Аввал хабар қилганимиздек, жорий йилнинг 14 май куни Ўзбекистон мусулмонлари идорасининг Фарғона вилояти вакиллиги томонидан вилоят ҳокимлиги билан ҳамкорликда вилоятда фаолият кўрсатаётган имом-хатиблар ва имом-ноибларининг билим ва кўникмаларини оширишга қаратилган қисқа муддатли ўқув семинари бошланган бўлиб, мазкур семинарга пойтахтдан меҳмонлар таклиф қилиниши ҳақида айтилганди.

Муборак ойнинг фараҳбахш кунларида Ўзбекистон мусулмонлари идораси раиси ўринбосари, шайх Абдулазиз Мансур ҳазратлари ҳамда Ўзбекистон мусулмонлари идораси Уламолар кенгаши аъзоси Ҳасанбой домла Қодировлар Фарғона вилоятига ташриф буюрдилар.

Тошкент ахборот технологиялари университетининг Фарғона филиали мажлислар залида мартабали меҳмонлар ва вилоятда фаолият юритаётган имом-хатиблар билан учрашув бўлиб ўтди.

- Бугун имом-хатиблар зиммасида масъулият ва вазифалар ҳар қачонгидан ҳам талайгина. Шундай экан, ҳар бир имом ўз устида мунтазам ишлаши, доимий равишда китоб мутолааси билан ошно бўлиши лозим. Айниқса, муҳтарам юртбошимиз ташаббуслари билан очилган "Фиқҳ мактаби"нинг мавқеини кўтариш, бу ердан Бурҳониддин Марғилонийнинг ворисларини яна тарбия қилиш даркор, - дея таъкидлади шайх Абдулазиз Мансур ҳазратлари.

Ўзбекистон мусулмонлари идораси Уламолар кенгаши аъзоси Ҳасанбой домла Қодиров ҳам тадбирда нутқ сўзлаб: - "Имомлар халқнинг бир бўлаги. Бугун мўмин-мусулмонлар ҳар ишида унинг фиқҳий ечимини сўрашга ошиқмоқда. Бу албатта халқимизни  муқаддас динимизга бўлган муҳаббати ва ихлосидан нишона. Шундай экан, имом-хатиб саволларга жавоб берар экан, албатта илмий асосланаган, ҳужжат-далил орқали жавоб беришга тайёр туриши муҳим", - эканини қайд этди.

Учрашув савол-жавобларга уланиб, иштирокчилар ўзларини қизиқтирган саволларга жавоб олдилар.

Эслатиб ўтамиз, имом-хатиблар ва имом-ноиблари  учун қисқа муддатли ўқув семинари давом этади. Семинар дастури давомида ана шундай қизиқарли учрашувлар белгиланган.

Вакиллик матбуот хизмати

Кеча, 19 май куни Ўзбекистон Республикаси Президенти Шавкат Мирзиёев Андижон вилоятига ташриф буюриб, аҳоли вакиллари билан учрашув ўтказди. Ушбу учрашувда мамлакатимиз Президенти Ўзбекистон халқини мусулмонларнинг муқаддас ойи Рамазон ойи билан табриклади. Бу ҳақда Президент Матбуот хизмати хабар берди.

"Фурсатдан фойдаланиб меҳнаткаш, бағрикенг ва олийжаноб Ўзбекистон халқини, улар қаторида бугун мана шу Андижон халқини, жумладан фахримиз ва дуогўйларимиз бўлган, муҳтарам отахон ва мунис онахонларимизни кириб келган муборак Рамазон ойи билан чин қалбимдан муборакбод этмоқчиман", деди Ўзбекистон Республикаси Президенти Шавкат Мирзиёев.

