Жаноби Пайғамбаримиз Расулуллоҳ саллаллоҳу алайҳи васаллам: «Икки неъмат борки, кўпчилик инсонлар унинг қадрига етмайдилар. Улар – сиҳат-саломатлик ва хотиржамликдир», – дедилар» (Имом Бухорий ривоятлари). 

Бир куни “Пайғамбарларнинг отаси” бобомиз Иброҳим алайҳиссалом сўрадилар:

– Эй, Парвардигори олам! Дард кимдан?

Аллоҳ таоло:

– Мендан, – деди.

Иброҳим алайҳиссалом яна сўрадилар:

– Даво кимдан?

Аллоҳ таоло яна:

– Мендан, – деди.

Шунда Иброҳим алайҳиссалом:

– Унда шифокорга не ҳожат? – дедилар.

Аллоҳ таоло:

– Шифокор – қўлига даво юборилган кишидир, – деб марҳамат қилди.

Жаноби Пайғамбаримизнинг айтган муборак сўзларидан оладиган хулосамиз – қайси бир дард-касалликни Аллоҳ таоло юборган бўлса, демак, унинг шифосини ҳам юборган. Шифосини эса даволовчи, табиб, шифокорларнинг қўллари орқали юборар экан! 

Шарқ-у ғарб-у олимлари  тан олган, XXI асрнинг нанотехнология замонасида ҳам асарларини бутун дунё халқлари бошга кўтараётган, жаҳоннинг олий тиббиёт ўқув даргоҳларида китоблари ҳанузгача ўқитилиб келаётган, ер юзининг энг нуфузли тиббиёт академияларида илмий ишлари ўрганилиб келаётган, ёруғ оламдаги бутун бир улкан ва жиддий соҳани шу инсоннинг исмлари билан номланган Абу Али ибн Сино ҳазратлари айтадилар:

"Тузатиб бўлмайдиган дард йўқ,
Иродасизлик бор.
Шифобахш бўлмаган ўсимлик йўқ,
Илмсизлик бор".

Худои таоло Ўзи яратган барча махлуқот-у мавжудотларини жуфт-жуфт қилиб яратган. Илло Ўзигина яккаю-ягона ёлғиз холос! Қолган ҳамма нарсаларни жуфтли этиб қўйган. Қуёш-ой, ёз-қиш, эркак-аёл, оқ-қора, ер-осмон, жаннат-дўзах, ўлим-ҳаёт, савоб-гуноҳ, кеча-кундуз ва ҳоказо. Аллоҳ таоло яратган ҳар бир нарсанинг жуфти, зидди бор.

Демак, дарднинг ҳам жуфти, зидди бор экан. Бу нима? Бу – даво! Ҳар бир касалликнинг ҳам жуфти, зидди бор экан. Бу нима? Бу – шифо!

Модомики Аллоҳ таоло ҳар бир дардга – даво, ҳар бир касалликка – шифо юборибдими, энди сизу-биз бандаларининг иши – шу даво ва шифоларни излаб топиш!

Имом Бухорий ва Имом Муслим асарларида Абу Ҳурайра разияллоҳу анҳудан ривоят қилинган қуйидаги ҳадиси шариф мавжуд:

Расулуллоҳ алайҳиссалом айтдилар: "Аллоҳ қандай касаллик туширган бўлса, албатта, унинг шифосини ҳам туширган".
       

Зиёд ибн Алақа разияллоҳу анҳу Усома ибн Шэрик разияллоху анхудан шундай ривоятни келтиради:

"Мен Расулуллоҳнинг ҳузурларида эдим. Бир аъробий келиб:

– Ё, Расулуллоҳ! Даволансак бўладими? – деб сўради.

Расулуллоҳ алайҳиссалом:

– Ҳа, эй, Аллоҳнинг бандалари! Даволанинглар! Чунки Аллоҳ таоло қандай дардни яратган бўлса, албатта, унинг шифосини ҳам яратган. Лекин битта дарднинг давоси йўқ, – дедилар.

Саҳобийлар:

– У қайси дард? – деб сўрашди.
Расулуллоҳ  алайҳис  салом:

– Қарилик, – деб жавоб бердилар.

