиқий ҳаёни ўзимизда шакллантиришимиз ва бутун вужудимиз билан Aллoҳга юзланишимиз кeрaк. Афсуски, кўпчилигимиз бундaн мaҳруммиз, ғaфлaтдaмиз. Имон шўъбасининг асосларигa имкон қадар эътибoр бeрaмизу, унинг мeвaлари ҳисобланмиш ҳaёгa бeпарвомиз.

Ҳақиқий ҳаёга фарз, вожиб, суннат ибодатларни имқон қадар мукаммал бажариш ва тоқатга яраша нафл ибодатлар, суннат ҳамда нафл рўзалар тутиш орқали эришилади. Бу фазилатга етишмоқчи киши ўзини тарбиялаб, ҳою-ҳавасга учмасдан ҳаётнинг машаққатларига сабр қилсагина мақсадга эришади, иншааллоҳ. Зеро, эндигина намоз ўқиётган киши билан йиллар давомида ибодат қилаётган одам орасида Ер билан осмонча фарқ бор. Эътибор берсак, биринчи ўқиган намозимиз билан ҳoзирги қилаётган ибодатларимизни таққосласак, ўртада тафовут жуда катта. Беихтиёр хаёлимиздан: “Ўшa дaмлар нaмoз ўқидим, рўзa тутдим, дeб юргaн экaнман-дa”, деган ўй ўтади. Бу дегани, Аллоҳга шукрки, ҳақиқий ҳаё сари интилаётганимиздан даракдир.

Хуллас, ҳаё деганда, “уялиш, тортиниш” деб тушунмаслик керак. Шунингдек, фақат авратларни ёпиб юриш ҳам эмас, балки шу билан бирга ҳар бир ҳолатда камида Аллоҳ таолонинг кўриб турганини ҳис қилиб яшаш, гуноҳлардан узоқда бўлиш билан намоён бўлади. Шу руҳда тарбияланган инсон бировга, гарчи у билмаса-да, кўрмаса-да, хиёнат этмайди, обрўсини тўкмайди, зулм қилмайди, ҳақини топтамайди. Ичи билан таши бир бўлади. Биров бор пайда бошқача, йўғида эса бошқача муомала қилмайди ва ҳоказо.

Ор-номусли киши жамоат жойларида ҳам, ёлғиз қолганда ҳам ўзини бир хил тутади, ўзгармайди. Одамлар кўз ўнгида қилмаган гуноҳни Парвардигоридан қўрққани учун танҳолигида ҳам содир этмайди. Шундай сифатга эга одамдa сaлoбaт пайдо бўлади. Виқорли инсoнни кўргaн одам ўз-ўзидaн уялaди. Ҳатто, гуноҳ қилишга муккасидан кетган киши ҳам унинг олдида маъсиятдан тўхтайди. Ҳаёсизларда эса, бу фазилат йўқ. Ҳатто ёши улуғ бўлсa ҳaм, oлдидa ёши кичиклaр тап тортмасдан фаҳш сўзлaрни гапиришади, одобсизлик қилишади. Аксинча, ёши катта шарм-ҳаёсиз кишилар имoн-эътиқoдли, уятчан oдaм ёнигa кeлгандa, гарчи ўзидан кичик бўлса-да, унинг олдида одоб сақлaйди.

Шундай экан, ҳаёга эътиборсиз бўлмайлик ва ундан ғaфлaтдa ҳам қолмайлик. Шунда икки дунё саодатига эришамиз, иншоаллоҳ. Аллоҳ таоло барчамизни имонда, Исломда собитқадам қилсин, ва ҳақиқий ҳаё билан зийнатласин, ҳеч қачон улардан айирмасин. Омин!

Толибжон ҚОДИРОВ
тайёрлади.