Ушбу қутлуғ ва баракотли кунларда Яратгандан бетакрор эл-юртимиз ҳамиша тинч ва осойишта бўлишини, сизларга ва оила аъзоларингизга ҳамда бутун халқимизга мустаҳкам соғлик ва саломатлик, қут-барака ва бахт-саодат ёр бўлишини сўрайман. Ватанимиз тараққиёти, юртимизнинг ободлиги, халқимиз фаровонлиги учун олиб бораётган барча ишларимизга қодир Аллоҳ ўзи мададкор бўлсин деб, ҳар биримиз мана шундай ниятлар билан яшасак, қутлуғ Рамазон ойида обод масжидларда, файзли хонадонларда ўқилаётган дуолар ижобат бўлсин", дея ўз табригини йўллаган Шавкат Мирзиёев.

ЎМИ Матбуот хизмати

ЎМИ Матбуот хизмати

Ҳазрати Али розияллоҳу анҳу бир насроний одамнинг уйида меҳмон бўлди. Мезбон узум келтирди. Ҳазрати Али еди. Сўнгра узумдан тайёрланган шароб келтирди.

Али розияллоҳу анҳу:

­– Ҳаром, ­– деди.

Насроний:

– Сиз мусулмонларга ҳайронман. Узум ҳалол, шароб ҳаром, Ахир шароб ҳам узумдан қилинади-ку! – деди.

Ҳазрати Али ундан:

– Аёлинг борми? ­– деб сўради.

– Бор, – деб жавоб берди у.

­– Қизинг борми?

– Қизим ҳам бор.

– Иккови ҳам келсин бу ерга.

Али розияллоҳу анҳу мезбоннинг аёли ва қизи кирганидан сўнг:

– Бу қиз бу онадан, аммо кўряпсанки, Аллоҳ таоло сенга онасини ҳалол, қизини эса ҳаром қилмиш, -– деди.

Бу жавобдан ҳайратга тушган насроний:

– Шаҳодат бераманки, Аллоҳ бирдир ва Муҳаммад Унинг Расулидир ва Сен Унинг халифасисан, ­– деди мусулмон бўлганини эълон қилди.

Робия ЖЎРАҚУЛОВА тайёрлади.

Кунии кеча муборак рамазон ойи кирди. Маҳалла-кўй тўпланишиб масжидимизга таровеҳ намозини ўқигани бордик. Намозга йиғилган одам ўтган йилгидан уч-тўрт баробар кўп. Бурунги йиллари намозхонлар таровеҳнинг яримларига келганда таҳоратга, бошқа нарсаларга қўзғалиб қолар эди. Бу йил ҳамма охиригача ўқиди. Аллоҳ таолонинг марҳамати ила бугун учинчи таровеҳни ўқиймиз.

Ўртароқ сафда туриб намоз ўқир эканман, одамларимиз намозга хийла маҳкам бўлиб қолибди, деб суюниб қўйдим. Зеро, таровеҳни ўқиган одам ҳам намоз ўқиганининг, ҳам Қуръони каримни хатм қилганнинг савобини олади-да.

Ҳамма нарса ўзининг ўрнида қийматли бўлади деганларидек, рамазон ойида тутилган рўзанинг, ана шу кечаларда ўқилган йигирма ракат намознинг,  қилингани тиловати Қуръоннинг савобини бошқа ҳеч вақтда топиш мумкин эмас. Бошқа вақтда 24 соатлаб рўза тутсангиз ҳам, минг ракатлаб намоз ўқисангиз ҳам, бир кечада бир мартадан хатм қилсангиз ҳам бугуннинг савобига асло эриша олмайсиз.

Нега? Чунки Аллоҳ таоло Қуръони каримни айнан рамазон ойида дунё осмонига туширди ва Пайғамбар соллаллоҳу алайҳи васалламга нозил эта бошлади. Ибн Аббос розияллоҳу анҳумодан ривоят қилинади: «Қуръон дунё осмонига Қадр кечасида бир йўла нозил қилинди. Сўнгра, ундан кейин йигирма йил мобайнида бўлиб-бўлиб нозил қилинди» (Имом Байҳақий ривояти)

Рамазон ойида тўлиқ бир ой рўза тутишни Аллоҳ таолонинг Ўзи амр қилиб:  “Эй, имон келтирганлар! Сизлардан олдинги (уммат)ларга фарз қилингани каби сизларга ҳам рўза тутиш фарз қилинди, шояд (у сабабли) тақволи бўлсангиз” (Бақара сурасининг 183-ояти), деди ва унинг мукофотини Ўзи беришини ваъда қилди.