Яна бир ҳадиси шарифларида Жаноби Пайғамбаримиз Расулуллоҳ алайҳиссалом айтдилар: ”Ҳар бир дарднинг давоси бор. Агар даво дардга етиб борса, Аллоҳ азза ва жалланинг изни билан тузалади" (Имом Муслим ривоятлари).

Доно халқимиз “Бирни кўриб – фикр қил, бирни кўриб – шукр қил!” деб бежиз айтмаган. Телевизоримизни пультидаги хоҳлаган тугмасини босиб, хоҳлаган телеканалга қўйсак, дунёнинг неча минглаб жойларида неча юз минглаб турли ёшдаги инсонлар тансиҳатлик (!) излаб, сарсон-саргардон бўлаётганига ўз кўзимиз билан гувоҳ бўламиз...

Оилаларимиз саломатлиги учун ҳам, ўзларимизнинг соғлигимиз учун ҳам нечта одам хизмат қилмоқда? Уларнинг икки-учтасини кўра олсак, неча миллионтасини ҳаёлимизга ҳам келтира олмаймиз! Хатто тасаввур қилишга ҳам ожизлик қиламиз!

Ҳар қандай ақлли одам доно юртимиз тинчлиги ва халқимиз саломатлиги учун сон минглаб ўзимизнинг ака-укаларимиз, опа-сингилларимиз, ўғил-қизларимиз хизмат қилаётганини алоҳида эътироф этади ва юксак қадрлайди.

Жаннатмакон юртимиз тинчлиги, муқаддас Ватанимиз равнақи, доно халқимиз саломатлиги ва фаровонлиги учун ҳар бир инсоннинг қилаётган хизматларига миннатдор бўлишимиз – ҳам бурчимиз, ҳам фарзимиз, ҳам қарзимиздир! 

“Ҳаёт” номли "университет"нинг "тилло дипломи"га эга бўлган, “тажриба” номли "олий ўқув юрт"нинг "бриллиант сертификати"га эга бўлган ва “ақл” номли "институт"нинг "гавҳар дипломи"га эга бўлган оқил ва доно оталаримиз ҳам, ёшлари улуғ табаррукларимиз ҳам Ўзига илтижо қилганларида “Тансиҳат, хотиржамлик бергин, Худойим!” деб, дуо қиладилар. Бежиздан-бежизга эмас!

Устозларимиз айтадилар: “Ҳаётдан киши олмаса таълим, ўргата олмас унга ҳеч бир муаллим”. Кундалик ҳаётимизда эҳтиёт бўлишимиз лозим экан. Яна билиб-билмасдан Жаноби Пайғамбаримиз алайҳис саломнинг: «Икки неъмат борки,  кўпчилик инсонлар унинг қадрига етмайдилар. Улар – сиҳат-саломатлик ва хотиржамликдир»,  деган муборак сўзларига қарши бўлиб қолмайлик!

                                                                                               Иброҳимжон домла Иномов

                                              Ўзбекистон мусулмонлари идораси раиси ўринбосари

Фазилатлар ичида энг гўзали қаноатдир. Қаноатли киши чинакам бахтиёрдир.

Китоб ўқишдан тўхтаган одам фикрлашдан ҳам тўхтайди.

Мард одамгина нафсини жиловлай олади.

Энг бой одам имонли одамдир.

Мусибат етганда меҳнатга берилинг. Уни енгишга ёрдам беради.

Барака истасанг, мулойим бўл, нажот тиласанг, ростгўй бўл!

Тилни тийиш санъати бутун санъатнинг пойдеворидир.

Қалби гўзал бўлган одамга яқинлашаверинг, яхшилик кўрасиз.

Инсоннинг солиҳ амалигина абадийдир.

Бугуннинг қийинига чидасангиз, эртанинг ҳузурини кўрасиз.

Саҳарда турган кишигина савобу баракадан баҳраманд бўлади.

Умид билан яшанг, ноумидлик шайтон васвасасидир.

