muslim.uz.umi
Юртимиз яна дунёнинг энг хавфсиз давлатлари қаторида
“Global Terrorism Index – 2019” рейтингида терроризм хавфи даражаси бўйича Ўзбекистон 2019 йилда ўз ўрнини 2018 йилга нисбатан уч поғонага оширди ва 132-ўриндан 135-ўринга кўтарилиб, дунёнинг энг хавфсиз мамлакатлари қаторида қолди, дея “Тараққиёт стратегияси” маркази хабар берди.
Ушбу рейтингга дунёнинг 160 мамлакати терроризмнинг хавфлилик даражаси бўйича киритилган. Жумладан, энг хавфсиз давлатлар қаторида Туркманистон ва Беларусь 138-ўрин деб тан олинган. Эстония 123-ўрин, Латвия 117-, Литва 107-, Озарбайжон 103-, Грузия 90-, Қирғизистон 87-, Қозоғистон 85-, Тожикистон 50-ўринни, Россия Федерацияси эса террористик хавф бўйича рейтингда 37-ўринни эгаллаган.
Ўзбекистон мусулмонлари идораси матбуот хизмати
Россиянинг Томск вилояти Асино туманидаги ёғоч уйда юз берган ёнғинда ҳалок бўлган юртдошларимизнинг оилаларига ҳамдардлик
Россия Федерациясининг Томск вилояти Асино туманидаги ёғоч уйда юз берган ёнғин оқибатида ҳалок бўлган 10 нафар фуқароларимизнинг оила аъзолари ва яқинларига чуқур ҳамдардлик изҳор этамиз. Ҳалол меҳнат қилиб, аҳли оила нафақаси йўлида ҳалок бўлган ушбу йигитларимизнинг охиратлари обод бўлишини Ҳақ таолодан сўраймиз.
Ушбу фожиада ҳалок бўлганларнинг ҳақларига дуолар қилиш, мағфират сўраш ва яқинларига тасалли бериш инсоний бурчимиздир. Инсон қачон, қаерда ва қандай ҳолатда вафот этишини билмайди. Динимизда бирор фожиа билан вафот этган мўминнинг даражаси юқори бўлиши айтилган. Ҳазрати Пайғамбаримиз соллаллоҳу алайҳи ва саллам ҳадисларининг бирида киши сувга ғарқ бўлиб, ўтда куйиб, том остида қолиб вафот этса, шаҳидлик мақомини топиши таъкидланган.
Мазкур ёнғинда вафот этган юртдошлармизнинг ҳақларига дуо қилиб, Яратган Парвардигордан уларнинг солиҳ амалларини ўзларига ҳамроҳ қилишини, гуноҳларини мағфират этишини илтижо қилиб сўраймиз.
Ҳалок бўлганларнинг аҳли байтига Аллоҳ таолонинг қазои қадарини розилик ила қарши олган чинакам мўминларнинг мақомини сўраймиз, ҳақларига дуо қилиб, самимий ҳамдардлик билдирамиз. Парвардигоримиз қурбонларни Ўзининг раҳмати ва мағфиратига буркасин, ортларида қолган аҳли байти ва фарзандларига сабру жамил берсин!
Ўзбекистон мусулмонлари идораси
Президент: “Бирор университетда бир соат бўлса ҳам Имом Насафийнинг китобларидан дарс ўтилганми?!”
Ўзбекистон Республикаси Президенти Шавкат Мирзиёев бугун 20 январь куни Олий Мажлис Қонунчилик палатаси биринчи мажлисида қилган чиқиши давомида Ислом дини аҳкомларига нотўғри ёндошиб, диний мутаассибликка берилиб кетиш ҳолатлари рўй бераётганини айтиб ўтди. Президент айниқса Қашқадарё вилоятидаги вазиятдан ташвишда эканини таъкидлаб, XI-XII асрларда яшаб, ижод қилган аллома Абул Муин Насафий меросини ўрганишга чақирди.
