“Қанча қолганингизни Роббингиз яхши билгувчидир, шаҳарга бирингизни ушбу пулингиз ила юборинг, назар солиб, яхши таомни танлаб, ундан ризқ келтирсин ва диққатли (мўътадил) бўлсин” (Каҳф сураси, 19-оят).

“Мўътадил бўлсин” сўзининг Қуръоннинг қоқ ўртасида келиши жуда ажойиб ҳолат. Мўътадиллик бу васатийлик, ўртабинликнинг бир туридир. Бу сўз Қуръоннинг энг ўртасида келган. Бу эса айни вақтда Раббоний йўл бўлмиш – васатийликнинг аҳамиятини белгилаб беради.

Душманлар билан мўътадил муомалада бўлиш талаб қилинар экан, мўминлар ҳақида-ку гапирмаса ҳам бўлади.

Масжидга келган бир йигитнинг телефони намоз ичида бехосдан жиринглаб қолибди, кейин намозхонлар: “Аллоҳнинг уйида Унга осийлик қиляпсанми?! Аллоҳ сени ерга юттиришидан қўрқмайсанми?!” дея ўкира кетишибди.

Ҳалиги йигит масжиддан шу чиққани бўйича қайтиб қадам ҳам босмабди.

Ўша куни бир қаҳвахонага борибди ва бир шиша идишнинг қопқоғини билмасдан ерга тушириб синдириб қўйибди. Шунда қаҳвахона эгаси унга қараб: “Хижолат бўлманг, жаноб! Мингта қопқоқ сиздан айлансин”, дебди.

Шу кундан бошлаб у қаҳвахонанинг доимий мижозига айланибди!

“Хушхабар беринглар, нафратлантирманглар”. Бу Ҳабибимиз соллаллоҳу алайҳи васалламнинг насиҳатларидир.

Агар ота-оналар, эр-хотинлар атрофларидаги яқинларига хушмуомалада бўлсалар, кўп муаммолар ўз-ўзидан ечим топади ва кўпчилик хонадонларни тинчлик, ҳамжиҳатлик қамраб олади!

Одамлар ўртасидаги алоқалар худди қушларга ўхшайди, маҳкам ушлаб оласангиз, ўлиб қолади, енгил ушласангиз учиб кетади!

Эътибор билан ушлашингиз керак, шунда сиз билан қолади, ҳеч қаерга учиб кетолмайди, ўлиб ҳам қолмайди.

Юмшоқ сўзчалик, ёқимли табассумчалик, самимийлик ва холислик каби ҳеч нарса қалбларни маҳв этолмайди.

Ҳазрати Умар розияллоҳу анҳу тунда ёқилган гулханни кўрганида: “Эй ёруғлик аҳли” деб нидо қилган эканлар. “Ҳой олов аҳли” дейишни маъқул кўрмаганлар.

Буларнинг ҳамма-ҳаммаси Аллоҳ таолонинг қуйидаги оятига асосланади: “Бандаларимга айтгин, улар энг гўзал бўлган нарсани айтсинлар. Албатта, шайтон ораларини бузиб турадир” (Исро сураси, 53-оят).

Набий соллаллоҳу алайҳи васаллам айтадилар: “Кимки юмшоқфеъллик билан насибаланган бўлса, яхшилик билан насибаланган бўлади. Ким бундан маҳрум бўлса, яхшиликдан ҳам маҳрум бўлади”.

Доктор Ҳассон Шамси Пошонинг "Метин қоялар" китобидан

Ғиёсиддин Ҳабибуллоҳ, Неъматуллоҳ Исомов таржимаси.

Марҳум отам ўзлари яхши кўрган ҳар бир нарсани менга ҳам бўлиб берардилар. Албатта бу барча оталар қиладиган иш. Лекин менинг отам ҳатто қадаҳдаги ичиб турган сувларидан ҳам менга илинардилар. Ширинлик еб турган бўлсалар, гарчи ширинлик ўта оз бўлса ҳам “Қизим, шуни сен еб қўйгин, мен тўйиб қолдим” деб менга берардилар. Ваҳоланки, ширинликка деярли қўл урилмагани билиниб турарди.

Ўйлайманки, барча оталар ҳам бу нарсага аҳамият беришмайди. Фарзандга эътибор бериш бир кун келиб албатта мевасини беради. Болалар ҳамма нарсани ёдда сақлашади. Мана ёшим 35дан ошган бўлса ҳам, ҳалигача отамнинг ўша одатлари эсимдан чиқмайди. Ўзим ҳам еб турган нарсамни болаларимга отам каби бўлиб беришга ҳаракат қиламан.

Отамнинг бу одатларидан мени жуда қаттиқ яхши кўришларини, доимо эътиборларида эканимни билиб турардим. Шунинг учун бўлса керак, ёшлигимда бегона эркакнинг эътиборига эҳтиёж сезмаганман. Дугоналаримнинг баъзилари бир неча йигитлар билан гаплашадиган, учрашиб юрадиган бўлиб кетишди. Отам сабабли Аллоҳ мени бундай хорликдан сақлади.