Жобир (розияллоҳу анҳу)дан ривоят қилинади: Расулуллоҳ (соллаллоҳу алайҳи ва саллам) марҳамат қилдилар:

إِذَا جَنَحَ اللَّيْلُ أَوْ أَمْسَيْتُمْ فَكُفُّوا صِبْيَانَكُمْ فَإِنَّ الشَّيَاطِينَ تَنْتَشِرُ حِينَئِذٍ ، فَإِذَا ذَهَبَ سَاعَةٌ مِنَ اللَّيْلِ فَخَلُّوهُمْ ، وَأَغْلِقُوا الأَبْوَابَ وَاذْكُرُوا اسْمَ اللَّهِ فَإِنَّ الشَّيْطَانَ لا يَفْتَحُ بَابًا مُغْلَقًا ، وَأَوْكُوا قِرَبَكُمْ وَاذْكُرُوا اسْمَ اللَّهِ ، وَخَمِّرُوا آنِيَتَكُمْ وَاذْكُرُوا اسْمَ اللَّهِ ، وَلَوْ أَنْ تَعَرِضُوا عَلَيْهَا شَيْئًا ، وَأَطْفِئُوا مَصَابِيحَكُمْ

“Кеч киргач, болалари­нгизни (уйда) ушлаб туринг. Чунки бу пайтда шайтон (жин)лар изғийди. Бир соат ўтгач, болаларингизни эркин қўйинг. Аллоҳнинг номини зикр этиб эшик­ларингизни ёпинг. Зеро, шайтон бер­ки­тилган эшикни очмайди. Аллоҳнинг номини зикр этиб мешларингиз (оғзи)ни боғлангиз. Аллоҳ­нинг номини зикр этиб идишларингиз устига бирон нарса бўлса-да, ташлаб қўйинг. Чироқларингизни ўчириб (ётинг)” (Муттафақун алайҳ).

Аллоҳ таоло тунни бандалари ором олиши учун яратган. Қуръони каримда бу ҳақда кўп оятлар келган. Жумладан, Юнус сурасининг 67-оятида бундай дейилади:

هُوَ الَّذِي جَعَلَ لَكُمُ اللَّيْلَ لِتَسْكُنُوا فِيهِ

“У сизларга ором олишларингиз учун кечани яратган Зотдир”. Кундузи кўринмайдиган сичқон, каламуш, суварак сингари зарар келтирувчи ҳашарот ва жонивор­лар кеч­аси изғийди. Сичқон ва каламуш теккан идишни покламай туриб фойдаланиш эса макруҳдир. Шундай экан, уларнинг зиёнидан, шайтон ва унинг зарарларидан сақланиш ҳамда туннинг бизларга таскин бўлиши учун Пайғамбаримиз (соллаллоҳу алайҳи ва саллам)нинг ушбу кўрсатмаларига риоя этишимиз лозим:

1. “Кеч киргач, болалари­нгизни (уйда) ушлаб туринг”. Яъни, қуёш ботгач, фарзандларингизни уйдан чиқарманг, ташқарида юрган бўлишса, уйга киргизиб керакли машғулотлар билан банд қилинг. “Чунки бу пайтда шайтон (жин)лар изғийди”. Тун шайтонлар қўзғалиши учун қулай фурсатдир. Улар бу вақтда ташқарида юрган болаларга зиён етказиши мумкин.
2. “Бир соат ўтгач, болаларингизни эркин қўйинг”. Уларнинг уйга кириб-чиқишида тўсқинлик қилманг.
3. “Аллоҳнинг номини зикр этиб эшик­ларингизни беркитинг”. Хайрли ҳар бир ишда Аллоҳни зикр қилиш – “Бисмиллаҳир Роҳманир Роҳим” дейиш, лозим, ҳатто эшикни ёпганда ҳам. Эшикни беркитиш билан ҳар хил зарарли ҳашаротлар, ҳайвонларнинг зиён ет­ка­зиши, ўғри кириши, номаҳ­рамлар назари туши­ши ёки оила аъзоларининг соғлиғига зарар етишининг олди олинади. “Зеро, шайтон бер­ки­тилган эшикни очмайди”. Фақат “Бисмиллоҳ” деб ёпилган эшикларни шайтонлар очолмайди. Ўша кеча иблис ёмонлигидан омонда бўлинади. Жобир (розияллоҳу анҳу)дан ривоят қилинади: Набий (соллаллоҳу алайҳи ва саллам) бундай деганлар:

إِذَا دَخَلَ الرَّجُلُ بَيْتَهُ فَذَكَرَ اللَّهَ عِنْدَ دُخُولِهِ وَعِنْدَ طَعَامِهِ ، قَالَ الشَّيْطَانُ: لا مَبِيتَ بِكُمْ وَلا عَشَاءَ، وَإِذَا دَخَلَ فَلَمْ يَذْكُرِ اللَّهَ عِنْدَ دُخُولِهِ، قَالَ الشَّيْطَانُ: أَدْرَكْتُمُ الْمَبِيتَ، وَإِذَا لَمْ يَذْكُرِ اللَّهَ عِنْدَ طَعَامِهِ، قَالَ: أَدْرَكْتُمُ الْمَبِيتَ وَالْعَشَاءَ

«Ким уйига кираётганида ва таомланаётганида Аллоҳни зикр қилса, шайтон (аскарларига) сизларга ётоқ ҳам, кечки овқат ҳам йўқ, дейди. Мабодо уйига кираётганида Аллоҳни зикр қилмаса, шайтон (шерикларига) ётоққа эга бўлдингиз, дейди. Агар таомланаётганида ҳам Аллоҳни зикр этмаса, шайтон (аскарларига) ҳам ётоққа, ҳам кечки овқатга эга бўлдингиз, дейди» (Имом Бухорий ривояти).

4. “Аллоҳнинг номини зикр этиб мешларингиз (оғзи)ни боғлангиз”. Егулик сақланадиган меш, қоп, саноч сингари идишлар оғзини боғлашда ҳам “Бисмиллоҳ”ни айтиш зарур. Шундагина шайтон уларни ечолмас. Мабодо Аллоҳнинг исми зикр қилинмасдан, идишлар қанчалик мустаҳкам беркитилмасин, шайтон ундаги таом ва ичимликлардан насибасини олади. Шундай экан, доимо озиқ-овқат ва ичимликлар сақланадиган идишларни берк тутишимиз лозим. Оғзи очиқ идишларга ҳашарот, микроб ва зарарли нарсалар ҳамда вабо тушиши оқибатида турли касалликлар келиб чиқиши мумкин. Набий (соллаллоҳу алайҳи ва саллам):

غَطُّوا الإِنَاءَ وَأَوْكُوا السِّقَاءَ فَإِنَّ فِي السَّنَةِ لَيْلَةً يَنْزِلُ فِيهَا وَبَاءٌ لا يَمُرُّ بِإِنَاءٍ لَمْ يُغَطَّ وَلا سِقَاءٍ لَمْ يُوكَأْ إِلاَّ وَقَعَ فِيهِ مِنْ ذَلِكَ الْوَبَاءِ

“Идишлар (усти)ни ёпинг, мешкоблар (оғзи)ни боғланг. Чунки йилда шундай бир кеча борки, унда вабо тушади. У (вабо) ёпқичи йўқ идиш ва боғичи бўлмаган мешкоб олдидан ўтганида, албатта, унга тушади”, дедилар (Имом Муслим ривояти).

5. “Аллоҳ­нинг номини зикр этиб идишларингиз устига бирон нарса бўлса-да, ташлаб қўйинг”. Идишлар устини ёпганда ҳам “Бисмиллоҳ”ни айтиш даркор. Шундагина шайтон уларни очолмас. Озиқ-овқат ва ичимликлар сақланадиган идишлар устини ёпиш уларга нажосат, зарарли ва шубҳали нарсалар тушишидан тўсади. Пайғамбаримиз (соллаллоҳу алайҳи ва саллам) бошқа ҳадиси шарифларида идиш устини бир чўпни кўндаланг қилиб бўлса ҳам ёпиш кераклигини таъкидлаганлар.
6. “Чироқларингизни ўчириб (ётинг)”. Зеро, чироқларни ўчирмай ухлашда кўпгина зарарлар бор. Ибн Аббос (розияллоҳу анҳумо)дан ривоят қилинади:

جَاءَتْ فَأْرَةٌ فَأَخَذَتْ تَجُرُّ الْفَتِيلَةَ، فَذَهَبَتِ الْجَارِيَةُ تَزْجُرُهَا، فَقَالَ رَسُولُ اللَّهِ صلى الله عليه وسلم: دَعِيهَا، فَجَاءَتْ بِهَا فَأَلْقَتْهَا عَلَى الْخُمْرَةِ الَّتِي كَانَ قَاعِدًا عَلَيْهَا فَأَحْرَقَتْ مِنْهَا مِثْلَ مَوْضِعِ الدِّرْهَمِ، فَقَالَ رَسُولُ اللَّهِ صلى الله عليه وسلم: إِذَا نِمْتُمْ فَأَطْفِئُوا سُرُجَكُمْ، فَإِنَّ الشَّيْطَانَ يَدُلُّ مِثْلَ هَذِهِ عَلَى هَذَا فَيُحْرِقُكُمْ

“Сичқон келиб, пиликни судрай бошлади. Ходима уни ҳайдади. Шунда Набий (соллаллоҳу алайҳи ва саллам): “Қўявер уни”, дедилар. Сичқон пиликни у зот ўтирган хамра (жойнамозча) устига ташлади. Унинг дирҳамдек жойи куйди. Шунда у зот: “Қачон ухласангиз, чироқларингизни ўчиринг. Чунки шайтон мана бунга ўхшаганга амр қилса, куйиб қолишингиз мумкин”, дедилар (Имом Байҳақий ривояти).

Тўғри, бугунги кунда пиликли чироқ бўлмаса-да, электр чироқларнинг кечаси беҳуда ёниқ қолиши ҳам оила, ҳам давлат иқтисодига зарар. Қолаверса, чироқ ёруғлигида ухлаш узоқни кўра олмаслик каби хасталикларга сабабдир.

Абу Мусо (розияллоҳу анҳу)дан ривоят қилинади: “Кечаси Мадинада бир уй ёниб аҳли зарар кўрди. Бу ҳақда Набий (соллаллоҳу алайҳи ва саллам)га айтилди. У зот:

ان النار عدو لكم فإذا نمتم فأطفئوها عنكم

“Албатта, олов сизга душмандир. Қачон ухласангиз, уни ўчиринг”, деди­лар” (Муттафақун алайҳ).

Тўғри, совуқ кунларда печка каби иситкич асбоб­ларидан фойдаланмасликнинг иложи йўқ. Айниқса, қиш ойларида улардан истифода этишда ҳар доимгидан ҳам ҳушёрроқ бўлишимиз керак. Чунки ёнғинга қарши кураш биргина ёнғин хавфсизлиги хизмати ходимларининг эмас, балки барчамизнинг бурчимиздир.

Уламолар: “Ҳадиси шарифда зикр қилинган ҳолатлар сабаб, холос. Қўриш эса, Аллоҳнинг ҳимояси билан бўлади”, деганлар. Ушбу Набавий одобларга ҳар биримиз ­риоя этишимиз ва оила аъзоларимизга ҳам ўргатишимиз лозим. Шунда, икки дунё саодатига эришамиз, иншоаллоҳ.

Толибжон ҚОДИРОВ 
тайёрлади.

2016 йилнинг 4 июль куни халқаро ЮНЕСКО ташкилоти томонидан ташкиллаштирилган матбуот конференциясида, Ислом дини – Дунёдаги энг тинчликпарвар дин деб, эълон қилинди ва сертификат билан тақдирланди.

Албатта, бу олий мукофотга сазовор бўлиш жараёни осон кечмади. Жумладан, ЮНЕСКО мутахассислари Халқаро тинчлик ташкилоти билан ҳамкорликда олти ой давомида, дунёдаги барча динларни ўрганиб чиқишди ва ушбу хулосага келишди.