«Охирги вақтларда Қашқадарёда турли иллатлар кўпайиб кетди. Илгари ҳеч бундай бўлмаган, мен ҳайронман. Энди савол пайдо бўлади: муқаддас Ислом динини ўргатиш учун керакли ишларни амалга оширдикми?
Қашқадарёда бирорта муқаддас қадамжо борми? Биз бундай жойга етарлича эътибор бердикми? Қашқадарё ҳокимидан шу ҳақда сўрадим ва «бор», деган жавоб олдим. Сўрасам, қайсидир жойда бир дарахт бор экан ва улар зиёратга бориб, ўша дарахтга латта боғлаб қайтар экан.
Хўш, дарахтга латта боғлашда қандай илм бор экан? Биз ўша жойни ўргандик, ҳеч қандай муқаддас нарса йўқ.
Қарши шаҳрида Насафий бобомизнинг ёдгорлиги бор (Абул Муин Насафий зиёратгоҳи — таҳририят изоҳи). Энди савол пайдо бўлади: бобомизнинг илмини етарлича ўрганганмизми? Бирор университетда бир соат бўлса ҳам унинг китобларидан дарс ўтилганми? Йўқ.
Алломамиз бундан минг йил олдин айнан динда тўғри йўлдан адашганлар ҳақида китоблар ёзиб кетган. Бу китобларни биз ўқиганмизми? Йўқ.
Мисрдаги катта-катта университетларда Насафийнинг китоблари ўрганилар экан», — деди Шавкат Мирзиёев.
https://islaminstitut.uz/
Фотолавҳа: Муфтий ҳазратлари умра зиёратчилари билан учрашдилар
20 январь куни Саудия Арабистони сафарида бўлиб турган Ўзбекистон мусулмонлари идораси раиси, муфтий Усмонхон Темирхон ўғли Самарқандий ҳазратлари ва Дин ишлари бўйича қўмита раиси Абдуғофур Аҳмедов Макка шаҳридаги “Аброж ал-Кисва” меҳмонхонасида умра зиёратчилари билан учрашдилар. Мулоқотда юртдошларимизнинг фикр-мулоҳазаларини тинглаб, ҳозирланган шарт-шароитлар билан яқиндан танишдилар.
Ўзбекистон мусулмонлари идораси Матбуот хизмати
Иқрор
Туркиялик Ватандошимиз ёзувчи Собир Сайхон бир сафар юртимизга келганларида “Ислом ота” масжидига кириб биргаликда "Пешин" намозини адо этдик. Таҳорат олар эканмиз Собир ака менга мамнун қараб:
- Набижон масжиднинг умумий кўриниши билан таҳоратхонани суратга тушириб “телеграм”имга ташлаб берсангиз, - дедилар.
- Нега? - дедим ҳайрон бўлиб.
- “Мақтайверма... Юртингда Масжидлар қаровсиз” дейдиган айрим кимсаларга кўрсатиб қўймоқчиман.
Дарров илтимосни бажардим.
Ҳа, чинданам кейинги йилларда Республикамиздаги масжидларга катта эътибор берилди. Вилоят ҳатто чекка туманлардаги таҳоратхоналар ҳавас, ифтихор қилса арзигулик даражада кўркамлашди. Бу борада анча илгарилаб кетдик. Озода шинам хоналар турфа хил совунлару қимматбаҳо қоғозлар хушбўй атирлар билан зийнатланди. Юз учун бошқа оёқ артишга бошқа покиза сочиқларни ишлатиб танангиз яйрайди, беихтиёр қалбингиз ёришиб бутун вужудингизни шукроналик ҳисси эгаллаб онгу- шуурингизда Диний қўмитамиз раҳбарларига нисбатан ҳурмат, миннатдорчилик туйғулари жўш уради. Илло, Ватан ободлиги, равнақи йўлида жимгина ўз ишини қилаётган мутасаддилар ҳақига дуолар, раҳматлар айтасиз.