Сизни улуғлаганни улуғланг, сизни ёмон лаганларга яхшилик қилинг, иккала ҳолатда ҳам сиз улуғланасиз.

Яхши амаллар аёл кишини зийнатлайди, уни янада гўзал ва назокатли қилади.

Тўлқин МУҲИДДИН,
меҳнат фахрийси

“Ҳидоят” журналининг 2022 йил 10-сонидан олинди

Аллоҳ таоло дунё ҳаётида инсониятни беҳисоб неъмат лар билан ризқлантирганки, унинг саноғига етиб бўлмаслиги хақида Қуръони каримда шундай баён қилинган:
«Сизларга барча сўраган нарсаларингиздан ато этди. Агар Аллоҳнинг неъматини санасангизлар, саноғига етолмайсиз. Ҳақиқатан, инсон ўта золим ва жуда ношукрдир» (Иброҳим, 34). Баъзи кишилар неъмат сўзининг маъносини жуда тор доирада тушунадилар. Бирор орзу умидлари амалга ошишини, ҳар ким ҳам етиша олмайдиган нарсаларни қўлга киритишни, жумладан, катта мол-дунё, фарзанд, бирор мансаб-мартаба ва шунга ўхшаш орзу ҳавасларга эришишнигина неъмат деб биладилар. Сув, ҳаво, тан соғлик, эл-юрт тинчлиги каби, инсон ҳаётининг асоси бўлган бу нарсаларга бепарво қараб, гўё булар ўз-ўзидан пайдо бўлиб қолган табиий ҳолат деб ўйлайдилар.
Ҳолбуки, кишининг дунё ва охирати учун манфаат етказадиган нарсалар борки, уларнинг барчаси неъмат ҳисобланиб, динимиз бизларни унинг қадрига етиб яшашга буюради, зеро неъматнинг қадрини билиш, уни эъзозлаш неъмат берувчи «Мунъим» (Аллоҳ)нинг қадрига етиш ва шукрини адо этиш демакдир.
Пайғамбар алайҳиссалом ҳадисларининг бирида: «Қайси бирингиз тонгда уйқудан уйюнганда оиласи тинч, тани coғ ва уйида бир кунлик егулиги бўлса, билсинки, унда дунёдаги барча неъматлар мужассам экан», деб неъматни кенг маънода тушуниш лозимлигига ишора килганлар.Неъмат моддий ва маънавий бўлиб, юқорида санаб ўтганларимиз моддий неъматлар жумласига киради. Маънавий неъматлар эса имон, ислом, акд, ҳуррият, тинчлик каби кўзга кўринмайдиган, бироқ моддий неъматларга қараганда қадрлироқ нарсалардан иборатдир.
Неъмат нинг бардавом бўлиши, унинг шукри адо этилишига боғлиқдир. Аллоҳ таоло Қуръони каримда таъкидлаб шундай мархамат қилган:»Қасамки, агар (берган неъматларимга) шукр қилсан-гиз, албатта (уларни янада) зиёда қилурман. Борди-ю ношукрчилик қилсангиз, албатта, азобим (ҳам) жуда қаттикдир» (Иброҳим, 7).Неъматнинг салмоғига яраша шукр лозимдир. Баъзи неъматларнинг шукри тилда «алҳамду лиллоҳ» дейиш билан адо бўлса, бошка хил неъматлар ҳам борки, улар нинг шукрини адо этишда тил билан айтилган ҳамднинг ўзи кифоя қилмайди, балки буларга амалий шукр даркор. Масалан, намоз, рўза каби ибодатларни адо қилиш тан соғлиқнинг шукри бўлса, имон ва ислом неъматининг шукри фарзандларимизни имон-эътиқодли, ҳало, пок қилиб вояга етказишдир.
Неъматларнинг энг сараси бўлмиш мустақилликни тинчлик амалий шукри эса ёшларимизни ватанга муҳаббатли қилиб тарбиялаш, десак муболаға бўлмайди. Тинчликнинг қадрини турли ўлкаларда бўлиб турган қўпорувчилик ҳаракатларини, одамларнинг нотинч ҳолатларини кўз ўнгига келтирган одамгина чуқур ҳис кила олади. У ердаги одамлар нинг кўнглига ибодат қилиш у ёқда турсин ҳатто еб-ичиш ҳам сиғмайди. Бас шундай экан, маънавий неъмат нинг шукрини доим адо этиб турмоғимиз лозим. Инсон берилган бу неъматларга қай даражада шукр қилган ёки қилмагани ҳақида қиёмат кунида албатта сўралади. Расулуллоҳ (с.а.в.) бир ҳадисда: «Аллоҳ таоло қиёмат кунида бандасидан: «Танингни соғ қилиб қўймаганми-дим? Сени муздак сув билан қондирмаганмидим…?», деб сўрайди», деганлар (Имом Термизий ривояти). Бошқа бир ҳадисда: «Одам боласи қиёмат кунида то беш нарсадан сўралмагунча жойидан жилмайди: умрида нима ишлар қилгани, ёшлик даврини қандай ўтказгани, молини қайси йўл билан топиб, қаерга сарф қилгани ва ниҳоят билганларига қай даражада амал қилгани»,деб марҳамат қилганлар. Неъматни Аллоҳдан деб билиш кишини Аллоҳга яна ҳам яқинлашишга, унга тақарруб ҳосил қилишга ундайди. Аксинча, тинчлик шукри адо этилмаган неъмат эса инсонга офат келтиради.
Динимиз кишиларини тинчликни асраш ва барқарорликни таъминлаш йўлида хамжихатлик ва бирдамлик билан харакат қилишимиз керак.