Конференцияда Халқаро тинчлик ташкилотининг “Қиёсий тадқиқотлар” бўлими бошлиғи Роберт Мак сўзга чиқиб: “Биз олти ой давомида изланишлар ва сўровномалар олиб бордик ҳамда Исломни дунёдаги энг тинчликпарвар дин эканини аниқладик”, деди. Суҳбат якунида Роберт Макдан, яқинда Ироқ пойтахти Бағдод шаҳрида Ислом дини номидан амалга оширилган қўпорувчилик ҳаракатлари ҳақида сўралганда, қуйидагича жавоб берди: “Бу қўпорувчиликларнинг мутлақо Исломга алоқаси йўқ. Террор – ҳеч бир динга мансуб эмас. У дин ва миллат танламайди. Исломга келсак, унинг моҳиятида тинчлик ётади. Зеро, Ислом сўзи – тинчлик деган маънони билдиради”.

Шунингдек конференцияда, ташкилот муҳаррири Мофат Жавед сўзга чиқиб, ЮНЕСКО томонидан берилган сертификат, Ислом дини ва мусулмонларга нисбатан нотўғри тассавурлар ва гап-сўзларга барҳам беришига умид билдирди.

Ушбу сертификат дунёнинг нуфузли шахслари ва турли дин раҳбарлари томонидан мамнуният билан қарши олинди. Жумладан, Далай Лама бу ҳақида фикр билдириб, бошқа дин вакиллари меҳрибонлик ва шафқатни тинчлик дини бўлган – Исломдан ўрганиши керак, деди.  

Ҳақиқатан ҳам, Ислом – тинчлик дини!

Илҳом МАЪРУПОВ тайёрлади

Мусулмон мамлакатлари илмий изланишлар ва тадқиқотлар учун бошқа ривожланган мамлакатларга нисбатан беш баробар камроқ сармоя ажратади, деб ҳисоблайди назарий физика бўйича Суррея университети профессори Жим Ал-Халили. Америка ва Оврупа мамлакатлари бу масалага жиддийроқ ёндошиши ва давлат бюджетининг 0,5 фоизини соҳа ривожи учун сарфлашини таъкидлади. Бу айниқса, аниқ фанлар ва замонавий технологик жараёнларга тегишли эканини айтди. Ислом дунёси доимо замон билан ҳамоҳанг ва ҳамнафас бўлиши кераклигини қайд этди. Зеро, тарихда Ислом маданиятини намоён этган ота-боболаримиз фалакиёт, тиббиёт ва математика соҳаларида етакчи бўлишганини эслатиб ўтди. Ташаббусни қайта қўлга олиш учун барча мусулмонлар, хусусан, Форс Кўрфази вакиллари бир ёқадан бош чиқариши мақсадга мувофиқ эканини изҳор этди. Олдингидек, байтул ҳикма донолар уйи ва олимлар қароргоҳларини тиклаш айни муддао экани ҳақида фикр билдирди.

Азизхон ҲАКИМОВ

тайёрлади.

Алҳамдулиллаҳ, муборак Рамазон ойини яна бир бор кузатдик. Аллоҳ таоло унда ваъда қилинган ажру савобларга, файзу баракотларга Ўзи эриштирган бўлсин! Аллоҳ таолонинг марҳамати туфайли муборак Рамазоннинг файзу футуҳлари ҳамон қалбимизда. Парвардигори олам уни келаси Рамазонгача давомли қилсин, кўп маротаба ушбу муборак ойга соғ-омон етиб, ундаги фазилатлардан баҳрамад бўлайлик! Зеро, Рамазонда тутган рўзаси мақбул бўлган кишилар йил давомида шу ойнинг файзу баракотидан баҳраманд бўлиб юрадилар. Эгамиз барчамизга шундай ҳаёт кечиришни насиб қилсин! Зеро, Абу Саид Худрий (розияллоҳу анҳу)дан ривоят қилинган ҳадиси шарифда Расулуллоҳ (соллаллоҳу алайҳи ва саллам) бундай марҳамат қилганлар:

صيام رمضان إلى رمضان كفارة ما بينهما

“...Рамазон ойида тутилган рўза кейинги Рамазонгача (бўлган гуноҳларга) каффоратдир” (Имом Табароний ривояти). Зотан, Рамазон ойи қадрига етган, унинг фазилатларидан баҳраманд бўлган киши, албатта, уни яна келишини интизорлик билан кутади. Чунки бир ибодатни адо этиб, кейингисига муштоқ бўлиб кутиш ҳақиқий мўмин сифатидир. Муалло ибн Фазл (раҳимаҳуллоҳ) айтади: «Салафи солиҳлар Рамазон келмасидан олти ой олдин Аллоҳдан бу ойга етказишини сўраб дуо қилишар, Рамазондан кейин эса, яна олти ой бу муборак ойда бажарган ибодатларининг мақбул бўлишини тилаб илтижо этишар эди». Шундай қилиб, у зотлар йил давомида Рамазон ҳақида қайғурар эканлар. Демак, бу муборак ойнинг фазли нақадар юксак эканига далолатдир.

Мана, алҳамдулиллаҳ, Аллоҳнинг инояти билан Рамазон ҳайитини ҳам эсон-омон нишонладик. Бу Рамазон кетди, ибодатлар тўхтади дегани, эмас, албатта. Ҳозир Рамазондан кейин келадиган шаввол ойида турибмиз. Шаввол ҳижрий-қамарий тақвимнинг ўнинчи ойидир. Бу муборак ойнинг фазилатлари жуда кўп. Қуйида улардан баъзилари билан танишамиз:

1. Ийдул фитр. Ҳижрий тақвим бўйича шаввол ойининг биринчи куни Рамазон ҳайити байрамидир. Анас (розияллоҳу анҳу) айтадилар: Расулуллоҳ (соллаллоҳу алайҳи ва саллам) Мадинага келганларида, у ерда аҳолининг ўйин-кулги қилиб нишонлайдиган икки куни бор экан. У зот сўрадилар: “Бу икки кун қандай кунлар?” Улар: “Биз жоҳилиятда бу икки кунни байрам қилиб, унда уйнар эдик”, дейишди. Шунда у зот марҳамат қилдилар:

إِنَّ اللَّهَ قَدْ أَبْدَلَكُمْ بِهِمَا خَيْرًا مِنْهُمَا يَوْمَ الأَضْحَى وَيَوْمَ الْفِطْرِ

“Аллоҳ сизларнинг бу кунларингизни улардан кўра яхшироқ бўлган икки кун – Қурбон ва Фитрга алмаштириб берди” (Имом Абу Довуд ривояти).

2. Ҳаж ибодатига тайёргарлик. Бу ой ҳаж ибодатига тайёргарлик кўриш мавсумидир. Ҳаж Ислом арконларидан бири ҳисобланган улуғ ибодат экани маълум. Зеро, мукаммал бажарилган ҳажнинг мукофоти жаннатдир. Унга етишиш ҳар бир мўмин-мусулмон орзуси. Бунинг учун, ҳаж ибодатидан олдин алоҳида ҳозирлик кўриб, унга доир аҳкомларни, шариат кўрсатмаларини кўнт билан ўрганиш ва амалда тадбиқ этиш керак. Бу ой эса, айнан шунга қулай фурсатдир.
3. Уйланиш. Хал­қи­миз орасида «икки ҳайит орасида никоҳ тўйи қи­либ бўл­май­ди» деган нотўғри, асоси йўқ тушунча бор. Ҳолбуки, Пайғамбаримиз (соллаллоҳу алайҳи ва саллам) икки ҳайит орасида, айнан, шаввол ойида ҳазрат Ойша онамиз (розияллоҳу анҳо)га уйланганлар. Демак, икки ҳайит орасида тўй қилиш мумкин, ҳатто мустаҳабдир.
4. Олти кун нафл рўза тутиш. Шавволнинг айнан Рамазондан кейин келишининг боиси Рамазон рўзасига бевосита боғлиқлиги учундир. Зеро, бу ойда соғлиғи ва имкони бор кишилар нафл рўза тутсалар, уларга Аллоҳ таоло кўплаб ажру мукофотлар беришини ваъда қилган. Жумладан, Абу Айюб Ансорий (розияллоҳу анҳу)дан ривоят қилинади. Пайғамбаримиз (соллаллоҳу алайҳи ва саллам) дедилар:

من صام رمضان ثم أتبعه بست من شوال كان كصوم الدهر

“Ким Рамазон рўзасини тутиб, сўнг кетидан шавволдан олти кун рўза тутса, йил бўйи рўза тутгандек бўлади” (Имом Ибн Можа ривояти).