Бугун нима яхши иш қилсам ҳам, савобига отамни шерик қилишини Аллоҳдан сўраб дуо қиламан. Садақа қилсам ёки бировга ёрдам бериб дуо оладиган бўлсам, менга қўшиб отамни ҳам дуо қилишларини илтимос қиламан. Ўзимнинг ҳар кунги махфий дуоларимда ҳам отамнинг ҳақларига дуо қилишга алоҳида вақт ажратаман. Хотирамда ҳамон отамнинг менга илинган ширинликлари гавдаланади, “Қизим, мен шуни еёлмадим, сен еб қўйгин” деган меҳр тўла сўзлари эшитилиб тургандек бўлади.

Доктор Абдуллоҳ Муҳаммад Абдулмуътининг
"Фарзанд тарбиясида 700 та сабоқ" китобидан
Ғиёсиддин Ҳабибуллоҳ, Камронбек Ислом таржимаси.

Зиёратчиларга қулай шароит қилиш мақсадида Масжидун Набавийга 25 мингдан ортиқ гилам тўшалди, - дея хабар берди“Сауди Пресс” агентлиги.

“Arabnews” хабарига кўра, гиламлар масжид ичи, ҳовлилар ва томларига ётқизилиб, ҳар куни тозаланади ва тоза ва хушбўй ҳид таратиши учун энг яхши мушклар сепилади.

Мазкур гиламлар чидамлилиги ва қалинлиги билан ажралиб туради. Ҳар бир гиламга электрон чип ўрнатилган бўлиб, унинг жойлашуви, ювиш, тозалаш, ҳушбўйлик сепиш ва кўчириш вақтлари кузатиб борилади.

Ўзбекистон мусулмонлари идораси

Матбуот хизмати

Тошкент Ислом институтида “Январь – Араб тили ва балоғат” фанлари ойлиги муносабати билан “Араб тили –  Қуръони карим  тили” шиори остида Араб тили фанидан талабалар ўртасида мусобақа ўтказилди.

Қуръони карим тиловати билан бошланган тадбирни Ўзбекистон мусулмонлари идораси раиси ўринбосари, Имом Бухорий номидаги Тошкент ислом институти ректори Муҳаммадолим домла Муҳаммадсидиқов кириш сўзи билан очиб берди.

Мусобақада ҳар бир курс талабаларидан ташкил топган гуруҳларда 4 тадан иштирокчи қатнашди. Уларнинг чиқишини институтнинг малакали устозларидан иборат ҳакамлар 20 баллик тизимда баҳолаб борди.  

Иштирокчилар мусобақанинг 5 шарти, яъни матн ўқиш, таржима ва таркиб қилиш; Араб тилидаги исмлардан охири тугаган ҳарфга луғат айтиш; қўйилган овозсиз видеони шарҳлаш; ҳикмат айтиш беллашуви ва саҳна кўриниши бўйича ўзаро беллашди.

Якуний натижалар эса қуйидагича бўлди:

1-ўрин: 2 курснинг Мулла Жомий жамоаси;

2-ўрин: 4 курснинг Замахшарий жамоаси;

3-ўрин: 1 курснинг Журжоний жамоаси;

4-ўрин: 3 курснинг Саккокий жамоасига насиб этди.

Тошкент Ислом институти

Матбуот хизмати

24 январда бошланган Қоҳирадаги 55-халқаро китоб кўргазмасида Қуръони карим ва брайл алифбосида ёзилган кўплаб диний китоблар намойиш этилди.

Кўргазмада Қуръон нусхалари ва брайл алифбосида ёзилган кўплаб диний китоблар намойиш этилди, дея хабар беради “IQNA” сайти “Youm7” нашрига таяниб. Ушбу асарларнинг аксариятини кўзи ожизлар учун махсус ёрдам уюшмаси тақдим этган.

Кўзи ожизлар стендида кўргазмага қўйилган китоблар орасида Қуръони карим ва унинг турли тафсирлари, замонавий мисрлик Қуръон мутафаккирларининг атеистлар билан мунозаралари ва аёллар ҳуқуқларига оид ёзувлари ўрин олган.

Қуръони каримни кўзи ожизларга ўргатиш Мисрда анъанага айланган ва мисрликларнинг энг машҳур қори ва ҳофизлари кўзи ожиз бўлган. Бироқ илгари бу тадқиқотлар фақат анъанавий ва эшитиш усулида олиб борилган. Сўнгги йилларда янги технологиялардан, айниқса, Брайл алифбоси ва Қуръон алифбосидаги ўқув китобларидан фойдаланишга ҳам катта эътибор қаратилмоқда.

Миср пойтахти Қоҳирада бўлиб ўтаётган кўргазмада 70 дан ортиқ давлатдан 1 200 та нашриёт иштирок этмоқда.

Бу йилги Қоҳира кўргазмасининг Олий қўмитаси Мисрнинг ўзига хослигини мустаҳкамлашдаги муҳим роли туфайли таниқли тарихчи олим Салим Ҳасанни 55-Қоҳира кўргазмасининг асосий қаҳрамони сифатида танлади.

Кўргазма 6 февралгача давом этади.

Ўзбекистон мусулмонлари идораси

Матбуот хизмати