Абу Ҳурайра розияллоҳу анҳудан  ривоят қилинган ҳадиси қудсийда Аллоҳ таоло бундай деган:

“Одам боласининг ҳар бир амали унинг учундир. Фақат рўза мен учундир. Унга ўзим мукофот бераман!” (Имом Аҳмад, Имом Муслим ва Имом Насоий ривояти)

Расули акрам соллаллоҳу алайҳи васаллам биз умматларига таровеҳ намозини ўқишни ўргатдилар.

Аллоҳ таолонинг амри ва Пайғамбар соллаллоҳу алайҳи васалламнинг суннатини бажариб эришиладиган савобни бирор нарсага тенглаштириб бўлар эканми?

Рамазон – Қуръон ойи. Муқаддас Китобимиз ана шу ойда нозил бўлди. Бу ойда ўқилган ҳар бир ҳарф учун масжидда ҳозир бўлган инсонларнинг барча-барчаси мислсиз ажру савоблар олади.

“Рамазон ойи – одамлар учун ҳидоят (манбаи) ва тўғри йўл ҳамда ажрим этувчи ҳужжатлардан иборат Қуръон нозил қилинган ойдир. Бас, сизлардан ким бу ойда (ўз яшаш жойида) ҳозир бўлса, рўзасини тутсин” (Бақара сурасининг 185-ояти).

Рамазон – сабр-бардош ойи. Аллоҳ таоло шу ойда нафсимизни оч ва сувсиз қўйиб қалбимиздаги имонимизни синайди. Шунинг учун рўзадорман деган одамнинг қанчалик рўзадор эканини Унинг Ўзи билади.

Рамазон – барака ойи. Чунки Аллоҳ таолонинг Ўзи уни баракали қилиб қўйган.

Рамазон – саховат ойи. Чунки ҳар сафар рамазон кирганида Пайғамбар алайҳиссалом янада сахий бўлиб кетганлар. Ибн Аббос розияллоҳу анҳумодан ривоят қилинади: «Расулуллоҳ соллаллоҳу алайҳи васаллам одамларнинг энг сахийси эдилар. У зотнинг энг сахийликлари Рамазонда – Жаброил у зот билан учрашганда бўлар эди. Жаброил Рамазоннинг ҳар тунида у зот билан учрашиб, Қуръонни дарс қилишарди. Ҳақиқатда, Расулуллоҳ соллаллоҳу алайҳи васаллам яхшиликда эркин шамолдан ҳам сахий бўлиб кетар эдилар» (Имом Бухорий ривояти).

Рамазон – бирдамлик, ҳамжиҳатлик, дийдор ойи. Бир йил давомида бир-бирини кўрмаган кўнгли яқин, аммо яшаш жойи узоқ, қиладиган касби-кори бошқа-бошқа бўлган инсонлар таровеҳ намозларига келганда яна дийдорлашади. Бегона инсонлар ҳам таровеҳ намозига қатнаганда танишиб, дўстлашиб кетади. 

Таровеҳни ўқиётганда саррин ҳавода танимизни майингина шабада силаб турганини ҳис қиляпмиз. Ҳаво ҳам ниҳоятда мусаффо. Буни Раббимизнинг бошимиз узра ёғилган марҳаматидан  нишона бўлсин дея умидвор бўлайлик ва кўплаб эзгуликлар сўраб дуога қўл очайлик, азизлар.

Дамин ЖУМАҚУЛ,

ЎМИ Матбуот хизмати