Ҳадиси шарифдан маълум бўлишича, шаввол ойида рўза тутишнинг қатор фойдалари бор. Қуйида улар билан танишамиз:

1. Шавволнинг олти кунида рўза тутишнинг фойдаларидан бири шуки, ҳар йили ушбу ҳадиси шарифга амал қилган одам умр давомида рўза тутганлик савобини қозонар экан. Уламолар Рамазон рўзасидан кейин шаввол ойида олти кун рўза тутган кишига бир йил давомида рўза тутганлик мукофоти берилишини бундай тушунтиришган: “Маълумки, шариатимизда ҳижрий-қамарий тақвим асосида ҳисоб-китоб қилинади. Шундай экан, бир ҳижрий-қамарий йил тақрибан 360 кундан иборат. Шунда, ўттиз кун Рамазон рўзаси ўнга кўпайтилганда 10 ой, яъни, 300 кун ўрнига ўтади. Шаввол ойининг олти кун рўзасининг ўн баробари эса 60 кун, яъни, 2 ой бўлади. Қўшиб ҳисоблаганда, 360 кун (бир йил)ни ташкил қилади. Натижада, киши бутун йил бўйи рўза тутгандек бўлади. Зеро, Аллоҳ таоло Қуръони каримда бундай марҳамат қилади: 

مَنْ جَاءَ بِالْحَسَنَةِ فَلَهُ عَشْرُ أَمْثَالِهَا

“Кимки (бир) ҳасана (савобли иш) қилса, унга ўн баробар (кўпайтириб ёзилур)...” (Анъом сураси, 160-оят).

Демак, Рамазондан кейин шаввол ойида ҳам рўза тутиш фазилатли улуғ экан. Бунинг ҳикмати ўлароқ, мўмин-мусулмонлар Рамазондан бошқа пайтларда ҳам рўза тутиб, янада кўпроқ ажр-савобга эришишлари, қолаверса, Рамазон келишидан олдин, унга тайёргарлик кўриш мақсадида Шаъбон ойида ўзларини рўзага ўргатиб, ҳам жисмонан, ҳам руҳан тайёргарлик кўрганлари сингари, шавволда ҳам бир ой давомида рўза тутишга кўниккан ички аъзолар энди аста-секинлик билан таом истеъмолига мослашиши учун ҳамдир. Шундай йўл тутиш инсон руҳига ҳам, жисмига ҳам кони фойда. Зеро, табиблар шавволда бирдан ўзини овқатга уришни тавсия қилишмайди. Балки, овқат истеъмолини аста-секинлик билан кўпайтиришни таъкидлашади.

Бу олти кунлик рўзани шаввол ойининг иккинчи кунидан бошлаб тутиш мумкин. Зеро, шаввол ойининг биринчи куни Рамазон ҳайити бўлгани учун унда рўза тутиш тақиқланади. Шунингдек, Ийдул фитрдан сўнг дарҳол рўза тутиш ҳам шарт эмас, балки шаввол ойи давомида тутса, жоиз. Рамазон ойи давомида баъзи кунларининг рўзасини тута олмаган кишилар, аввал ўша кунларнинг қазосини адо этиб, сўнг олти кунлик рўзани тутсалар, айни муддао бўлади. Аммо, бу ойда олти кунлик нафл рўзани тутиб, Рамазондан қолган қазоларни ундан кейин ёки бошқа ойларда тутсалар ҳам зарари йўқ. Лекин уламоларнинг тавсия қилишларича, шаввол ойида тутиладиган олти кунлик нафл рўзани кетма-кет эмас, балки ҳар ҳафтада икки кундан тутиш фазилатдир. Айниқса, душанба ва пайшанба кунлари тутилса, нур устига нур бўлади. Зеро, бу кунларда тутилган рўзага қўшимча қилиб, ўша кунлардаги рўза туганлик ажри ҳам ёзилади, иншааллоҳ. Бундан ташқари, қазо бўлган рўзаларни ҳам мазкур ойда тутиш билан бу муборак ойдаги фазилатларга эришилади.