Соҳибжон Камалов,
Мингбулоқ тумани "Мулла тожи Аҳмад" жоме масжиди имом ноиби

Шу йил 10 ноябрь куни Ўзбекистон мусулмонлари идораси раиси ўринбосари Иброҳимжон домла Иномов Қуддус халқ конгресси Бош котиби Билол Ан-Натшах бошчилигидаги Фаластин делегациясини қабул қилди.

Учрашувда Иброҳимжон домла Иномов делегация аъзоларини ташриф билан қутлаб, сўнгги йилларда Ўзбекистон билан Фаластин ўртасидаги дўстлик ва кўп томонлама ҳамкорлик равнақ топаётгани, жумладан, диний соҳадаги алоқалар янада ривожланиб бораётгани, икки халқ ўртасида асрлар давомида шаклланган ришталар бугунги кунда ҳам янгича мазмун касб этаётгани ҳамда ўтмишда ота-боболаримиз Фаластин ерларига сафарлар қилганлари, шунингдек, Ўзбекистон мўмин-мусулмонлари Фаластиндаги муаммолар тинчлик ва музокара йўли билан ечим топиши тарафдори эканини таъкидлади.

Билол Ан-Натшах жаноблари самимий қабул ва илиқ фикрлар учун ташаккур айтиб, Ақсо масжиди нафақат фаластинликлар, балки бутун Ислом олами учун катта неъмат экани, унинг омонлиги учун мўмин-мусулмонлар, аввало, дуо қилишларини изҳор қилди. Шунингдек, Фаластиннинг Ўзбекистонга ўхшаш жиҳатлари жуда кўп экани, хусусан, диний бағрикенглик муҳитида бу ўхшашлик яққол намоён бўлиши, турли дин вакиллари қадим-қадимдан бирга яшаб келаётганларини мисол сифатида келтирди.

Мулоқот давомида зиёрат туризми бўйича ўзаро ҳамкорлик масаласи ҳам ўзаро муҳокама этилди.

Учрашув дўстона ва самимий руҳда ўтди. Якунда ўзаро ҳадялар алмашилди.

Ўзбекистон мусулмонлари идораси Матбуот хизмати

Бугун, 11 ноябрь куни Ўзбекистон мусулмонлари идораси раиси, муфтий Нуриддин домла ҳазратлари жума намозини мўмин-мусулмонлар билан бирга адо этиш ва мавъиза қилиш учун Самарқанд туманидаги "Имоми Аъзам" жомесига ташриф буюрдилар.

Ўзбекистон мусулмонлари идораси Матбуот хизмати