2. Шавволнинг олти кунида рўза тутишнинг яна фойдаларидан бири шуки, у Рамазон рўзасидаги йўл қўйилган камчилик-нуқсонларга каффорат бўлади. Зеро, беайб Парвардигори олам. Банда камчилик ва хатолардан холи эмас. Бу худди фарз намозлар ортидан ўқилган суннат намози кабидир. Ушбу суннатлар фарзда билиб-билмай йўл қўйилган камчиликларни бартараф қилади. Қиёмат куни банданинг нафл ибодатлари унинг фарз-вожиб амалларда йўл қўйган нуқсонларини тўлдиради. Зотан, Пайғамбаримиз (соллаллоҳу алайҳи ва саллам) бундай деганлар:

إن أول ما يحاسب الناس به يوم القيامة من أعمالهم الصلاة قال يقول ربنا جل وعز لملائكته وهو أعلم انظروا في صلاة عبدي أتمها أم نقصها فإن كانت تامة كتبت له تامة وإن كان انتقص منها شيئا قال انظروا هل لعبدي من تطوع فإن كان له تطوع قال أتموا لعبدي فريضته من تطوعه ثم تؤخذ الأعمال على ذاكم

“Инсонлар қиёмат куни амаллари ичида энг биринчи ҳисоб-китоб қилинадигани намоздир. Раббимиз азза ва жалла Ўзи яхши билса-да, фаришталарга қарата: “Бандамнинг намозига қаранглар-чи, у тўла-тўкис эканми ёки нуқсонлими?" деб айтади. Агар (банданинг намози) мукаммал бўлса, унга мукаммал деб ёзилади, агар унда бирор камчилик бўлса, Аллоҳ: “Каранглар-чи, бандамнинг бирор-бир нафл ибодати бор эканми?" дейди. Агар унинг нафл ибодатлари бўлса, Аллоҳ: “Бандамнинг фарз амалларини унинг нафл (ибодатлар)идан олиб тўлдиринглар", дейди. Сўнра (унинг қолган) амаллари ҳам шу йўсинда қабул қилинади" (Имом Абу Довуд ривояти).

3. Шавволнинг олти кунида рўза тутишнинг яна фойдаларидан бири шуки, бу ўз моҳияти билан мусулмон кишининг рўзадан зерикмаганига, балки унга рағбати кучлилигидан далолат қилади. Зеро, бу ойдаги рўзанинг ҳикмати ҳақида Ибн Ражаб (раҳматуллоҳи алайҳ) бундай деган: “Рамазон ойидан кейин рўза тутиб юришга одатланиш – Рамазон ойи рўзасининг қабул бўлгани белгисидир. Чунки Аллоҳ таоло бандасининг бирор амалини қабул қилса, ундан кейин уни (бошқа) солиҳ, хайрли ишларга бошлайди, давомли қилади”.
4. Тарихий воқеалар. Ислом тарихида бу муборак ойда жуда кўп ҳодисалар юз берган. Жумладан, манбаларда шу ойда бўлиб ўтган воқеаларнинг энг машҳури ўлароқ Расулуллоҳ (соллаллоҳу алайҳи ва саллам) пайғамбарликнинг ўнинчи йили тоифликларни Исломга чорлаш учун, Тоиф томонга йўл олиб, сафар давомида жуда оғир машаққат ва қийинчиликларга дуч келганлари тилга олинади. Мақола жуда чўзилиб кетмаслиги эътиборидан мазкур воқеа тафсилоти ва бошқа бўлиб ўтган ҳодисалар ҳақида тўхталмадик. Улар ҳақида тўлиқ маълумот олмоқчи кишилар Ислом тарихи оид манбаларга мурожаат қилишлари тавсия этилади.

Аллоҳ таоло барчамизни Рамазон ойи ва шаввол ойининг фазилатларидан баҳраманд қилсин. Омин!

Толибжон ҚОДИРОВ

тайёрлади.